Sārdhatriśatikālottarāgama · Chapter 23

śṛṇu ṣaṇmukha tattvena jñānāmṛtamanuttamam
yanna kasyacidākhyātaṃ nākhyeyaṃ kathayāmi tat //

dehasthaḥ sakalo jñeyo niṣkalo dehavarjitaḥ
āptopadeśagamyo 'sau sarvataḥ kimapi sthitaḥ //

haṃsa haṃseti yo brūyad dhaṃso devaḥ sadāśivaḥ
guruvaktrāttu labhyeta pratyakṣaṃ sarvatomukhaḥ //

tileṣu ca yathā tailaṃ puṣpe gandha iva sthitaḥ
puruṣastu śarīre 'smin sabāhyābhyantare sthitaḥ //

ulkāhasto yathā kaścid dravyamālokya tāṃ tyajet
jñānena jñeyamālokya tathā jñānaṃ parityajet //

puṣpaṃ tu sakalaṃ vidyād gandhastasya tu niṣkalaḥ
vṛkṣaṃ tu sakalaṃ vidyāc chāyā tasya tu niṣkalā //

sakale niṣkalo bhāvaḥ sarvatraiva vyavasthitaḥ
upāyaḥ sakalastadvad upeyaścaiva niṣkalaḥ //

sakale sakalo bhāvo niṣkale niṣkalastathā
trimātraśca dvimātraśca ekamātrastathaiva ca //

ardhamātrā parā sūkṣmā tasyā ūrdhvaṃ parātparam
brahmā viṣṇuśca rudraśca īśvaraḥ śiva eva vā //

pañcadhā pañcadaivatyaḥ sakalaḥ paripaṭhyate
brahmaṇo hṛdayaṃ sthānaṃ kaṇṭhe viṣṇuḥ samāśritaḥ //

tālumadhye sthito rudro lalāṭastho maheśvaraḥ
nāsāgre tu śivaṃ vidyāt tasyānte tu paraṃ padam //

parasmāttu paraṃ nāsti iti śāstrasya niścayaḥ
gamāgamaḥ kathaṃ tasya kena vā nīyate tu saḥ //

saṃśayo me mahādeva kathayasva yathārthataḥ
śaktyā tu nīyate jīvas tasminprāpya nivartate //

asyāntaṃ te pravakṣyāmi śṛṇu ṣaṇmukha tattvataḥ
dehātītaṃ tu tadvidyān nāsāgre dvādaśāṅgulam //

tadantaṃ tadvijānīyāt tatrastho vyāpayetprabhuḥ
mano 'pyanyatra nikṣiptaṃ cakṣuranyatra pātitam //

tathāpi yogināṃ yogo hyavicchinnaḥ pravartate
etattatparamaṃ guhyam etattatparamākṣaram //

nātaḥ parataraṃ kiñcin nātaḥ parataraṃ śivam
nātaḥ parataraṃ jñānam ityāha bhagavāñśivaḥ //

śivajñānāmṛtaṃ prāpya saṃkṣepānna tu vistarāt
kathito devadevena paramākṣaranirṇayaḥ //

etatte śivasadbhāvaṃ śivavaktrādviniḥsṛtam
guhyādguhyatamaṃ guhyaṃ gūhanīyaṃ prayatnataḥ //

nāśiṣyāya pradātavyaṃ nāputrāya kadācana
gurudevāgnibhaktāya nityaṃ muktiratāya ca //

pradātavyamidaṃ śāstraṃ netarebhyaḥ pradāpayet
dātāsya narakaṃ yāti siddhyecca na kadācana //

śivāmṛtaṃ mayā khyātaṃ satyaṃ satyamidaṃ tava
evaṃ jñātvā tu medhāvī vicarettu yathāsukham //

gṛhastho brahmacārī ca vānaprastho 'tha bhaikṣukaḥ
yatra yatra sthito jñānī paramākṣaravit sadā //

viṣayī viṣayāsakto yāti dehāntake śivam
jñānādevāsya śāstrasya sarvāvastho 'pi mānavaḥ //

brahmahatyāśvamedhādyaiḥ puṇyapāpairna lipyate
codako bodhakaścaiva mokṣadaśca paraḥ smṛtaḥ //

ityevaṃ trividho jñeya ācāryastu mahītale
codako darśayenmārgaṃ bodhakaḥ sthānamādiśet
mokṣadastu paraṃ tattvaṃ yajjñātvāmṛtamaśnute //