Sārdhatriśatikālottarāgama · Chapter 20
kathaṃ vyāpī adhaścordhvaṃ tiryak caiva kathaṃ bhavet
etanme brūhi tattvena kāruṇyāttvaṃ maheśvara //
yāvaddehe sthito jantor adhastāvadvyavasthitaḥ
nirgato vyāpayettiryag antasthaḥ sarvataḥ sthitaḥ //
trimārgāvasthito devaḥ sarvadeheṣu vartate
aviditvā na mucyeta yadyapyetallayo bhavet //
tattrimārgaṃ tryadhiṣṭhānaṃ sarvadeheṣu vartate
yo vettyevamimāṃ vyāptiṃ sarvavyāpī na saṃśayaḥ //
na tasya garbhasambhūtir yathā devaḥ prabhāṣate
tāvadbhramati saṃsāre yāvadvyāptiṃ na vindati //
viditvā vyāpinaṃ jīvaṃ mucyate nātra saṃśayaḥ
yathā tṛṇajalūkā nu tṛṇāgraṃ yāvadāgatā //
upariṣṭānnirālambā tadvajjīvo 'tra saṃsthitaḥ
ūrdhvaśūnyamadhaḥ śūnyaṃ śūnyaṃ dehāntarasthitam //
triśūnyaṃ yo vijānāti mucyate sa dhruvaṃ guha
vyāptiścāsya mayā proktā saṃkṣepānna tu vistarāt
ataḥ parataraṃ nāsti vyāpakaṃ vyāpakasya tu //
Original text: Sārdhatriśatikālottarāgama · Edition: N.R. Bhatt: Sardhatrisatikalottaragama, avec le commentaire de Bhatta Ramakantha. Pondicherry : Institut Francais d'Indologie 1979. (Publications de l'Institut Francais d'Indologie, 61) · Data entry Dominic Goodall · GRETIL (Göttingen) · CC BY-NC-SA 4.0