Sārdhatriśatikālottarāgama · Chapter 19

pūrvamevaṃ pratijñātaṃ śivabhedo 'ṣṭadhā sthitaḥ
kathaṃ bhidyeta deveśa tattvataḥ kathaya prabho //

sakalaṃ niṣkalaṃ śūnyaṃ kalāḍhyaṃ khamalaṅkṛtam
kṣapaṇaṃ ca tathāntasthaṃ kaṇṭhoṣṭhyaṃ cāṣṭamaṃ viduḥ //

prāsādaṃ ṣaṣṭhasaṃyuktaṃ ṣaḍantena samanvitam
sakalaṃ sarvabhūtasthaṃ śivatattvaṃ prakīrtitam //

niṣkrāmati svayaṃ devo dehaṃ tyaktvā samārutaḥ
niṣkalaṃ taṃ vijānīyāt ṣaḍvarṇarahitaṃ śivam //

niśvāsocchvasane hitvā sthito dehe tu kāṣṭhavat
śūnyaṃ taṃ tu vijānīyād dhṛdayena tu bhāvayet //

cumbākāreṇa vaktreṇa yattattvaṃ parikīrtitam
kalāḍhyaṃ taṃ vijānīyād ākāśasthamatha śṛṇu //

ūrdhvanādasya kṣīṇasya yadantaṃ parikīrtitam
tatrasthaṃ taṃ vijānīyād ākāśena tvalaṅkṛtam //

vyāvṛtenaiva vaktreṇa brūyadevaṃ jagadgurum
duḥkhakṣapaṇamityuktaṃ tatkṣayātkṣapaṇaṃ smṛtam //

adhonādasya kṣīṇasya yadantaṃ parikīrtitam
antasthaṃ taṃ vijānīyād anuccāryaṃ prakīrtitam //

saptavargāṣṭamaṃ koṭiḥ saptamasya dvitīyakam
vargātītaṃ ṣaḍantaṃ ca saptamāttricaturthakam //

ādimaṃ tu punaryojyaṃ ṣaṣṭhaṃ vai prathamasya tu
khaśekharasamāyuktaṃ kaṇṭhoṣṭhyaṃ cāṣṭamaṃ smṛtam //

ete bhedāḥ samākhyātā aṇimādiprasādhane
anuccāryamasandigdhaṃ mokṣa ityabhidhīyate //