સાર્ધત્રિશતિકાલોત્તરાગમ · અધ્યાય 2

અન્તઃકરણવિન્યાસો ભૂતશુદ્ધિસ્તથૈવ ચ
ભૂતશુદ્ધિં પુરા કૃત્વા તતો ઽન્તઃકરણં કુરુ ॥

હૃદ્બીજં પાર્થિવે યુક્તં પાર્થિવીં ધારયેત્ક્રમાત્
શિરો ઽપ્સુ તેજસિ શિખાં કવચં વાયુના સહ ॥

અસ્ત્રં ચ શિવસંયુક્તમ્ આકાશં ધારયેત્સદા
હુંફડન્તેન પટલં ભિત્ત્વા ચોર્ધ્વં વિશેષતઃ ॥

પઞ્ચોદ્ઘાતાશ્ચ ચત્વારસ્ ત્રયો દ્વાવેક એવ ચ
દ્વાદશાન્તે નિરાલમ્બં વિજ્ઞાનં કેવલં સ્થિતમ્ ॥

દીક્ષાયાં તુ યથા વત્સ તત્પ્રયોગં સમાચરેત્
પ્રક્રિયાન્તસ્થમમૃતં સ્રવન્તં ચિન્તયેત્તતઃ ॥

ઓમિત્યનેન કમલં યોગપીઠં તદા ભવેત્
સૂર્યમણ્ડલસંકાશમ્ અકારં હ્યાત્મસમ્ભવમ્ ॥

વિદ્યાતત્ત્વમુકારં તુ શિવતત્ત્વં મકારજમ્
પુર્યષ્ટકં ચ તન્માત્રં તુર્યાતીતં સદાશિવમ્ ॥

ચિન્તયેત્પરમં ધામ સુષુમ્નાભિન્નમસ્તકમ્
તેનાપ્લાવિતમાત્માનં પરિપૂર્ણં વિચિન્તયેત્ ॥

યો ઽભસેદીદૃશં મર્ત્યઃ સમાધિં મૃત્યુનાશનમ્
ન તસ્ય જાયતે મૃત્યુર્ ઇતિ શાસ્ત્રસ્ય નિશ્ચયઃ ॥

પશ્ચાદ્ગુરોઃ સાધકાનાં મૂર્તેસ્તુ ગ્રહણં ભવેત્
ઈશાનાદ્યાસ્તુ સદ્યાન્તં મૂર્ધ્ન આરભ્ય વિન્યસેત્ ॥

નેત્રં દત્ત્વા તદાવાહ્યો દેવદેવઃ સદાશિવઃ
સર્વજ્ઞં ચ તદાત્માનં ચિન્તયેત્તુ વિચક્ષણઃ ॥

હૃદયં ચ શિરશ્ચૈવ શિખાં કવચમેવ ચ
ન્યસેદસ્ત્રં ચ મન્ત્રજ્ઞો યથાસ્થાનેષ્વનુક્રમાત્ ॥

હૃદયે ઽર્ચાવિધાનં તુ નાભૌ હોમં પ્રકલ્પયેત્
લલાટે ત્વીશ્વરં ધ્યાયેદ્ વરદં સર્વતોમુખમ્ ॥

યથાર્ચને તથાગ્નૌ ચ ધ્યાને સ્નાને તથૈવ ચ
યથા દેવે તથા દેહે ચિન્તયેત્તુ વિચક્ષણઃ ॥

કૃત્વાન્તઃકરણં હ્યેવં પશ્ચાદ્બાહ્યં તુ ષણ્મુખ
સબાહ્યન્તરં કૃત્વા પશ્ચાદ્યજનમારભેત્ ॥