Sārdhatriśatikālottarāgama · Chapter 1

bhagavandevadeveśa lokanātha jagatpate
mantratantraṃ tvayā proktaṃ vistarādvastusādhanam //

alpāyuṣastvime martyā alpavīryālpabuddhayaḥ
alpasattvālpavittāśca lobhamohāsamanvitāḥ //

alpagranthaṃ mahārthaṃ ca padārthānīkasaṃkulam
vaktumarhasi devaiṣāṃ prasādārthaṃ mama prabho //

athātaḥ sampravakṣyāmi śāstraṃ paramadurlabham
nāmnā tu vātulāttantrād dadhno ghṛtamivoddhṛtam //

nādākhyaṃ yatparaṃ bījaṃ sarvabhūteṣvavasthitam
muktidaṃ paramaṃ kiṃ ca divyasiddhipradāyakam //

tadviditvā mahāsena deśikaḥ pāśahā bhavet
āgopālāṅganā bālā mlecchāḥ prākṛtabhāṣiṇaḥ //

antarjalagatāḥ sattvāste api nityaṃ bruvanti tam
sthūlaṃ sūkṣmaṃ paraṃ jñātvā karma kuryādyathepsitam //

sthūlaṃ śabda iti proktaṃ sūkṣmaṃ cintāmayaṃ bhavet
cintayā rahitaṃ yattu tatparaṃ parikīrtitam //

sāntaṃ sarvagataṃ śūnyaṃ mātrādvādaśake sthitam
brahmāṇi hrasvāḥ proktāni dīrghā hyaṅgāni ṣaṇmukha //

anusvāro bhavennetraṃ sarveṣāṃ copari sthitaḥ
savisargaṃ bhavedastram anusvāravivarjitam //

ṣaṣṭhaṃ trayodaśāntaṃ ca pañcame viniyojayet
śivaṃ tattu vijānīyān mantramūrtiṃ sadāśivam //

ṣaṣṭhamasya dvitīyaṃ tu caturthādyena saṃyutam
dvitīyātpañcamāccaiva ādimaṃ yojayetpunaḥ //

hanti vighnāñśivāstreṇa śikhayā muktidaṃ smṛtam
etatpāśupataṃ divyaṃ sarvapāśanikṛntanam //

brahmāṇi ca śivaṃ sāṅgaṃ netraṃ pāśupataṃ ca yat
samāsātkathitaḥ sarvo mantroddhārastvayaṃ śubhaḥ //

asya mudrāṃ pravakṣyāmi sādhakānāṃ hitāya vai
hastābhyāṃ saṃspṛśetpādād ūrdhvaṃ yāvattu mastakam //

eṣā mudrā mahāmudrā sarvakāmārthasādhikā
karanyāsaṃ purā kṛtvā mudrābandhaṃ tu kārayet //

talikāṃ hastapṛṣṭhaṃ ca astrabījena śodhayet
kaniṣṭhāmāditaḥ kṛtvā aṅguṣṭhaṃ cāpyapaścimam //

brahmāṇi vinyasettatra tathaivāṅgāni yatnataḥ
prāsādaṃ vinyasetpaścād vyāpinaṃ sarvatomukham //