સાર્ધત્રિશતિકાલોત્તરાગમ · અધ્યાય 19

પૂર્વમેવં પ્રતિજ્ઞાતં શિવભેદો ઽષ્ટધા સ્થિતઃ
કથં ભિદ્યેત દેવેશ તત્ત્વતઃ કથય પ્રભો ॥

સકલં નિષ્કલં શૂન્યં કલાઢ્યં ખમલઙ્કૃતમ્
ક્ષપણં ચ તથાન્તસ્થં કણ્ઠોષ્ઠ્યં ચાષ્ટમં વિદુઃ ॥

પ્રાસાદં ષષ્ઠસંયુક્તં ષડન્તેન સમન્વિતમ્
સકલં સર્વભૂતસ્થં શિવતત્ત્વં પ્રકીર્તિતમ્ ॥

નિષ્ક્રામતિ સ્વયં દેવો દેહં ત્યક્ત્વા સમારુતઃ
નિષ્કલં તં વિજાનીયાત્ ષડ્વર્ણરહિતં શિવમ્ ॥

નિશ્વાસોચ્છ્વસને હિત્વા સ્થિતો દેહે તુ કાષ્ઠવત્
શૂન્યં તં તુ વિજાનીયાદ્ ધૃદયેન તુ ભાવયેત્ ॥

ચુમ્બાકારેણ વક્ત્રેણ યત્તત્ત્વં પરિકીર્તિતમ્
કલાઢ્યં તં વિજાનીયાદ્ આકાશસ્થમથ શૃણુ ॥

ઊર્ધ્વનાદસ્ય ક્ષીણસ્ય યદન્તં પરિકીર્તિતમ્
તત્રસ્થં તં વિજાનીયાદ્ આકાશેન ત્વલઙ્કૃતમ્ ॥

વ્યાવૃતેનૈવ વક્ત્રેણ બ્રૂયદેવં જગદ્ગુરુમ્
દુઃખક્ષપણમિત્યુક્તં તત્ક્ષયાત્ક્ષપણં સ્મૃતમ્ ॥

અધોનાદસ્ય ક્ષીણસ્ય યદન્તં પરિકીર્તિતમ્
અન્તસ્થં તં વિજાનીયાદ્ અનુચ્ચાર્યં પ્રકીર્તિતમ્ ॥

સપ્તવર્ગાષ્ટમં કોટિઃ સપ્તમસ્ય દ્વિતીયકમ્
વર્ગાતીતં ષડન્તં ચ સપ્તમાત્ત્રિચતુર્થકમ્ ॥

આદિમં તુ પુનર્યોજ્યં ષષ્ઠં વૈ પ્રથમસ્ય તુ
ખશેખરસમાયુક્તં કણ્ઠોષ્ઠ્યં ચાષ્ટમં સ્મૃતમ્ ॥

એતે ભેદાઃ સમાખ્યાતા અણિમાદિપ્રસાધને
અનુચ્ચાર્યમસન્દિગ્ધં મોક્ષ ઇત્યભિધીયતે ॥