Sārdhatriśatikālottarāgama · Chapter 12
candrāgniriva saṃyuktā ādyā kuṇḍalinī tu yā
hṛtpradeśe tu sā jñeyā aṅkurākāravatsthitā //
sṛṣṭinyāsaṃ nyasettatra dvirabhyāsapaderitam
sravantaṃ cintayettasminn amṛtaṃ sādhakottamaḥ //
agnīṣomātmakaṃ sarvaṃ jagatsthāvarajaṅgamam
cintayedviparītaṃ tu siddhikāmaḥ samāhitaḥ //
svadehaṃ cintayedvidvān divyarūpamanaupamam
yasya yatkarma coddiṣṭaṃ tatkarma paricintayet //
idaṃ ca yo 'bhyasedevam amṛtaṃ sarvatomukham
acireṇaiva kālena sa siddhiphalabhāgbhavet //
sṛṣṭinyāsamavijñāya kathaṃ yuñjīta sādhakaḥ
hanyānmuṣṭibhirākāśaṃ tuṣānkuṭṭayatīva saḥ //
Original text: Sārdhatriśatikālottarāgama · Edition: N.R. Bhatt: Sardhatrisatikalottaragama, avec le commentaire de Bhatta Ramakantha. Pondicherry : Institut Francais d'Indologie 1979. (Publications de l'Institut Francais d'Indologie, 61) · Data entry Dominic Goodall · GRETIL (Göttingen) · CC BY-NC-SA 4.0