सार्धत्रिशतिकालोत्तरागम · अध्याय 12

चन्द्राग्निरिव संयुक्ता आद्या कुण्डलिनी तु या
हृत्प्रदेशे तु सा ज्ञेया अङ्कुराकारवत्स्थिता ॥

सृष्टिन्यासं न्यसेत्तत्र द्विरभ्यासपदेरितम्
स्रवन्तं चिन्तयेत्तस्मिन्न् अमृतं साधकोत्तमः ॥

अग्नीषोमात्मकं सर्वं जगत्स्थावरजङ्गमम्
चिन्तयेद्विपरीतं तु सिद्धिकामः समाहितः ॥

स्वदेहं चिन्तयेद्विद्वान् दिव्यरूपमनौपमम्
यस्य यत्कर्म चोद्दिष्टं तत्कर्म परिचिन्तयेत् ॥

इदं च यो ऽभ्यसेदेवम् अमृतं सर्वतोमुखम्
अचिरेणैव कालेन स सिद्धिफलभाग्भवेत् ॥

सृष्टिन्यासमविज्ञाय कथं युञ्जीत साधकः
हन्यान्मुष्टिभिराकाशं तुषान्कुट्टयतीव सः ॥