Sārdhatriśatikālottarāgama · Chapter 13

athātaḥ sampravakṣyāmi sṛṣṭiṃ mantralipeḥ kramāt
yathā tu sakalo devo niṣkalena samanvitaḥ //

kalāmutpādayāmāsa sarvamantrapravartikām
oṃkāramūrdhni madhyastha oṃkāravyāpakastathā //

oṃkāraprathamāṃ rekhāṃ sṛjati prabhuḥ(?)
vidyā nāma kalā sā tu varṇe varṇe vyavasthitā //

oṃkārasya ukārābhā rekhā yā sampradṛśyate
pratiṣṭhā nāma sā jñeyā ukārākṣarasambhavā //

mūrdhni tasya bhavedyāsau sūkṣmarekhā nirañjanā
makāro hyabhavattatra nivṛttirnāma sā kalā //

oṃkāramūrdhni saṃyuktā laya oṃkāramūrdhani
rekheyaṃ vyomni nirvāṇā sā kalā śāntirucyate //

saṃyogātsamprakāśeta niṣkale sakale sthitā
mūrdhanyākrāna oṃkāre śabdastatra tu jāyate //

sā śaktiḥ paramā sūkṣmā bindunā sahitā matā
dīpādiva mahattejo visphuliṅgaśikhānvitam //

nipatantī tridhā yāti śivavidyātmakairyathā
śāntirvidyā pratiṣṭhā ca nivṛttiśceti tāḥ kalāḥ //

yā kalā rekhinī tatra patitā bindunā saha
savidyeśaḥ śivaḥ prokto devadevaḥ sadāśivaḥ //

prathamaṃ tasya tadbījaṃ nādabinduritīritam
na jahāti paraṃ sthānaṃ śāśvataṃ dhruvamavyayam //

binduṃ tadudare kṣiptvā mātṛvatparirakṣati
tasyordhvaṃ vāmapārśve 'tha viṣṇubījaṃ pratiṣṭhitam //

dakṣiṇaṃ brahmayonistham ekameva tridhā sthitam
pārśvabindudvayopetā sā rekhā madhyataḥ sthitā //

tatra devaḥ śivaḥ sūkṣmo gūḍhastiṣṭhati śaṃkaraḥ
tadbījaṃ paramaṃ devaṃ śaktigarbho maheśvaraḥ //

yataḥ pravartate sarvaṃ mantratantraṃ carācaram
avyaktaṃ paramaṃ sūkṣmaṃ śaktidehaṃ nirañjanam //

śivaṃ tvanādinidhanaṃ yaṃ buddhvā nābhijāyate
dakṣiṇasthaṃ hi yadbījaṃ jñānaśaktiḥ parā hi sā //

tadbījamaparaṃ brahmā yatra gūḍhaḥ sa tiṣṭhati
vāmago 'tha paro binduḥ kriyāśaktiḥ parā hi sā //

tatra viṣṇuḥ svayaṃ bīje gūḍhaḥ sūkṣmo nirañjanaḥ
eṣa devo 'pi sargastho visṛṣṭo yaḥ sa śambhunā //

nigūḍhatvānna paśyanti yena sṛṣṭaṃ carācaram
visargājjāyate sṛṣṭir īśvaraḥ prabhureva saḥ //

visṛṣṭaṃ yena tadbījaṃ visargastena cocyate
tena cāpūritamidaṃ jagatsarvaṃ ca tanmayam //

śaktiraśmisamūhena śataśo 'tha sahasraśaḥ
sṛjati grasati hyeṣa saṃyojakaviyojakaḥ //

jñānaśaktyā ca bhagavān anugṛhṇāti vai śivaḥ
visargācca bhavetsṛṣṭiḥ saṃhāro bindunā saha
nirvāṇaṃ tattvavijñānaṃ tantravistāragocaraḥ //