Sangita Ratnakara · Chapter p3

saṅgītaratnākaraḥ
atha prakīrṇakākhyastṛtīyo'dhyāyaḥ
atha prakīrṇakaṃ karṇarasāyanamanākulam
deśīmārgāśrayaṃ vakti śārṅgadevo vidāṃ varaḥ

vāṅmāturucyate geyaṃ dhāturityabhidhīyate
vācaṃ geyaṃ ca kurute yaḥ sa vāggeyakārakaḥ

śabdānuśāsanajñānamabhidhānapravīṇatā
chandaḥprabhedaveditvamalaṃkāreṣu kauśalam

rasabhāvaparijñānaṃ deśasthitiṣu cāturī
aśeṣabhāṣāvijñānaṃ kalāśāstreṣu kauśalam

tūryatritayacāturyaṃ hṛdyaśārīraśālitā
layatālakalājñānaṃ viveko'nekakākuṣu

prabhūtapratibhodbedabhāktvaṃ subhagageyatā
deśīrāgeṣvabhijñatvaṃ vākpaṭutvaṃ sabhājaye

rāgadveṣaparityāgaḥ sārdratvamucitajñatā
anucchiṣṭoktinirbandho nūtnadhātuvinirmitiḥ

paracittaparijñānaṃ prabandheṣu pragalbhatā
drutagītavinirmāṇaṃ padāntaravidagdhatā

tristhānagamakaprauḍhirvividhālaptinaipuṇaṃ
avadhānaṃ guṇairebhirvaro vāggeyakārakaḥ

vidadhāno'dhikaṃ dhātuṃ mātumandastu madhyamaḥ
dhātumātuvidaprauḍhaḥ prabandheṣvapi madhyamaḥ

ramyamātuvinirmātā'pyadhamo mandadhātukṛt
varo vastukavirvarṇakavirmadhyama ucyate
kuṭṭikāro'nyadhātau tu mātukāraḥ prakīrtitaḥ

iti vāggeyakāralakṣaṇam
mārgaṃ deśīṃ ca yo vetti sa gāndharvo'bhidhīyate
iti gāndharvaḥ
yo vetti kevalaṃ mārgaṃ svarādiḥ sa nigadyate

iti svarādiḥ /
hṛdyaśabdaḥ suśārīro grahamokṣavicakṣaṇaḥ
rāgarāgāṅgabhāṣāṅgakriyāṅgopāṅgakovidaḥ

prabandhagānaniṣṇāto vividhālaptitattvavit
sarvasthānoccagamakeṣvanāyāsalasadgatiḥ

āyattakaṇṭhastālajñaḥ sāvadhāno jitaśramaḥ
śuddhacchāyālagābhijñaḥ sarvakākuviśeṣavit

apārasthāyasaṃcāraḥ sarvadoṣavivarjitaḥ
kriyāparo jakvalayaḥ sughaṭo dhāraṇānvitaḥ

sphūrjannirjavano hārirahaḥkṛdbhajanodghuraḥ
susaṃpradāyo gītajñairgīyate gāyanāgraṇīḥ

guṇaiḥ katipayairhīno nirdoṣo madhyamo mataḥ
mahāmāheśvareṇoktaḥ sadoṣo gāyano'dhamaḥ

śikṣākāro'nukāraśca rasiko rañjakastathā
bhāvukaśceti gītajñaḥ pañcadhā gāyanaṃ jaguḥ

anyūnaśikṣaṇe dakṣaḥ śikṣākāro mataḥ satām
anukāra iti proktaḥ parabhaṅgyanukārakaḥ

rasāviṣṭastu rasiko rañjakaḥ śrotṛrañjakaḥ
gītasyātiśayādhānādbhāvukaḥ parikīrtitaḥ

ekallo yamalo vṛndagāyanaśceti te tridhā
eka eva tu yo gāyedasāvekallagāyanaḥ

sadvitīyo yamalakaḥ savṛndo vṛndagāyanaḥ
rūpayauvanaśālinyo gāyinyo gātṛvanmatāḥ
mādhuryadhuryadhvanayaścaturāścaturapriyāḥ

saṃdaṣṭodghṛṣṭasūtkāribhītaśaṅkitakampitāḥ
karālī vikalaḥ kākī vitālakarabhodvaḍāḥ

jhombakastumbakī vakrī prasārī vinimīlakaḥ
virasāpasvarāvyaktasthānabhraṣṭāvyavasthitāḥ

miśrako'navadhānaśca tathā'nyaḥ sānunāsikaḥ
pañcaviṃśatirityete gāyanā ninditā matāḥ

saṃdaśya daśanāngāyansaṃdaṣṭaḥ parikīrtitaḥ
udghṛṣṭo virasodghoṣaḥ sūtkārī sūtkṛtairmuhuḥ

bhīto bhayānvito gātā tvarayā śaṅkito mataḥ
kampitaḥ kampanājjñeyaḥ svabhāvādgātraśabdayoḥ

karālī gaditaḥ sadbhiḥ karālodghāṭitānanaḥ
vikalaḥ sa tu yo gāyetsvarānnyūnādhikaśrutīn

kākakrūraravaḥ kākī vitālastālavicyutaḥ
dadhānaḥ kandharāmūrdhvāṃ karabho'bhihito budhaiḥ

chāgavadvadanaṃ kurvannudvaḍo'dhamagāyanaḥ
śirālabhālavadanagrīvo gātā tu jhombakaḥ

tumbakī tumbakākārotphullagallastu gāyanaḥ
vakrī vakrīkṛtagalo gāyandhīrairudīritaḥ

prasārī gīyate tajjñairgātragītaprasāraṇāt
nimīlako mato gāyannimīlitavilocanaḥ

viraso nīraso varjyasvaragānādapasvaraḥ
gadgadadhvaniravyaktavarṇastvavyakta ucyate

sthānabhraṣṭaḥ sa yaḥ prāptumaśaktaḥ sthānakatrayam
avyavasthita ityuktaḥ sthānakairavyavasthitaiḥ

śuddhacchāyālagau rāgau miśrayanmiśrakaḥ smṛtaḥ
itareṣāṃ ca rāgāṇāṃ miśrako bhūrimiśraṇāt

sthāyyādiṣvavadhānena nirmukto'navadhānakaḥ
geyaṃ nāsikayā gāyangīyate sānunāsikaḥ

iti gāyanadoṣāḥ /
caturbhedo bhavecchabdaḥ khāhulo nāraṭābhidhaḥ
bombako miśrakaśceti tallakṣaṇamathocyate

kaphajaḥ khāhulaḥ snigdhamadhuraḥ saukumāryayuk
āḍilla eṣa eva syātprauḍhaścenmandramadhyayoḥ

tristhānaghanagambhīralīnaḥ pittodbhavo dhvaniḥ
nārāṭo bombakastu syādantarniḥsāratāyutaḥ

paruṣoccaistaraḥ sthūlo vātajaḥ śārṅgiṇoditaḥ
etatsaṃmiśraṇādukto miśrakaḥ sāṃnipātikaḥ

tanurūkṣaguṇo bombaḥ khāhulaḥ snigdhatāyutaḥ
kathaṃ tayormiśraṇaṃ syādviruddhaguṇayoginoḥ

atrocyate parityāgātpāruṣyasya virodhinaḥ
aviruddhasya mādhuryasthaulyādermiśraṇaṃ matam

etena ghananiḥsāraguṇanārāṭabombayoḥ
viruddhaguṇatākṣepasamādhāne nivedite

miśrasya bhedāścatvāro yuktau nārāṭakhāhulau
nārāṭabombakau bombakhāhulau miśritāstrayaḥ

niḥsāratārūkṣatābhyāṃ hīnastritayamiśraṇāt
uttamottama ityuktaḥ surāṇāmiva śaṃkaraḥ

nārāṭakhāhulonmiśra uttamaḥ khāhulaḥ punaḥ
bombayukto madhyamaḥ syādbombo nārāṭasaṃyutaḥ

śabdānāmadhamaḥ proktaḥ śrīmatsoḍhalasūnunā
niḥsāratārūkṣatābhyāṃ yuktaḥ sarvo'dhamo mataḥ

bhavanti bahavo bhedā nānātadguṇamiśraṇāt
kaścitsyānmadhurasnigdhaghano'nyaḥ snigdhakomalaḥ

ghano'parastu madhuramṛdutristhānako'nyakaḥ
mṛdutristhānagambhīro'paraḥ snigdho mṛdurghanaḥ

tristhāno'nyastu madhuramṛdustristhānako ghanaḥ
anyastu madhurasnigdhamṛdutristhānako'paraḥ

madhurasnigdhagambhīraghanatristhānako'paraḥ
snigdhakomalagambhīraghantristhānalīnakaḥ

aparaḥ snigdhamadhurakomalaḥ sāndralīnakaḥ
tristhānaśobhī gambhīra iti bhedā daśoditāḥ

khāhulonmiśranārāṭe tataḥ khāhulabombayoḥ
snigdhakomalaniḥsāra eko'nyo madhuro mṛduḥ

rūkṣo'nyastu mṛdusnigdhaniḥsāroccataraḥ paraḥ
komalasnigdhaniḥsāraḥ sthūlo'nyaḥ snigdhakomalaḥ

rūkṣaniḥsārapīnaśca bhedāḥ ṣaḍiti kīrtitāḥ
nārāṭe bombabhedāḥ syurghanatristhānarūkṣakaḥ

eko'nyo ghanagambhīrarūkṣo'nyo līnapīvaraḥ
niḥsārarūkṣo'nyo līnaghanoccatarapīvaraḥ

tristhānaghanagambhīralīnarūkṣo'paraḥ paraḥ
tristhānalīnaniḥsārarūkṣasthūlaḥ ṣaḍityamī

ete dvaṃdvajabhedāḥ syurathaite sāṃnipātikāḥ
snigdhatristhānaniḥsāro'nyo mṛdurmadhuro ghanaḥ

gambhīroccataro rūkṣaḥ parastu snigdhakomalaḥ
ghanalīnaḥ pīvaroccataro'nyaḥ snigdhakomalaḥ

tristhānalīnaniḥsārapīvaroccataro'paraḥ
kīrtito madhuro līnatristhāno rūkṣapīvaraḥ

niḥsāroccaistaro'nyastu madhurasnigdhakomalaḥ
tristhānaghanagambhīralīna uccaistaraḥ paraḥ

madhuro mṛdugambhīralīnatristhānarūkṣakaḥ
niḥsāroccaistaro'nyastu komalo madhuro ghanaḥ

līnatristhānarūkṣoccatarapīvaratāyutaḥ
aṣṭāviti trimiśrasya bhedāḥ sarve tu miśrajāḥ

militā mugdhabodhāya triṃśanniḥśaṅkakīrtitāḥ
anyeṣāṃ sūkṣmabhedānāṃ nānto'sti guṇasaṃkarāt
te granthavistaratrāsādasmābhirna samīritāḥ

iti śabdabhedalakṣaṇam
mṛṣṭo madhuracehālatristhānakasukhāvahāḥ
pracuraḥ komalo gāḍhaḥ śrāvakaḥ karuṇo ghanaḥ

snigdhaḥ ślakṣṇo raktiyuktaśchavimāniti sūribhiḥ
guṇairebhiḥ pañcadaśabhedaḥ śabdo nigadyate

śrotranirvāpako mṛṣṭatriṣu sthāneṣvavisvaraḥ
madhuraḥ kīrtitastāraḥ prauḍho madhurarañjakaḥ

nātisthūlo nātikṛśaḥ snigdhaścehālako ghanaḥ
ākaṇṭhakuṇṭhanaṃ sa syātpuṃsāṃ strīṇāṃ tu sarvadā

triṣu sthāneṣvekarūpaśchaviraktyādibhirguṇaiḥ
tristhāno manaso yastu sukhadaḥ sa sukhāvahaḥ

śrīśaṃkarapriyeṇoktaḥ pracurasthūlatāyutaḥ
komalo'nvarthanāmaiva kokilādhvanivanmataḥ

gāḍhastu prabalo dūraśravaṇācchrāvako mataḥ
karuṇaḥ śrotṛcittasya karuṇārasadīpakaḥ

dūraśravaṇayogyastu ghano'ntaḥsāratāyutaḥ
arūkṣo dūrasaṃśrāvyo budhaiḥ snigdho dhvaniḥ smṛtaḥ

ślakṣṇastu tailadhārāvadacchidro dhīrasaṃmataḥ
anuraktestu janako raktimānabhidhīyate

dhāturvimalakaṇṭhatvādyaḥ prājñairupalakṣyate
ujjvalo'yamiti proktaśchavimāniti sa dhvaniḥ

iti śabdaguṇāḥ
rūkṣasphuṭitaniḥsārakākolīkeṭikeṇayaḥ
kṛśo bhagna iti proktā duṣṭasyāṣṭau bhidā dhvaneḥ

rūkṣaḥ snigdhatvanirmuktaḥ splhuṭito'nvarthanāmakaḥ
eraṇḍakāṇḍaniḥsāro niḥsāra iti kīrtitaḥ

kākolikākhyaḥ kākolakulanirghoṣaniṣṭhuraḥ
sthānatrayaprāptimukto nirguṇaḥ keṭirucyate

kṛcchronmīlanmandratāraḥ keṇirityabhidhīyate
atisūkṣmaḥ kṛśo bhagnaḥ kharoṣṭradhvaninīrasaḥ

iti śabdadoṣāḥ
rāgābhivyaktiśaktatvamanabhyāse'pi yaddhvaneḥ
tacchārīramiti proktaṃ śarīreṇa sahodbhavāt

tārānudhvanimādhuryaraktigāmbhīryamārdavaiḥ
ghanatāsnigdhatākāntiprācuryādiguṇairyutam

tatsuśārīramityuktaṃ lakṣyalakṣaṇakovidaiḥ
anudhvānavihīnatvaṃ rūkṣatvaṃ tyaktaraktitā

niḥsāratā visvaratā kākitvaṃ sthānavicyutiḥ
kārśyaṃ kārkaśyamityādyaiḥ kuśārīraṃ kudūṣaṇaiḥ

vidyādānena tapasā bhaktyā vā pārvatīpateḥ
prabhūtabhāgyavibhavaiḥ suśārīramavāpyate

iti śārīralakṣaṇam
svarasya kampo gamakaḥ śrotṛcittasukhāvahaḥ
tasya bhedāstu tiripaḥ sphuritaḥ kampitastathā

līna āndolitavalitribhinnakurulāhatāḥ
ullāsitaḥ plāvitaśca gumphito mudritastathā
nāmito miśritaḥ pañcadaśeti parikīrtitāḥ

laghiṣṭhaḍamarudhvānakampānukṛtisundaraḥ
drutaturyāṃśavegena tiripaḥ parikīrtitaḥ

vege drutatṛtīyāṃśasaṃmite sphurito mataḥ
drutārdhamānavegena kampitaṃ gamakaṃ viduḥ

līnastu drutavegenā''ndolito laghuvegataḥ
valirvividhavakratvayuktavegavaśādbhavet

tribhinnastu triṣu sthāneṣvaviśrāntaghanasvaraḥ
kurulo valireva syādgranthilaḥ kaṇṭhyakomalaḥ

svaramagragamāhatya nivṛttastvāhato mataḥ
ullāsitaḥ sa tu prokto yaḥ svarānuttarottarān

kramādgacchetplāvitastu plutamānena kampanam
hṛdayaṃgamahuṃkāragambhīro gumphito bhavet

mukhamudraṇasaṃbhūto mudrito gamako mataḥ
svarāṇāṃ namanādukto nāmito dhvanivedibhiḥ

eteṣāṃ miśraṇānmiśrastasya syurbhūrayo bhidāḥ
tāsāṃ tu sthāyavāgeṣu vivṛtiḥ saṃvidhāsyate

iti gamakalakṣaṇam
rāgasyāvayavaḥ sthāyo vāgo gamaka ucyate
tatroktaṃ lakṣma vāgānāṃ sthāyānāṃ tūcyate'dhunā

vāgānāmapi keṣāṃcitprasaṅgādvacmi lakṣaṇam

te ca śabdasya ḍhalasya lavanyā vahanerapi
vādyaśabdasya yantrasya cchāyāyāḥ svaralaṅghitaḥ
preritastīkṣṇa ityuktā vyaktāsaṃkīrṇalakṣaṇāḥ

ityasaṃkīrṇalakṣaṇāḥ prasiddhā daśa sthāyāḥ
bhajanasya sthāpanāyā gaternādadhvanicchaveḥ
rakterdhṛtasya śabdasya bhṛtasyāṃśāvadhānayoḥ

apasthānasya nikuteḥ karuṇāvividhatvayoḥ
gātropaśamayoḥ kāṇḍāraṇānirjavanānvitau

gāḍho lalitagāḍhaśca lalito lulitaḥ samaḥ
komalaḥ hprasṛtaḥ snigdhacokṣocitasudeśikāḥ

apekṣitaśca ghoṣaśca svarasyaite prasiddhitaḥ
sthāyānāṃ guṇabhedena vyapadeśā nirūpitāḥ

iti trayastriṃśadgaṇakṛtabhedāḥ prasiddhāḥ sthāyāḥ
vahākṣarāḍambarayorullāsitataraṅgitau
pralambito'vaskhalitastrāṭitaḥ saṃpraviṣṭakaḥ

utpraviṣṭo niḥsaraṇo bhrāmito dīrghakampitaḥ
pratigrāhyollāsitaśca syādalambavilambikaḥ

syāttroṭitapratīṣṭo'pi prasṛtākuñcitaḥ sthiraḥ
sthāyukaḥ kṣiptasūkṣmāntāvityasaṃkīrṇalakṣaṇāḥ

itīṣatprasiddhā viṃśatirasaṃkīrṇalakṣaṇāḥ
prakṛtisthasya śabdasya kalākramaṇayorapi
ghaṭanāyāḥ sukhasyāpi cāle jīvasvarasya ca
vedadhvanerghanatvasya śithilo'vaghaṭaḥ plutaḥ

rāgeṣṭopasvarābhāso baddhaḥ kalaravasya ca
chāndasaḥ sukarābhāsaḥ saṃhito laghurantaraḥ

vakro dīptaprasannaśca syātprasannamṛdurguruḥ
hrasvaḥ śithilagāḍhaśca dīrgho'sādhāraṇastataḥ
sādhāraṇo nirādhāro duṣkarābhāsanāmakaḥ

miśraścaite'pi saṃkīrṇā guṇairbhinnāśca pūrvavat

itīṣatprasiddhāstrayastriṃśadguṇabhinnāḥ
iti ṣaṇṇavatiḥ sthāyāḥ śārṅgadevena kīrtitāḥ

muktaśabdapratigrāhyāḥ sthāyāḥ śabdasya kīrtitāḥ
ḍhālo muktāphalasyeva calanaṃ luṇṭhanātmakam

sa eṣu te syurḍhālasya namanaṃ tvatikomalam
lavanī tadyujaśchā yā lavanyāḥ parikīrtitāḥ

yattu kampanamārohiṇyavarohiṇi vā bhavet
vadanī sā'tha saṃcāriṇyapi vā sthirakampanam

sā gītālaptisaṃbandhabhedena dvividhā matā
punardvidhā sthirā vegāḍhyā punastrividhoditā

hṛdyā kaṇṭhyā śirasyā ca dehasthā hṛdayodbhavā
vahanī syātpunardvedhā khuttotphulleti bhedataḥ

yasmāmantarviśantīva svarāḥ khutteti sā matā
sotphulletyuditā yasyāṃ niryāntīvopari svarāḥ

valiryā gamakeṣūktā sā'pyevaṃvidhabhedabhāk
vahanī yeṣu te sthāyā vahanyāḥ paribhāṣitāḥ

rāgamagnā vādyaśabdā yeṣu te vādyaśabdajāḥ
ye yantreṣveva dṛśyante bāhulyātte tu yantrajāḥ

chāyā kākuḥ ṣaḍjakārā svararāgānyarāgajā
syāddeśakṣetrayantrāṇāṃ tallakṣaṇamathocyate

śrutinyūnādhikatvena yā svarāntarasaṃśrayā
svarāntarasya rāge syātsvarakākurasau matā

yā rāgasya nijacchāyā rāgakākuṃ tu tāṃ viduḥ
sā tvanyarāgakākuryā rāge rāgāntarāśrayā

sā deśakākuryā rāge bhaveddeśasvabhāvataḥ
śarīraṃ kṣetramityuktaṃ pratikṣetraṃ nisargataḥ

rāge nānāvidhā kākuḥ kṣetrakākuriti smṛtā
vīṇāvaṃśādiyantrotthā yantrakākuḥ satāṃ matā

anyacchāyāpravṛttau ye chāyāntaramupāśritāḥ
chāyāyāste matāḥ sthāyā gītavidyāviśāradaiḥ

madhye madhye svarānbhūrīllam̐ṅghayansvaralaṅghitaḥ
tiryagūrdhvamadhaḥsthācca preritaḥ preritasvaraiḥ
svarapūrṇaśrutistāre tīkṣṇavattīkṣṇa ucyate

ityasaṃkīrṇāḥ sthāyā daśa
rāgasyātiśayādhānaṃ prayatnādbhajanaṃ matam
tadyuktā bhajanasya syuḥ sthāpanāyāstu te matāḥ

sthāpayitvā sthāpayitvā yeṣāṃ pratipadaṃ kṛtiḥ
savilāsā'sti gīttasya mattamātaṅgavadgatiḥ

tadyuktāstu gateḥ sthāyāḥ snigdho mādhuryamāṃsalaḥ
bahulo yeṣu nādaḥ syātte nādasya prakīrtitāḥ

atidīrghaprayogāstu sthāyā ye te dhvanermatāḥ
yuktāḥ komalayā kāntyā chaveḥ sthāyā nirūpitāḥ

rakterutkarṣato rakteruktāḥ sthāyā manīṣibhiḥ
dhṛtasyānvarthanāmāno bhṛtasya bharaṇāddhvaneḥ

rāgāntarasyāvayavo rāgeṃ'śaḥ sa ca saptadhā
kāraṇāṃśaśca kāryāṃśaḥ sajātīyasya cāṃśakaḥ

sadṛśāṃśo visadṛśo madhyamasyāṃśako'paraḥ
aṃśāṃśaśceti yo rāge kāryeṃ'śaḥ kāraṇodbhavaḥ

kāraṇāṃśastvasau rāmakṛtau kolāhalāṃśavat
kāraṇe kāryarāgāṃśaḥ kāryāṃśo bhairave yathā

bhairavyaṃśaḥ samāṃ jātiṃ gauḍatvādyāṃ samāśritāḥ
karṇāṭādyāḥ sajātīyāsteṣvekāṃśo'paratra yaḥ

sajātīyāṃśakaḥ sa syādaṃśaḥ sadṛśarāgayoḥ
sadṛśāṃśo yathā naṭṭāvarāṭyoḥ śuddhayormithaḥ

sādṛśyaśūnyayoraṃśo'tyantaṃ visadṛśāṃśakaḥ
velāvalyāśca gūrjaryāḥ parasparagatau yathā

madhyastharāgau sādṛśyavaisādṛśyavivarjitau
madhyasthāṃśastayoraṃśo naṭṭādeśākhyayoriva

aṃśe'śāntarasaṃcārādaṃśāṃśa iti kīrtitaḥ
yeṣvaṃśo dṛśyate sthāyāsteṃ'śasya parikīrtitāḥ

manasā tatkṛtenaiva ye grāhyāste'vadhānajāḥ
āyāsena vinā yatra sthāne syātpracuro dhvaniḥ

svasthānaṃ tadapasthānaṃ tvāyāsena tadudgateḥ
apasthānasya te sthāyā ye'pasthānasamudbhavāḥ

nikuteḥ karuṇāyāśca sthāyāstvanvarthanāmakāḥ
sthāyā nānāvidhāṃ bhaṅgiṃ bhajaṃnto vividhatvajāḥ

gātrasya gātre niratāḥ kṛtvā tīvrataraṃ dhvanim
yeṣūpaśāntiḥ kriyate bhavantyupaśamasya te

kāṇḍāraṇā prasiddhaiva tasyāḥ sthāyāstadudbhavāḥ
saralaḥ komalo raktaḥ kramānnīto'tisūkṣmatām

svarasyā''dyeṣu te sthāyāḥ proktā nirjavanānvitāḥ
gāḍhaḥ śaithilyanirmuktaḥ sa eva mṛdutānvitaḥ

bhavellalitagāḍhastu lalitastu vilāsavān
mārdavāghūrṇitaḥ prokto lulitaḥ syātsamaḥ punaḥ

hīno vegavilambābhyāṃ yathārthaḥ komalo mataḥ
prasṛtaḥ prasṛtopetaḥ snigdho rūkṣatvavarjitaḥ

ujjvalo gaditaścokṣa ucitastu yathārthakaḥ
sudeśiko vidagdhānāṃ vallabho'pekṣitastu saḥ

sthāyasthāyena pūrveṇa pūrtyarthaṃ yo'bhikāṅkṣitaḥ
valau vahervahanyāṃ ca yaḥ snigdhamadhuro mahān

mandre dhvaniḥ saghoṣaḥ syāttadyuktā ghoṣajā matāḥ
gambhīramadhuradhvānā mandre ye syuḥ svarasya te

iti trayastriṃśatsaṃkīrṇāḥ /
vahanta iva kampante svarā yeṣu vahasya te
akṣarāḍambaro yeṣu mukhyāste syustadanvitāḥ

vegena preritairūrdhvaṃ svarairullāsito mataḥ
yatra gaṅgātaraṅganti svarāḥ sa syāttaraṅgitaḥ

parito'rdhabhṛte kumbhe jalaṃ dolāyate yathā
gīte tathāvidhaḥ sthāyaḥ proktastajjñaiḥ pralambitaḥ

avaskhalati yo mandrādavaroheṇa vegataḥ
so'vaskhalita ityuktastrāṭitastu svare kvacit

ciraṃ sthitvā'gnivattāraṃ spṛṣṭvā pratyāgato bhavet
ghanasvaro'varohe syātsaṃpraviṣṭastathāvidhaḥ

ārohiṇyutpraviṣṭaḥ syādanvarthāḥ syuḥ pare trayaḥ
pratigṛhyollāsitaḥ syādasau yaḥ pratigṛhyate

utkṣipyotkṣipyanipatatkelikandukasundaraḥ
drutapūrvo vilambāntaḥ syādalambavilambakaḥ

syāttroṭitapratīṣo'sau yatra syāttāramandrayoḥ
prathamaṃ traṭayitvaikamaparasya pratigrahaḥ

prasṛtākuñcitaḥ sthāyaḥ prasāryā''kuñcitadhvaniḥ
sthāyivarṇasthitiḥ kampaḥ sthira ityabhidhīyate

ekaikasminsvare sthitvā sthitvā vā'tha dvayordvayoḥ
triṣu triṣvathavā sthāyo racitaḥ sthāyuko mataḥ
ūrdhvaḥ prasāritaḥ kṣiptaḥ sūkṣmāṅgonte'lpatāṃ gataḥ

ityasaṃkīrṇā viṃśatiḥ
śabdaḥ prakāśate yeṣu dhṛtibhṛtyādivarjitaḥ
svabhāvādeva śabdasya prakṛtisthasya te matāḥ

yeṣu sūkṣmīkṛtāḥ śabdāste kalāyāḥ prakīrtitāḥ
bhṛśaṃ prāṇapratigrāhyā ye syurākramaṇasya te

te sthāyā ghaṭanāyā ye śilpinā ghaṭitā iva
sukhadāstu sukhasya syuścālirjakketi kīrtitāḥ

sthāyāstadanvitāścāleraṃśo jīvasvaro mataḥ
tatprādhānyena ye gītāḥ sthāyā jīvasvarasya te

vedadhvaninibhadhvānāḥ sthāyā vedadhvanermatāḥ
antaḥsāro ghanatvasya yathārthaḥ śithilo mataḥ

duṣkaro'vaghaṭaḥ proktaḥ pluto'tyantavilambitaḥ
rāgeṇeṣṭaḥ svapūrtyarthaṃ rāgeṣṭa iti kīrtitaḥ

sa syādapasvarābhāso bhātyapasvaravattu yaḥ
stabdhasthāyastu baddhaḥ syādbahutvaṃ madhuradhvaneḥ

yasminkalaravasyāsau chāndasaścaturapriyaḥ
sukarābhāsa ityukto duṣkaraḥ sukaropamaḥ

ghaṇṭānādavadāyātastārānmandraṃ tu saṃhitaḥ
laghurgurutvarahito dhruvakābhogayostu yaḥ

antare sā'ntaro vakro yathārthaḥ sukarastu yaḥ
tāre dīptaprasanno'sau sukaraḥ komaladhvaniḥ

prasannamṛdurityukto gururanvarthanāmakaḥ
hrasvastokaḥ parau dvau tu syātāmanvarthanāmakau

śabdaśārīraguṇataḥ sukaraḥ susvaro'thavā
yaḥ kasyacinna sarveṣāṃ so'sādhāraṇa ucyate

sadṛśo yastu sarveṣāmasau sādhāraṇaḥ smṛtaḥ
na vāñchati vahanyādi yaḥ svanirvāhahetave

ucyate sa nirādhāraḥ sukaro duṣkaropamaḥ
duṣkarābhāsa ityukto miśraṇānmiśrako mataḥ

iti trayastriṃśatsaṃkīrṇalakṣaṇāḥ
ānantyānnaiva śakyante bhedā miśrasya bhāṣitum
dikpradarśanamātrārthamucyante teṣu kecana

yo yasminbahulaḥ sthāyaḥ sa tens vyapadiśyate
sāmye tu miśranāmaiva sa tvidānīṃ prapañcyate

tiripāndolito līnakampitaḥ kampitāhataḥ
tiripasphurito līnasphuritaḥ sphuritāhataḥ

līnakampitalīnaśca tribhinnakurulāhataḥ
plāvitollāsitavalirvalihumphitamudritaḥ

nāmitāndolitavalirvalināmitakampitaḥ
andolitaplāvitakasamullāsitanāmitaḥ

tiripāndolitavalitribhinnakurulo'paraḥ
tribhinnalīnasphuritaplāvitāndolitaḥ paraḥ

vahanīḍhālayordhālavahanyoḥ śabdaḍhālayoḥ
vahanīyantrayośchāyāyantrayoḥ śabdayantrayoḥ

vahanīchāyayoryantravādyaśabdabhavaḥ paraḥ
tīkṣṇapreritakastīkṣṇapreritaḥ svaralaṅghitaḥ

ḍhālaśabdotthayantrotthavādyaśabdabhavaḥ paraḥ
ḍhālacchāyā yantravādyaśabdaśabdabhavo'paraḥ

jhallambitāvaskhalitastrāṭitollāsitaḥ paraḥ
saṃpraviṣṭotpraviṣṭaśca saṃpraviṣṭataraṅgitaḥ

anyaḥ pratigṛhītollālitālambavilambakaḥ
syāttroṭitapratīṣṭotpraviṣṭaniḥsaraṇaḥ paraḥ

dīrghakampitasūkṣmāntabhrāmitasthāyuko'nyakaḥ
vahākṣarāḍambarajaprasṛtākuñcitasthiraḥ

bhrāmitakṣiptasūkṣmāntataraṅgitajhalambhitaḥ
ete ṣaṭtriṃśadanye'pi vijñātavyā diśā'nayā

iti sthāyavāgalakṣaṇam
rāgālapanamālaptiḥ prakaṭīkaraṇaṃ matam
sā dvidhā gaditā rāgarūpakābhyāṃ viśeṣaṇāt

rāgālaptistu sā yā syādanapekṣyaiva rūpakam
svasthānaiḥ sā caturbhiḥ syāditi gītavido viduḥ

yatropaviśyate rāgaḥ svare sthāyī sa kathyate
tataścaturtho dvyardhaḥ syātsvare tasmādadhastane

cālanaṃ mukhacālaḥ syātsvasthānaṃ prathamaṃ ca tat
dvyardhasvare cālayitvā nyasanaṃ taddvitīyakam

sthāyisvarādaṣṭamastu dviguṇaḥ parikīrtitaḥ
dvyardhadviguṇayormadhye sthitā ardhasthitāḥ svarāḥ

ardhasthito cālayitvā nyasanaṃ tu tṛtīyakam
dviguṇe cālayitvā tu sthāyinyāsāccaturthakam
ebhiścaturbhiḥ svasthānai rāgālaptirmatā satām

stokastokaistataḥ sthāyaiḥ prasannairbahubhaṅgibhiḥ
jīvasvaravyāptimukhyai rāgasya sthāpanā bhavet

iti rāgālaptiḥ
rūpakasthena rāgeṇa tālena ca vidhīyate
yā soktā rūpakālaptiḥ sā punardvividhā bhavet

pratigrahaṇikaikā'nyā bhañjanītyabhidhīyate
vidhāya sthāyamālapte rūpakāvayavo yadi
pratigṛhyeta sā proktā pratigrahaṇikā budhaiḥ

iti pratigrahaṇikā
bhañjanī dvividhā jñeyā sthāyarūpakabhañjanāt
yadā tatpadamānena sthāyo rūpakasaṃsthitaḥ
nānāprakāraḥ kriyate sā jñeyā sthāyabhañjanī

taiḥ padaistena mānena samagraṃ rūpakaṃ yadi
anyathā cānyathā gāyedasau rūpakabhañjanī

varṇālaṃkārasaṃpannā gamakāsthāyacitritā
ālaptirucyate tajjñairbhūribhaṅgimanoharā

ityālaptilakṣaṇam
gātṛvādakasaṃghāto vṛndamityabhidhīyate
uttamaṃ madhyamamatho kaniṣṭhamiti tattridhā

catvāro mukhyagātāro dviguṇāḥ samagāyanāḥ
gāyinyo dvādaśa proktā vāṃśikānāṃ catuṣṭayam

mārdaṅgikāstu catvāro yatra tadvṛndamuttamam
madhyamaṃ syāttadarthena kaniṣṭhe mukhyagāyanaḥ

ekaḥ syātsamagātārastrayo gāyanikāḥ punaḥ
catasro vāṃśikadvaṃdvaṃ tathā mārdalikadvayam

uttame gāyanīvṛnde mukhyagāyanikādvayam
daśa syuḥ samagāyinyo vāṃśikadvitayaṃ tathā

bhavenmārdalikadvaṃdvaṃ madhyame mukhyagāyanī
ekā syātsamagāyinyaścatasro vāṃśikāstathā

ito nyūnaṃ tu hīnaṃ syādyayeṣṭamathavā bhavet
uttamābhyadhikaṃ vṛndaṃ kolāhalamitīritam

mukhyānuvṛttirmilanaṃ tālalīlānuvartanam
mithastruṭitanirvāhastristhānavyāptiśaktatā

śabdasādṛśyamityete proktā vṛndasya ṣaḍguṇāḥ
āha vṛndaviśeṣaṃ tu kutapaṃ bharato muniḥ

tatasya cāvanaddhasya nāṭyasyaite tridhā ca saḥ
tatasya kutapo jñeyo gāyanaḥ saparigrahaḥ

vīṇā ghoṣavatī citrā vipañcī parivādinī
vallakī kuṅnikā jyeṣṭhā nakuloṣṭhī ca kiṃnarī

jayā kūrmī pinākī ca hastikā śatatantrikā
audumbarī ca ṣaṭkarṇaḥ pauṇo rāvaṇahastakaḥ

sāraṅgyālapanītyādestatavādyasya vādakāḥ
vāṃśikāḥ pāvikāḥ pāvakāhalāḥ śaṅkhavādakāḥ

muhurīśṛṅgavādyādyāstathā tāladharā varāḥ
kutape tvavanaddhasya mukhyo mārdaṅgikastataḥ

paṇavo darduro ḍhakkā maṇḍiḍakkā ca ḍakkulī
paṭahaḥ karaṭā ḍhakkā ḍhavaso ghaḍasastathā

huḍukkā ḍamarū ruñjā kuḍukkā kuḍuvā tathā
niḥsvānastrivalī bherī tambakī bombaḍī tathā

paṭṭavādyaṃ paṭaḥ kamroḍāvajāvajasellukāḥ
jayaghaṇṭā kāṃsyatālo ghaṇṭā ca kirikiṭṭakam

vādyānāmevamādīnāṃ pṛthagvādakasaṃcayaḥ
varāṭalāṭakarṇāṭagauḍagurjarakauṅkaṇaiḥ

mahārāṣṭrāndhrahammīracaulairmalayamālavaiḥ
aṅgavaṅgakaliṅgādyairnānābhinayakovidaiḥ

aṅgahāraprayogajñairlāsyatāṇḍavakovidaiḥ
vicitrasthānakaprauḍhairviṣameṣu suśikṣitaiḥ

nāṭasya kutapaḥ pātrairuttamādhamamadhyamaiḥ
kutapānāmamīṣāṃ tu samūho vṛndamucyate

iti vṛndalakṣaṇam
iti śrīmadanavadyavidyāvinodaśrīkaraṇādhipatiśrīsoḍhaladevanandananiḥśaṅkaśārṅgadevaviracite saṃgītaratnākare tṛtīyaḥ prakīrṇakādhyāyaḥ