Sangita Ratnakara · Chapter p2

saṅgītaratnākaraḥ
atha saptamo nartanādhyāyaḥ
āṅgikaṃ bhuvanaṃ yasya vācikaṃ sarvavāṅmayam
āhāryaṃ candratārādi taṃ numaḥ sāttvikaṃ śivam

śivaprasādasaṃprāptaniḥsamijñānasaṃpadā
tanyate śārṅgadevena nartanaṃ tāpakartanam

nāṭyaṃ nṛtyaṃ tathā nṛttaṃ tredhā taditi kīrtitam

nāṭyavedaṃ dadau pūrvaṃ bharatāya caturmukhaḥ
tataśca bharataḥ sārdhaṃ gandharvāpsarasāṃ gaṇaiḥ
nāṭyaṃ nṛtyaṃ tathā nṛttamagre śaṃbhoḥ prayuktavān

prayogamuddhataṃ smṛtvā svaprayuktaṃ tato haraḥ
taṇḍunā svagaṇāgraṇyā bharatāya nyadīdiśat

lāsyamasyāgrataḥ prītyā pārvatyā samadīdiśat
buddhvā'tha tāṇḍavaṃ taṇḍormartyebhyo munayo'vadan

pārvatī tvanuśāsti sma lāsyaṃ bāṇātmajāmuṣām
tayā dvāravatīgopyastābhiḥ saurāṣṭrayoṣitaḥ

tābhistu śikṣitā nāryo nānājanapadāspadāḥ
evaṃ paramparāprāptametalloke pratiṣṭhitam

ṛgyajuḥsāmavedebhyo vedāccātharvaṇaḥ kramāt
pāṭhyaṃ cābhinayāngītaṃ rasānsaṃgṛhya padmabhūḥ

vyarīracattrayamidaṃ dharmakāmārthamokṣadam
kīrtiprāgalbhyasaubhāgyavaidagdhyānāṃ pracardhanam
audāryasthairyadhairyāṇāṃ vilāsasya ca kāraṇam

duḥkhārtiśokanirvedakhedavicchedekāraṇam

api brahmaparānandādidamabhyadhikaṃ dhruvam
jahāra nāradādīnāṃ cittāni kathamanyathā

na kiṃciddṛśyate loke dṛśyaṃ śrāvyamataḥ param

sarvadā kṛtakṛtyenāpyakliṣṭeṣtapradāyake
draṣṭavye nāṭyanṛtye te parvakāle viśeṣataḥ

nṛttaṃ tvatra narendrāṇāmabhiṣeke mahotsave
yātrāyāṃ devayātrāyāṃ vivāhe priyasaṃgame

nagarāṇāmagārāṇāṃ praveśe putrajanmani
brahmaṇoktaṃ prayoktavyaṃ maṅgalyaṃ sarvakarmasu

nāṭyāditritayasyātaḥ prapañcamabhidadhmahe
nāṭyaśabdo rase mukhyo rasābhivyaktikāraṇam

caturdhābhinayopetaṃ lakṣaṇāvṛttitio budhaiḥ
nartanaṃ nāṭyamityuktaṃ sa tvatrābhinayo bhavet

kāvyabaddhaṃ vibhāvādi vyañjanyo'rtho naṭe sthitaḥ
sāmājikānāṃ janayannirvighnarasasaṃvidam

lakṣaṇādi vibhāvādervakṣye rasanirūpaṇe

āṅgiko vācikastadvadāhāryaḥ sāttviko'paraḥ
caturdhā'bhinayastatrā''ṅgiko'ṅgairdarśito mataḥ

vācā viracitaḥ kāvyanāṭakādistu vācikaḥ
āhāryo hārakeyūrakirīṭādivibhūṣaṇam

sāttvikaḥ sāttvikairbhāvairbhāvukena vibhāvitaḥ

itikartavyatā tasya dvividhā parikīrtitā
lokadharmī nāṭyadharmītyete ca dvividhe punaḥ

cittavṛttyarpikā kācidbāhyavastvanukāriṇī
iti bhedadvayaṃ prāhurlokadharmyāḥ purātanāḥa

āśritya kaiśikīṃ vṛttimekā nāṭyopayoginīm
tadyogyāṃ laukikāṃ śobhāṃ karotyāveṣṭitādibhiḥ

aṃśenaivopajīvantī lokamanyā pravartate
nāṭyadharmyāmapi prājñā bhedadvaṃdvamidaṃ jaguḥ

āṅgikāhbhinayaireva bhāvāneva vyanakti yat
tannṛtyaṃ mārgaśabdena prasiddhaṃ nṛtyavedinām

gātravikṣepamātraṃ tu sarvābhinayavarjitam
āṅgikoktaprakāreṇa nṛttaṃ nṛttavido viduḥ

tāṇḍavaṃ lāsyamityetaddvayaṃ dvedhā nigadyate
vardhamānāsāritādyairgītaistattaddhruvāyutam

karaṇairaṅgahāraiśca prādhānyena pravartitam
taṇḍūktamuddhataprāyaprayogaṃ tāṇḍavaṃ matam

lāsyaṃ tu sukumārāṅgaṃ makaradhvajavardhanam

viṣamaṃ vikaṭaṃ laghvityanye bhedatrayaṃ viduḥ
nṛttasya tatra viṣamaṃ syādṛjubhramaṇādikam

virūpaveṣāvayavavyāpāraṃ vikaṭaṃ matm
upetaṃ karaṇairalpairañcitādyairlaghu smṛtam

nāṭakasthitavākyārthapadārthābhinayātmakam
tadādyabharatenoktaṃ rasabhāvasamanvitam

nāṭyaṃ tannāṭakeṣvevopayuktaṃ tadgatānataḥ
vihāya trīnabhinayānāṅgiko'trābhidhīyate

tasya śākhā'ṅkuro nṛttaṃ pradhānaṃ tritayaṃ matam
tatra śākheti vikhyātā vicitrā karavartanā

aṅkuro bhūtavākyārthamupajīvya pravartitā
vartanā sā bhavetsūcī bhāvivākyopajīvanāt

karaṇairaṅgahāraiśca sādhitaṃ nṛttamucyate
nātropayoginau sūcyaṅgurāvuktau prasaṅgataḥ

aṅgānyatra śiro hastau vakṣaḥ pārśve kaṭītaṭam
pādāviti ṣaḍuktāni skandhāvapyapare jaguḥ

pratyaṅgāni tviha grīvā bāhū pṛṣṭhaṃ tathodaram
ūrū jaṅghe ṣaḍityāhurapare maṇibandhakau
jānunī bhūṣaṇānīti trayamabhyadhikaṃ jaguḥ

dṛṣṭibhrūpuṭatārāśca kapolau nāsikānilaḥ
adharo daśanā jihvā cibukaṃ vadanaṃ tathā

upāṅgāni dvādaśeti śirasyaṅgāntareṣu tu
pārṣṇigulphau tathā'ṅgulyaṃ karayoḥ pādayostale

mukharāgaśca karayoḥ pracārāḥ karaṇāni ca
karmāṇi pāṇikṣetrāṇi karaṇāni dvidhā tataḥ

śuddhānyutplutipūrvāṇi cāṅgahārāḥ sarecakāḥ

cāryaḥ śuddhāśca deśīsthāḥ sthānakānyatha vṛttayaḥ
nyāyāḥ sapravicārāśca maṇḍalānyakhilānyapi

lāsyāṅgāni tato rekhā śramaḥ pātrasya lakṣaṇam
guṇadoṣā maṇḍanaṃ ca tasyopādhyāyalakṣaṇam

saṃpradāyo guṇā doṣāstasya śuddhā ca paddhatiḥ
gauṇḍalyāśca vidhiḥ samyaglakṣma peraṇinastataḥ

tatpaddhatirathā''cāryo naṭanartakalakṣaṇe
vaitālikaścāraṇaśca kolāṭikasabhāsadaḥ

sabhāpatiḥ sabhāyāśca niveśo rasalakṣaṇam
bhāvalakṣaṇamityasminnadhyāye brūmahe kramāt

dhutaṃ vidhutamādhūtamavadhūtaṃ ca kampitam
ākampitodvāhite ca parivāhitamañcitam

nihañcitaṃ parāvṛttamutkṣiptādhomukhe tathā
lolitaṃ ceti vijñeyaṃ caturdaśavidhaṃ śiraḥ

tiryagnatonnataṃ skandhānatamārātrikaṃ samam
pārśvābhihmukhamityanyānbhedānpañcāpare jaguḥ

paryāyeṇa śanaistiryaggatamuktaṃ dhutaṃ śiraḥ
śūnyasthānsthitasyaiva pārśvadeśāvalokane

anāśvāse vismaye ca viṣāde'nīpsite tathā
pratiṣedhe ca tasyoktaḥ prayogo bharatādibhiḥ

iti dhutam
drutagatyā tadeva syādvidhutaṃ tatprayujyate
śītārte jvarite bhīte sadyaḥpītāsave tathā

iti vidhutam
ādhūtaṃ tu sakṛttiryagūrdhvaṃ nītaṃ śiro matam
garveṇa svāṅgavīkṣāyāṃ pārśvasthordhvanirīkṣaṇe
śakto'smītyabhimāne ca prayogastasya kīrtitaḥ

ityādhūtam
yadadhaḥ sakṛdānītamavadhūtaṃ taducyate
sthityā'rdhadeśanirdeśe saṃjñāvāhanayorapi
ālāpe ca prayoktavyamidamāhurmanīṣiṇaḥ

ityavadhūtam
bahuśo drutamūrdhvādhaḥkampanātkampitaṃ śiraḥ
jñāne'bhyupagame roṣe vitarke tarjane tathā

tvaritapraśnavākye ca prayoktavyamidaṃ śiraḥ
iti kampitam
ākampitaṃ tadeva syāddviḥ prayuktaṃ śanairyadi

etatpaurastyanirdeśe praśne saṃjñopadeśayoḥ
āvāhane svacittasthakathane ca prayujyate

ityākampitam
sakṛdūrdhvaṃ śiro nītamudvāhitamudīritam
śakto'hamiha kārye'smītyabhimāne prayujyate

ityudvāhitam
parimaṇḍalitākārabhrāmitaṃ parivāhitam
lajjābharodbhave māne vallabhānukṛtau tathā

vismaye ca smite harṣāmarṣayoranumodane
vicāre ca vicārajñāḥ kāryamāhuridaṃ śiraḥ

iti parivāhitam
śiraḥ syādañcitaṃ kiṃcitpārśvato natakaṃdharam
rukcintāmohamūrchāsu tatkāryaṃ hanudhāraṇe

ityañcitam
utkṣiptabāhuśikharaṃ magnagrīvaṃ nihañcitam
vilāse lalite garve vivvoke kilakiñcite

moṭṭāyite kuṭṭamite māne stambhe ca tadbhavet
vilāso gamanādi syācceṣṭā''śliṣṭāṅgayā kṛtā

kānyāyāḥ sukumārāṅgopāṅgatvaṃ lalitaṃ viduḥ
vivvokastviṣṭalābhena jātādgarvādanādaraḥ

harṣādrodanahāsādi procyate kilakiñcitam
moṭṭāyitaṃ priyakathādṛṣṭyādau tanmayātmatā

keśādigrahaje harṣe duḥkhivadbhavanaṃ tu yat
syāttatkuṭṭamitaṃ māno roṣaḥ praṇayasaṃbhavaḥ

syāttu niṣkriyatā stambho navoḍhāpriyasaṃgame

iti nihañcitam
parāṅmukhīkṛtaṃ śīrṣaṃ parāvṛttamudīritam
tatkāryaṃ kopalajjādikṛte vaktrāpasāraṇe
parāvṛttānukaraṇe pṛṣṭhataḥ prekṣaṇe tathā

ūrdhvavaktraṃ śiro jñeyamutkṣiptaṃ tatprayujyate
darśane tuṅgavastūnāṃ candrādivyomagāminām

ityutkṣiptam
lajjāduḥkhapraṇāmeṣu syādanvarthamadhomukham

ityadhomukham
śiraḥ syāllolitaṃ sarvadikkaiḥ śithilalocanaiḥ
nidrāgadagrahāveśamadamūrchāsu tanmatam

iti lolitam
tiryaṅnatonnatiṃ prāptaṃ śirastiryaṅnatonnatam
vivvokādiṣu kāntānāṃ tatprayogaṃ pracakṣate

iti tiryaṅnatonnatam
skandhānataṃ tadākhyātaṃ skandhe yannihitaṃ śiraḥ
tannidrāmadamūrchāsu cintāyāṃ ca prayujyate

iti skandhānatam
skandhau tu kiṃcidāśliṣya bhrāntamārātrikaṃ matam
vismaye dṛśyate tacca parābhiprāyavedane

ityārātrikam
svābhāvikaṃ samaṃ śīrṣaṃ svabhāvābhinaye matam
iti samam
pārśvābhimukhamanvarthaṃ pārśvasthasyāvalokane

iti pārśvābhimukham
iti pañca śiraḥprakārāḥ
patākastripatāko'rdhacandrākhyaḥ kartarīmukhaḥ
arālamuṣṭiśikharakapitthakhaṭakāmukhāḥ

śukatuṇḍaśca kāṅgūlaḥ padmakośo'lapallavaḥ
sūcīmukhaḥ sarpaśirāścaturo mṛgaśīrṣakaḥ

haṃsāsyo haṃsapakṣaśca bhramaro mukulastathā
ūrṇanābhaśca saṃdaṃśastāmracūḍo'paraḥ karaḥ

asaṃyutā matā hastāścaturviṃśatirityamī
abhineyavaśādeṣāṃ saṃyutatvamapīṣyate

añjaliśca kapotākhyaḥ karkaṭaḥ svastikastathā

dolapuṣpapuṭotsaṅgakhaṭakāvardhamānakāḥ
gajadantaścāvahittho niṣadho makarastathā

vardhamānaśceti hastāḥ saṃyutāḥ syustrayodaśa
ete'bhinayahastāḥ syuḥ saptatriṃśanmunermatāḥ

caturasrāvathodvṛttau hastau talamukhābhidhau
svastikau viprakīrṇākhyāvarālakhaṭakāmukhau

āviddhavaktrau sūcyāsyau recitāvardharecitau
nitambau pallavau keśabandhāvuttānavañcitau
nitambau pallavau keśabandhāvuttānavañcitau

latākhyau karihastaśca pakṣavañcitakābhidhau
pakṣapradyotakodaṇḍapakṣau garuḍapakṣakau

ūrdhvamaṇḍalinau hastau pārśvamaṇḍalināvapi
uromaṇḍalinau syātāmuraḥpārśvārdhamaṇḍalau

muṣtikasvastikāvanyau nalinīpadmakośakau
alapadmāvulbaṇau ca valitau lalitāviti

nṛttahastā matāstriṃśannṛttamātropayoginaḥ
etānabhinaye'pyāhuḥ śāstrataḥ saṃpradāyataḥ

latākhyau hi munirvakti nṛttābhinayagocarau
sūcyante'nye sāhacaryāttenābhinayagocarāḥ

yuktitaḥ saṃpradāyācca lokato'tra viśeṣadhīḥ
yathā hi karihastena hastī loke'bhinīyate

bhaṭṭābhinavaguptādyairidamabhyupagamyate
sarve ca militāḥ santaḥ saptaṣaṣṭirime karāḥ

catuḥṣaṣṭitvameteṣāṃ nayuktyāgamagocaraḥ
catuḥṣaṣṭitvamevaṃ vā teṣāṃ sūribhirūhyatām

kartavyau svastikau hastau viprakīrṇaviśeṣaṇau
karau hi svastikībhūya vicyutau viprakīrṇakau

svatantrayorato nāsti prayogo viprakīrṇayoḥ
uromaṇḍalināvevaṃ pārśvamaṇḍalinoriha

viśeṣaṇe colbaṇayoḥ kartavyāvalapallavau
viśeṣaṇaviśeṣye ca na syātāṃ bhinnagāminī

nīlamutpalamityatra na hīṣṭaṃ paṅkajadvayam
prasiddherupapattyarthaṃ yuktireṣā mayoditā

ācāryāṇāṃ tu sarveṣāṃ pṛthaguddeśalakṣaṇe
vadatāṃ svastikādyeṣu na viśeṣaṇatā matā

nikuñcakamayukteṣu karaṃ dviśikharaṃ punaḥ
yukteṣu nṛttahasteṣu tvadhikau varadābhayau

bruvantaḥ kecidācāryā hastasaptatimūcire
teṣāmīṣadvikāre'pi viniyogeṣvananyatā

tarjanīmūlasaṃlagnaḥ kuñcitāṅguṣṭhako bhavet
patākaḥ saṃhatākāraḥ prasāritatalāṅguliḥ

eṣa sparśe capeṭe ca patākātālikādiṣu
jvālāsūrdhvagatāsvasyāṅgulyaḥ praviralāścalāḥ

dhārāsvadhogatāḥ pakṣipakṣe tvasya kaṭisthite
ūrdhvaṃ gacchannucchriteṣu puṣkaraprahatau tvadhaḥ

ūrdhvaṃ gacchankaṭikṣetrādutkṣepābhinaye karaḥ
ābhimukhye mukhakṣetramāgacchannijapārśvataḥ

svapārśve kampamānastu pratiṣedhe bhavatyasau
śīghraṃ gharṣannadhiṣṭhāya patākaṃ kṣālane param

patākaṃ tu śanairgharṣanmardane mārjane tathā
utpāṭane dhāraṇe ca śilādisthūlavastunaḥ

ucitau vicyutau kāryāvetāvanyonyasaṃmukhau
adhogatocchritacalāṅgulirvāyūrmivegayoḥ

iti patākaḥ
sa eva tripatākaḥ syādvakritānāmikāṅguliḥ
dadhyādimaṅgaladravyasparśādau sa vidhīyate

parāṅmukhaḥ syādāhvāne lagnadvyaṅgulikuñcanāt
bahiḥkṣiptāṅgulidvaṃdvo'dhastalo'nādarojjhite

namaskāre tvasau kāryaḥ śirasthaḥ pārśvatastalaḥ
uttānitāṅgulidvaṃdvo vadanonnāmane mataḥ

saṃdehe dadhadaṅgulyau krameṇaiva natonnate
adhomukhaḥ śiraḥprānte bhramannuṣṇīṣadhāraṇe

tādṛgeva kirīṭasya dhṛtau mūrdhordhvadeśagaḥ
aniṣṭe gandhavāgghoṣe nāsāsyaśrotrasaṃvṛtim

aṅgulībhyāṃ kramātkurvanpakṣisrotonileṣu tu
kṣudreṣūrdhvamadhastiryakkramādgacchandadhattathā

adhomukhacalāṅgulyau kaṭikṣetragataḥ karaḥ
asre tanmārjane ca syādadho yāntīmanāmikām

netrakṣetragatāṃ bibhrattikalake tu lalāṭagām
alakasyāpanayane dadhattāmalakānvitām

iti tripatākaḥ
ekato'ṅgulisaṃghāte yatrāṅguṣṭhe sthite'nyataḥ
candralekhākṛtirbhāti so'rdhacandro'bhidhīyate

uparyuttānito'rdhendāvūrdhvago bālapādape
parāṅmukhastu khede syātkapolaphalakaṃ dadhat
prayoktavyaḥ kṛśe madhye balānnirvāsanādiṣu

ityardhacandraḥ
aśliṣṭamadhyamā pṛṣṭhe saṃsthitā tarjanī yadā

tripatākasya hastasya tadā syātkartarīmukhaḥ
alaktakādinā pādarañjane patane punaḥ

madhyamāṃ tarjanīsthāne punastatraiva tarjanīm
dadhāno'dhogato'thāgrasthottāne lekhyavācane

iti kartarīmukhaḥ
tarjanyādiṣvaṅgulīṣu prācyāḥ prācyāḥ parā parā
dūrasthoccā manāgvakrā dhanurvakrā tu tarjanī

aṅguṣṭhaḥ kuñcito yatra tamarālaṃ pracakṣate
āśīrvādādiṣu proktaḥ sa puṃsāṃ hṛdayasthitaḥ

atha strīṇāṃ keśabandhe keśānāṃ ca vikīrṇane
dvistriḥ kāryo'nyapārśvāttu svapārśve vartulabhramaḥ

āvrajañjanasaṃghe syādāhvāne patadaṅguliḥ
vivāhe tvaṅgulāgrasthasvastikākārayojitam

pradakṣiṇaṃ karadvaṃdvaṃ syāddhamankevalaḥ punaḥ
pradakṣiṇaṃ bhramatkāryo devatānāṃ pradakṣiṇe

kastvaṃ ko'haṃ kva saṃbandha ityasaṃbaddhabhāṣaṇe
bahiḥ punaḥ punaḥ kṣiptāṅgulirbhālasthitaḥ punaḥ
bhālasvedāpanayane tripatākoditeṣu ca

ityarālaḥ
talamadhyasthitairlagnairaṅgulyagrairagopitaiḥ
niṣpīḍya madhyamāṃ tiṣṭhatyaṅguṣṭho muṣṭiriṣyate

kuntanistriṃśadaṇḍādigrahe vividhayodhane
dhāvane prāṅmukhāṅguṣṭho mallayuddhe karadvayam

iti muṣṭiḥ
muṣṭerūrdhvakṛto'ṅguṣṭhaḥ śikharaḥ saṃprayujyate

śaktitomarayormokṣe dhanurbhallāṅguśagrahe
alakotpīḍane muṣṭiḥ kāryaḥ so'pyasya lokataḥ

iti śikharaḥ
aṅguṣṭhāgreṇa lagnāgrā tarjanī śikharasya cet
kapitthaḥ syāttadā kāryo dhāraṇe kuntavajrayoḥ

cakracāpagadādeśca śarākarṣādikarmaṇi
anyonyakāryaviṣayau kapitthaśikharau kvacit

iti kapitthaḥ
anāmikākanīyasyāvutkṣipte kuṭilīkṛte

virale cetkapitthasya tadā syātkhaṭakāmukhaḥ
uttānasturagādeḥ syādvalgācāmaradhāraṇe

kusumāvacaye muktāsragdāmadharaṇe tathā
śaramanthākarṣaṇe ca saṃmukho darpaṇagrahe

kastūrikādivastūnāṃ peṣaṇe'dhastalau karau
tāmbūlavīṭikāvṛntacchedanādau ca sa smṛtaḥ

iti khaṭakāmukhaḥ
arālasya yadā'tyantavakre tarjanyanāmike
śukatuṇḍastadā sa syātpremakopena varṣayā
na tvaṃ nāhaṃ na me kṛtyaṃ tvayeti vacane tathā

dyūtākṣapātanādau syātsāvajñe tu visarjane
āhvāne ca bahiścāntaḥ kramātkṣiptāṅgulirbhavet

iti śukatuṇḍaḥ
kāṅgūle'nāmikā vakrā bhavedūrdhvā kanīyasī
ūrdhvāstretāgnisaṃsthānāstarjanyaṅguṣṭhamadhyamāḥ

phale'lpe ca mite grāse syādbiḍālapadādiṣu
cibukagrahaṇe caiva bālakānāṃ vidhīyate

iti kāṅgūlaḥ
aṅguṣṭhāṅgulayo yasminnalagnāgrā dhanurnatāḥ
viralāḥ padmakośo'sau kāryo devārcane balau

dvistrirvā viprakīrṇāgraḥ puṣpāṇāṃ prakare karaḥ
phale bilvakapitthādau strīṇāṃ ca kucakumbhayoḥ

iti padmakośaḥ
vyāvartitākhyaṃ karaṇaṃ kṛtvaiva samavasthitāḥ
yasyāṅgulyaḥ karatale pārśvagāḥ so'lapallavaḥ

alalpadmaḥ sa eva syādaṅgulīnāṃ ca kecana
asya vyāvartitasthāne parivartitamūcire

kasya tvamiti nāstīti vākyayoḥ pratiṣedhane
tucchādyuktānṛtatvoktiṣveva strībhiḥ prayujyate

ityalapallavaḥ
ūrdhvaṃ prasāritā yatra khaṭakāmukhatarjanī
hastaḥ sūcīmukhaḥ sa syādabhineyamihocyate

śastre cakrābhidhe kumbhakāropakaraṇe tathā
rathāṅge janasaṃghāte bhramantī tarjanī bhavet

ūrdhvavaktrā'dhomukhī ca nijapārśvagatā tathā
pārśvāntarānnijaṃ pārśvamāyāntī ca kramādbhavet

patākāyāṃ bhavedūrdhvā sādhuvāde ca dolitā
ekatve tarjanī cordhvā nāsāsthā śvāsavīkṣaṇe

adhastale pārśvayukte saṃyukte virahe punaḥ
viyukte ca vidhātavye śārṅgadevena kīrtite

iti sūcīmukhaḥ
patāko nimnamadhyo yaḥ sa tu sarpaśirāḥ karaḥ
devebhyastoyadāne'sāvuttāno'dhomukhaḥ punaḥ

bhujaṃgamagatau sa syādāsphāle karikumbhayoḥ
bhujāsphoṭe ca mallānāṃ niyuddhādiṣu kīrtitaḥ

iti sarpaśirāḥ
asyāṅguṣṭho madhyamāyā madhyaparvodaraṃ śritaḥ
ūrdhvā kanīyasī yatra caturaṃ taṃ karaṃ viduḥ

anye patākāṅguṣṭhasya madhyamāmūlasaṃsthitim
īṣacca pṛṣṭhato yātāṃ kaniṣṭhāṃ cature jaguḥ

naye vadanadeśastho yutau dvau maṇibandhayoḥ
vinaye'tha vicāre syātpārśvago'tha hṛdi sthitaḥ

ūhāpohe ca līlāyāmudveṣṭitayutaḥ karaḥ
kaitave'kṣapreraṇe ca bhavedūrdhvatalaḥ same

aṅguṣṭhamadhyamānyonyamardanena tu mārdave
cāturyavacane tvetau saṃyutau caturoditau

iti caturaḥ
sarpaśīrṣakarasyordhve yadā'ṅguṣṭhakaniṣṭhike
mṛgaśīrṣastadā hastaḥ sa tvadhovadano bhavet

adyohasāṃpratārtheṣūttānodyūtākṣapātane
gaṇḍādikṣetrasaṃsthastu gaṇḍādisvedamārjane

iti mṛgaśīrṣaḥ
lagnāstretāgnisaṃsthānāstarjanyaṅguṣṭhamadhyamāḥ
śeṣe yatrordhvavirale haṃsāsyaḥ so'bhidhīyate

ayaṃ mṛduni niḥsāre ślakṣṇe'lpe śithile laghau
marditaṃ mathitaṃ kṣiptaṃ dadhadagraṃ vidhūnitam
aucityācyutayuktaṃ tu kusumāvacayādiṣu

iti haṃsavaktraḥ
yadi kiṃcinnamanmūlaṃ tarjanyādyaṅgulitrayam
patākasya tadā hastaṃ haṃsapakṣaṃ pracakṣate

ayamācamane kāryaścandanādyanulepane
hanudeśagatastu syādduḥkhaje hanudhāraṇe

maṇḍalīkṛtabāhū tau mahāstambhapradarśane
āliṅgane ca pratyakṣe parokṣe svastikīkṛtau

romāñcādyanubhāvaistu raseṣveṣa yathārasam
anubhāvā rasavaśātkāryā hastāntareṣvapi

iti haṃsapakṣaḥ
aṅguṣṭhamadhyamāṅgulyau śliṣṭāgre tarjanī matā
yatrordhvavirale śeṣe sa karo bhramaro bhavet

grahaṇe dīrghanālānāṃ puṣpāṇāmayamiṣyate
karṇapūre tālapatre kaṇṭakoddharaṇādiṣu

iti bhramaraḥ
yatrāṅguṣṭhāgralagnāśca saṃhatāṅgulayo'khilāḥ
ūrdhvāśca mukulaḥ sa syātpadmādimukulākṛtau

balikarmaṇi devānāṃ pūjane bhojanādiṣu
muhurvikāsya prakṛtiṃ nīto dāne tvarānvite

mukhacumbe tu kāntānāṃ saṃnidhau viṭacumbane
kucakakṣādideśasthaḥ syādācchuritake karaḥ

yadā'ṅgulīpañcakena saśabdaṃ nakhalekhanam
kucādau kāmasūtrajñāstadā''cchuritakaṃ viduḥ

iti mukulaḥ
padmakośasya yatra syuraṅgullyaḥ pañca kuñcitāḥ
ūrṇanābhaḥ sa cauryeṇa grahe keśagrahādiṣu

śiraḥkaṇḍūyane kāryaścibukakṣetragau tu tau
kāryau sakhastikau siṃhavyāghrādinakharāyudhe

ityūrṇanābhaḥ
arālāṅguṣṭhatarjanyau lagnāgre nimnatāṃ gataḥ
kiṃciccettalamadhyaḥ syāttadā saṃdaṃśa ucyate

sa tredhā syādagrajaśca mukhajaḥ pārśvajaḥ kramāt
prāṅmukhaḥ saṃmukhaḥ pārśvamukha ityasya lakṣaṇam

kaṇṭakoddharaṇe sūkṣmakusumāvacayādiṣu
prayoktavyo'grasaṃdaṃśo dhigityuktau tu roṣataḥ

vṛntātpuṣpoddhṛtau vartiśalākāñjanapūraṇe
kartavyo mukhasaṃdaṃśaḥ saṃdaṃśaḥ pārśvajaḥ punaḥ

guṇanikṣepaṇe muktāphalānāṃ vedhane tathā
nirūpaṇe ca tattvasya sadvitīyo'tha bhāṣaṇe

saroṣe vāmahastena kiṃcidagravivartanāt
alaktakādiniṣpeṣe'pyeṣa śrīśārṅgiṇoditaḥ

iti saṃdaṃśaḥ
bhramarasya talasthe cetkaniṣṭhopakaniṣṭhike
tāmracūḍastadā hasto bālāhvāne'tha bhartsane

gītāditālamāne ca śaighryaviśvāsanādiṣu
saśabdacyutasaṃdaṃśaḥ kāryo'sau choṭikocyate

prasāritakaniṣṭhasya muṣṭeryattāmracūḍatām
viniyogaṃ sahasrādisaṃkhyānirdeśane'sya ca
ke'pyūcustaṃ tu niḥśaṅko naicchallakṣyeṣvadarśanāt

iti tāmracūḍaḥ
patākahastatalayoḥ saṃśleṣādañjalirmataḥ

devatāguruviprāṇāṃ namaskāreṣvayaṃ kramāt
kāryaḥ śiromukhorastho nṛbhiḥ strībhiryatheṣṭataḥ

ityañjaliḥ
kapoto'sau yatra śliṣṭamūlāgrapārśvakau
asya kūrmaka ityanyāṃ saṃjñāṃ hastavido viduḥ

praṇāme gurusaṃbhāṣe vinayāṅgīkṛtau tvayam
prāṅmukhaḥ saśiraḥkampaḥ strīkāpuruṣayorbhavet

iti kapotaḥ
anyonyasyāntarairyatrāṅmulyo niḥsṛtya hastayoḥ
antarbahiśca dṛśyante karkaṭaḥ so'bhidhīyate

antaḥsthitāṅguliḥ kāryaścintāyāmatha jṛmbhaṇe
ūrdhvaṃ pārśve'grato vā syātparāṅmukhatalāṅguliḥ

aṅgānāṃ moṭane cātha bṛhaddehe svasaṃmukhaḥ
jaṭharakṣetragaḥ pṛṣṭhe tvaṅgulīnāṃ hanuṃ dadhat

khede ca saṃkucatkiṃcidanyonyābhimukhāṅguliḥ
śaṅkhasya dhāraṇe so'yaṃ jṛmbhādau bahiraṅguliḥ

iti karkaṭaḥ
ekasya maṇibandhe'nyamaṇibandhasthitau karau
dehasya vāmapārśvasthāvuttānau svastiko mataḥ

atrārālau patākau vā'bhinaye vaśagau karau
vicyutaḥ svastikaḥ strībhirevamastīti bhāṣane
gagane sāgarādau ca vistīrṇe saṃprayujyate

iti svastikaḥ
lambamānau patākau tu ślathāṃsau śithilāṅgulī

dolo bhavedasau vyādhau viṣāde madamūrchayoḥ
saṃbhramādau yathāyogaṃ stabdho vā pārśvadolitaḥ

iti dolaḥ
sarpaśīrṣo miladbāhyapārśvaḥ puṣpapuṭo bhavet
dhānyapuṣpaphalādīnāmapāṃ ca grahaṇe'rpaṇe
kāryaḥ puṣpāñjalau caiṣa proktaḥ soḍhalasūnunā

iti puṣpapuṭaḥ /
anyonyaskandhadeśasthāvarālau svastikīkṛtau
svasaṃmukhau ca vitatāvutsaṅgo gīyate karaḥ

dehadakṣiṇabhāgasthaṃ svastikaṃ kecidūcire
adhastalatvamapyanye'nyonyakakṣānuveśinīḥ

aṅgulīḥ karayoḥ pṛṣṭhadvayaṃ pārśvamukhaṃ viduḥ
karāvarālayoḥ sthāne sarpaśīrṣāvitītare

atiprayatnasādhye'rthe śītāliṅganayorapi
prasādanānaṅgīkāre lajjādau caiva yoṣitām

ityutsaṅgaḥ
khaṭakāmukhayoḥ pāṇyoḥ svastike maṇibandhane
anyonyābhimukhatve vā khaṭakāvardhamānakaḥ

tāmūlagrahaṇādau syātkāmināṃ prathame mate
puṣpāṇāṃ granthane satyabhāṣaṇādau matāntare

skandhakūrparayormadhyamanyonyasya yadā karau
dadhāte sarpaśirasau gajadantastadoditaḥ

ākuñcatkūrparau skandhadeśasthau sarpaśīrṣakau
anyonyābhimukhau lakṣma gajadante jaguḥ pare

eṣa śailaśilotpāṭe gatāgatayutaḥ karaḥ

vivāhasthānanayane syādvadhūvarayorayam
stambhagrahe'tibhāre ca śrīsoḍhalasutoditaḥ

iti gajadantaḥ
vakṣaso'bhimukhau santau śukatuṇḍāvadhomukhau
kṛtvā nītāvadho yatra so'vahittho'bhidhīyate
daurbalyautsukyaniḥśvāsagātrakārśyeṣvasau bhavet

ityavahitthaḥ
mukulasya kapitthena veṣṭanānniṣadho bhavet

śāstrārthasamyaggrahaṇe sa syānniṣpeṣaṇe tathā
samyakca sthāpite tathyamidamityapi bhāṣaṇe

prathamaṃ gajadantaṃ tu niṣadhaṃ kecidūcire
sa śairyadhairyagāmbhīryagarvādiṣu matastathā

iti niṣadhaḥ
uparyupari vinyastau yatrānyonyamadhomukhau
ūrdhvāṅguṣṭhau patākākhyau karau sa makaraḥ karaḥ

sa nakramakarāḍīnāṃ kravyādadvīpināmapi
siṃhādīnāmabhinaye nadīpūrasya ceṣyate

iti makaraḥ
haṃsapakṣau svastikatvaṃ prāptau yadi parāṅmukhau

vardhamānastadā hastaḥ kapāṭodghāṭane bhavet
vicyutaḥ svastikastadvadvakṣaḥsthalavidāraṇe

sarpaśīrṣo haṃsapakṣasthāne'sminnapare jaguḥ
apare'bhyupajagmustaṃ svastikena vinā kṛtam

iti vardhamānaḥ
puromukhau samaskandhakūrparau khaṭakāmukhau

sthitau vakṣaḥpurodeśe vakṣaso'ṣṭāṅgulāntare
caturasrāviti proktau sragādyākarṣaṇe karau

iti caturasrau
caturasrīkṛtya pāṇyoḥ kṛtayorhaṃsapakṣayoḥ
uttāno'dho vrajatyueko vakṣo'nyo yātyadhomukhaḥ

yadā syātāṃ tadodvṛttau tālavṛntanirūpaṇe
tāveva tālavṛntākhyāvavadannṛttakovidāḥ

prāṅmukhau haṃsapakṣākhyau vyāvṛttaparivartitau
jayaśabde prayoktavyāvudvṛttau menire pare

ityudvṛttau
bhūtvodvṛttau sthitau tryasrau haṃsapakṣau svapārśvayoḥ
jātau mithaḥ saṃmukhasthatalau talamukhau matau
budhairabhidadhāte tau madhure mardaladhvanau

iti talamukhau
aśliṣṭahaṃsapakṣābhyāṃ svastikasvastikau karau

iti svastikau
viprakīrṇau tu tāveva sahasā svastike cyute
nīcāgrāvunnatāgrau vā kucābhyāṃ purataḥ sthitau
parāṅmukhau haṃsapakṣau viprakīrṇau jaguḥ pare

iti viprakīrṇau
patākasvastikaṃ kṛtvā vyāvṛttaparivartane
ūrdhvāsyau padmakośau ca vyāvṛttaparivartane

kramātkṛtvā yatra vāmamuttānārālamācaret
khaṭakāmukhamanyaṃ vā'dhomukhaṃ caturasrataḥ

svastikenāthavā yadvā kṛtvā'rālau karau kṛtau
khaṭakāmukhasaṃjñau tāvarālakhaṭakāmukhau

vaṇijāṃ sacivādīnāṃ vitarke'sau prayujyate
anye tvāhururograsthaḥ prāṅmukhaḥ khaṭakāmukhaḥ

arālaḥ pronnatāgro'nyastiryagīṣatprasāritaḥ
pārśvavyatyayato yadvā svapārśve cetkarau sthitau
talāntarau tadā syātāmarālakhaṭakāmukhau

ityarālakhaṭakāmukhau
bhujāgrayoḥ kūrparayoraṃsayoḥ savilāsayoḥ
satoḥ patākau vyāvṛttiṃ vidhāya bhavato drutam
adhastalau cedāviddhavaktrau hastau tadoditau

vikṣepavalane prāhuḥ prayogaṃ kṛtinastayoḥ

ityāviddhavaktrau
madhyamāsaṃgatāṅguṣṭhau caturasrapradeśagau
sarpaśīrṣau kramāttiryakprasarantau pradeśinīm
bahiḥ prasāritāṃ dhatto yadā sūcīmukhau tadā

patākau prathamaṃ kāryau vyāvṛttaparivartitau
bhrāntvā prasāraṇaṃ cātra viśeṣaṃ kecidūcire

madhyaprasāritāṅguṣṭhau sarpaśīrṣākṛtī karau
recitasvastikau kecidūcuḥ sūcyāsyalakṣaṇam

iti sūcyāsyau
prasāritottānatalāvucyete recitau karau
athavā recitau proktau haṃsapakṣau drutabhramau

yadvā recitayorlakṣma lakṣaṇe milite ime
prayojyau tau nṛsiṃhasya daityavakṣovidāraṇe

iti recitau
ekena caturasreṇa tau syātāmardharecitau

ityardharecitau
uttānādhomukhatvābhyāṃ krameṇa skandhadeśataḥ
patākau yadi niṣkramya nitambakṣetravartinau
recakaṃ kuruto hastau nitambāvuditau tadā

iti nitambau
bāhū vyāvartitenordhvaṃ prasārya parivartitaḥ
svastikākṛtitāṃ nītau patākau pallavau matau

śithilau tripatākau tu kecidatra pracakṣate
natonnatau padmakośau śithilau maṇibandhayoḥ

svapārśvayoḥ purastādvā pallavāvavadanpare
padmakośakarasthāne patākāvapare jaguḥ

iti pallavau
pārśvadeśotthitau pārśvamaspṛśantau gatau śiraḥ
nitambavatkeśadeśānniṣkramya ca punaḥ punaḥ
pṛthaggatāgatau yau tau keśabandhau karau matau

iti keśabandhau
kapolāṃsalalāṭānāṃ kṣetre tvanyatame sthitau

tripatākau karau kiṃcittiryañcau saṃmukhau mithaḥ
aṃsakūrparayoḥ kiṃciccalatorūrdhvatastalau

kṣaṇaṃ bhūtvā pracalitau jñeyāvuttānavañcitau
aṃsakūrparayoḥ kiṃcitpatanaṃ manvate pare

ityuttānavañcitau
patākau dolitau tiryakprasṛtau tau latākarau
anayoḥ karayoḥ keśabandhayośca nitambayoḥ
tripatākākṛtiṃ kecidācāryāḥ pratijānate

iti latākarau
spṛśatkarikarākāraḥ pārśvayoścellatākaraḥ
unnato dolito'nyastu karṇasthaḥ khaṭakāmukhaḥ

tripatāko'thavā yatra karihastamamuṃ viduḥ
nanvanyahastavatkasmānnātra dvivacanaṃ kṛtam

brūmo yatraikaśabdena sajātīyāvubhau karau
uktau tatra dvivacanaṃ ghaṭavaccaturasravat

bhinnaśabdau vijātīyau yau vā dvivacanaṃ tayoḥ
yathā ghaṭapaṭau syātāmarālakhaṭakāmukhau

karihastākṛtistveko dṛśyate'tra latākaraḥ
itikartavyatā tvanyā syādekavacanaṃ tataḥ

na cātra karihastatvamekaikatra ghaṭatvavat
na cātraikaḥ karī hastaḥ śabdavācyo'paraḥ karaḥ
naikaśeṣo na ca dvaṃdvo yato dvivacanaṃ bhavet

āśritaṃ caikavacanaṃ muninā sarvadarśinā

tripatākau kaṭīśīrṣe nyastāgrau pakṣavañcitau

iti pakṣavañcitau
tau pārśvābhimukhāgrau tu pakṣapradyotakau matau
uttānau kecidanye tūrdhvāṅgulī ca parāṅmukhau
hastau bhaṇanti śobhete caitau prāgbhyāmanantaram

iti pakṣapradyotakau
upavakṣasthalaṃ haṃsapakṣe gacchati pārśvataḥ
savilāso'parastiryakprasṛtaścellatākaraḥ

kramādaṅgāntareṇaivaṃ daṇḍapakṣau tadā karau
hastaprasāraṇaṃ tvatra yugapanmenire'pare

iti daṇḍapakṣau
adhomukhau kaṭikṣetre sthitvā nyañcitakūrparau

patākau tiryagūrdhvaṃ drāggatau garuḍapakṣakau
tripatākāvimau kaiściduktau na tu munermatau

iti garuḍapakṣakau
bhālasthalamurodeśātprāpya tatpārśvamāgatau
maṇḍalabhrāntivitatāvūrdhvamaṇḍalinau karau

lalāṭaprāptiparyantamanye lakṣmānayorjaguḥ
cakravartaniketyetau prasiddhau nṛttavedinām

tau patākākṛtī pārśvanyastāvanyonyasaṃmukhauā!rśvamaṇḍalināvuktāvanye tvāhuḥ svapārśvayoḥ

āviddhabhrāmitabhujau pārśvamaṇḍalināviti
kakṣavartaniketyetau manvate nṛttavedinaḥ

iti pārśvamaṇḍalinau
yugapatkaraṇe kṛtvodveṣṭitaṃ capaveṣṭitam
yātau svapārrśve vakṣasto bhrāntyā maṇḍalavatkramāt

vakṣo'bhivyutkramātprāptāvuromaṇḍalinau karau
anayorbhramaṇaṃ prāhuranye vakṣasthalasthayoḥ

urovartanikātvena prasiddhau tadvidāmimau
haṃsapakṣau pare prāhurūrdhvamaṇḍaliṣu triṣu

ityuromaṇḍalinau
ekatroraḥsthitottāne'nyasminpārśvaprasārite

vyāvartite nālapadmīkṛtvorastho yadā karaḥ
svapārśvaṃ nīyate'nyastūdveṣṭitakriyayā karaḥ

tadaivārālatāṃ prāpya yātyuro maṇḍalākṛtiḥ
anyo'pyevaṃ karābhyāsāduraḥpārśvārdhamaṇḍalau

ityuraḥpārśvārdhamaṇḍalau
ekaṃ vartanayā'rālaṃ tathā'nyamalapallavam
hastaṃ muhuḥ kramātkṛtvā kriyate svastikākṛtī

khaṭakāmukhahastau cenmuṣṭikasvastikau tadā
kapitthau śikharau muṣṭī cātha vā svastikākṛtī

aśliṣṭasvastikau santua vyāvṛttakriyayā karau
iti muṣṭikasvastikau
mithaḥ parāṅmukhau kṛtvā yau kṛtau padmakośakau

nalinīpadmakośau tāvapare tvanyathā jaguḥ
anyonyasaṃmukhau santau saṃśliṣṭamaṇibandhakau

padmakośau pṛthakprāptau vyāvṛttiparivartane
nalinīpadmakośau staḥ ke'pyāhuḥ padmakośayoḥ

vyāvṛttyā parivṛttyā ca jānvantikagatāvimau
skandhayoḥ stanayoryadvā jānunornikaṭaṃ gatau
vivartitau padmakośau tallakṣmetyavadanpare

iti nalinīpadmakośau
udveṣṭitakriyau vakṣaḥkṣetrasthāvalapallavau
skandhāntikamathoptetya prasṛtāvalapadmakau

prasārya skandhayoḥ skandhābhimukhapracalāṅgulī
vartitāvalapadmau cedulbaṇau bhaṇitau tadā

ityulbaṇau
kūrparasvastikayutau latākhyau valitau matau
muṣṭikasvastikau mūrdhni vivṛttau tau pare viduḥ

anye tvācakṣate'nyonyalagnāgrau khaṭakāmukhau
ūrdhvagau pṛṣṭhato namrakūrparau valitau matau

iti valitau
pallavau śīrṣadeśasthau lalitaukalitā budhaiḥ
caturasrīmabhañjantau śirasthāvacalau karau

lalitāvapare prāhuranye tu khaṭakaḥmukhau
śanaiḥ prāpya śiro'nyonyalagnāgrau lalitau viduḥ

iti lalitau
nṛttahastau krameṇāpi prayojyau sūrayo viduḥ

iti triṃśannṛttahastāḥ
patāko madhyamāmūlalagnāṅguṣṭho nikuñcakaḥ
sasvalpābhinaye vedādhyayane ca prayujyate

ityayutahastaḥ
śikharadvaṃdvasaṃyogātkaro dviśikharo mataḥ
śayanārthe'ṅgulisphoṭe strīṇāmanunaye tathā
nāstītyarthaṃ tu saṃyujya viyuktaṃ śikharadvayam

iti saṃyutahastaḥ
pṛthagdakṣiṇavāmau cedvaradābhayadau karau
arālau kaṭipārśvasthau tadoktau varadābhayau

iti nṛttahastau
pradarśanārthamukteyaṃ hastānāṃ saptatirmayā
ānantyādabhineyānāṃ santyanantāḥ pare karāḥ

lokavṛttānusārātte'pyūhyantāmanayā diśā

netrabhrūmukharāgādyairupāṅgairupabṛṃhitāḥ
pratyaṅgaiśca karāḥ kāryā rasabhāvapradarśakāḥ

uttameṣvabhineyeṣu lalāṭakṣetracāriṇaḥ
vakṣaḥsthā madhyameṣu syuradhameṣu tvadhogatāḥ

anyairuktā vyavastheyamuttamādyabhinetṛṣu

uttame saṃnikṛṣṭāḥ syurmadhyame madhyasaṃsthitāḥ
adhame tvabhineye syurviprakṛṣṭacarāḥ karāḥ

alpo hastapracāraḥ syātpratyakṣe bhūrisāttvike
parokṣe pracuraḥ sa syānmadhyame madhyamo mataḥ

kāryāḥ suvyaktalakṣmāṇaḥ pātrairuttamamadhyamaiḥ
sasauṣṭhavāśca nīcaistu pāṇayastadvilakṣaṇam

viṣaṇṇe vyākule bhīte mūrchite tandrayā'nvite
jugupsāśekasaṃtapte supte glāne jaśārdite

rogaśītārtaniśceṣṭasaṃciteṣvapi tāpase
mattonmattapramatteṣu na hastābhinayo bhavet

sūcayantyāntaraṃ bhāvaṃ ye karāḥ karkaṭādayaḥ
viṣaṇṇādiṣvapi prāyaḥ prayojyāste satāṃ matāḥ

iti hastaprakaraṇam
syādakṣaḥ samamābhugnaṃ nirbhugnaṃ ca prakampitam
udvāhitaṃ pañadheti teṣāṃ lakṣmābhidadhmahe

sauṣṭhavādhiṣṭhitaṃ vakṣaścaturasrāṅgasaṃśrayam
prakṛtisthaṃ samaṃ prāhuḥ svabhāvābhinayue ca tat

iti samam
nimnaṃ śithilamābhugnaṃ vakṣaḥ syādgarvalajjayoḥ
śītahṛcchalyayoḥ śoke mūrchabhīsaṃbhrameṣu ca
kāryaṃ vyādhau viṣāde ca brūte śaṃkarakiṃrah

ityābhugnam
nirbhugnaṃ nimnapṛṣṭhatvādunnataṃ stabdhamagrataḥ
māne ca satyavacane stambhe vismayavīkṣite
praharṣabhāṣaṇe garvotseke cedaṃ prayujyate

iti nirbhugnam
prakampitaṃ kampitaṃ syādūrdhvakṣepairnirantaraiḥ
syādbhīhāsaśramaśvāsakāsahikkāsu rodane

iti prakampitam
akampaṃ saralotkṣiptamudvāhitamudīritam
dīrghocchvāse ca jṛmbhāyāmuttuṅgālokane ca tat

ityudvāhitam
vivartitaṃ cāpasṛtaṃ prasāritamatho cāpasṛtaṃ prasāritamatho natam
unnataṃ ceti saṃcakhyuḥ pārśvaṃ pañcavidhaṃ budhāḥ

vivartanāttrikasya syātparāvṛttau vivartitam

iti vivartitam
tannivṛttyā tvapṛsataṃ bhavetpārśvavivartane
ityapasṛtam
prasāritaṃ tūbhayto vistārātsyānmudādiṣu

iti prasāritam
nyañcitāṃsaṃ nitambaṃ tu nataṃ syādupasarpaṇe
iti natam
pārśvaṃ tadviparītaṃ tūnnataṃ syādapasarpaṇe

ityunnatam
kampitodvāhitā chinnā vivṛtā recitā tathā
kaṭī pañcavidhetyuktā tallakṣma vyāhare'dhunā

drutaṃ gatāgate pārśve dadhatī kampitā matā
tāṃ kubjavāmanādīnāṃ gamane viniyuñjate

iti kampitā
śanairuccalitā pārśvadvayenodvāhitā kaṭī
strīṇāṃ līlāgateṣveṣā pīnāṅgānāṃ gatāvapi

ityudvāhitā
chinnā tiryaṅmukhe pātre madhyasya valanātkaṭī
vyāyāme saṃbhrame caiṣā vyāvṛttaprekṣaṇādiṣu

iti cchinnā
parāṅmukhena pātreṇābhimukhaṃ yā vivartitā
vivṛttā sā kaṭī proktā viniyojyā vivartane

iti vivṛttā
sarvato bhramaṇāduktā recitā bhramaṇe bhavet

iti recitā
samo'ñcitaḥ kuñcitaśca sūcyagratalasaṃcaraḥ
udghaṭṭitaśceti muneḥ ṣaḍvidhaścaraṇo mataḥ

trāṭito ghaṭitotsedho ghaṭṭito marditastathā
agragaḥ pārṣṇigaḥ pādaḥ pārśvagaścāparaḥ paraiḥ

iti saptāpare proktāḥ pādāstallakṣaṇaṃ bruve
svabhāvena sthito bhūmau samaḥ pādo'bhidhīyate
svabhāvābhinaye kāryaḥ sthiro'sau recake calaḥ

iti samaḥ
bhūsthapārṣṇiḥ samutkṣiptāgratalaḥ prasṛtāṅguliḥ
añcitaḥ sa bhavetpādāhatibhramaṇakādiṣu

ityañcitaḥ
kuñcitāṅgulirutkṣiptapārṣṇimadhye ca kuñcitaḥ
kuñcitaḥ syādatikrāntakrame tuṅgasya ca grahe

iti kuñcitaḥ
vāmaḥ svābhāviko'nyastu bhuvyaṅguṣṭhāgrasaṃsthitaḥ
utkṣiptetarabhāgaॐ'sau sūcī nūpurabandhane

iti sūcī
yasyotkṣiptā bhavetpārṣṇiraṅguṣṭhaḥ prasṛtastathā
aṅgulyo nyañcitāḥ sa syātpādo'gratalasaṃcaraḥ

preraṇe kuṭṭane sthāne pīḍane bhūmitāḍane
bhūsthāpasārane sa syādrecake bhramaṇe made

ityagratalasaṃcaraḥ
yadi pādatalāgreṇa sthitvā bhūmau nipātyate
asakṛdvā sakṛtpāṣṇirbhavedudghaṭṭitastadā

ityudghaṭṭitaḥ
pārṣṇyā dharāmavaṣṭabhya tāmagreṇa nihanti yaḥ
trāṭitaścaraṇaḥ sa syātprayojyaḥ krodhagarvayoḥ

iti trāṭitaḥ
ghnanmuhurghaṭitotsedho'grapārṣṇibhyāṃ bhuvaṃ kramāt
iti ghaṭitotsedhaḥ
ghaṭṭitaḥ kṣitighātī syātpārṣṇyaṅghriḥ preraṇe ca saḥ

iti ghaṭṭitaḥ
yastiraścā talenorvīṃ pramṛdgāti sa marditaḥ
iti marditaḥ
agrago'gre drutaṃ sarpanprayojyaḥ paṅkilakṣitau

ityagragaḥ
pṛṣṭhato'pasaranpārṣṇyā pārṣṇigaḥ pāda ucyate
iti pārṣṇigaḥ
sthitaḥ pārśve'thavā pārśvaṃ vrajanpārśvaga iṣyate

iti pārśvagaḥ
ekoccau karṇalagnau cocchritau srastau ca lolitau
ityuktau pañcadhā skandhau nāmnaiva vyaktalakṣaṇau

ekoccau kathitau skandhau muṣṭikuntaprahārayoḥ

āśleṣe śiśire cāṃsau karṇalagnau matau satām
ucchritau harṣagarvādau srastau duḥkhe śrame made

mūrchāyāṃ cātha kartavyau lolitau viṭanartane
nṛttajñairgaditau hāsya huḍukkāvādyavādane

iti pañcadhā skandhau
samā nivṛttā valinā recitā kuñcitā'ñcitā

tryasrā natonnatā ceti grīvā navavidhā bhavet
samā svābhāvikī dhyāne jape kārye svabhāvaje

iti samā
grīvā tvabhimukhībhūya nivarteta yadā tadā
nivṛttetyucyate sā syātsvasthānābhimukhādiṣu

iti nivṛttā
pārśvonmukhī tu valitā grīvā bhaṅge tathekṣaṇe
iti valitā
recitā vidhutabhrāntā vartule mathane tathā

iti recitā
ākuñcitā kuñcitā syānmūrdhabhāre svagopane
iti kuñcitā
añcitā prasṛtā lolā keśākarṣe'tha vīkṣaṇe

ityañcitā
tryasrā pārśvagatā khede pārśvekṣāskandhabhārayoḥ
iti tryasrā
natā'vanamrā'laṃkārabandhe kaṇṭhāvalambane

iti natā
unnatordhvanatā grīvā'laṃkārordhvapradarśane

ityunnatā
ūrdhvastho'dhomukhastiryagapaviddhaḥ prasāritaḥ
añcito maṇḍalagatiḥ svastikodveṣṭitāvapi

pṛṣṭhānusārītyudito bāhurdaśavidho budhaiḥ
āviddhaḥ kuñcito namraḥ saralāndolitāvapi

utsārita iti prāhurbāhūnṣaḍaparānpare
śīrṣādūrdhvaṃ vrajanbāhurūrdhvasthastuṅgadarśane

ityūrdhvasthaḥ /
adhomukho mahīśleṣī
ityadhomukhaḥ /
tiryakpārśvagato bhavet //
iti tiryaggataḥ
bāhumaṇḍalavadgatyā vakṣaḥkṣetrādvinirgataḥ

apaviddhaḥ
ityapaviddhaḥ /
athāgradeśamanudhāvanprasāritaḥ //
iti prasāritaḥ
vakṣaḥkṣetrācchiraḥ prapya vakṣaḥ pratyāgato'ñcitaḥ

ityañcitaḥ
ucyate maṇḍalagatiḥ sarvato bhramaṇādbhujaḥ
khaḍgādibhrāmaṇe cāsya viniyogaṃ prapedire

iti maṇḍalagātiḥ
svastiko lagnayorbāhvoḥ pārśvavyatyāsataḥ sthitau
sa syādbhānorupasthāne parirambhe'bhivādane

iti svastikaḥ
niṣkrāmanmaṇibandhasthavartanāmāśrito bhujaḥ

udveṣṭito bhavet
ityudveṣṭitaḥ /
pṛṣṭhānusārī pṛṣṭhato gataḥ
bhavettūṇaśarākarṣe vīṭikāgrahaṇe ca saḥ

iti pṛṣṭhānusārī
āviddho'bhyantarākṣiptaḥ
ityāviddhaḥ
kuñcitastu sa ucyate
yastīkṣṇakūrparaṃ vakrīkṛtaḥ khaḍgādidhāraṇe

prahāre bhojane pāne prokto niḥśaṅkasūriṇā
iti kuñcitaḥ
īṣadvakrastu namro'sau stutau mālyasya dhāraṇe

iti namraḥ
saralaḥ pārśvayorūrdhvamadhastācca prasāritaḥ
syātpakṣānukṛtau māne bhūsthanirdeśane kramāt

iti saralaḥ
gatāvāndolito'nvarthaḥ
ityāndolitaḥ
bāhurutsāritaḥ punaḥ
svapśvamanyato gacchañjanatotsāraṇe bhavet

ityutsāritaḥ
bāhūnāṃ karaṇenātha samastavyastayojanāt
kramāddrutādivaicitryājjāyante'tra sahasraśaḥ
vartanāścaturairūhyāstāḥ śobhābharasaṃbhṛtāḥ

te reṣāmanatikramya bhūribhaṅgibhṛto bhujāḥ
recyante yadi lakṣajñaiścālakāḥ kīrtitāstadā

otāvatsarigoṇīnāṃ padasya malapasya ca

gajaropaśamasyānte khaṇḍe'pyelādigāmini
sālagasthadhruvādyante yacca praharaṇaṃ bhavet

tadantakhaṇḍe'nyatrāpi proddhate tuṇḍakaiśike
kavite'pi prayojyāste nānyatretyūcire pare

iti bāhuprakaraṇam
pṛṣṭhaṃ tu jaṭharoktābhirvartanābhirvivartate
ato na tatpṛthagvācyaṃ jaṭharaṃ tūcyate'dhunā

kṣāmaṃ khallaṃ tathā pūrṇaṃ tredhā jaṭharamiṣyate
kṣāmaṃ syānnamanājjṛmbhāhāsyaniśvāsarodane

iti kṣāmam
nimnaṃ khallaṃ kṣudhārte syādāture śramakarśite
vetālabhṛṅgiriṭyādijaṭharākāradhāri tat

iti khallam
pūrṇaṃ sthūlaṃ vyādhite syāttundile'tyaśite tathā
iti pūrṇam
anye'nvarthaṃ riktapūrṇaṃ śvāsaroge'paraṃ jaguḥ

iti riktapūrṇam
kampito valitaḥ stabdhodvatitau ca nivartitaḥ
ityūruḥ pañcadhā tatra muhuḥ pārśve natonnate
yasyāsau kampito jñeyo'dhamānāṃ gamane ca saḥ

iti kampitaḥ
valito'ntargate jānunyūruḥ svairagatau striyāḥ

iti valitaḥ
stabdhastu niṣkriyaḥ sa syādviṣāde sādhvase tathā
iti stabdhaḥ
pārṣṇerantarbahiḥkṣepātkṣepādagratalasya ca
muhurudvartitaḥ sa syādvyāyāme tāṇḍave tathā

ityudvartitaḥ
nivartito'ntargatayā pārṣṇyā syātsaṃbhrame śrame
iti nivartitaḥ
āvartitā natākṣiptodvāhitā parivartitā
iti pañcavidhā jaṅghā śārṅgadevena kīrtitā

niḥsṛtā ca parāvṛttā tiraścīnā bahirgatā
kampitetyaparāḥ pañca jaṅghāḥ saṃcakṣate pare

vāme dakṣiṇataḥ pāde dakṣiṇe vāmataḥ kṛte
muhurāvartitā proktā vidūṣakaparikrame

ityāvartitā
namajjānurnatā jaṅghā sthānāsanagatādiṣu
iti natā
bahirvikṣepataḥ kṣiptā vyāyāme tāṇḍave ca sā

iti kṣiptā
ūrdhvaṃ nītodvāhitā syādāviṣṭagamanādiṣu
ityudvāhitā
pratīpaṃ gacchato jaṅghā tāṇḍave parivartitā
iti parivartitā
puraḥ prasāritā jaṅghā niḥsṛtā parikīrtitā

iti niḥsṛtā
paścādgatā parāvṛttā bhūmilagnena jānunā
vāmena pitṛkārye syādanyena surakarmaṇi

iti parāvṛttā
bhūmilagnabahiḥpārśvā tiraścīnā''sane matā
iti tiraścīnā
bahirgatā matā jaṅghā nṛtte pārśvaprasāritā

iti bahirgatā
kampanātkampitā bhītau kāryā ghargharikā dhvanau
iti kampitā
pañcadhā maṇibandhaḥ syānnikuñcākuñcitau calaḥ

bhramitaḥ sama ityatra nikuñcastu sa ucyate
yo bahirnimnatāṃ nītaḥ sa dānābhayadānayoḥ

iti nikuñcaḥ
ākuñcito'ntarnimno'sau kāryo'pasaraṇe budhaiḥ
ityākuñcitaḥ
nikuñcā kuñcitābhyāsāccalamāvāhane viduḥ

iti calaḥ
bhramito bhramaṇātkhaḍgacchurikābhrāmaṇādiṣu
iti bhramitaḥ
ṛjuḥ samaḥ pustakasya dhāraṇe ca pratigrahe

iti samaḥ
saṃhataṃ kuñcitaṃ cārdhakuñcitaṃ natamunnatam
vivṛtaṃ samamityūce jānu saptavidhaṃ budhaiḥ
śliṣṭānyajānu jānūktaṃ hīroṣerṣyāsu saṃhatam

iti saṃhatam
jānu lagnorujaṅghaṃ tu bhavetkuñcitamāsane
iti kuñcitam
nitambanamanājjānu tvardhakuñcitamucyate
ityardhakuñcitam
mahīgataṃ nataṃ jānu mataṃ pāte namaskṛtau

iti natam
stanakṣetrāgataṃ jānūnnataṃ śailādirohaṇe
ityunnatam
gajārohe tu vivṛtaṃ jānudvaṃdvaṃ bahirgatam
iti vivṛtam
samaṃ svābhāvikaṃ jānu svabhāvāvasthitau bhavet

iti samam
tattadveśajuṣo bhūṣā bhūṣaṇānīti manvate

iti nava pratyaṅgāni
kāntā hāsyā ca karuṇā raudrī vīrā bhayānakā
bībhatsā cādbhutetyaṣṭau draṣṭavyā rasadṛṣṭayaḥ

snigdhā hṛṣṭā tathā dīnā kruddhā dṛptā bhayānvitā
jugupsitā vismiteti dṛśo'ṣṭau sthāyibhāvajāḥ
sthāyiṣvavyabhicāritvaṃ prāpteṣu sthāyidṛṣṭayaḥ

śūnyā ca malinā śrāntā lajjitā śaṅkitā tathā
mukulā cārdhamukulā glānā jihmā ca kuñcitā

vitarkitā'bhitaptā ca viṣaṇṇā lalitābhidhā
ākekarā vikośā ca vibhrāntā viplutā parā

trastā ca madiretyetā vyabhicāriṣu viṃśatiḥ
sarvāstā militāḥ satyaḥ ṣaṭtriṃśaddṛṣṭayo matāḥ

āpibantīva dṛśyaṃ yā savikāsā'tinirmalā
sabhrūkṣepakaṭākṣā sā kāntā manmathavardhinī

yadgatāgataviśrāntivaicitryeṇa vivartanam
tārakāyāḥ kalābhijñāstaṃ kaṭākṣaṃ pracakṣate

iti kāntā
kiṃcidantaḥsamāviṣṭavicitrabhrāntatārakā

ākuñcitapuṭā mandamadhyatīvratayā kramāt
vismāpane'bhinetavye hāsyā dṛṣṭiḥ praśasyate

iti hāsyā
patitordhvapuṭā sāsrā śokamantharatārakā
nāsāgramevānugatā karuṇādṛṣṭirucyate

iti karuṇā
cakitadvipuṭā stabhdatārakā'tyantalohitā
rūkṣā bhrukuṭibhīmogrā raudrī dṛṣṭirudāhṛtā

iti raudrī
acañcalā vikasitā gambhīrā samatārakā
dīptā saṃkucitāpāṅgā vīrā dhīrairudāhṛtā

audāryadhairyagāmbhīryamādhuryalalitānyapi
tejaḥśobhāvilāsāṃśca sapta bhedānvivṛṇvatī

iti vīrā
stabdhodvṛttapuṭā'tyantacañcalodvṛttatārakā
dṛśyātpalāyamāne ca bhītyā dṛṣṭirbhayānakā

iti bhayānakā
bībhatsā syānmilallolapakṣmā taralatārakā
dṛśyodvegādapāṅgau ca nikuñcitapuṭau śritā

iti bībhatsā
prasannā snigdhaśuklāṃśāntarbahirgāmitārakā
īṣatkuñcitapakṣmāgrā'dbhutāpāṅgavikāsinī

ityadbhutā raseṣvaṣṭāsu śṛṅgārapramukheṣu kramādimāḥ

ityaṣṭau rasadṛṣṭayaḥ
rasadṛṣṭirbhavedbhāvadṛṣṭirbhāvairanulbaṇaiḥ
vikāsisnigdhā madhurā cature bibhratī bhruvau

kaṭākṣiṇī sābhilāṣā dṛṣṭiḥ snigdhā'bhidhīyate
atraikabhrūsamutkṣepamāhuḥ kīrtidharādayaḥ

iti snigdhā
phullagallā viśattārā kiṃcidākuñcitā calā
nimeṣiṇī smitākārā hṛṣṭā dṛṣṭirudāhṛtā

iti hṛṣṭā
yā tvardhapatitordhvasthapuṭeṣadruddhatārakā
sabāṣpā mandasaṃcārā dīnā dṛṣṭirasau matā

iti dīnā
sthirodvṛttapuṭāṃ rūkṣāṃ kiṃcittaralatārakām
bhrukuṭīkuṭilāṃ dṛṣṭiṃ kruddhāṃ brūte harapriyaḥ

iti kruddhā
sattvamudgiratī dṛṣṭirdṛptā vikasitā sthirā

iti dṛptā
madhyanirgamanodyuktā bhāvavisphāritau puṭau
tārake kampite yasyāḥ sā syādṛṣṭirbhayānvitā

iti bhayānvitā
aspaṣṭālokinī mīlattārakā saṃkucatpuṭā
dṛśyaṃ dṛṣṭvā samudvignā dṛṣṭiruktā jugupsitā

iti jugupsitā
dūravisphāritākārapuṭadvaṃdvavikāśinī
niścalā dṛṣṭirudbṛttatārakā vismitā smṛtā

iti vismitā
dṛṣṭayo'ṣṭāsu ratyādisthāyibhāveṣvimāḥ kramāt
ityaṣṭau sthāyibhāvadṛṣṭayaḥ
samatārāpuṭā dṛśyadṛṣṭiśūnyā vilokinī
niṣkampā dhūsarā śūnyā cintāyāṃ dṛṣṭiriṣyate

iti śūnyā
dṛśyādapasṛte tāre kiṃcinmukulitau puṭau
dadhatyapāṅgau vicchāyau pakṣmāgrasyandanaṃ tathā

dṛṣṭiḥ syānmalitā strīṇāṃ vihṛte sā prayujyate
prāpte kāle'pyasaṃlāpaḥ priyeṇa vihṛtaṃ matam

iti malinā
udūrālokinī mlānapuṭā'pyalasacāriṇī
patattārā manākkuñcatprāntā śrāntā śrame matā

iti śrāntā
mitho'bhigāmipakṣmāgrā'pyadhastādgatatārakā
patitordhvapuṭā dṛṣṭirlajjāyāṃ lajjitā matā

iti lajjitā
muhuścalasthirā pārśvālokinī bahirunmukhī
gūḍhāvalokinī śīghraṃ vinivṛttā vilokanāt
śaṅkāyāṃ śaṅkitā dṛṣṭiruktā niḥśaṅkasūriṇā

iti śaṅkitā
sphuratsaṃśliṣṭapakṣmāgrā sukhaviśrāntatārakā
mukulā dṛṣṭirānande hṛdyayoḥ sparśagandhayoḥ

iti mukulā
ardhavyākośite kiṃciddhamantyau tārake puṭau
yatrārdhamīlitau sā'rdhamukulārthe sukhaprade

ityardhamukulā
majjattārā mandacārā śithilā vikalairiva
pakṣmāgrabhrūpuṭairyuktā glānā glānau vidhīyate

kiṃcitkuñcatpuṭā gūḍhapatattārā vilokane

śanaistiryaṅnigūḍhaṃ yā sā jihmā viniyujyate
asūyāyāṃ nigūḍhe'rthe jaḍatālasyayorapi

iti jihmā
kiṃciccetkuñcitāni syuḥ pakṣmāgrāṇi puṭāvapi
samyakca kuñcitā tārā tadā dṛkkuñcitocyate
aniṣṭe sūcite tejo duṣprekṣye'kṣivyathāsu sā

iti kuñcitā
uddhāmitapuṭotphullatārā'dhaḥsaṃcarantyapi
vitarkitoditā dṛṣṭirvitarke sā'bhidhīyate

iti vitarkitā
vilokanālase tāre vyathāpracalitau puṭau

yasyāḥ saṃtaptavadbhānti sā'bhitaptā'bhidhīyate
nirvede veditavyā sā'pyabhighātopatāpayoḥ

ityabhitaptā
yā dṛṣṭiḥ patitāpāṅgā vistāritapuṭadvayā
nimeṣiṇī stabdhatārā viṣaṇṇā sā viṣādinī

iti viṣaṇṇā
madhurā kuñcitāpāṅgā sabhrūkṣepā smitānvitā
manmathonmathitā dṛṣṭirlalitā lalite matā

iti lalitā
kiṃcitkuñcatpuṭāpāṅgā dṛṣṭirardhanimeṣiṇī
pṛthakpathe cānyanetrānmuhustārāvivartinī
ākekarā durāloke syādvicchande ca vastuni
ityākekarā
vikāsitapuṭadvaṃdvā vikāsinyanimeṣiṇī
anavasthitatārā ca vikośā kīrtitā budhaiḥ

jñānavijñānagarve sā syādamarṣogradarśane

iti vikośā
yā tu kvacitaviśrāntamavisrabdhaṃ vilokate
vistīrṇā cañcalotphullatārā sā dṛṣṭirucyate
vibhrāntā vibhrame vege saṃbhrame ca bhavedasau

iti vibhrāntā
puṭau visphui! stabdhau yasyāḥ staḥ patitau kramāt
sā viplutā''rtiduḥkhādāvunmāde cāpale tathā

iti viplutā
utkampotphullatārā syāttrāse trastoddhamatpuṭā

iti trastā
madirā trividhā proktā taruṇe madhyame'dhame
made prayogamarhantī tattallakṣmasamanvitā

tīvro mado'dhamo'tra syādadhame puruṣe sthitaḥ
dṛṣṭirvikasitāpāṅgā kṣāmībhūtavilocanā
āghūrṇamānatārā syānmadirā taruṇe made

kiṃcitkuñcatpuṭā kiṃcidanavasthitacāriṇī
dṛṣṭiḥ kiṃciddhamattārā madirā madhyame made

adhobhāgacarī kiṃciddṛṣṭatārā nimeṣiṇī
yannetrasidhyanunmeṣā madirā cādhame made

iti trividhā madirā
pradarśanārthamityuktāḥ ṣaṭtriṃśaddṛṣṭayo mayā
anantāḥ santi saṃdarbhāddhṛtārāpuṭakarmaṇām

dṛṣṭayastā virañco'pi pratyekaṃ vaktumakṣamaḥ
lāghavāttatprabodhārthaṃ brūmo bhrūprabhṛtīnyataḥ

iti dṛṣṭiprakaraṇam
sahajā patitotkṣiptā recitā kuñcitā tathā
bhrukuṭī caturā ceti proktā bhrūḥ saptadhā budhaiḥ
svābhāvikī syātsahajā bhāveṣvakuṭileṣvasau

iti sahajā
patitā syādadho yātā sadvitīyā'thavā kramāt
utkṣepe vismaye harṣe roṣe'sūyājugupsayoḥ
hāse ghrāṇe ca patite vidhīyetāmubhe bhruvau

iti patitā
utkṣiptā saṃmatā'nvarthā krameṇa saha cānyathā
strīṇāṃ kope vitarke ca darśane śravaṇe nije
bhrūrlīlāhelayoścaiṣā kāryotkṣiptā vicakṣaṇaiḥ

ityutkṣiptā
ekaiva lalitotkṣiptā recitā nṛttagocarā

iti recitā
kevalā sadvitīyā vā mṛdubhaṅgā nikuñcitā
moṭṭāyite kuṭṭamite vilāse kilakiñcite

iti nikuñcitā
āmūlātsadvitīyā bhrūrutkṣiptā bhrukuṭī krudhi

iti bhrukuṭī
sadvitīyā'lpakasyandādāyatā mantharā bhavet
caturā rucire sparśe śṛṅgāre lalite ca sā

iti caturā
prasṛtau kuñcitau syātāmunmeṣitanimeṣitau
vivartitau ca sphuritau pihitau ca vitālitau

samau ca navadhetyuktau puṭau soḍhalasūnunā
āyatau prasṛtau syātāṃ vīre harṣe ca vismaye

iti prasṛtau
ākuñcitau kuñcitau sto rūpādau ca manohare
iti kuñcitau
unmeṣitau tu viśleṣātsaṃśleṣāttu nimeṣitau
vivartitau samudvṛttau trayo'mī krodhagocarāḥ

ityunmeṣitanimeṣitavivartitāḥ
sphuritau spanditau syātāṃ tāvīrṣyāviṣayau matau

iti sphuritau
atīva kuñcitau lagnau pihitau tau dṛśo ruji
suptimūrchātivarṣoṣṇadhūmavātāñjanārtiṣu

iti pihitau
uttareṇādharāghātādabhighāte vicālitau
āhuranye tvadṛśyau tāviti visphāraṇātpuṭau
iti vicālitau
samau svābhāvikāvetau svabhāvābhinaye matau

iti samau
karmabhistārakābhedā yaiḥ syustānyadhunā bruve
tāni dvedhā svaniṣṭhāni viṣayābhimukhāni ca

bhramaṇaṃ valanaṃ pātaścalanaṃ ca praveśanam
vivartanaṃ samudvṛttaṃ niṣkrāmaḥ prākṛtaṃ tathā

svaniṣṭhāni navetyāhustārākarmāṇi sūrayaḥ
tārayormaṇḍalabhrāntiḥ puṭāntarbhramaṇaṃ matam

valanaṃ tryasragamanaṃ pātastu syādadhogatiḥ
calanaṃ kampanaṃ proktamatha jñeyaṃ praveśanam

praveśaḥ puṭayorantaḥkaṭākṣastu vivartanam
udgatistu samudvṛttamantarā nirgamastu yaḥ

sa niṣkrāmaḥ prākṛtaṃ tu svabhāvasthitirucyate
samudvṛtaṃ ca valanaṃ bhramaṇaṃ vīraraudrayoḥ

pātastu karuṇe kāryaścalanaṃ tu bhayānake
praveśanaṃ tu bībhatse hāsye tu syādvivartanam

śṛṅgāre syāttu niṣkrāmo vīre raudre bhayānake
adbhute ca prākṛtaṃ tu bhāvenā''veśabhāgini

iti nava svaniṣṭhāni tārākarmāṇi
viṣayābhimukhānyaṣṭau tārākarmāṇyatha bruve

samaṃ sācyanuvṛttāvalokitāni vilokitam
ullokitālokite ca pravilokitamityapi

etāni darśanānyāhurlakṣyalakṣmavicakṣaṇāḥ
saumyaṃ madhyasthatāraṃ ca darśanaṃ samamucyate

iti samam
sācyucyate tiraścīnapakṣmāntargatatārakam
iti sāci
rūpanirvarṇanāyuktamanuvṛttaṃ mataṃ muneḥ
nirvarṇanā kriyākārtsnyadidṛkṣā'ntaścirasthirā

ityanuvṛttam
adhasthadarśanaṃ yattadavalokitamucyate
ityavalokitam
pṛṣṭhato darśanaṃ yattadvilokitamudāhṛtam

iti vilokitam
ullokitaṃ tadūrdhvasthavastuno yadavekṣaṇam
ityullokitam
sahasā darśanaṃ yattadālokitamudīritam

ityālokitam
pārśvasthadarśanaṃ proktaṃ kṛtibhiḥ pravilokitam
iti pravilokitam
sādhāraṇānyamūnyāhū rasabhāveṣu tadvidaḥ

ityaṣṭau darśanāni
kuñcitau kampitau pūrṇau kṣāmau sphullau samau tathā
kapolau ṣaḍvidhāvuktau tallakṣaṇamathocyate

saṃkocātkuñcitau romāñcitau śītajvare bhaye
iti kuñcitau
sphuritau kampitau kāryau romaharṣeṣu sūribhiḥ

iti kampitau
kapolāvunnatau pūrṇau tau garvotsāhagocare
iti pūrṇau
kṣāmau tvavanatau jñeyau duḥkhe kāryāvimau naṭaiḥ
iti kṣāmau
gaṇḍau vikasitau phullau praharṣe parikīrtitau
iti phullau
samau svābhāvikau bhāveṣvanāveśeṣu tau matau

iti samau
svābhāvikī natā mandā vikṛṣṭā ca vikūṇitā

socchvāsetyuditā nāsā ṣaḍvidhā sūriśārṅgiṇā
svābhāvikī syādanvarthā bhāveṣvāveśavarjitā

iti svābhāvikī
muhuḥ saṃśliṣṭaviśliṣṭapuṭā nāsā natā matā
socchvāsābhinaye mandavicchinnarucigocare

iti natā
mandā tu mandaniśvāsocchvāsā nāsā'bhidhīyate
sā cintautsukyayoḥ śoke nirvede ca vidhīyate

iti mandā
vikṛṣṭā'tyantamutphullapuṭā roṣārtibhītiṣu
ūrdhvaśvāse ca kartavyā ghrātavye bhūrisaurabhe

iti vikṛṣṭā
vikūṇitā saṃkucitā hāsye'sūyājugupsayoḥ

iti vikūṇitā
ākṛṣṭaśvasanā nāsā socchvāsā saurabhe bhavet
nirvedādiṣu bhāveṣu dīrghocchvāsakareṣu ca

iti socchvāsā
svasthau calau pravṛddhaśca nirastollāsitāvapi
vimukto vismitaḥ śvāsaḥ skhalitaḥ prasṛtastathā

evamucchvāsaniśvāsau navadhā kohaloditau
samo bhrānto vilīnaścā''ndolitaḥ kampito'paraḥ

stambitocchvāsaniśvāsasūtkṛtāni ca sītkṛtam
evaṃ daśavidhaḥ prokto lakṣyajñairmāruto'paraiḥ

svasthāvucchvāsaniḥśvāsasaṃjñau vāyū svabhāvajau
svasthakriyāsu kartavyāvuktau niḥśaṅkasūriṇā

iti svasthau
uṣṇau dīrghau saśabdau ca tau mukhena kṛtau calau
kāryāvautsukyanirvedaśokacintāsvimau matau

iti calau
pravṛddhaḥ sansaśabdena vadanena vinirgataḥ
niḥśvāsaḥ syātpravṛddhākhyaḥ kṣayavyādhyādigocaraḥ

iti pravṛddhaḥ
saśabdaḥ sansakṛtkṣipto nirastaḥ kathyate marut
duḥkhānvite sarāge ca śānte caiṣa vidhīyate

iti nirastaḥ
cirānmandaṃ nipītastu ghrāṇenollāsito marut
hṛdye gandhe vidhātavyaḥ saṃdigdhe ca vicakṣaṇaiḥ

ityullāsitaḥ
saṃyamya suciraṃ mukto vimuktaḥ kathyate'nilaḥ
yoge dhyāne ca sa proktaḥ prāṇāyāme ca sūribhiḥ

iti vimuktaḥ
cittasyānyaparatvena yaḥ prayatnena vartate
sa vismito vismaye syādudbhūte vā'rthacintane

iti vismitaḥ
mahattvādduḥkhaniṣkrāntaḥ kathitaḥ skhalito'nilaḥ
syāddaśamyāṃ daśāyāṃ sa vyādhau praskhaliteṣu ca

iti skhalitaḥ
prasupte prasṛto dīrghaḥ saśabdo nirgato mukhāt

iti prasṛtaḥ
samo'tra svasthaparyāyo bhrānto'ntarbhramaṇānmarut
anye tvanvarthanāmānastatra sūtkṛtasītkṛte

śabdānukaraṇe vaktratyājyagrāhye'nile kramāt
samaḥ svābhāviko bhrāntaḥ prathame priyasaṃgame

vilīno mūrchite śailārohe tvāndolito mataḥ
kampitaḥ surate śastramokṣādau stambhito bhavet

ucchvāsaḥ kusumāghrāṇe niḥśvāso'nuśayādiṣu
sūtkṛtaṃ vedanādau syācchīte kleśe tu sītkṛtam

nakhakṣate mṛgākṣīṇāṃ nirdayādharacarvaṇe
viniyogāntarāṇyatra budhyatāṃ lokato budhāḥ

iti matāntareṇa daśadhā śvasanaḥ
vivartitaḥ kampitaśca visṛṣṭo vinigūhitaḥ
saṃdṛṣṭakaḥ samudgaścetyadharaḥ ṣaḍvidho mataḥ

anye'nyānūcurudvṛttavikāsyāyatarecitān
oṣṭhayoḥ saṃpuṣṭastiryaksaṃkocena vivartitaḥ
avajñāvedanāsūyāhāsyādiṣu vidhīyate

iti vivartitaḥ
vyathāyāṃ kampito'nvartho bhītau śīte jape ruṣi

iti kampitaḥ
visṛṣṭaḥ syādviniṣkrānto rañjane'laktavādinā
strīṇāṃ vilāse vivvoke śārṅgidevena śīrtitaḥ

mukhāntarnihitaḥ prāṇasādhye'rthe vinigūhitaḥ
roṣerṣyayośca nārīṇāṃ balāccumbati vallabhe

iti vinigūhitaḥ
saṃdaṣṭako'dharo dantairdaṣṭaḥ krodhe vidhīyate

iti saṃdaṣṭakaḥ
samudgastu bhavedoṣṭhasaṃpuṭo dadhadunnatim
syātphūtkāre'nukampāyāṃ cumbane cābhinandane

iti samudgaḥ
āsyotkṣiptatayodvṛttaḥ so'vajñāparihāsayoḥ
ityudvṛttaḥ
īṣadvṛśyordhvadaśano vikāsī sa smite smṛtaḥ

iti vikāsī
sa sārdhamuttaroṣṭhena tataḥ syādāyataḥ smite
ityāyataḥ
paryantaṃcalanādukto vilāse recito'dharaḥ

iti recitaḥ
dantakarmāṇi vakṣyāmo dantalakṣaṇasiddhaye
kuṭṭanaṃ khaṇḍanaṃ chinnaṃ cukkitaṃ grahaṇaṃ matam

daṣṭaṃ niṣkarṣaṇaṃ ceti dantakarmāṣṭakaṃ jaguḥ
saṃgharṣaṇaṃ kuṭṭanaṃ syācchītarugbhījarāsu tat

iti kuṭṭanam
khaṇḍanaṃ tu muihurdantaśleṣaviśleṣaṇaṃ matam
japādhyayanasaṃlāpabhakṣaṇeṣu bhavedidam

iti khaṇḍanam
chinnaṃ syādgāḍhasaṃśleṣo rodane bhītiśītayoḥ
vyādhau ca vīṭikācchedavyāyāmādiṣu kīrtitam

iti cchinnam
dantapaṅktyoḥ sthitirdūre cukkitaṃ jṛmbhaṇādiṣu
iti cukkitam
tṛṇasya cāṅgulairdante dhāraṇaṃ grahaṇam bhaye

iti grahaṇam
kiṃcicchleṣaḥ samaṃ tacca svabhāvābhinaye matam

iti samam
adhare daṃśanaṃ dantairdaṣṭaṃ krodhe'bhidhīyate
iti daṣṭam
niṣkarṣaṇaṃ tu niṣkāsaḥ kāryaṃ markaṭarodane

iti niṣkarṣaṇam
ṛjvī ṛkvānugā vakronnatā lolā'valehinī

jihveti ṣaḍvidhā tatra prasṛtāsye prasāritā
ṛjvī śrame pipāsāyāṃ śvāpadānāṃ prayujyate

iti ṛjvī
sṛkkānugā līḍhasṛkkā prakopasvādubhakṣayoḥ
iti sṛkkānugā
vyāttāsyasthonnatāgrā ca vakrā nṛharirūpaṇe

iti vakrā
vyāttāsyasthonnatā'nvarthā jṛmbhāsyāntasthavīkṣayoḥ

ityunnatā
vyātte vaktre calā lolā vetālābhinaye bhavet
iti lolā
dantoṣṭhaṃ lihatī jihvā lehinī saṃmatā muneḥ

iti lehinī
jihvoṣṭhadantakriyayā civukaṃ lakṣyate tataḥ
uktaprāyaṃ sukhārthaṃ tu vakṣye lakṣyānusārataḥ

vyādīrṇaṃ śvasitaṃ vakraṃ saṃhataṃ calasaṃhatam
sphuritaṃ calitaṃ lolamevaṃ cibukamaṣṭadhā
vyādīrṇaṃ dūraniṣkrāntaṃ jṛmbhālasyādiṣu smṛtam

iti vyādīrṇam
ekāṅgulamadhaḥsrastaṃ śvasitaṃ vīkṣite'dbhute
iti śvasitam
vakraṃ tiryaṅnataṃ tattu grahāveśe vidhīyate

iti vakram
niścalaṃ mīlitamukhaṃ maune saṃhatamipyate
iti saṃhatam
saṃlagnauṣṭhaṃ calaṃ nārīcumvane calasaṃhatam

iti calasaṃhatam
kampitaṃ sphuritaṃ prāhuḥ śīte śītajvare tathā
iti sphuritam
calitaṃ śliṣṭaviśliṣṭaṃ vākstambhe kṣobhakopayoḥ
iti calitam
romanthe kevalāvarte lolaṃ tiryaggatāgatam

iti lolam
vyābhugnaṃ bhugnamudvāhi vidhutaṃ vivṛtaṃ tathā
vinivṛttamiti prājñāḥ ṣaḍvidhaṃ vadanaṃ jaguḥ

kiṃcidāyāmivakraṃ ca vyābhugnaṃ mukhamucyate
nirvedautsukyacintādau taduktaṃ pūrvasūribhiḥ

iti vyābhugnam
adhomukhaṃ tu bhugnaṃ tallajjāyāṃ prakṛtau yateḥ
iti bhugnam
līlāsūtkṣiptamudvāhi garvānādarato gatau

ityudvāhi
vāraṇe naivamityuktau vidhutaṃ tiryagāyatam
iti vidhutam
viśliṣṭauṣṭaṃ tu vivṛtaṃ hāsyaśokabhayādiṣu

iti vivṛtam
vinivṛttaṃ parāvṛttaṃ roṣerṣyāsūyiteṣu tat

iti vinivṛttam
iti dvādaśa śirogatānyupāṅgāni
utkṣiptā patitotkṣiptapatitā'ntargatā tathā
bahirgatā mitho yuktā viyuktā'ṅgulisaṃgatā
pārṣṇirityaṣṭadhā pādacārī sthāneṣu dṛśyate

gullphāvaṅguṣṭhasaṃśliṣṭāvantaryātau bahirgatau
mitho yuktau viyuktau ca pañcadhā sthānakādiṣu

saṃhatā viyutā vakra valitāḥ patitāstathā

kuñcanmūlāḥ kare'ṅgulyaḥ prasṛtāśceti saptadhā
ete pārṣṇyādibhedāḥ syuḥ saṃjñāvijñānalakṣaṇāḥ

adhaḥ kṣiptāstathotkṣiptāḥ kuñcitāśca prasāritāḥ
saṃlagnāśceti caraṇāṅgulayaḥ pañcadhā matāḥ

muhuḥ pātādadhaḥ kṣiptā vivvoke kilakiñcite
utkṣiptā muhurutkṣepānnavoḍhāyāstrapābhare

saṃkocātkuñcitāḥ śītamūrchātrāsagrahārdite
prasāritā ṛjustabdhā stambhe svāpe'ṅgamoṭane

aṅguṣṭhasyāpyamī bhedā jñātavyā nṛttakovidaiḥ
svāṅguṣṭhāsu mitho lagnāḥ saṃlagnā gharṣaṇe matāḥ

patitāgraṃ coddhṛtāgraṃ bhūmilagnamathoddhṛtam
kuñcanmadhyaṃ tiraścīnamiti ṣoḍhā talaṃ viduḥ

iti pārṣṇigulphāṅgulitalāni karacaraṇopāṅgāni /
vivṛṇoti manovṛttiṃ mukharāgo rasātmikām
ato rasopayogitvānmukharāgo'bhidhīyate

svābhāvikaḥ prasannaśca raktaśyāmo'parastathā
caturdhā mukharāgo'trānvarthaḥ svābhāviko mataḥ

anāviṣṭeṣu bhāveṣu sudhībhiḥ sa vidhīyate
iti svābhāvikaḥ
prasanno nirmalo hāsye śṛṅgāre cādbhute bhavet

iti prasannaḥ
rakto'ruṇaḥ syātkaruṇe raudre vīre'dbhute tathā
iti raktaḥ
anvartho bhavati śyāmaḥ sa bībhatse bhayānake

iti śyāmaḥ
śaśineva diśo'ṅgāni śobhante mukharāgataḥ

rasabhāvāntare netramanyadanyatkṣaṇe kṣaṇe
yathātathocitaḥ kāryo mukharāgo rase rase

iti caturdhā mukharāgaḥ
uttāno'dhomukhaḥ pārśvagataḥ pāṇiriti tridhā

pracāraṃ bharatā mene pañcadhā tvapare jaguḥ
agrago'dhastalaśceti dvau trayaśca puroditāḥ

tatra tvagraga uttāno'dhomukho'dhastalaḥ karaḥ
antarbhūtaṃ vadanbhaṭṭastritvameva samādadhe

uttāno'dhomukhaḥ pārśvagato hasto'gratastalaḥ
svasaṃmukhatalaścordhvamukho'dhovadanastathā

parāṅmukhaḥ saṃmukhaśca hasto'nyaḥ pārśvatomukhaḥ
ūrdhvago'dhogataḥ pārśvagato hasto'grago'paraḥ

saṃmukhāgata ityetānpracārāndaśa pañca ca
lakṣyalakṣaṇatattvajñaḥ śārṅgadevo'bhyabhāṣata

iti pañcadaśa hastapracārāḥ
niṣpattau nirapekṣāyāṃ karasyābhinayāya yaḥ
kriyāviśeṣaḥ kriyate taddhastakaraṇaṃ matam

āveṣṭitodveṣṭite ca vyāvartitamataḥ param
parivartitamityetaccaturdhā dhīrasaṃmatam

tarjanyādyaṅgulīnāṃ yadbhavedāveṣṭanaṃ kramāt
talasaṃmukhamāvakṣaḥ karo'pyāyāti pārśvataḥ
tadāveṣṭitamākhyātaṃ karasya karaṇaṃ budhaiḥ

yattu krameṇa niryāṇamaṅgulīnāṃ talādbahiḥ
vakṣaḥsthalātkarasyāpi tadudveṣṭitamucyate

āveṣṭitaprakriyayā kāryamāvartitaṃ kare
udveṣṭitena vyākhyātaṃ karaṇaṃ parivartitam

kiṃtvetatkaraṇadvaṃdvaṃ kaniṣṭhādyaṅgulīkṛtam

iti catvāri karakaraṇāni
dhūnanaṃ śleṣaviśleṣau kṣepo rakṣaṇamokṣaṇe
parigraho nigrahaścotkṛṣṭākṛṣṭivikṛṣṭayaḥ

tāḍanaṃ tolanaṃ chedabhedau sphoṭanamoṭane
syādvisarjanamāhvānaṃ tarjanaṃ ceti viṃśatiḥ
karakarmāṇi nṛttajñairanvarthāni babhāṣire

iti viṃśatiḥ karakarmāṇi
pārśvadvayaṃ purastācca paścādūrdhvamadhaḥ śiraḥ

lalāṭakarṇaskandhoronābhayaḥ kaṭiśīrṣake
ūrudvayaṃ ca hastānāṃ kṣetrāṇīti caturdaśa

iti hastakṣetrāṇi
karaṇaiḥ karaṇātīto'naṅgahāro'ṅgahārakaiḥ
yaḥ sthāṇū rodasīraṅge nṛtyatīśaṃ namāmi tam

syātkriyā karapādādervilāsenātruṭadrasā

karaṇaṃ nṛttakaraṇaṃ bhīmavadbhīmasenavat
prabhedānkaraṇasyāsya brūmahe bharatoditān

talapuṣpapuṭaṃ līnaṃ vartitaṃ ca litoru ca
maṇḍalasvastikaṃ vakṣaḥsvastikākṣiptarecite

svastikānyardhadikpṛṣṭhādyāni svastikamañcitam
apaviddhaṃ samanakhonmatte svastikarecitam

nikuṭṭārdhanikuṭṭe ca kaṭīchinnaṃ kaṭīsamam
bhujaṃgatrāsitālātabikṣiptākṣiptakāni ca

nikuñcitaṃ ghūrṇitaṃ syādūrdhvajānvardharecitam
mattalli cārdhamattalli syādrecakanikuṭṭakam

lalitaṃ valitaṃ daṇḍapakṣaṃ pādāpaviddhakam
nūpuraṃ bhramaraṃ chinnaṃ bhujaṃgatrastarecitam

bhujaṃgāñcitakaṃ daṇḍarecitaṃ caturaṃ tataḥ
kaṭibhrāntaṃ vyaṃsitaṃ ca krantaṃ vaiśākharecitam

vṛñśikaṃ vṛścikādye ca syātāṃ kuṭṭitarecite
latāvṛścikamākṣiptārgale talavilāsitam

lalāṭatilakaṃ pārśvanikuṭṭaṃ cakramaṇḍalam
uromaṇḍalamāvartaṃ kuñcitaṃ dolapādakam

vivṛttaṃ vinivṛttaṃ ca pārśvakrāntaṃ niśumbhitam
vidyuddhāntamatikrāntaṃ vikṣiptaṃ ca vivartitam

gajakrīḍitakaṃ gaṇḍasūcī syādgarudaplutam
talasaṃsphoṭitaṃ pārśvajānu gṛdhrāvalīnakam

sūcyardhasūcinī sūcīviddhaṃ ca hariṇaplutam
parivṛttaṃ daṇḍapādaṃ mayūralalitaṃ tataḥ

preṅkholitaṃ saṃnataṃ ca sarpitaṃ karihastakam
prasarpitamapakrāntaṃ nitambaṃ skhalitābhidham

siṃhavikrīḍitaṃ siṃhākarṣitaṃ cāvahitthakam
niveśamelakākrīḍajanitopasṛtāni ca

talasaṃghaṭṭitodvṛttaviṣṇukrāntāni lolitam
madaskhalitasaṃbhrāntaviṣkambhodghaṭṭitāni ca

śakaṭāsyorūdvṛttākhye vṛṣabhakrīḍitaṃ tataḥ
nāgāpasarpitamatho gaṅgāvataraṇaṃ tathā

ityaṣṭottaramuddiṣṭaṃ karaṇānāṃ śataṃ mayā
gatisthitiprayogāṇāmānantyātkaraṇānyapi

anantānyaṅgahāreṣu kriyantāmupayogitā
atha lakṣaṇameteṣāṃ vakṣye lakṣyavidāṃ matam

prāyaśo nartanārambhe samapādau latākarau
caturasraṃ bhavedaṅgaṃ viśeṣastvayamucyate

cāryā dvyardhikayā pāde viniṣkrāmati dakṣiṇe
vyāvartanātkarayuge dakṣiṇaṃ pārśvamāgate

parivartanato vāmapārśvaṃ satatamāśrite
tatkucakṣetrasaṃviṣṭo yasya puṣpapuṭaḥ karaḥ
talapuṣpapuṭaṃ tatsyātpāde'gratalasaṃcare

yadyanantarametatsyātkaraṇaṃ karaṇāntarāt

tadā karakriyā tattattyājyagrāhyakarānugā
etatpuṣpāñjalikṣepe lajjāyāṃ ca niyujyate

iti talapuṣpapuṭam
ūrdhvamaṇḍalinau kṛtvā karau vakṣaḥsthito'ñjaliḥ
nihañcitaṃ cāṃsakūṭaṃ yatra grīvā natā kṛtā
līnaṃ tatkaraṇaṃ yojyaṃ vallabhābhyarthane budhaiḥ

iti līnam
āśliṣṭau maṇibandhasthasvastikābhimukhau karau
kṛtvā vakṣasyekakālaṃ vyāvṛttaparivartitau

uttānau pātayedūrvoryatra tadvartitaṃ matam
asūyāyāṃ prayogaḥ syātpatākau yadi pātayet

adhomukhanighṛṣṭau tau krodhaṃ sūcayataḥ karau
śukatuṇḍādayo'pyanye viniyogavaśādiha

iti vartitam
vakṣaḥkṣetre samaṃ hastau vyāvṛttaparivartitau

vidhāyā''kṣiptayā cāryā saṃhatau parivartanāt
tatrā''nīya nidhīyete śukatuṇḍāvadhomukhau

baddhā yāti sthitiryatra valitoru taducyate
mugdhastrīvrīḍite cāsya prayogaḥ śārṅgiṇoditaḥ

iti valitoru
caturasrau karau kṛtvā vidadhadvicyavāṃ tataḥ
udveṣṭitakriyāpūrvamūrdhvamaṇḍalinau karau

vidhāya svaskikau kuryādatra sthānaṃ ca maṇḍalam
maṇḍalasvastikaṃ tatsyātprasiddhārthāvalokane

iti maṇḍalasvastikam
caturasrau karau vakṣaḥsthitau kṛtvā'tha recitau
vyāvartitena cā''nīyābhugne vakṣasi yatra tau

svastikau svastikau pādau tadvakṣaḥsvastikaṃ matam
anābhugnāṃsametacca yojyaṃ lajjānutāpayoḥ a

iti vakṣaḥsvastikam
hastau hṛtkṣetragau yatra vyāvṛtyordhvaṃ ca pārśvayoḥ
kṣiptaikaṃ haṃsapakṣaṃ ca drutabhramamadhomukham

vakṣaḥ prāpyāparaṃ tādṛgbhūtaṃ niṣkrāmayettataḥ
pādāvañcitasūcyau ca tatsyādākṣiptarecitam
anenābhinaye tyāgaparigrahaparamparām

ityākṣiptarecitam
dakṣiṇaḥ karihastaḥ syādvāmastu khaṭakāmukhaḥ
vakṣasthaḥ svastikau pādau yatrārdhasvastikaṃ tu tat

anye karikarasthāne pakṣavañcitakaṃ param
pakṣapradyotakaṃ cārdhacandraṃ kaṭigataṃ viduḥ

ityardhasvastikam
pārśvayoragrataḥ pṛṣṭhe svastiko'tra diśaṃ gataḥ
karāṅghrī recitau yatra taddiksvastikamucyate

tadgītaparivarteṣu viniyuktaṃ purātanaiḥ
svastikaprakriyaiṣā syātsvastikoktyantareṣvapi

iti diksvastikam
udveṣṭitakriyāpūrvaṃ bāhvorvikṣiptyamāṇayoḥ
kṛtvā cārīmapakrāntāṃ kriyamāṇe'paveṣṭane

recayitvā'nyacaraṇaṃ sūcīsvastikamācaret
yatrāṅghribhyāṃ karābhyāṃ ca tatpṛṣṭhasvastikaṃ bhavet

etanniṣedharābhasyaparānveṣaṇabhāṣaṇe
prayuktaṃ nāṭyatattvajñairanyairyuddhaparikrame

iti pṛṣṭhasvastikam
udveṣṭena niṣkāsya pāṇyorvyāvartamānayoḥ

utplutya yugapadyatra karāṅghriḥ svastikaḥ kṛtaḥ
tatsvastikaṃ prayoktavyaṃ budhaiḥ pūrvoktavastunoḥ

iti svastikam
vyāvartaparivartābhyāṃ nāsādeśaṃ gato yadgā
karihasto'lapadmatvaṃ dhatte syādañcitaṃ tadā
saṃmukhaprekṣaṇe tacca yojyaṃ svasyātikautukāt

ityañcitam
caturasrakaraḥ sthitvā hastaṃ vyāvartya dakṣiṇam

niṣkrāmayanbhajeccārīmākṣiptāmatha dakṣiṇam
śukatuṇḍaṃ karaṃ tasyaivorau tu paripātayet

yatrāpaviddhaṃ tadvāme vakṣasthe khaṭakāmukhe
tatkopāsūyayoryojyamuktaṃ soḍhalasūnunā

ityapaviddhaṃ
dehaḥ svābhāviko yatra pādau samanakhau yutau
latāhastau samanakhaṃ syātpraveśe tadādime

cāryā viddhāñcitapade paryāyādrecitaḥ karaḥ
yatronmattaṃ tu tadgarve saubhāgyādisamudbhave

ityunmattam
caturasraḥ sthitaḥ kṛtvā haṃsapakṣau drutabhramau
vyāvṛttiparivṛttibhyāmadhaścordhvaṃ śiraḥsthalāt
ānīyā''viddhavakrau cedvakṣasi svastikau kṛtau

viprakīrṇau tataḥ kāryau pakṣavañcitakau karau
pakṣapradyotakau paścāccārī tadvaśagā bhavet

ante'vahitthakaṃ sthānaṃ tadā svastikarecitam
nṛttābhinayane tacca praharṣādau niyujyate

iti svastikarecitam
maṇḍalasthānake kṛtvā caturasratayā sthitaḥ
udveṣṭya dakṣiṇaṃ hastaṃ nītvā skandhaśirasyamum

patanotpatanāviṣṭakaniṣṭhādyaṅgulīdvayam
alapadmākṛtiṃ kṛtvodghaṭṭite'ṅghrau ca dakṣiṇe

āviddhavaktratāṃ nītvā kare'tra caturasrite
tathaiva vāmapāṇyaṅghri yatra syāttannikuṭṭakam
ātmasaṃbhāvanākhyānapare vākye niyujyate

iti nikuṭṭakam
tadevārdhanikuṭṭaṃ syādekenāṅgena cetkṛtam
aprarūḍhavacaḥprokte tatraivārthe niyujyate

ityardhanikuṭṭakam
pārśvena bhramarīṃ kṛtvā maṇḍalasthānake sthitaḥ
kṛtvā chinnāṃ kaṭīmekāṃ bāhvoḥ śirasi pallavam

karamaṅgāntareṇaivaṃ yatra tricaturāḥ kṛtāḥ
āvṛttayaḥ kaṭīchinnaṃ tadvismayanirūpaṇe

iti kaṭīchinnam
ākṣiptāmapyapakrāntāṃ cārīṃ kṛtvā karadvayam
svastikīkṛtya nābhistho dakṣiṇaḥ khaṭakāmukhaḥ

kaṭyāmanyo'rdhacandraśca kṛtaḥ pārśvaṃ ca tannatam
anyadudvāhitaṃ yatra vṛttiraṅgāntaraistathā

tatkaṭīsamamādiṣṭaṃ vaiṣṇavasthānakānvitam
prayojyaṃ sūtradhāreṇa jarjarasyābhimantraṇe

iti kaṭīsamam
bhujaṃgatrāsitāṃ cārīṃ kṛtvotkṣipya ca kuñcitam
aṅghrimūrukaṭījānutryasraṃ yatra vivartayet

vyāvṛttiparivṛttibhyāmeko dolākaro'paraḥ
khaṭakākhyastadanvarthaṃ bhujaṃgatrāsitaṃ matam

iti bhujaṃ gatrāsitam
cāryālātā nitambaśca karo'tha caturasrakaḥ
etaddakṣiṇato vāma ūrdhvajānustathaiva cet
aṅgāntaraṃ tadā'lātaṃ nṛtte salalite matam

ityalātam
haste vyāvartamāne tu so'ṅghrirvikṣipyate bahiḥ
caturasraḥ paraḥ pāṇiḥ pūrvo'tha parivartane

pāṇirākṣipyate cāṅghriryatrāṅgaṃ cānyadīdṛśam
vikṣiptākṣiptakaṃ ca syādgatāgatanirūpaṇe

imaṃ tu nāṭyatattvajñā viniyogaṃ na manvate
vākyārthābhinayastatra yatrābhinayahastakāḥ

prādhānyena vidhīyante nṛttamātraparaṃ tvidam
ato'ntarālasaṃdhāne gatīnāṃ ca parikrame

tathā yuddhaniyuddhasthacārīsthānakasaṃkrame
kārye tālānusaṃdhāne yojyaṃ karaṇamīdṛśam

vṛścikaṃ caraṇaṃ kṛtvā yatrārālaṃ śirasthale
taddikkaṃ karamādhāha nāsākṣetrārjavena tu

kṛto vakṣasyarālo'nyastadvadanti nikuñcitam
etadutpatanautsukyavitarkādau prayujyate

anye patākasūcyāsyāvasminnāsāgragau viduḥ

iti nikuñcitam
ūrdhvaṃ vyāvartanenādhaḥ parivartanataḥ kare
pārśvakṣetrāddhāmyamāṇe jaṅghāsvastikamācaret

tato'pakrāntacārīkastaddikkaścaraṇo yadā
vāmo dolākaraḥ proktaṃ karaṇaṃ ghūrṇitaṃ tadā

iti ghūrṇitam
kuñcite caraṇe cāryāṃ cordhvajānau yadā karaḥ
taddigbhavo'lapadmo vā'rālaścordhvamukho bhavet

pakṣavañcitakau cordhvaṃ stanasāmyasthajānunaḥ
khaṭakākhyo'paro vakṣasyūrdhvajānustadocyate

ityūrdhvajānuḥ
maṇḍale sthānake sthitvā vakṣasthaḥ khaṭakāmukhaḥ
sūcīmukhaṃ cāpasārya yadā tasyāntike kṛtaḥ

aṅghrirudghṛṭṭitaḥ pārśvaṃ saṃnataṃ cāpasāraṇe
tadardharecitaṃ yojyamasamañjasaceṣṭane

ityardharecitam
gulphayoḥ svastikaṃ kṛtvā pādayorapasarpaṇe
yugapatkarayoryatrodveṣṭanaṃ cāpaveṣṭānam
kuryānmuhurmahustattu mattalli madavedakam

iti mattali
upetyāprasṛtau pādau vāmaścedrecitaḥ karaḥ
kaṭyāmanyastadā tvardhamattalli taruṇe made

recito dakṣiṇo hastaḥ so'ṅghriruddhaṭṭito bhavet
yatra dolākaro vāmastadrecakanikuṭṭakam

iti recakanikuṭṭakam
nitambakeśabandhādivartano dakṣiṇaḥ karaḥ

bahuśaḥ karihasto'nyaḥ pādaścodghaṭṭitastathā
aṅgāntaraṃ cellalitaṃ tadā nṛtte vilāsini

iti lalitam
dehakṣetrātkare sūcīmukhasaṃjñe'pasarpati
sūcīpādo'pyapasṛtaścārī syāddhamarī tataḥ
kramādaṅgadvaye'pyevaṃ lalite valitaṃ bhavet

iti valitam
yatrordhvajānuścārī syāllatāhastau karau kṛtau

tayorekaṃ tato nyasyeduparyūrdhvasthajānutaḥ
punaraṅgāntareṇaiva daṇḍapakṣaṃ taducyate

iti daṇḍapakṣam
parāṅmukhau nābhitaṭe hastau cetkhaṭakāmukhau
sūcīpādo'ṅghriṇā'nyena yuktvā'pakrāntayā'nvitaḥ
aṅghriranyastathaiva syāttadā pādāpaviddhakam

iti pādāpaviddhakam
vidhāya bhramarīṃ cārīṃ tato nūpurapādikām

pādenaikena taddikkaṃ hastaṃ recitamācaret
dvitīyaṃ tu latāhastaṃ yatra tannūyuraṃ viduḥ

iti nūpuram
pādamākṣiptacārīkaṃ tadaivodveṣṭitaṃ karam
trikaṃ ca valitaṃ kṛtvā pādasvastikamācaret

tatastadvaddvitīyāṅgaṃ yugapaccolbaṇau karau
yatra taddhamaraṃ yojyaṃ taccoddhataparikrame

iti bhramaram
alapadmau kaṭīpārśvakṣetre yatra kramātkarau
kaṭīchinnā ca vaiśākhaṃ sthānaṃ tacchinnamucyate
syāttālabhañjane tacca tathā'ṅgapratisāraṇe

iti cchinnam
bhujaṃgatrāsitā cārī tato yatra ca recitau
hastau sto vāmapārśve tadbhujaṃgatrastarecitam

iti bhujaṃgatrastarecitam
cārī ceddakṣiṇāṅghreḥ syātpūrvoktā dakṣiṇaḥ karaḥ
recito'nyo latāhasto bhujaṃgāñcitakaṃ tadā

iti bhujaṃgāñcitam
cārī ceddaṇḍapādā syāddaṇḍapakṣau ca hastakau
pramodanṛttaviṣayaṃ tadā syāddaṇḍarecitam
prayogamapare tvāhurasyoddhataparikrame

iti daṇḍarecitam
vakṣaḥkṣetrasthayoḥ pāṇyorvāmaścedalapallavaḥ
dakṣiṇaścaturo'ṅghristūdghaṭṭitaścaturaṃ tadā
etadvismayasūcāyāṃ vaidūṣikyāṃ niyujyate

iti caturam
drutāpasāritaṃ vāmaṃ sūcīpādaṃ vidhāya cet
tatpārśve dakṣiṇaṃ nyasyettatkālaṃ recayetkaṭim

kurvanvā bhramarīṃ hastau vyāvṛttaparivartitau
kṛtvā'nte caturasraḥ syātkaṭibhrāntaṃ tadā bhavet

asya tālāntarāleṣu yatīnāṃ paripūraṇe
prayogamāha niḥśaṅkastathā gatiparikrame

iti kaṭibhrāntam
eka udveṣṭitenādho viprakīrṇaḥ karo'paraḥ
ūrdhvaṃ tādṛkparāvṛttyā vakṣaḥkṣetragatastataḥ

uttāno recitaścaiko'paro'dhomukharecitaḥ
ālīḍhaṃ sthānakaṃ yatra tadvyaṃsitamudāhṛtam
ālīḍhaṃ sthānakaṃ yatra tadvyaṃsitamudāhṛtam
prayojyamāñjaneyādimahākapiparikrame

iti vyaṃsitam
cāryā'tikrāntayā pādaṃ pātyamānaṃ tu kuñcayet
vyāvartitena tatkālaṃ karaṃ niṣkrāmayettataḥ

ākṣipya parivartena taṃ kuryātkhaṭakāmukham
vakṣasyevaṃ dvitīyāṅgaṃ yatra tatkrāntamiṣyate
prayogamāhurācāryāstasyoddhataparikrame

itikrāntam
hastapādakaṭigrīvaṃ recitaṃ sthānakaṃ punaḥ
vaiśākhaṃ yatra tajjñeyaṃ vijñairvaiśākharecitam

iti vaiśākharecitam
karihastau karau pādaḥ pṛṣṭhe vṛścikapucchavat
dūrasamnatapṛṣṭhaṃ ca yatra tadvṛścikaṃ viduḥ
etadairāvaṇādīnāṃ vyomayāne niyujyate

iti vṛścikam
vṛścikaṃ caraṇaṃ kṛtvā bāhuśīrṣe yadā kramāt
alapadmau nikuṭyete tadā vṛścikakuṭṭitam
savismaye vyomayānavāñchādau viniyujyate

iti vṛścikakuṭṭitam
yatrāṅghrī vṛścikībhūtau svastikau recitau karau
vicyutau cettadā''kāśayāne vṛśikarecitam

iti vṛścikarecitam
vṛśikaścaraṇo yatra vāmahasto latābhidhaḥ
tallatāvṛścikaṃ yojyaṃ gaganotpatane budhaiḥ

iti latāvṛścikam
ākṣiptā yatra cārī syādākṣiptaḥ khaṭakāmukhaḥ
caturo vā tadākṣiptaṃ vidūṣakagatau matam

ityākṣiptam
kaniṣṭhāṅgulibhāge cedvāmāṅghrerdakṣiṇaḥ sthitaḥ

stabdhajaṅghaḥ sārdhatāladvitayaṃ syātprasāritaḥ
tadaiva stabdhabāhuḥ sanvāmapārśve'lapallavaḥ

bāmetaraḥ karaḥ kiṃcitprasṛtāgro'rgalaṃ tadā
parikrame'ṅgadādīnāṃ śārṅgadevena kīrtitam

ityargalam
ūrdhvamūrdhvāṅgulitalaḥ pādaḥ pārśve prasāritaḥ

tadagrayukpatāko'ṅgaṃ yatretthamaparaṃ kramāt
sūtradhārādiviṣaye tatsyāttalavilāsitam

iti talavilāsitam
aṅguṣṭho vṛścikāṅghreścelalāte tilakaṃ likhet
tadā lalāṭatilakaṃ vidyādharagatau matam

iti lalāṭatilakam
pāṇyoḥ svastikayorūrdhvamukha pārśve nikuṭṭitaḥ

eko'nyodhomukho yatra tadvatpādo nikuṭṭitaḥ
tatprakāśanaṃ saṃcārābhyāse pārśvanikuṭṭakam

iti pārśvanikuṭṭakam
yatra kṛtvoḍḍitāṃ cārīṃ dolābhyāṃ cakravaddhamet

antarnatena gātreṇa tadūcuścakramaṇḍalam
surāṇāṃ varivasyāyāṃ taduddhataparikrame

iti cakramaṇḍalam
cāryau baddhāsthitāvarte uromaṇḍalinau karau
yatroromaṇḍalaṃ tattu śivavallabhabhāṣitam

ityuromaṇḍalam
udveṣṭitenāpaveṣṭe yatra dolābhidhau karau
cārī cāṣagatistatsyādāvartaṃ bhayasarpaṇe

ityāvartam
uttāno vāmapārśvastho'lapadmo dakṣiṇaḥ karaḥ

yatra tatkuñcitaṃ pāde savye'gratalasaṃcare
tena devānabhinayedānandabharanirbharān

iti kuñcitam
ūrdhvajānoḥ paraṃ cārī dolāpādā yadā bhavet
dolau hastau tadā proktaṃ dolāpādaṃ vidāṃvaraiḥ

iti dolāpādam
pādamākṣiptayā cāryā''kṣipyā''kṣipya karāvapi

vyāvṛttaparivṛttābhyāṃ kṛtvā bhramarikāṃ karau
recitau cedvivṛttaṃ syāttaccoddhataparikrame

iti vivattam
sūcyaṅghriṇā dvitīyāṅghreḥ pārṣṇitaḥ svastikaṃ bhavet
vyāvṛttipratyāvṛttibhyāṃ valayitvaikapārśvataḥ

trikaṃ baddhābhidhāṃ cārīṃ kuryāddhastau ca recitau
yatra tadvinivṛttaṃ syātpūrvoktaviniyogabhāk

iti vinivṛttam
pārśvakrāntā bhaveccārī karau pādānugau yadā a

pārśvakrāntaṃ tadā yadvā'bhineyavaśagau karau
tadyojyaṃ bhīmasenāde raudraprāye parikrame

iti pārśvakrāntam
pārṣṇideśe dvitīyāṅghraḥ kuñcitaścaraṇo bhavet
samunnatamuraḥ pāṇeḥ khaṭakākhyasya madhyamā

yatrāṅgulistilakayellalāṭaṃ tanniśambhitam
yadvā vṛścikahastaḥ syādabhineyo maheśvaraḥ

iti niśumbhitam
pṛṣṭhato bhrāmitaṃ pādaṃ sarvatomaṇḍalaplutaḥ

bhrāmayeccecchiraḥ kṣetre vidyuddhāntaṃ tadocyate
prayogamasya ca prāhuruddhatānāṃ parikrame

iti vidyuddhāntam
kṛtvā cārīmatikrāntāmaṅghrimagre prasārayet
yatra hastau prayogārhāvatikrāntamado viduḥ

ityatikrāntam
vidyuddhāntādaṇḍapāda kramāccāryau vidhāya cet
udveṣṭitāpaveṣṭābhyāmekamārgagatau karau

recayannagrataḥ pṛṣṭhe pārśvayorvikṣipettadā
vikṣiptamabhinetavyastenoddhataparikramaḥ

iti vikṣiptam
karaṃ caraṇamākṣipya yatra trikavivartanam
karo'paro recitaśca tadvadanti vivartitam

iti vivartitam
dolāpādā yadā cārī karihasto'sya karṇagaḥ
kriyāviṣṭaḥ karo'nvarthaṃ gajakrīḍikaṃ tadā

iti gajakrīḍitakam
sūcīpādo nataṃ pārśvaṃ vakṣasthaḥ khaṭakāmukhaḥ

vāmo
lapallavo gaṇḍakṣetre cedgaṇḍasūcitam
kṣetre'tra kecidicchanti sūcīpādaṃ pare punaḥ

sūcīmukhaṃ nṛttahastamanye'bhinayahastakam
karaṇenābhinetavyā kapolālaṃkṛtistadā

iti gaṇḍasūcī
latārecitakau hastau vṛścikāṅghriḥ samunnatam
uro yatra tadanvarthābhidhānaṃ garuḍaplutam

iti garuḍaplutam
daṇḍapādākhyayā cāryā yadvā'tikrāntayā drutam

utkṣipya pātyamāne'ṅghrāvagre cettālikāṃ karau
saśabdāṃ kuruto'nvarthaṃ talasaṃsphoṭitaṃ tadā

iti talasaṃsphoṭitam
samapādastu pṛṣṭhe cennihitaścaraṇo'paraḥ

muṣṭihastaḥ sthito vakṣasyardhacandraḥ kaṭītaṭe
pārśvajānu tadā jñeyaṃ yojyaṃ yuddhaniyuddhayoḥ

iti pārśvajānu
pṛṣṭhe'ṅghriḥ prasṛto bhūmiśliṣṭāṅguṣṭhau latākarau
yadā tadā mahājpakṣiyuddhe gṛdhrāvalīnakam

iti gṛdhrāvalīnakam
utkṣipya kuñcitaḥ pādaḥ sthāpyate bhūmimaspṛśan
khaṭakākhyaśca taddikko hasto vakṣasyathāparaḥ

alapadmaḥ śirodeśe tatahivāṅgāntaraṃ kramāt
yatra tacchārṅgadevena gaditaṃ sūci vismaye

iti sūci
sūcyevaikāṅgaracitamardhasūci pracakṣate

ityardhasūci
pakṣavañcitako vā'rdhacandro hastaḥ kaṭīgataḥ
khaṭakākhyo'paro vakṣasyanyapārṣṇisthito'paraḥ
sūcyaṅghriścettadā sūcīviddhaṃ cintādigocaram

iti sūcīviddham
hariṇaplutayā cāryā dolākhaṭakahastakam
hariṇaplutamākhyātaṃ nāmoktaviniyogakam

iti hariṇaplutam
ūrdhvamaṇḍalinau hastau sūcyaṅghriryatrabaddhayā
vivṛtto'tha bhramarikā parivṛttaṃ taducyate

iti parivṛttam
cārīnūpurapādo'tha daṇḍapādāddrutaṃ karaḥ
daṇḍavannyasyate yatra daṇḍapādaṃ taducyate
sūrayo viniyuñjanti tatsāṭopaparikrame

iti daṇḍapādam
hastau cedrecitāvūrū vṛścikāṅghriṃ nikuñcya ca
bhramarī kriyate'nvarthaṃ mayūralalitaṃ tadā

iti mayūralalitam
dolāpādākhyacārīkādaṅghreranyāṅghriṇā yadā
utplutya bhramarīṃ kuryādbhavetpreṅkholitaṃ tadā

iti preṅkholitam
kṛtvā mṛgaplutaṃ yatra kṛto'ṅghriḥ svastiko'grataḥ
dolau hastau saṃnataṃ tadadhamāpasṛtau bhavet

iti saṃnatam
añcite'pasaratyaṅghrāvanyāṅghrernāmitaṃ śiraḥ
tasminpārśve karo'pyeṣa rocito'ṅgāntaraṃ tathā
yatra tatsarpitaṃ mattasyopasarpāpasarpaṇe

iti sarpitam
vāmaścetkhaṭako vakṣasyudveṣṭitatayā paraḥ

tripatākaḥ karaḥ karṇe taddikkaścaraṇo'ñcitaḥ
niṣkrāmyate yadā proktaṃ karihastaṃ tadā budhaiḥ

iti karihastam
hasto yo recitastaddikpādaścedbhūmigharṣaṇāt
caletpādāntarānmandaṃ mandamanyo latākaraḥ
tadā khecarasaṃcāragocaraṃ syātprasarpitam

baddhājpakrāntayoścāryoḥ kṛtayorhastayoḥ punaḥ
tattatprayogānugayorapakrāntamudāhṛtam

ityapakrāntam
adhomukhāṅgulī hastau patākau cecchiraḥsthalam
ānīya parivṛttena niṣkrāmyordhvāṃsayostayoḥ

mithomukhāvavasthāpya svadehābhimukhāṅgulī
nitambākhyau vidhīyete nitambaṃ karaṇaṃ tadā

iti nitambam
dolāpādāṅghrigamanāgamane haṃsapakṣakaḥ
abhyetyathetthamanyāṅgaṃ yatra tatskhalitaṃ matam

iti skhalitam
kṛtvā'lātāṃ puro'ṅghriṃ ceddrutaṃ nyasya capeṭavat
kṛto hastastathā'nyāṅgaṃ siṃhavikrīḍitaṃ tadā
etadraudragatau yojyaṃ brūte śrīkaraṇāgraṇīḥ

iti siṃhavikrīḍitam
vṛściko'ṅghriḥ padmakośau vaurṇanābhau yadā karau

anyāṅghrau vṛścike prāñcau bhaṅktvā tau tādṛśau punaḥ
kṛtau siṃhābhinayane siṃhākarṣitakaṃ tadā

iti siṃhākarṣitam
vidhāya janitāṃ cārīṃ yadyarālālapallavau
lalāṭavakṣaḥkṣetrasthau hastāvabhimukhāṅgulī

kramātkṛtvodveṣṭitena vyāvṛttyā pārśvagau tataḥ
vakṣodeśe'paveṣṭena parivṛttyā ca tādṛśau

mithomukhau nidhīyete tadā syādavahitthakam
gaॐpanaprāyavākyārthābhinaye tanniyujyate

anye'vahitthahastena yuktatvādavahitthakam
vadanti cintādaurbalyaprabhṛtyabhinayakṣamam

ityavahitthakam
yatra vakṣasi nirbhugne nihitau khaṭakāmukhau
maṇḍalaṃ sthānakaṃ tattu niveśaṃ gajavāhane

iti niveśam
elakākrīḍitā cārī ceddolakhaṭakau karau
saṃnataṃ valitaṃ gātramelakākrīḍitaṃ tadā
adhamaprakṛtiprāṇigatigocaramiṣyate

ityelakākrīḍitam
cārī cejjanitā muṣṭirvakṣasyanyo latākaraḥ
yadā tadā kriyārambhābhinaye janitaṃ bhavet

iti janitam
ākṣiptāṃ vāmataścārīṃ vyāvṛtya parivartitam

karaṃ kṛtvā nate pārśve dakṣiṇe'rālatāṃ nayet
yatra tatsyādupasṛtaṃ vinayenopasarpaṇe

ityupasṛtam
dolāpādāṃ bhajaṃścārīṃ saṃghaṭṭitatalau karau
patākau recayitvā cedvaiṣṇave sthānake sthitaḥ

kaṭisthaṃ dakṣiṇaṃ hastaṃ vāmaṃ recitamācaret
anukampāvidhāne syāttalasaṃghaṭṭitaṃ tadā

iti talasaṃghaṭṭitam
yatrāpasāritānītaṃ hastapādaṃ vidhīyate
gātramudvṛttacārīkaṃ tadudvṛttaṃ vidurbudhāḥ

ityudvṛttam
kuñcitaḥ prasaratyaṅghriragre yatrodgamonmukhaḥ
karau ca recitau viṣṇukrāntaṃ tatkramaṇe hareḥ

iti viṣṇukrāntam
recitaḥ pāṇirekaḥ syādvakṣasyanyo'lapallavaḥ
lolitaṃ śīrṣamubhayorviśrāntaṃ pārśvayorapi
vaiṣṇavaṃ sthānakaṃ yatra tadāhurlolitaṃ budhāḥ

iti lolitam
svastikāpasṛtau pādau krameṇa parivāhitam

śiro dolau yadā hastau madaskhalitakaṃ tadā
etanmadhyamade yojyaṃ bhāṣate bhavavallabhaḥ

iti madaskhalitam
āviddhāṃ vidadhaccārīṃ vyāvṛttaparivartitam
alapadmakaraṃ nyasyedūrupṛṣṭhe yadā tadā
saṃbhrāntaṃ tatprayoktavyaṃ sasaṃbhramaparikrame

iti saṃbhrāntam
apetyopavrajedvāmaṃ dakṣiṇo nṛttahastakaḥ

sūcīmukho nikuṭyeta sāṅghrirvāmakaro yadi
tadvadaṅgāntaraṃ kṛtvā sūcīpādaśca dakṣiṇaḥ

hasto'sāvalapadmaḥ syādvāmahastastu pūrvavat
evaṃ punaḥ punaryatra viṣkambhaṃ tadbabhāṣire

iti viṣkambham
udghaṭṭito'ṅghriḥ pārśvaṃ tatsaṃnataṃ tālikodyatau
hastau yatrodghaṭṭitaṃ tadāvṛttāṅgaṃ pramodakam

ityudghaṭṭitam
śakaṭāsyā bhaveccārī prasāryetāṅghriṇā saha

eko hasto dvitīyastu vakṣasthaḥ khaṭakāmukhaḥ
yatra tacchakaṭāsyaṃ syāttādṛśe bālakhelite

iti śakaṭāsyam
sahorūdvṛttayā cāryā yatra vyāvartanānvitau
arālakhaṭakau hastau nidadhyādūrupṛṣṭhayoḥ
ūrūdvṛttaṃ tadīrṣyāyāṃ prārthanāpremakopayoḥ

ityūrūdvṛttam
alātāṃ vidadhaccārīṃ hastau kurvīta recitau

vyāvṛttyā kuñcitau kṛtvā'lapadmau bāhuśīrṣayoḥ
nyasyete yatra taddhīrā vṛṣabhakrīḍitaṃ jaguḥ

iti vṛṣabhakrīḍitam
hastau cedrecitau syātāṃ śirastu parivāhitam
svastikāpasṛtau pādau tadā nāgāpasarpitam
prāhuḥ prayogametasya sūrayastaruṇe made

iti nāgāpasarpitam
aṅghrerutkṣepanikṣepāvanu pronnatisaṃnatī

bhajetāṃ tripatākau cedevameva śirastadā
gaṅgāvataraṇaṃ gaṅgāvatāre śārṅgiṇoditam

iti gaṅgāvarataṇam
kartavyaḥ karaṇe prāyo vāmo vakṣaḥsthitaḥ karaḥ
pāṇistu dakṣiṇastatra syāttattatkaraṇānugaḥ

ityaṣṭottaraśataṃ karaṇāni
atha deśyanusāreṇa deśe deśe lasadyaśāḥ
vadatyutplutipūrvāṇi karaṇāni harapriyaḥ

añcitaṃ caikacaraṇāñcitaṃ syādbhairavāñcitam
daṇḍapraṇāmāñcitaṃ ca kartaryañcitakaṃ tataḥ

alagaṃ trīṇi kūrmordhvāntarapūrvālagāni ca
lohaḍī kartarīlohaḍyekapādādilohaḍī

tataḥ syāddarpasaraṇaṃ śayanaṃ jalapūrvakam
nāgabandhaṃ kapālādyaṃ cūrṇanaṃ natapṛṣṭhakam

syānmatsyakaraṇaṃ cātha karasparśanasaṃjñakam
eṇaplutaṃ tatastiryakkaraṇaṃ tiryagañcitam

tiryaksvastikasaṃjñaṃ ca sūcyantamatha kīrtitam
bahyāntaśchannatiripālagacakrocitādimāḥ

sapta bhramaryo bhramarī śiraḥpūrvā digādimā
samapādāñcitaṃ bhrāntapādāñcitamataḥ param

skandhabhrāntaṃ ca ṣaṭtriṃśaditi soḍhalanandanaḥ
saṃkṣipyotplutipūrvāṇi karaṇāni samādiśat

añcitaṃ samapādena sthitvottālotpluto bhavet
ityañcitam
ekapādāñcitaṃ tatsyādekapādavinirmitam

ityekacaraṇāñcitam
ūrupṛṣṭhasthitaikāṅghrerutplutau bhairavāñcitam
iti bhairavāñcitam
utplutyāñcitavadyatra nipateddaṇḍavadbhuvi
daṇḍapraṇāmāñcitaṃ tadgaditaṃ nṛttavedibhiḥ

iti daṇḍapraṇāmāñcitam
añcitaṃ svastikāṅghribhyāṃ kartaryañcimucyate
iti kartaryañcitam
adhomukhotpluto'gre ca patitvā kukkuṭāsanam
badhnīyādyatra tatproktamalagaṃ sūriśārṅgiṇā

ityalagam
kūrmāsanaṃ yadyalage bhavetkūrmālagaṃ tadā
iti kūrmālagam
ūrdhvālagaṃ tatpatitvā samāṅghrerūrdhvasaṃsthitau

ityūrdhvālagam
kṛtālago nipatyorvyāmuttānoraḥsthalasthitaḥ
pṛṣṭhataḥ śroṇisaṃsparśi śiraḥ syādantarālage

ityantarālagam
samapādasthito yatra vivartya trikamutplutaḥ
tiryakpāte lohaḍī talluṇṭhitaṃ cocyate budhaiḥ

iti lohaḍī luṇṭhitaṃ vā
svastikāṅghrikṛtā saiva kartarīlohaḍī matā
iti kartarīlohaḍī luṇṭhitaṃ vā
ekāṅghrijā tvekapādalohaḍī saṃmatā satām

ityekapādalohaḍī ekapādaluṇṭhitaṃ vā
vaiṣṇave sthānake sthitvā patetpārśvena cedbhuvi
karaṇaṃ darpasaraṇaṃ tadāha karaṇādhipaḥ

iti darpasaraṇam
tadeva jalaśayyākhyamāsane jalaśāyivat
iti jalaśayanam
nāgabandhaṃ tadeva syānnāgabandhavadāsane

iti nāgabandham
samapādasthito yatra saṃspṛśya śirasā bhuvam
parāvṛttastatkapālacūrṇanaṃ varṇitaṃ budhaiḥ

iti kapālacūrṇanam
kapālacūrṇanaṃ kṛtvottānaṃ vakṣasthalaṃ tataḥ
yatroktaṃ natapṛṣṭhaṃ tadvaṅkolamaparairadaḥ

utplutya madhyamāvartya vāmapārśvena matsyavat
parivarteta cenmatsyakaraṇaṃ varṇitaṃ tadā

iti matsyakaraṇam
alagaṃ karaṇaṃ kṛtvā hastenā''śritya ca kṣitim
parivarteta yatrādaḥ karasparśanamūcire

iti karasparśanam
utplutyānyatamāṃ sūcīṃ khe kṛtvā bhajate kṣitau
yadotkaṭāsanaṃ cordhvasthānameṇaplutaṃ tadā

ityeṇaplutam
tiryagekena pādena samutplutya nipatya cet
tiṣṭhedbhuvyaṅghriṇā'nyena syāttiryakkaraṇaṃ tadā

iti tiryakkaraṇam
samapādātparam tiryagutplutau tiryagañcitam
iti tiryagañcitam
syāttiryaksvastikaṃ kṛtvā svastikaṃ tiryagutplutau

iti tiryaksvastikam
samādyanyatamāṃ sūcīṃ dadhate nidhane yadi
karaṇāni tadā prāñci sūcyantāni pracakṣate

iti sūcyantam
dakṣiṇenāṅghriṇā sthitvā vāmamaṅghriṃ tu kuñcayet
vāmāvartaṃ bhavedyatra sā bāhyabhramarī matā

iti bāhyabhramarī
etasyāstu viparyāsādantarbhramarikā bhavet
ityantarbhramarī
trivikramākāradhārī sthānamāsthāya yatra tu
vāmāvartabhramādāhustāṃ channabhramarīṃ budhāḥ

iti cchannabhramarī
tiripabhramarī tiryagbhrame'ṅghrisvastikātparam

iti tiripabhramarī
vaiṣṇavasthānake sthitvā yadā vāmāṅghriṇā sthitaḥ
dehaṃ bhrāmayate tiryagalagabhramarī tadā

ityalagabhramarī
cakrabhramarikā khaṇḍasūcyardhe cakravaddhamāt
iti cakrabhramarī
samapādānanataraṃ cettiraścīṃ bhrāmayettanum
ucitabhramarīṃ prāha tadā śaṃkaravallabhaḥ

ityucitabhramarī
śirasaiva bhuvi sthitvordhvīkṛtau caraṇau dadhat
paribhramati yatra triḥ sā śirobhramarī matā

iti śiro'bhramarī
prāgvatsakṛtsakṛddhāntvā hastabhrāntyā dhṛtakṣitiḥ
dikcatuṣke kramāttiṣṭhedyadā digbhramarī tadā

iti digbhramarī
samapādāñcitaṃ kṛtvā skandhenaikena bhūsthitaḥ

parivṛtya ca tiryakcetpādāvullolayettadā
samapādāñcitaṃ prāha sūriḥ śrīkaraṇāgraṇīḥ

iti samapādāñcitam
bhrāmayitvā dakṣiṇāṅghriṃ tadīyatalapṛṣṭhataḥ
jaṅghāmadhyamavaṣṭābhya vāmāṅghrerañcitaṃ padam

vidhāya tiryaksaṃdhābhyāmadhiṣṭhāya vivṛtya ca
pādāvullolayetproktaṃ bhrāntapādāñcitaṃ tadā

iti bhrāntapādāñcitam
utkaṭāsanamāsthāyāñcitaṃ kṛtvā sayugmataḥ
sthitvā bhuvi vyomni kṛtvā'ṅgāntarāṇi tato bhuvam

avaṣṭābhya karābhyāṃ ceddhāntvā bhrāntvā ca pūrvavat
tiṣṭhetpratidiśaṃ proktaṃ skandhabhrāntaṃ tadā budhaiḥ

iti skandhabhrāntam
vidyante'nye'pi bhūyāṃso bhedāḥ karaṇasaṃśrayāḥ
na te śrīśārṅgiṇā proktā granthaprathimabhīruṇā

iti ṣaṭtriṃśadutplutikaraṇāni
pūrvaraṅge prayoktavyāndṛṣṭādṛṣṭaphalānapi
aṅgahārānpravakṣyāmi nāmato lakṣmatastathā

aṅgānāmucite deśe prāpaṇaṃ savilāsakam
mātṛkotkarasaṃpādyamaṅgahāro'bhidhīyate

yadvā hāro harasyāyaṃ prayogo'ṅgairiti smṛtaḥ

karaṇābhyāṃ mātṛkā syātkalāpaḥ karaṇaistribhiḥ
caturbhiḥ khaṇḍako jñeyaḥ saṃghātaḥ pañcabhirmataḥ
iti saṃghaviśeṣeṇa saṃjñābhedānpare jaguḥ

karaṇanyūnatādhikyaṃ teṣāṃ mene muniḥ svayam
dvābhyāṃ tricaturābhirvetyetadvāśabdasūcitam

sthirahasto'tha paryastaḥ sūcīviddho'parājitaḥ
vaiśākharecitaḥ pārśvasvastiko bhramaro'paraḥ

ākṣiptakaḥ paricchinno madādvilasitastataḥ
ālīḍhācchuritau pārśvacchedasaṃjño'pasarpitaḥ

mattākrīḍastathā vidyuddhānto'mī ṣoḍaśoditāḥ
caturasreṇa mānenāṅgahārā munisattamaiḥ

viṣkambhāpasṛtau mattaskhalito gatimaṇḍalaḥ
apaviddhaśca viṣkambhodghaṭṭitākṣiptarecitāḥ

recito'rdhanikuṭṭaśca vṛścikāpasṛtastataḥ
alātakaḥ parāvṛttaḥ parivṛttādirecitaḥ

uddhṛttakaśca saṃbhrāntasaṃjñaḥ svastikarecitaḥ
ṣoḍaśeti tryasramānā dvātriṃśadubhaye matāḥ

karaṇavrātasaṃdarbhānantyātteṣāmanantatā
dvātriṃśatte tathā'pyuktāḥ prādhānyaviniyogataḥ

ekaikaṃ karaṇaṃ kāryaṃ kalayā gururūpayā
sarveṣāmaṅgahārāṇāmityāha karaṇāgraṇīḥ

līnaṃ samanakhaṃ kṛtvā vyaṃsitaṃ cātra vicyutau
karau kṛtvojjhitālīḍhaḥ pratyālīḍhaṃ vrajettataḥ

nikuṭṭakorūdvṛttākhyasvastikākṣiptakānyatha

nitambaṃ karihastaṃ ca kaṭīcchinnamiti kramāt
karaṇaiḥ sthirahastaḥ syāddaśabhiḥ śivavallabhaḥ

aṅgahāreṣu sarveṣu pratyālīḍhāntamāditaḥ
prayoktavyamiti prāhuḥ kecinnāṭyaviśāradāḥ

iti sthirahastaḥ
talapuṣpapuṭaṃ pūrvamapaviddhaṃ ca vartitam
nikuṭṭakorūdvṛttākhyākṣiptoromaṇḍalānyatha

nitambaṃ karihastaṃ ca kaṭīchinnamiti kramāt
daśabhiḥ karaṇairebhiḥ proktaḥ paryastako budhaiḥ

iti paryastakaḥ
ardhasūcyatha vikṣiptamāvartaṃ ca nikuṭṭakam
ūrūdvṛttamathā''kṣiptamuromaṇḍalasaṃjñakam

karihastaṃ kaṭīchinnaṃ navabhiḥ karaṇairiti
sūcīviddhābhidhaḥ prokto'ṅgahāro bharatādibhiḥ

iti sūcīviddhaḥ
daṇḍapādaṃ dvyaṃsitaṃ ca prasarpitakasaṃjñakam
nikuṭṭārdhanikuṭṭe cā''kṣiptoromaṇḍale tataḥ

karihastaṃ kaṭīchinnamiti lakṣmāparājite
navabhiḥ karaṇairyuktamuktaṃ niḥśaṅkasūriṇā

ityaparājitaḥ
vaiśākharecitaṃ dvābhyāmaṅgābhyāmatha nūpuram

bhujaṃgatrāsitonmattamaṇḍalasvastikānyatha
nikuṭṭakorūdvṛttākhyākṣiptoromaṇḍalāni ca

karihastaṃ kaṭīchinnamityekādaśabhiḥ kramāt
karaṇairaṅgahāraḥ syānnāmnā vaiśākharecitaḥ

iti vaiśākharecitaḥ
diksvastikaṃ tataścāṅgenaikenārdhanikuṭṭakam
punardiksvastikamathānyāṅgenārdhanikuṭṭakam

apaviddhorūdvṛttākhye tathā''kṣiptaṃ nitambakam
karihastaṃ kaṭīchinnamaṣṭabhiḥ karaṇairiti
syātpārśvasvastiko'bhyāsāttvādyayordaśabhirbhavet

iti pārśvasvastikaḥ
nūpurākṣiptakacchinnasūcīnyatha nitambakam

karihastaṃ ca karaṇamuromaṇḍalakaṃ tataḥ
kaṭīchinnamiti proktaḥ karaṇairbhramaro'ṣṭabhiḥ

iti bhramaraḥ
kṛtvā nūpuravikṣiptālātānyākṣiptakaṃ tataḥ
uromaṇḍalasaṃjñaṃ ca karaṇairebhirākṣiptako'ṣṭabhiḥ
vikṣiptālātakākṣiptaprayogaṃ dviḥ pare jaguḥ

ityākṣiptakaḥ
kṛtvā samanakhaṃ chinnaṃ saṃbhrāntamatha vāmataḥ
bhramaraṃ vāmapārśvārdhasūcyaṅghrikrāntasaṃjñakam

bhujaṃgatrāsitādūrdhvaṃ karihastaṃ vidhīyate
kaṭīchinnaṃ paricchinno navabhiḥ karaṇairiti

iti paricchinnaḥ
madaskhalitamattallitalasaṃsphoṭitāni ca
bahuśaścitragumphāni nikuṭṭakamataḥ param

ūrūdvṛttaṃ ca karaṇaṃ karihastasamāhvayam
kaṭīchinnaṃ ca sapteti madādvilasite jaguḥ

karaṇāni trayāṇāṃ tu trirabhyāsāttrayodaśa
abhyāsāṃstriṣu vāñchanti catuṣpañcādikānapi

iti madabilasitaḥ
dvyaṃsitaṃ sanikuṭṭaṃ syānnūpuraṃ vāmato'ṅghritaḥ
anyato'lātakākṣipte uromaṇḍalakaṃ tataḥ

karihastaṃ kaṭīchinnamityebhiḥ karaṇaiḥ kramāt
bhavedaṣṭabhirālīḍho'ṅgahāro munisaṃmataḥ

ityālīḍhaḥ
nūpuraṃ bhramaraṃ cātha vyaṃsitālātake tataḥ

nitambaṃ sūcisaṃjñaṃ ca karihastamataḥ param
kaṭīchinnaṃ ca karaṇānyaṣṭetyācchurite viduḥ

ityācchuritaḥ
vṛścikādyaṃ kuṭṭitaṃ syādūrdhvajānu tataḥ param
ākṣiptasvastikaṃ kṛtvā trikasya parivartanam

uromaṇḍalasaṃjñaṃ ca nitambaṃ karihastakam
kaṭīchinnaṃ ca karaṇaṃ pārśvacchede'ṣṭamaṃ matam

iti pārśvacchedaḥ
apakrāntaṃ vyaṃsitasya kevalaṃ karayoḥ kriyā
karihastaṃ cārdhasūcī vikṣiptākhyaṃ kaṭīyutam

chinnamūrūdvṛttasaṃjñamākṣiptaṃ karihastakam
kaṭīchinnaṃ ca sapteti karaṇānyapasarpite
sārdhāni dviḥ kaṭīchinnakarihastakṛternava

ityapasarpitaḥ
bhramaraṃ nūpurākhyaṃ ca bhujaṃgatrāsitābhidham

dakṣiṇāṅgenaiva kṛtvā kuryādvaiśākharecitam
ākṣiptacchinnakaraṇe bhramaravyaṃsite tataḥ

uromaṇḍalasaṃjñaṃ ca nitambaṃ karihastakam
kaṭīchinnaṃ ca karaṇairebhirdvādaśabhiḥ kramāt

ekādaśabhirabhyāsādgaṇanā bhramarasya tu
mattākrīḍābhidhānaḥ syādaṅgahāro harapriyaḥ

iti mattākrīḍaḥ
vāmāṅgenārdhasūci syādvidyuddhāntaṃ tu dakṣiṇe
punaraṅgaviparyāsāddvayaṃ chinnamataḥ param

atikrāntaṃ vāmato'tha latāvṛścikamācaret
kaṭīchinnaṃ ca ṣaḍiti dvayorabhyāsataḥ punaḥ
karaṇānyaṣṭasaṃkhyāni vidyudbhrānte'bhyadhurbudhāḥ

iti vidyudbhrāntaḥ
nikuṭṭakākhyakaraṇaṃ vidhāyārdhanikuṭṭakam
bhujaṃgatrāsitādūrdhvaṃ bhujaṃgatrastarecitam

ākṣiptoromaṇḍale ca kramātkṛtvā latākaram
kaṭīchinnaṃ saptamaṃ tu viṣkambhāpasṛte bhavet

iti viṣkambhāpasṛtaḥ
mattalligaṇḍasūcyākhye līnaṃ mattāpaviddhakam
tadgatatvena kartavyaṃ talasaṃsphoṭitaṃ tataḥ

karihastaṃ kaṭīchinnaṃ karaṇāni kramāditi
saptāṅgahāre proktāni mattaskhalitasaṃjñake

iti mattaskhalitaḥ
maṇḍalasvastikādūrdhvaṃ niveśonmattasaṃjñake
udghaṭṭitākhyaṃ mattalli syādākṣiptamataḥ param

uromaṇḍalakaṃ chinnaṃ kaṭyādi gatimaṇḍale
ityaṣṭau karaṇāni syuriti niḥśaṅkabhāṣitam

iti gatimaṇḍalaḥ
apaviddhaṃ prathamataḥ sūcīviddhamatho karau
udveṣṭite samaṃ cāryā baddhayā valayettrikam

ūrūdvṛttaṃ ca karaṇamuromaṇḍalakaṃ tataḥ
kaṭīchinnaṃ pañcamaṃ cedapaviddhastadā bhavet

ityapaviddhaḥ
nikuṭṭakākhyaṃ karaṇaṃ syānnikuñcitamañcitam
ūrūdvṛttaṃ tato'pyardhanikuṭṭakaraṇaṃ tataḥ

bhujaṃgatrāsitaṃ hastodveṣṭane bhramaraṃ tataḥ
karihastaṃ kaṭīchinnaṃ viṣkambhe navamaṃ bhavet

iti viṣkambhaḥ
udghaṭṭite nikuṭṭākhyamuromaṇḍalakaṃ tataḥ
nitambaṃ karihastaṃ syātkaṭīchinnaṃ ca pañcamam

ityudghaṭṭitaḥ
svastikādyaṃ recitaṃ syātpṛṣṭhasvastikasaṃjñakam
diksvastikaṃ kaṭīchinnaṃ samaṃ ghūrṇitanāmakam

bhramaraṃ vṛścikādyaṃ ca recitaṃ pārśvapūrvakam
nikuṭṭakamuraḥpūrvaṃ maṇḍalaṃ saṃnataṃ tataḥ

siṃhākarṣitakaṃ nāgāpasarpitasamāhvayam
atha vakṣaḥsvastikaṃ tu kecidicchanti sūrayaḥ

daṇḍapakṣaṃ ca karaṇaṃ lalāṭatilakāhvayam
vilāsitaṃ talādyaṃ ca bhavedatha niśumbhitam

vidyuddhāntābhidhādūrdhvaṃ gajakrīḍitakaṃ tataḥ
nitambaviṣṇukrāntākhyorūdvṛttākṣiptakāni ca

uromaṇḍalasaṃjñaṃ ca nitambaṃ karihastakam
vaikalpikaṃ kaṭīchinnamicchantyākṣiptarecite

pañcaviṃśatisaṃkhyāni karaṇāni purātanāḥ
nitamboromaṇḍalayostvāvṛttyā saptaviṃśatiḥ

ye vakṣaḥsvastikaṃ cātra kaṭīchinnaṃ ca manvate
pañcaviṃśatireva syādāvṛttāvapi tanmate

ityākṣiptarecitaḥ
svastikādyaṃ recitaṃ syādardharecitakaṃ tataḥ
vakṣaḥsvastikamunmattasaṃjñamākṣiptarecitam

ardhamattallikaraṇaṃ syādrecakanikuṭṭakam
bhujaṃgatrastapūrvaṃ ca recitaṃ nūpuraṃ tataḥ

vaiśākharecitaṃ kṛtvā bhujaṃgāñcitamācaret
daṇḍarecitakaṃ cakramaṇḍalaṃ vṛścikādimam

recitaṃ vṛścikādūrdhvaṃ vivṛttavinivṛttake
vivartitaṃ ca garuḍaplutakaṃ lalitaṃ bhavet

mayūrādyaṃ sarpitaṃ ca skhalitākhyaṃ prasarpitam
talasaṃghaṭṭitamatho vṛṣabhakrīḍitaṃ tataḥ

lelitaṃ ṣaṭtriṃśatiryā karaṇānāmitīritā
tāṃ kṛtvā viṣamairbhāgaiścaturdhā dikcatuṣṭāye

parivṛttaprakāreṇa prayujyānte samācaret
uromaṇḍalakaṃ yatra kaṭīchinnaṃ sa recitaḥ

iti recitaḥ
nūpurākhyaṃ vivṛttaṃ ca nikuṭṭārdhanikuṭṭāke
ardharecitakādūrdhvaṃ syādrecakanikuṭṭakam

lalitākhyaṃ ca vaiśākharecitaṃ caturaṃ tataḥ
daṇḍarecitakādūrdhvaṃ bhavedvṛścikakuṭṭitam

nikuṭṭākaṃ pāśvapūrvaṃ saṃbhrāntodghaṭṭite tataḥ
uromaṇḍalakādūrdhvaṃ karihastasamāhvayam
kaṭīchinnaṃ saptadaśa bhavedardhanikuṭṭake

ityardhanikuṭṭakaḥ
latāvṛścikamādau syānninkuñcitamataḥ param
mattalli ca nitambākhyaṃ karaṇaṃ karihastakam

kaṭīchinnaṃ smṛtaṃ ṣaṣṭhaṃ vṛścikākpasṛte budhaiḥ
atra sthāne nitambasya bhramaraṃ kecidūcire

iti vṛścikāpasṛtaḥ
svastikaṃ vyaṃsitaṃ tu dviralātākhyordhvajānunī
nikuñcitārdhasūcyākhyavikṣiptodvṛttakānyatha

ākṣiptaṃ karihastaṃ syātkaṭīchinnamalātake
ekādaśa syuḥ karaṇānyekaṃ dvirvyaṃsite'dhikam

ityalātakaḥ
dakṣiṇāṅgena janitaṃ śakaṭāsyamalātakam

bhramaraṃ cātha gaṇḍasthaninkuṭṭitakarānvitam
karihastaṃ kaṭīchinnaṃ karaṇāni kramāditi

parāvṛtte ṣaḍuktāni śrīmatsoḍhalasūnunā
namanonnamanaṃ tajjñairaṅgasyoktaṃ nikuṭṭākam

iti parāvṛttaḥ
nitambaṃ karaṇaṃ kṛtvā kuryātskvastikarocitam

vikṣiptākṣiptakamatho latāvṛścikasaṃjñakam
unmattaṃ karihastaṃ ca bhujaṃgatrāsitaṃ tataḥ

ākṣiptakaṃ nitambaṃ ca nitambāntānyamūnyatha
nava bhramarakākhyeṇa parivṛttaṃ samācaret

digantaramukhe kṛtvā vyāvṛtya parayordiśoḥ
karihastakaṭīchinne kuryādādyadiśi sthitaḥ

yatra taṃ prāhurācāryāḥ parivṛttakarecitam
parivṛttavidhiścāyaṃ tyaktvā'ntyaṃ karaṇadvayam

sarveṣāmaṅgahārāṇāṃ śārṅgadevena sūriṇā
bhaṭṭābhinayaguptādimatajñena nigadyate

iti parivṛttakarecitaḥ
nūpurātkaraṇādūrdhvaṃ bhujaṃgāñcitamācaret
gṛdhrāvalīnakaṃ dve ca vikṣipte pṛthagaṅgaje

udvṛttamadhyera sūcyākhyaṃ nitambamatha vṛścikam
latāpūrvaṃ kaṭīchinnaṃ navabhiḥ karaṇairiti
udvṛttako dvirvikṣiptodvṛttākhyamadhikaṃ dvayam

ityudvṛttakaḥ
vikṣiptamañcitaṃ gaṇḍasūcī sarvāntimaṃ tataḥ
ardhasūci tato daṇḍapādaṃ vāmāṅgasādhitam

caturaṃ bhramaraṃ cātha nūpurākṣiptanāmake
ardhasvastikasaṃjñaṃ ca nitambaṃ karihastakam

uromaṇḍalasaṃjñaṃ ca kaṭīchinnamiti kramāt
karaṇaiḥ pañcadaśabhiḥ saṃbhrāntamabhaṇanbudhāḥ

iti saṃbhrāntaḥ
vaiśākharecitādūrdhvaṃ vṛścikaṃ dviridaṃ dvayam
nikuṭṭakābhidhādūrdhvaṃ kramāvāptalatākaram

kaṭīchinnaṃ caturthaṃ cettadā svastikarecitam
jñeyamādyadvayābhyāsādadhikaṃ karaṇadvayam

iti svastikarecitaḥ
mṛdaṅgairgomukhairbhambhābherīpaṭahaḍiṇḍimaiḥ

paṇavairdardurādyaiśca vādyaistālalayānugaiḥ
vardhamānāsāriteṣu pāṇikāgītakādiṣu

pūrvaraṅgasya cāṅgeṣu dhīrairutthāpanādiṣu
aṅgahārāḥ prayoktavyāḥ śreyaḥ paramabhīpsubhiḥ

viniyogo'ṅgahāreṣu karaṇānāmitīritaḥ
āhuḥ pṛthakprayoge'pi karaṇānāṃ mahatphalam

iti dvātriṃśadaṅgahāralakṣaṇam
recakānatha vakṣyāmaścaturo bharatoditān
pādayoḥ karayoḥ kaṭyā grīvāyāśca bhavanti te

pārṣṇyaṅguṣṭhāgrayorantarbahiśca satataṃ gatiḥ
namanonnamanopetā procyate pādarecakaḥ

parito bhramaṇaṃ tūrṇaṃ hastayorhaṃsapakṣayoḥ

yatparyāyeṇa racitaṃ sa bhavetkararecakaḥ
viralaprasṛtāṅguṣṭhāṅgulestiryagbhrameṇa ca

sarvato bhramaṇaṃ kaṭyāḥ kaṭirecakamūcire
grīvāyā vidhutabhrāntiḥ kathyate kaṇṭharecakaḥ
aṅgahārāṅgamapyete janayanti pṛkphalam

iti recakalakṣaṇam
vicitramaṅghrijaṅghorukaṭīkarma samaṃ kṛtam
cārī syātkaraṇe ṅīṣi careriñpratyayāntataḥ

hasto vā'bhinaye gatyāṃ caraṇo yo yadepsitaḥ
tatsaṃpattyucitā cārī kāryā taducitā parā

evamanyonyaniyamātsaiva vyāyāma ucyate
cārī ca karaṇaṃ khaṇḍo maṇḍalaṃ ceti tadbhidāḥ

tatraikapādaniṣpādyā cārī cāryeva kīrtitā
pādadvayena karaṇaṃ tannṛttakaraṇātpṛthak

karaṇaiḥ syāttribhiḥ khaṇḍo maṇḍalaṃ khaṇḍakaistribhiḥ
caturbhirvā kramāttāle tryasre ca caturasrake

bhaumī cā''kāśikītyeṣā dvedhā bhaumyo'tra ṣoḍaśa
samapādā sthitāvartā śakaṭāsyā ca vicyavā

adhyardhikā cāṣagatirelakākrīḍitā tathā
samosaritamattallī mattallyutsanditā'ḍḍitā

syanditā'pasyanditākhyā baddhā ca janitābhidhā
ūrūdvṛttetyatha brūmaḥ ṣoḍaśā''kāśikīrimāḥ

atikrāntā'pyapakrāntā pārśvakrāntā mṛgaplutā
ūrdhvajānuralātā ca sūcī nūpurapādikā

dolāpādā daṇḍapādā vidyuddhāntā bhramaryapi
bhujaṃgatrāsitā''kṣiptā viddhodvṛtteti kīrtitāḥ

bharatābhimatāścāryo dvātriṃśanmilitāstu tāḥ
deśīprasiddhāḥ santyanyāstāḥ saṃpratyabhidadhmahe

rathacakrā parāvṛttatalā nūpuraviddhikā

tiryaṅmukhā marālā ca karihastā kulīrikā
viśliṣṭā kātārā pārṣṇirecitā'pyūrutāḍitā

ūruveṇī talodvṛttā hariṇatrāsikā parā
ardhamaṇḍalikā tiryakkuñcitā ca madālasā

saṃcāritotkuñcitā ca stambhakrīḍanikā tataḥ
cārī laṅghitajaṅghākhyā sphuritā'pyapakuñcitā

api saṃghaṭṭitā khuttā svastikā taladarśinī
purāṭyardhapurāṭī ca sarikā sphurikā tataḥ

nikuṭṭakā latākṣepā'pyuḍuskhalitikā parā
samaskhalitikā bhaumyaḥ pañcatriṃśaditīritāḥ

vidyuddhāntā puraḥkṣepā vikṣepā hariṇaplutā
apakṣepā ca ḍamarī daṇḍapādāṅghritāḍitā

jaṅghālaṅghanikā'lātā jaṅghāvartā ca veṣṭanam
udveṣṭanamathotkṣepaḥ pṛṣṭhotkṣepaśca sūcikā

viddhā prāvṛttamullola ityatraikonaviṃśatiḥ
vyomagāḥ syurubhayāstu catuṣpañcāśadūcire

mārgadeśīgatācāryaḥ ṣaḍaśītirimā matāḥ
lakṣaṇāni kramāttāsāṃ cārīṇāmabhidadhmahe

nirantarau samanakhau pādau kṛtvā sthito yadā

sthānena samapādena samapādā tadoditā
pracārayogyatāmātrāccārī sthāne'pyasau matā

iti samapādā
caraṇāntarapārśvaṃ cedgatvā'gratalasaṃcaraḥ
antarjānuḥ svastikatvaṃ prāptaḥ pādastathetaraḥ
viśliṣya pārśvaṃ saṃnītaḥ sthitāvartā tadocyate

iti sthitāvartā
yatra dhṛtvā pūrvakāyaṃ pādo'gratalasaṃcaraḥ

prasāryodvāhitamuraḥ śakaṭāsyā tadā bhavet
āsyaṃ kṣepyaṃ hi śakaṭaṃ cārīmenāmupāśritaiḥ

iti śakaṭāsyā
vicyutya samapādāyāḥ pādau yadi talāgrataḥ
nikuṭṭayetāṃ dharaṇīmucyate vicyavā tadā

iti vicyavā
dakṣiṇāṅghreḥ pārṣṇideśe vāmaḥ pādo nidhīyate
dakṣiṇastvapasṛtya sve pārśve tryasratayā sthitaḥ

sārdhatālāntaratvena dakṣiṇo'pyevameva cet
vāmapārṣṇau sa ca tryasro bhavedadhyardhikā tadā

ityadhyardhikā
tālamātraṃ puraḥ sṛtvā dvitālaṃ pṛṣṭhato gate
dakṣiṇe'ṅghrau samaṃ pādau kiṃcidutplutipūrvakam

upasṛtyāpasarpetāmapasṛtyopasarpataḥ
yatra satrāsagatyādau saiṣā cāṣagatirmatā

iti cāṣagatiḥ
kiṃcidutplutya caraṇau yatrāgratalasaṃcarau
paryāyaśo nipatataḥ sailakākrīḍitā matā

ityelakākrīḍitā
abhyantare'ṅghreranyasya pāde'gratalasaṃcare
sajaṅghāsvastike'thānyapāde'gratalasaṃcare

kṛte'ṅghryorghūrṇatoryatrāpasṛtiścopasarpaṇam
samosaritamattallī sā bhavenmadhyame made

iti samosaritamattallī
bhūmiśliṣṭākhilatalau jaṅghāsvastikasaṃyutau

ardhatryasrau yadā pādau ghūrṇantau vopasarpataḥ
yadvā'pasarpataḥ sā syānmattallī taruṇe made

iti mattallī
kaniṣṭhāṅgulibhāgenāṅguṣṭhabhāgena ca kramāt
recakasyānukāreṇa śanairaṅghrirgatāgatam

kurute yatra sā cārī budhairutsanditoditā
recitaṃ nṛttahastaṃ ca kecidatra pracakṣate

ityutsanditā
samāṅghreragrapṛṣṭhābhyāmanyo'gratalasaṃcaraḥ
nighṛṣṭaścaraṇo yatra kramāttāmaḍḍitāṃ viduḥ

ityaḍḍitā
niṣaṇṇoruḥ samo vāmo dakṣiṇo'ṅghriḥ prasāritaḥ
pañcatālāntaraṃ tiryagyasyāṃ sā syanditā matā

iti syanditā
aṅghricāraviparyāsātsaivāpasyanditā matā

ityapasyanditā
ūrudvayasya valanaṃ jaṅghāsvastikasaṃyutam
bhaṅktvā vā svastikaṃ pādatalāgre maṇḍalabhramam
kṛtvā pārśvaṃ gate svaṃ svaṃ yatra baddheti sā matā

iti baddhā
cārī sā janitā yasyāṃ pādo'gratalasaṃcaraḥ

muṣṭirvakṣasi hasto'nyo yathāśobhaṃ pravartate
aṅghrikriyā pradhānaṃ syāditikartavyatetarā

iti janitā
pārṣṇiḥ pādasya cedagratalasaṃcarasaṃjñitaḥ
anyāṅghripṛṣṭhābhimukhī viparyāso'thavā bhavet

abhyanyajaṅghaṃ valitā jaṅghā cennatajānukā
ūrūdvṛttā tadā cārī lajjerṣyādau niyujyate

ityūrūdvṛttā
niyuddhe cāṅgahāreṣu nāṭye caitāḥ pratiṣṭhitāḥ
anādivedamūlena nāṭyavedena kīrtitāḥ

iti ṣoḍaśa bhaumacāryaḥ
athā''kāśikyaḥ
gulphakṣetre'nyapādasyodvṛtyāṅghriṃ kuñcitaṃ puraḥ
kiṃcitprasārya cā''kṣipya yathāprakṛti lokavat

catustālādyantareṇa tato'greṇa nipātayet
yatra cārīmatikrāntāṃ niḥśaṅkastāmakīrtayat

ityatikrāntā
baddhāṃ vidhāya cārīṃ cedudvṛtyāṅghriṃ ca kuñcitam
pārśve vinikṣipeccārīmapakrāntāṃ tadā''diśet

ityapakrāntā
nītvopari svapārśvena kuñcitaṃ caraṇaṃ tataḥ
pārṣṇyā cetpātayedbhūmau pārśvakrāntā tadocyate

sā pārśvadaṇḍapādeti prasiddhā lokavartmani

anyorukṣetraparyantamutkṣipya caraṇaṃ tataḥ
udghaṭṭitaṃ bhuvi nyasyedasyāmityapare jaguḥ

iti pārśvakrāntā
kuñcitaṃ pādamutkṣipyotplutya bhūmau nipātya tam
anyāñcitāṅghrijaṅghāṃ ca paścāddeśe kṣipedyadā
tadā mṛgaplutā jñeyā sā vidūṣakakartṛkā

iti mṛgaplutā
kuñcitotkṣiptapādasya jānustanasamaṃ yadā
nyasya stabdhīkṛto'nyo'ṅghrirūrdhvajānustadā bhavet

ityūrdhvajānuḥ
pṛṣṭhaprasāritāṅghreścedanyorvabhimukhaṃ talam
kṛtvā pārṣṇiḥ svapārśve kṣmānyastā'lātā tadoditā

ityalātā
utkṣipya kuñcitaṃ pādaṃ jaṅghāmasya prasārya ca

jānvantāṃ voruparyantāmagrayoge nataṃ bhuvi
caraṇaṃ pātayedyasyāṃ sā sūcīti nigadyate

iti sūcī
paścānnītvā'ñcitaṃ pādaṃ tasya pārṣṇyā sphijaṃ spṛśet
taṃ tato'ñcitajaṅghaṃ ca bhūmāvagratalena cet
vipātayettadā cārī proktā nūpurapādikā

iti nūpurapādikā
pādaṃ kuñcitamuddhṛtya dolayitvā ca pārśvayoḥ
nyasyetpārṣṇyā svapārśve ceddolāpādā tadocyate

iti dolāpādā
nūpuraścaraṇo'nyasya pārṣṇideśe vidhāya cet

svadehakṣetrābhimukhaṃ jānvagratvena vegataḥ
agre prasāryate cārī daṇḍapādā tadoditā

iti daṇḍapādā
pṛṣṭhato valitaḥ spṛṣṭvā śiro bhrāntvā ca sarvataḥ
prasṛtaścaraṇo yatra vidyuddhāntā bhavedasau

iti vidyuddhāntā atikrāntāgataṃ pādaṃ tryasrasyorovivartanam
kṛtvā pādāntaratalabhrameṇa bhrāmyate tanuḥ
yatra sā bhramarī cārī śārṅgadevena kīrtitā

iti bhramarī
anyorumūlakṣetrāntaṃ pādamutkṣipya kuñcitam
nitambābhimukhī pārṣṇiḥ kuryājjānu svapārśvagam

yatrottānaṃ pādatalaṃ kaṭījānuvivartanāt
bhujaṃgatrāsitā sā syādgujaṃgatrāsamūcikā

iti bhujaṃgatrāsitā
tālatrayāntarotkṣiptaṃ kuñcitaṃ pādamānayet

pārśvāntaraṃ tato jaṅghāṃ svastikīkṛtya pātayet
dharaṇyāṃ pārṣṇibhāgena yatrā''kṣiptāmamūṃ viduḥ

ityākṣiptā
viśliṣṭajaṅghayoḥ kṛtvā svastikaṃ tasya kuñcitaḥ
pādaḥ prasārito vakraḥ svapāśvastho'tha pātyate
pārṣṇyā pārṣṇyantarakṣetre yatrā''viddhā bhavatyasau

ityāviddhā
āviddhāpādamanyorupradeśasthāsnupārṣṇikam

kṛtvotplutya bhramarakaṃ dattvā yatra nipātayet
tathā'nyaṃ pādamuddhṛtya sodvṛttāśeṣarūpiṇī

ityudvṛttā
lalitāṅgakriyāsādhyāścāryo yuddhaniyuddhayoḥ
nṛtte nāṭye gatau caitāḥ prayoktavyā manīṣibhiḥ

pradhānaṃ yo yadā yatra hastaḥ pādo'thavā bhavet
so'gre tadanugo'nyaḥ syātsāmye tu samakālatā

yataḥ pādastato hasto yato hastastatastrikaḥ
caraṇānucarāṇyāhuraṅgopāṅgāni sūrayaḥ

evaṃ cārīpradhānatve syādaṅgaviniyojanam
prādhānye hastakānāṃ tu hastamaṅgānyupāsate

cāraṃ cāraṃ yathā cāryāṃ caraṇaḥ śrayate mahīm
kāraṃ kāraṃ karastadvadviśrāmyati kaṭītaṭe

ardhacandraḥ karo nāṭye saṃśrayeta kaṭītaṭam
pakṣavañcitako nṛtye pakṣapradyotako'thavā

iti dvātriṃśaccārīlakṣaṇam
caturasraṃ samāśritya saṃlagnau cetprasarpataḥ
purataḥ pṛṣṭhato vā'ṅghrī rathacakrā tadocyate

iti rathacakrā
paścāduttānitatalaścaraṇaḥ prasṛto bahiḥ
yasyāṃ parāvṛttatalā śārṅgadevena soditā

iti parāvṛttatalā
sthitvā svastikabandhena pārṣṇyoḥ prapadayostathā
recitau caraṇau yatra soktā nūpuraviddhikā

iti nūpuraviddhā
vardhamāne sthitau sthāne vāmadakṣiṇato yadā
saratodrutamānena pādau tiryaṅmukhā tadā

iti tiryaṅmukhā
nandyāvartasthitau pādau pārṣṇipādāgrarecitau
puraḥ prasāritau yasyāṃ sā marālā'bhidhīyate

iti marālā
saṃhatasthānake sthitvā pārśvābhyāṃ gharṣataḥ kṣitim
caraṇau yatra sā cārī karihastā prakīrtitā

iti karihastā
nandyāvartasthayoraṅghryostiryaksṛtvā kulīrikā
iti kulīrikā
pārṣṇividdhasthitau pādau cedviśliṣyopasarpataḥ
yadvā'pasarpataḥ proktā sā viśliṣṭābhidhā budhaiḥ

iti viśliṣṭā
nandyāvartasthapādābhyāṃ paścātsṛtvā tu kātarā
iti kātarā
pārṣṇipārśvagate sthāne sthitvā cedrecitā kṛtā
pārṣṇistadoditā cārī niṣṇātaiḥ pārṣṇirecitā

iti pārṣṇirecitā
ekapāde sthitaḥ sthāne bhūsthena caraṇena cet
ūruṃ tāḍayati proktā tadā cāryūrutāḍitā

ityūrutāḍitā
ūrusthasvastikākārāvaṅghrī saṃgharṣato bhuvam
pārśvābhyāṃ yatra tāmāhurūruveṇīṃ manīṣiṇaḥ

ityūruveṇī
aṅgulīpṛṣṭhabhāgena purataḥ sarato drutam
prapade yatra sā cārī talodvṛttā matā satām

iti talodvṛttā
kuñcite svastikīkṛtya valitānte tale yadā
aṅghryorutplutya nipateddhariṇatrāsikā tadā

iti hariṇatrāsikā
bhūmighṛṣṭyā bahirnītāvāvartete śanaiḥ kramāt
caraṇau yatra tāmāhurardhamaṇḍalikāṃ budhāḥ

ityardhamaṇḍalikā
yatrā''kuñcya tiraścīnaṃ caraṇaṃ prakṣipenmuhuḥ
tāṃ tiryakkuñcitāṃ cārīmāha śrīkaraṇeśvaraḥ

iti tiryakkuñcitā
itastataśca caraṇau sthāpayeta visaṃsthulau
mattavadyatra tāmāhuścārīṃ dhīrā madālasām

iti madālasā
ākuñcito'ṅghrirutkṣipyotkṣipyānyenāṅghriṇā yadā
yujyate'nyastu saṃsarpettiryaksaṃcāritā tadā

iti tiryaksaṃcāritā
utkṣipya kuñcitau pādau nyasyedekaikamagrataḥ
yasyāṃ sotkuñcitā cārī proktā soḍhalasūnunā

ityutkuñcitā
tiryakprasāritaikāṅghri pārśvamanyattalena cet
muhuḥ saṃyojayeduktā stambhakrīḍanikā tadā

iti stambhakrīḍanikā
sthāne'ṅghriḥ khaṇḍasūcyākhye tiṣṭhannākṛṣya vegataḥ
laṅghyate'nyāṅghriṇā yatra soktā laṅghitajaṅghikā

iti laṅghitajaṅghikā
sphuritā'gre sṛtau vegādbhūspṛśoḥ pādapārśvayoḥ
iti sphuritā
kramādākuñcitāṅghribhyāṃ paścādgatyā'pakuñcitā

ityapakuñcitā
sthāne viṣamasūcyākhye sthitvotplutya patanbhuvi
aṅghrī saṃghaṭṭayedyatra soktā saṃghaṭṭitābhidhā

iti saṃghaṭṭitā
dharaṇyāṃ caraṇāgreṇa ghātaḥ khuttā nigadyate
iti khuttā
caraṇaḥ svastikākārakāritaḥ svastikā bhavet

iti svastikā
yatrāṅghrī saṃhatasthāne sthitvā tiryakpṛthakkṛtau
spṛśato bāhyapārśvābhyāṃ bhuvaṃ sā taladarśinī

iti taladarśinī
nikuṭṭanaṃ mitho'ṅghribhyāmuddhatābhyāṃ purāṭikā
iti purāṭikā
uddhṛtena nikuṭṭena caraṇena nikuṭṭanam
uddhṛtasyānyapādasya yatra sā'rdhapurāṭikā

ityardhapurāṭikā
caraṇo'gre saratyeko yatra sā sarikā matā

iti sarikā
puraḥsaraṇamaṅghribhyāṃ samābhyāṃ sphurikā bhavet
iti sphurikā
sthitistu caraṇāgreṇa kuñcitena nikuṭṭikā

iti nikuṭṭikā
paścānnyasya purastaṃ ca prasārya caraṇaṃ yadi
nikuṭṭayedbhuvaṃ tena latākṣepastadoditaḥ

iti latākṣepaḥ
skhalite caraṇe tiryagaḍḍaskhalitikā bhavet

ityaḍḍaskhalitikā
purataḥ pṛṣṭhatastiryakcaraṇau yugapadyadā
skhalataḥ procyate cārī samaskhalitikā tadā

iti samaskhalitikā
yasyāṃ puro'ṅghrimutkṣipya lalāṭasyopari drutam
bhrāmayitvā bhuvi nyasyedvidyuddhāntāmamūṃ viduḥ

iti vidyuddhāntā
aṅghriṃ kuñcitamutkṣipya puro vistārya vegataḥ
vinyasedavanau yatra puraḥkṣepā bhavedasau

iti puraḥkṣepā
puro gaganabhāge cetprasārya caraṇaṃ muhuḥ
ākuñcayettadā cārī vikṣepā śārṅgiṇoditā

iti vikṣepā
natāṅghrerutplutyābhīkṣṇaṃ nipātāddhariṇaplutā

iti hariṇaplutā
bāhyapārśvena yatroroḥ pṛṣṭhaṃ spṛṣṭvetaratpadam
nitambanikaṭaṃ yāti sā'pakṣepā prakīrtitā

ityapakṣepā
ḍamaryākuñcitasyāṅghrervāmadakṣiṇato bhramāt
iti ḍamarī
yatra svastikamāvartya protkṣipettiryagūrdhvataḥ
caraṇau daṇḍapādā sā cārī niḥśaṅkakīrtitā

iti daṇḍapādā
vistāryāṅghrī plutaṃ kṛtvā gamanaṃ tāḍayenmitathaḥ
yadā pādataladvaṃdvaṃ tadā cāryaṅghritāḍitā

ityaṅghritāḍitā
kiṃcidākuñcitaṃ pādamaṅghriṇā'nyena laṅghayet
gagane cettadā cārī jaṅghālaṅghanikā matā

iti jaṅghālaṅghanikā
alātāṅghrau pṛṣṭhagate śīghramanyāṅghrilaṅghite

ityalātā
talamantarbhramasyāṅghrerjānupṛṣṭhe kṣipedyadi
bahirbhramasya tatpārśve jaṅghāvartā tadā bhaved

iti jaṅghāvartā
aṅghriṇaikena cedanyaṃ veṣṭayedveṣṭānaṃ tadā
tadeva valanaṃ kecidavadannṛttakovidāḥ

iti veṣṭanam
udveṣṭānaṃ veṣṭayitvā pṛṣṭhato'ṅghrau prasārite

ityudveṣṭānam
ākuñcitasya pādasya purataḥ pṛṣṭhatastathā
utkṣepo jānuparyantamutkṣepaḥ kathyate budhaiḥ

ityutkṣepaḥ
sa cetpṛṣṭhata eva syātpṛṣṭhotkṣepamamuṃ viduḥ
iti pṛṣṭhotkṣepaḥ
ūrau pārśvena vinyasya padaṃ yatra prasārayet
tīkṣṇāgrīkṛtya tāmāha sūcīṃ śrīkaṇṭhavallabhaḥ

iti sūcī
pādayoḥ svastike'syaikaḥ kiṃcidāndolitaḥ puraḥ
kuñcitaścaraṇo yatra sā viddhā bodhitā budhaiḥ

iti viddhā
lalitā valitā mūrtirudvṛttaścaraṇo bhavet
yatra tatprāvṛtaṃ jñeyaṃ makaradhvajajīvanam

iti prāvṛtam
ullolaḥ syāccaraṇayoḥ krameṇollālanāddivi

ityullolaḥ
sthānaṃ sthitirgatiścārī sthānamādyantayorgateḥ
sthitvā gacchati gatvā ca tiṣṭhatītyavinākṛtāḥ
cāryaḥ sthānena tābhyo'to'nantaraṃ sthānamucyate

saṃniveśaviśeṣo'ṅge niścalaḥ sthānamucyate

vaiṣṇavaṃ samapādaṃ ca vaiśākhaṃ maṇḍalaṃ tathā
ālīḍhapratyāliḍhe ca sthānānīti nareṣu ṣaṭ

atha sthānāni vakṣyāmastrīṇi strīṇāṃ munermatāt
āyatākhyāvahitthāśvakrāntānyanyaccatuṣṭayam

athāpi ceti vadatā muninā sūcitaṃ bruve
gatāgataṃ ca valitaṃ moṭitaṃ vinivartitam

atha deśīsthānakānāṃ trayoviṃśatirucyate
svastikaṃ vardhamānākhyaṃ nandyāvartaṃ ca saṃhatam

samapādaṃ caikapādaṃ pṛṣṭhottānatalaṃ tathā
caturasraṃ pāṣṇividdhaṃ pārṣṇipārśvagataṃ tathā

ekapārśvagataṃ ca syādekajānunatābhidham
parāvṛttāhvayaṃ sūci samādi viṣamādyapi

khaṇḍasūci tato brāhmaṃ vaiṣṇavaṃ śaivagāruḍe
kūrmāsanaṃ nāgabandhaṃ vṛṣabhāsanamityapi

svasthaṃ madālasaṃ krāntaṃ syādviṣkambhitamutkaṭam
srastālasaṃ jānugataṃ muktajānu vimuktakam

upaviṣṭasthānakāni naveti bharato'bhyadhāt
samamākuñcitaṃ sthānaṃ prasāritavivartite

udvāhitaṃ nataṃ ceti suptasthānāni santi ṣaṭ
iti sthānāni ṣaṭpuṃsāṃ strīṇāṃ saptāparāṇyapi

trayoviṃśatiruktāni nava sthānāni cā'sane
suptasthānāni ṣaṭtāni sarvāṇi militāni tu

ekapañcāśadācaṣṭa niḥśaṅkaḥ karaṇāgraṇīḥ
sarveṣāṃ vacmi lakṣmaiṣāmidānīṃ tadvidāṃ matam

ekaḥ samasthitaḥ pādastryasraḥ pakṣasthito'paraḥ

sārdhadvitālāntarālo jaṅghā kiṃcinnatā bhavet
sauṣṭhavaṃ yatra tajjñeyaṃ vaiṣṇavaṃ viṣṇudaivatam

prakṛtisthasya saṃlāpenānākāryāntarānvite
prayojyaṃ tanmuniḥ prāha nṛbhiruttamamadhyamaiḥ

viṣṇuveṣadhareṇaiva naṭenetyapare jaguḥ
sūtradhārādinā nāṭyasthitikartreti cāpare

pakṣasthito'sau caraṇo yaḥ pārśvābhimukhāṅguliḥ
tryasraḥ sa eva kiṃciccetpurodeśābhimukhyabhāk

aṅguṣṭhamadhyamāṅgulyau ye hastasya prasārite
tadagrayorantarālaṃ tālamāhurmanīṣiṇaḥ

kaṭī jānusamā yatra kūrparāṃsaśiraḥsamam
uraḥ samunnataṃ sannaṃ gātraṃ tatsauṣṭhavaṃ bhavet

sannaṃ svasthānaviśrāntaṃ niṣaṇṇaṃ tvacalasthiti

calapādamanatyuccamacañcalamakubjakam

sauṣṭhave'ṅgaṃ bhavettacca kāryamuttamamadhyamaiḥ
etacca vaiṣṇavaṃ sthānaṃ caturasrasya jīvanam

vaiṣṇavaṃ sthānakaṃ yatra kaṭīnābhicarau karau
pṛthaksamunnataṃ vakṣaścaturasraṃ taducyate

iti vaiṣṇavam
pradhānaṃ sauṣṭhavaṃ pādāvekatālāntarau samau

yatra tatsamapādaṃ syāccaturānanadaivatam
etacca vipradattāśīḥsvīkāre'tha nirīkṣaṇe

madhyamānāṃ vihaṃgānāṃ kanyāvarakutūhale
liṅgivrativimānasthasyandanastheṣu ceṣyate

iti samapādam
bhūmerūrdhvaniṣaṇṇau cetsārdhatālatrayāntare
nabhūsyūrū caraṇayostāvadevāntaraṃ bhuvi

tryasrapakṣasthayoḥ sthānaṃ vaiśākhaṃ kathitaṃ tadā
viśākhadaivataṃ tacca sthūlapakṣīkṣaṇe bhavet
yaddhādau preraṇe'śvānāṃ vegādāne ca vāhane

iti vaiśākham
pakṣasthau caraṇau tryasrāvekatālāntarau bhuvi
kaṭījānusamau vyomni sārdhatāladvayāntare

ūrū yatra niṣaṇṇau tanmaṇḍalaṃ śakradaivatam
dhanurvajrādiśastrāṇāṃ prayoge gajavāhane

vīkṣaṇe garuḍādīnāmidaṃ munirupādiśat
catustālāntarau pādau maṇḍale'nye pracakṣate

iti maṇḍalam
vāmo yatra niṣaṇṇorurambare pūrvamānataḥ
dakṣiṇaścaraṇaścāgre pañcatālaṃ prasāritaḥ

tryasrau dvāvapi tadvidyādālīḍhaṃ rudradaivatam
īrṣyākrodhakṛto jalpaḥ kāryastenottarottaraḥ

vīraraudrakṛtaṃ mallasaṃgharṣāsphoṭanādikam
tathā saṃdhāya śastrāṇi pratyālīḍhaṃ samāśrayet

ityālīḍham
ālīḍhāṅgaviparyāsātpratyālīḍhamudīritam
ālīḍhakṛtasaṃdhānaśastrametena mokṣayet
rudraṃ ca daivataṃ tatra bhāṣate śaṃbhuvallabhaḥ

iti pratyālīḍham
eṣāmādyāni catvāri dṛśyante nāṭyanṛttayoḥ
prayogastvantyayostajjñairiṣṭo nāṭyaikagocaraḥ

anye pañcavidhe'pyāhurnartane sthānakāni ṣaṭ

iti ṣaṭpuruṣasthānakāni
ghāmastālāntarastryasro dakṣiṇaścaraṇaḥ samaḥ
prasannaṃ vadanaṃ vakṣaḥ samunnatamanunnatā

kaṭīnitambago hasto dakṣiṇo'nyo latākaraḥ
yatrā''yataṃ tadākhyātaṃ kamalā cātra devatā

sthānaṃ cikīrṣitāsu syātkṣatāsu ca gatiṣvidam
ābhāṣaṇe ca kartavye sakhīpriyatamādibhiḥ

raṅgāvataraṇārambhe puṣpāñjalivisarjane
amarṣe pratiṣedhe ca kāryaṃ mānāvalambane
garvagāmbhīryamaune syādāvāhanavisarjane

pūrvaraṅge strībhireva prayojyaṃ kecidūcire
naro nāryo'thavā kuryuḥ praveśe sthānakaṃ striyāḥ

sthānaṃ yathābhineyaṃ syātpraviṣṭeṣviti cāpare
āyatānantaraṃ kāryā raṅgāvataraṇādayaḥ

hastapādapracārastu teṣu jñeyo yathocitam
bhaṭṭābhinavaguptasya matametadudīritam

ityāyatam
avahitthaṃ tadeva syādviparyāsena pādayoḥ
cintāvitarkayostoṣe saṃlāpe ca nisargaje

vismaye bhūrisaubhāgyagarvaje svāṅgavīkṣaṇe
līlāvilāsalāvaṇyavaramārgavilokane

kāryaṃ daurgamidaṃ sthānamavahitthasya sūcakam

ityavahittham
samasthaikasya pādasya pārṣṇideśaśato'paraḥ
sūcīpādaḥ svapārśve vā samastālāntare sthitaḥ

yatrāśvārohaṇārambhe tadaśvakrāntamucyate
skhalite vigaladvastradhāraṇe gopyagopane

prasūnastabakādāne taruśākhāvalambane
naisargike ca saṃlāpe vibhrame lalite tathā
prayoktavyamidaṃ sthānaṃ bhāratī cātra devatā

ityaśvakrāntam
gatyunmukhī ca yatraikaṃ padamuddhṛtya nartakī
udāste tadgatisthityornirodhātsyādgatāgatam

iti gatāgatam
śarīramīṣadvalitaṃ pādo valitadigbhavaḥ
kaniṣṭhāśliṣṭabhūranyo bhūlagnāṅguṣṭhako yadā
tadā valitamākhyātaṃ sābhilāṣavilokane

iti valitam
ekaḥ samo'ṅghriranyastu kuñcito'rdhatalāṅguliḥ
agre yadordhvagau hastau karkaṭau moṭitaṃ tadā
kāmāvasthāsu sarvāsu viniyogo'sya kīrtitaḥ

iti moṭitam
pṛṣṭhato'ṅgaparāvṛttyā tadeva vinivartitam

iti vinivartitam
svastiko haṃsakasthāne caraṇau kuñcitau yadā
mithaḥ śliṣṭakaniṣṭhau ca tadāhuḥ svastikaṃ budhāḥ

iti svastikam
vardhamāne tu caraṇau tiryañcau pārṣṇisaṃgatau

iti vardhamānam
asyaiva ceccaraṇayorantaraṃ syātṣaḍaṅgulam
vitastimātramathavā nandyāvartaṃ tadoditam

iti nandyāvartam
dehaḥ svābhāviko'ṅguṣṭhau pādayoścenmitho yutau
gulphau ca saṃhataṃ tatsyātpuṣpāñjalivisarjane

iti saṃhatam
vapuḥ svābhāvikaṃ pādau vitastyantaritāvṛjū
yatra tatsamapādākhyaṃ śārṅgadevaḥ samādiśat

iti samapādam
samasyāṅghrerjānumūrdhvaṃ bāhyapārśve yadītaraḥ
bāhyapārśvena lagno'ṅghrirekapādaṃ tadocyate

ityekapādam
bhūlagnāṅgulipṛṣṭho'ṅghriḥ paścādeko'paraḥ puraḥ
samo yatra tadādiṣṭaṃ pṛṣṭhottānatalaṃ budhaiḥ

iti pṛṣṭhottānatalam
nandyāvartasya cedaṅghryorbhavedaṣṭādaśāṅgulam
antaraṃ caturaiḥ sthānaṃ caturasraṃ tadoditam

iti caturasram
pārṣṇiraṅguṣṭhasaṃśliṣṭā pārṣṇividdhe vidhīyate
iti pārṣṇividdham
pārṣṇipārśvagate pārṣṇirantaḥ pārśvāntarasthitaḥ

iti pārṣṇipārśvagatam
samasyāṅghreḥ puraḥ kiṃcidaparaścaraṇo yadā
syādbāhyapārśvagastiryagekapārśvagataṃ tadā

ityekapārśvagatam
ekaḥ samo'ṅghriranyaścedantare caturaṅgule
tiryakkuñcitajānuḥ syādekajānunataṃ tadā

ityekajānunatam
parāvṛtte same syātāṃ pārṣṇyā'ṅguṣṭhakaniṣṭhike
iti parāvṛttam
pārṣṇijaṅghorusaṃlagnadharaṇī caraṇau yadā
tiryakprasāritau syātāṃ samasūci tadocyate

iti samasūci
sūcīpādau pṛthagyatra puraḥ paścātprasāritau

yugapadgaditaṃ tajjñaiḥ sthānaṃ viṣamasūci tat
bhūlagnajānugulphau tau caraṇau kecidūcire

iti viṣamasūci
eko'ṅghriḥ kuñcito'nyastu bhūsaṃlagnorupārṣṇikaḥ
tiryakprasārito yatra khaṇḍasūci tadocyate

iti khaṇḍasūci
ekaḥ samo'ṅghriranyaścetkuñcitīkṛtya pṛṣṭhataḥ
jānusaṃdhisamatvenotkṣipto brāhmaṃ taducyate

iti brāhmam
samamekaṃ vidhāyāṅghrimanyaścetkuñcito manāk
puraḥ prasāritastiryakpadaṃ syādvaiṣṇavaṃ tadā

iti vaiṣṇavam
aṅghreḥ samasya vāmasya jānuśīrṣasamo'paraḥ
uddhṛtaḥ kuñcitākāro yatra śaivaṃ taducyate

iti śaivam
ākuñcitaḥ puro vāmaḥ paścādanyastu jānunā
bhuvaṃ gatau yadā pādau gāruḍaṃ gaditaṃ tadā

iti gāruḍam
dakṣiṇaścaraṇo jānubāhyagulphamilatkṣitiḥ
vāmaḥ samo bhavedyatra kūrmāsanamado viduḥ

iti kūrmāsanam
yadopaviśya vāmoroḥ pṛṣṭhe nyasyati dakṣiṇām
jaṅghāṃ tadā nāgabandhamabhyadhātkaraṇāgraṇīḥ

iti nāgabandham
viyute saṃyute vā cejjānunī saṃsthite kṣitau
vṛṣabhāsanamākhyātaṃ sauṣṭhavādhiṣṭhitaṃ tadā

iti vṛṣabhāsanam
vistāritāñcitāvaṅghrī yatroraḥ kiṃcidunnatam
karāvūrukaṭinyastau svasthaṃ sthānaṃ taducyate

iti svastham
ekaḥ prasāritaḥ kiṃcidanyo'ṅghristvāsanāśritaḥ
śiraḥpāśvagataṃ yatra tanmadālasamiṣyate
made vipadi nirvede'thautsukye virahe bhavet

iti madālasam
hastau cibukavinyastau bāhuśīrṣaśritaṃ śiraḥ
īṣadbāṣpe ca nayane yatra krāntamado matam
nirjite nigṛhīte ca śokaglāne bhavedidam

iti krāntam
ūruvistāritau bāhū pādau vistāritāñcitau

yadā nimīlite netre viṣkambhaṃ bhaṇitaṃ tadā
yoge dhyāne bhavedetatsvabhāvena bhaṭāsane

iti viṣkambhitam
samāsanasamaṃ spṛṣṭabhūtalaṃ caraṇau samau
yadā tadotkaṭaṃ yogadhyānasaṃdhyājapādiṣu

ityutkaṭam
hastau srastau vimuktau ca śarīramalasaṃ yadā
locane mantharākāradhare srastālasaṃ tadā
hāniglānimadavyādhimūrchābhītiṣu tadbhavet

iti srastālasam
jānubhyāṃ bhūmisaṃsthābhyāṃ sthānaṃ jānugataṃ matam

home devārcane dīnayācane mṛgadarśane
kusattvatrāsane cedaṃ bhavetkruddhaprasādane

iti jānugatam
utkaṭasyaiva jānvaikaṃ dharāpṛṣṭhamadhiṣṭhitam
yatraitanmuktajānu syānmāninīnāṃ prasādane
havane sajjanānāṃ ca sāntvane sādhukartṛke

iti muktajānu
vimuktaṃ bhūprapatanaṃ hāvakrandādiṣu smṛtam
iti vimuktam
suptamuttānavaktraṃ ca srastamuktakaraṃ samam

iti samam
ākuñcitāṅgamāviddhajānvākuñcitamucyate
prayogastasya śītārtābhinaye śārṅgiṇoditaḥ

ityākuñcitam
upadhāya bhujāmekāṃ yatprasāritajānukam
suptaṃ prasāritaṃ sthānaṃ sukhasupte tadiṣyate

iti prasāritam
vivartitamadhovaktraṃ suptaṃ śastrakṣatādiṣu

iti vivartitam
skandhanyastaśiraḥ suptaṃ kūrparādhiṣṭhitakṣitiḥ
yattadudvāhitaṃ proktaṃ līlayā'vasthitau prabhoḥ

ityudvāhitam
īṣatprasṛtajaṅghaṃ yatsuptaṃ srastakaradvayam
tannataṃ sthānakaṃ khedaśramālasyādiṣu smṛtam

iti natam
vāṅmanaḥkāyajā ceṣṭā puruṣārthopayoginī
vṛttiḥ sā bhāratī sāttvatyārabhaṭyatha kaiśikī

caturvidheti vijñeyā tāsāmutpattirucyate
ṛgvedādbhāratī jātā yajurvedāttu sāttvatī
atharvaṇādārabhaṭī sāmavedāttu kaiśikī

vṛttiḥ saṃskṛtavākyaikapradhānā bharaitarnṛbhiḥ
prayujyamānā vāgvṛttiḥ prādhānyādbhāratī matā

sattvaprakāśakaṃ yatsyāttadyuktaṃ sattvamucyate
manastatprabhavā harṣaśauryatyāgāstu sāttvatāḥ

tatpradhānā sāttvatī syādvīraraudrādbhutotkaṭā
hīnā śṛṅgāranirvedakaruṇairuddhatāśrayāt

ārādutsāhino ye syurbhaṭāstatkāyasaṃbhavā
bhavedārabhaṭī vṛttī raudrādāvuddhate rase
māyendrajālabahulā citrayuddhapravardhinī

vāgaṅgābharaṇānāṃ yā saukumāryeṇa nirmitā
ullasadgītanṛttāḍhyā śṛṅgārarasanirbharā

niḥśaṅkaḥ kaiśikīṃ brūte tāṃ saundaryaikajīvitām
saundaryasaukumāryābhyāṃ raudrādāvapyasau bhavet

āmukhaṃ ca prahasanaṃ tathā vīthī prarocanā
aṃśāḥ syuriti catvāro ye bhāratyā munermatāḥ

udghātyakāvalagite kathodghātaḥ pravartakam
prayogātiśayaśceti bhedāḥ pañcā''mukhasya ye

utthāpakābhidho bhedaḥ sāttvatyāḥ parivartakaḥ
saṃlāpakaścaturthastu yaḥ saṃghātyakasaṃjñakaḥ

saṃkṣiptakaṃ cāvapātaḥ syādvastūtthāpanaṃ tathā
saṃpheṭaścā''rabhaṭyāṃ yaditi bhedacatuṣṭayam

kaiśikyāṃ yanmataṃ narma narmaspuñjastathā'paraḥ
narmasphoṭo narmagarbhaśceti bhedacatuṣṭayam

paricittākṣepakaṃ ca paropālambhakaṃ tathā
roṣerṣyāsūcakaṃ ceti narmabhedāstrayaśca ye

sodāharaṇalakṣmāṇaste'mī nāṭakagocarāḥ
vistaratrastacittena niḥśaṅkena na tenire

kāvyaṃ gītaṃ tathā nṛttaṃ vṛttihīnaṃ na śobhate
ato vṛttīrvijānīyādetā bharatabhāṣitāḥ

iti vṛttilakṣaṇam
yuddhe parātmaśastrāṇāṃ kramāccyāvanapātane
vidhātumucitā gātravartanā nyāya ucyate

bhārataḥ sāttvato vārṣagaṇyaḥ kaiśikasaṃjñakaḥ

bhedāstasyeti catvāraḥ kramādvṛtticatuṣṭaye
teṣāṃ lakṣaṇasiddhyarthaṃ pravicārānbruve'dhunā

yāḥ prakṛṣṭā vicitrāca gatayaste parikramāḥ
ta eva pravicārāḥ syuḥ śastramokṣaṇagocarāḥ

phalakaṃ vāmahastena khaḍgaṃ dakṣiṇapāṇinā
gṛhītvā'pasṛtau kṛtvā karāvākṣipya tau tataḥ

phalakabhrāmaṇaṃ kṛtvā pārśvayorubhayoratha
paritaḥ śirasaḥ śastraṃ bhrāmayitvā tu khaḍginam

karaṃ śiraḥkapolāntarudveṣṭya maṇibandhataḥ
phalakasyāpyupaśiraḥ paribhramaṇamācaret

vidhireṣa sakṛtkaṭyāṃ śastrapātaśca bhārate
sāttvate'pyevameva syācchastrabhrāntistu pṛṣṭhataḥ

kartavyaḥ śastrapātastu pādayoriha tadvidā
pravicāraḥ sāttvatavadvārṣagaṇye vidhīyate

pṛṣṭhataḥ phalakasyāpi bhrāmaṇaṃ syādihādhikam
skandhe vakṣasi vā śastrahastasyodveṣṭānaṃ tathā

prahārapātanaṃ cātra vakṣasthalagataṃ matam
kaiśike syādbhāratavacchastrapātastu mūrdhani

śaktikuntādiśastrāṇi dhanurvajrādikānyapi
nyāyeṣveṣu prayuñjīta sauṣṭhavena samanvitaḥ

pravicārā na śobhante sauṣṭhavena vinā kṛtāḥ
saṃjñāmātreṇa kartavyaḥ prahāro na tu vāstavaḥ

māyendrajālairathavā prahāramiva darśayet
ete nyāyāḥ prayoktavyāścārībhiḥ śastramokṣaṇe

ini nyāyalakṣaṇam
cārīcayaviśeṣaḥ prāṅmaṇḍalaṃ pratipāditam
tadbhedānadhunā dhīmānvakti śrīkaraṇāgraṇīḥ

bhramarāskanditāvartaśakaṭāsyāni cāḍḍitam
samosaritamadhyardhamelakākrīḍitaṃ tataḥ

piṣṭakuṭṭaṃ cāṣagataṃ bhaumānīti daśāvadan
atikrāntaṃ daṇḍapādaṃ krāntaṃ lalitasaṃcaram

sūcīviddhaṃ vāmaviddhaṃ vicitraṃ vihṛtaṃ tataḥ
alātaṃ lalitaṃ ceti vyomajāni daśābruvan

bhaumākāśikacārīṇāṃ prācuryānmaṇḍalānyapi
bhaumānyākāśikānīti vyapadeśaṃ prapedire

eteṣāṃ viniyogaśca vijñeyaḥ śastramokṣaṇe
nabhobhavānāṃ prādhānyaṃ bodhyaṃ yuddhaparikrame

cārīnāmnā'tra caraṇaṃ vakṣye cārīvivakṣayā
cārīṇāṃ nyūnatādhikyaṃ na dūṣayati maṇḍalam

dakṣiṇo janito vāmaḥ syandito dakṣiṇaḥ punaḥ
śakaṭāsyastathā vāmaḥ pādo'pasyandito'thavā

dakṣiṇo bhramaro vāmaḥ syandito'ṅghrirathetaraḥ
śakaṭāsyaścāṣagatirvāmo'nyo bhramaro bhavet
vāmānte syandito yatra tadūce bhramaraṃ budhaiḥ

iti bhramaram
dakṣiṇo bhramaro vāmo'ḍḍito'tha bhramaraḥ sa cet
dakṣiṇaḥ śakaṭāsyatvaṃ gatvorūdvṛttatāṃ gataḥ

vāmo vā'dhyardhikībhūya bhramaro dakṣiṇaḥ punaḥ
syanditaḥ śakaṭāsyastu vāmastenaiva bhūtalam
sphuṭamāsphoṭitaṃ dhīraistadāskanditamiṣyate

ityāskanditam
dakṣiṇo janito vāmaḥ sthitāvartastataḥ param
śakaṭāsyo bhavetpaścādelakākrīḍitāhvayaḥ

ūrūdvṛtto'ḍḍitaścārīṃ janitāmāśritastataḥ
samosaritamattalliḥ kramādaṅghristu dakṣiṇaḥ

śakaṭāsyaḥ kramādūrūdvṛttaśca syādathetaraḥ
pādaścāṣagatirdviḥ syāddakṣiṇaḥ syanditastataḥ

vāmāṅghriḥ śakaṭāsyaḥ syādanyo'ṅghrirbhramarastataḥ
vāmaścāṣagatiryatra tadāvartamavādiṣuḥ

ityāvartam
janitaḥ saptapūrvoktasthitāvartādibhedabhāk
krameṇa śakaṭāsyaśca dakṣiṇaḥ syandito'paraḥ

śakaṭāsyastataḥ pādo yāvanmaṇḍalapūraṇam
krameṇa yatra tajjñeyaṃ śakaṭāsyābhidhaṃ budhaiḥ

iti śakaṭāsyam
udghaṭṭitastato baddhaḥ samosaritapūrvakaḥ
mattallirardhamattallirapakrāntaśca dakṣiṇaḥ

udvṛtto idyuddhāntaśca bhramaraḥ syanditaśca saḥ
vāmastu śakaṭāsyo'nyo dviḥ syāccāṣagatistataḥ

vāmo'ḍḍito'dhyardhikastu kramāccāṣagatiḥ paraḥ
samosaritamattallirmattallirbhramarastathā

vāmo'tha syandito bhūtvā bhūtaṭāsphoṭanaṃ yadā
kurute dakṣiṇaḥ prāhuraḍḍitaṃ maṇḍalaṃ tadā

ityaḍḍitam
sthānena samapādena sthitvā hastau prasārayet
nirantarāvūrdhvakṛtāvāveṣṭyodveṣṭyavatkṣipet

kaṭītaṭe tataḥ pādau bhrāmayeddakṣiṇe tataḥ
krameṇānantaraṃ vāmaṃ puraḥ pādaṃ prasārayet

evaṃ bhrāntvā kramādyatra maṇḍalabhramaṇaṃ bhavet
caturdikkaṃ tadākhyātaṃ samosaritasaṃjñakam

iti samosaritam
krameṇa dakṣiṇaḥ pādo janitaḥ syanditastataḥ
aḍḍitoktā caturbhedī vāmasyādhyardhikādikā

dakṣiṇaḥ śakaṭāsyaḥ syādyatrānte dikcatuṣṭaye
maṇḍalabhramaṇaṃ tattu niyuddhe'dhyardhamaṇḍalam

ityadhyardham
bhūyuktaiścaraṇaiḥ sūcīviddhaṃ karaṇamāśritaiḥ
sūcīviddhābhidhe cāryāvelakākrīḍitairatha

saṃpūrṇairbhramaraiḥ prāgvatsūcīviddhāṅghribhistataḥ
ākṣptairmaṇḍalabhrāntyā dikcatuṣṭayayuktayā
ante racitayā jñeyamelakākrīḍitāhvayam

ityelakākrīḍitam
sūcī dakṣiṇapādaḥ syādvāmo'pakrāntakastataḥ

savyavāmau ca bahuśo bhujaṃgatrāsitau kramāt
yatrānte maṇḍalabhrāntiḥ piṣṭakuṭṭaṃ taducyate

iti piṣṭakuṭṭam
caraṇaiścāṣagatibhiḥ samastairmaṇḍalabhramam
ante dadhaccāṣagataṃ niyuddhaviṣayaṃ bhavet

iti cāṣagatam
janitaḥ śakaṭāsyaśca dakṣiṇaścaraṇaḥ kramāt
vāmo'lāto dakṣiṇastu pārśvakrāntastato'paraḥ

sūcī sa eva bhramara udvṛtto dakṣiṇo bhavet
vāmastvalātako vā'ghrī chinnākhyakaraṇāśrayau

vāhyabhramarakaṃ yatra vāmāṅgaṃ recitaṃ bhavet
atikrāntastato vāmo daṇḍapādastu dakṣiṇaḥ
avocattadatikrāntaṃ maṇḍalaṃ śaṃkarapriyaḥ

ityatikrāntam
dakṣiṇo janito bhūtvā daṇḍapādo bhavedatha
sūcī ca bhramaro vāma udvṛtto dakṣiṇastataḥ

alāto vāmacaraṇaḥ pārśvakrāntastu dakṣiṇaḥ
bhujaṃgatrāsitaścāsau vāmo'tikrāntatāṃ gataḥ

dakṣiṇo daṇḍapādo'tha sūcī ca bhramaro'paraḥ
yatra taddaṇḍapādākhyaṃ maṇḍalaṃ babhaṇe budhaiḥ

iti daṇḍapādam
dakṣiṇaḥ sūcyapakrānto vāmo'ghrirdakṣiṇastataḥ
pārśvakrāntastathā vāmaḥ samantānmaṇḍalabhramaḥ

sūcī yatrātha vāmaḥ syādapakrāntastu dakṣiṇaḥ
taduktaṃ kṛtibhiḥ krāntaṃ svabhāvagatigocaram

iti krāntam
ūrdhvajānustathā sūcī dakṣiṇaścaraṇaḥ kramāt
vāmapādastvapakrāntaḥ pārśvakrāntastu dakṣiṇaḥ

kramātsūcī bhramarako vāmaḥ pādo'tha dakṣiṇaḥ
pārśvakrāntastato vāmo'tikrānto dakṣiṇaḥ punaḥ

sūcyapakrāntako vāmaḥ pārśvakrānto'parastataḥ
syādvāmāṅghriratikrāntaścaraṇadvitayī tataḥ

syācchinnakaraṇoktā cedvāmāṅghriracitaṃ śritā
bāhyabhramarakaṃ vidyāttadā lalitasaṃcaram

iti lalitasaṃcaram
dakṣiṇaścaraṇaḥ sūcī bhramaraśca bhavettataḥ
pārśvakrānto'tha vāmāṅghrirapakrānto'tha dakṣiṇaḥ

sūcī vāmastvapakrāntaḥ pārśvakrāntastu dakṣiṇaḥ
yatra tanmaṇḍalaṃ proktaṃ sūcīviddhaṃ purātanaiḥ

iti sūcīviddham
sūcyaṅghrirdakṣiṇo vāmastvapakrānto'tha dakṣiṇaḥ

daṇḍapādo'tha sūcī syādvāmo bhramarakaśca saḥ
pārśvakrānto dakṣiṇaḥ syādākṣipto dakṣiṇetaraḥ

dakṣiṇo daṇḍapādaḥ syādūrūdvṛtto'pyanantaram
vāmaśca sūcī bhramaro'lātaśca kramato bhavet

pārśvakrānto dakṣiṇaḥ syādvāmo'tikrāntatāṃ vrajet
yatra tadvāmaviddhākhyaṃ maṇḍalaṃ śārṅgiṇoditam

iti vāmaviddham
dakṣiṇo janito'ṅghriḥ syādūrūdvṛttaśca vicyavaḥ
tataḥ samasthitāvartodvyāvartoditabhedabhāk

syandito vāmapādaḥ syātpārśvakrāntastu dakṣiṇaḥ
bhujaṃgatrāsito vāmo'tikrānto dakṣiṇo bhavet

udvṛttaścaiva vāmastu syādalāto'tha dakṣiṇaḥ
pārśvakrānto'thavā sūcī vāmo vikṣipya dakṣiṇam
vāmo'pakrāntatāṃ nītastadvicitraṃ pracakṣate

iti vicitram
dakṣiṇo vicyavo bhūtvā syandito'nantaraṃ bhavet

pārśvakrānto dakṣiṇo'ṅghrirvāmastu syanditastataḥ
udvṛtto dakṣiṇo'lāto vāmaḥ sūcī tu dakṣiṇaḥ

pārśvakrāntastu vāmāṅghrirākṣiptībhūya dakṣiṇaḥ
bhrāntvā savyāpasavyena daṇḍapādatvamāgataḥ

vāmaḥ krameṇa sūcī syāddhamaraścātha dakṣiṇaḥ
bhujaṃgatrāsito vāmo'tikrānto vihṛtābhidhe

iti vihṛtam
sūcīṃ ca bhramarīṃ vāme kramātpāde tu dakṣiṇe

bhujaṃgatrāsitāṃ cārīmalātāṃ dakṣiṇetare
ṣaṭkṛtvaḥ saptakṛtvo vā kṛtvā cārīrimāḥ kramāt

caturdikṣu drutaṃ bhrānnvā parimaṇḍalitākṛtiḥ
dakṣiṇāṅghrāvapakrāntāṃ vāme tu caraṇe kramāt

atikrāntā bhramarike lalitaiścaraṇakramaiḥ
karoti yatra tatprāhuralātaṃ maṇḍalaṃ budhāḥ

ityalātam
sūcyaṅghrirdakṣiṇo vāgastvapakrānto'tha dakṣiṇaḥ
pārśvakrāntatvamāgatya bhujaṃgatrāsito bhavet

atikrāntastu vāmāṅghrirākṣipto dakṣiṇastataḥ
vāmo'tikrāntatāṃ nītvorūdvṛtto'lātakaḥ kramāt

pārśvakrānto dakṣiṇaḥ syādvāmaḥ sūcyatha dakṣiṇaḥ
apakrānto vāmapādastvatikrāntīkṛto yadā
lalitaṃ saṃcareduktaṃ lalitaṃ maṇḍalaṃ tadā

iti lalitam
iti daśā''kāśikamaṇḍalāni
cāliścālivaḍaścātha laḍhiḥ sūkamuroṅgaṇam

dhasakaścāṅgahāraḥ syādoyāro vihasī manaḥ
lāsyāṅgāni daśaitāni deśyāṃ deśīvido viduḥ

komalaṃ savilāsaṃ ca madhuraṃ tālalāsyayuk
nātidrutaṃ nātimandaṃ tryasratāpracuraṃ tathā

pādorukaṭibāhūnāṃ yaugapadyena cālanam
cāliḥ sā śaighryasāṃmukhyaprāyā cālivaḍo bhavet

sukumāraṃ tiraścīnaṃ vilāsarasikaṃ ca yat
yugapatkaṭibāhūnāṃ cālanaṃ sā laḍhirmatā

karṇayorhāvabahulaṃ lasallīlāvataṃsayoḥ
vilambenāvilambena sūkaṃ tallayacālanam

vilambenāvilambena kucayorbhujaśīrṣayoḥ
lalitaṃ cālanaṃ tiryaktajjñāḥ prāhururoṅgaṇam

dhasakaḥ syātsulalitaṃ stanādhonayanaṃ layāt

satālalalitopetā kramātkāryā dvayornatiḥ
dhanurvadaṅgahāraḥ syāditi niḥśaṅkabhāṣitam

kiṃcittiryagadho mūrdhno gatiroyārako mataḥ
smitaṃ syādvihasī yastu śṛṅgārarasanirbharaḥ

abhyastādanya evātisūkṣmapratyagrabhāṅgibhāk
gītāderāgataḥ sthāyastallayāttanmano matam

iti daśa lāsyāṅgāni
śironetrakarādīnāmaṅgānāṃ melane sati
kāyasthitirmanonetrahārī rekhā prakīrtitā

iti rekhālakṣaṇam
vighneśaṃ bhāratīṃ devīṃ brahmaviṣṇumaheśvarān
raṅgaṃ taddevatāstālavādyabhāṇḍāni ca kramāt

upādhyāyaṃ nṛttakanyāḥ stambhayugmaṃ ca daṇḍikām
kastūrikācandanādyaiḥ sāmodairanulepanaiḥ

śubhrairaḥ sugandhibhiḥ puṣpairdhūpairānātrikairapi
naivedyairvividhairvastraistāmbūlairbalibhistathā

arcayitvā śubhe lagne prārabheta śramaṃ sudhīḥ
stambhadvayoparinyasyetkṛtvā hṛdayasaṃmitām

hastagrāhyāṃ tiraścīnāmavaṣṭambhāya daṇḍikām
vasitvā vasanaṃ śubhraṃ dṛḍhamādāya kañcukam

daṇḍikālambinī kanyā'bhyasyedaṅgavivartanam
valanaṃ sthāpanaṃ rekhāṃ tālasāmyaṃ layānapi

aṅgādīni puroktāni lāsyāṅgānyakhilānyapi
gītavādyānugamanaṃ śikṣeta sumanāḥ satī

iti śramavidhiḥ
pātraṃ syānnartaādhāro nṛtte prāyeṇa nartakī
mugdhaṃ madhyaṃ pragalbhaṃ ca pātraṃ tredheti kīrtitam

mugdhāderlakṣaṇaṃ proktaṃ yauvanatritayaṃ kramāt

līnādharastanābhogakapolajaghanorukam
surataṃ prati sotsāhaṃ prathamaṃ yauvanaṃ matam

pīnorujaghanaṃ pīnakaṭhinoccaghanastanam
jīvitaṃ manmathasyoktaṃ dvitīyaṃ yauvanaṃ budhaiḥ

unmādakaṃ śriyā juṣṭaṃ saṃpannaratinaipuṇam
kāmaśikṣitabhāvaṃ ca tṛtīyaṃ yauvanaṃ viduḥ

yauvanaṃ turyamapyasti mandotsāhamano bhavet
mlānādharastanābhogakapolajaghanaṃ ca tat

atipragalbhametasmādyauvanātpātramucyate
tajjarābhimukhaṃ śobhāvikalaṃ nā''dṛtaṃ budhaiḥ
bālaṃ manovihīnatvānna pātraṃ tajjñarañjakam

iti pātralakṣaṇam
sauṣṭhavaṃ rūpasaṃpattiścāruvistīrṇavaktratā
viśālanetratā bimbādharatā kāntadantatā

sukaṇṭhakambutā vellallatāsarasabāhutā
tanumadhyonnatisthūlanitambakarabhorutā

atyuccakharvapīnatvarāhityamaśirālatā

lāvaṇyakāntimādhuryadhairyaudāryapragalbhatā
gauratā śyāmatā veti tajjñaiḥ pātraguṇā matāḥ

yatpātraṃ gātravikṣepaiḥ komalairvilasallayaiḥ
sutālairakṣarāṇīva prodgiradgītavādyayoḥ

gītavādyadhvaniṃ cāṅgaiścākṣuṣatvamivā''nayat
sumanāṃsīva gātrāṇi rasapūrṇatayā dadhat
nṛtyatyuttamamācaṣṭa tadidaṃ karaṇāgraṇīḥ

iti pātraguṇāḥ
vyastānāṃ vā samastānāmeṣāṃ doṣo viparyayaḥ
guṇadoṣau parīkṣeta pātre nṛttasya siddhaye

mārkaṇḍeyapurāṇoktā nṛtte pātraikatantratā

nṛttenālamarūpeṇa siddhirnānyena rūpataḥ
cārvadhiṣṭhānavannṛttaṃ nṛttamanyadviḍambanā

iti pātradoṣāḥ
sulīnasnigdhavistīrṇakeśapāśaniveśitaḥ
granthirvilulitaḥ pṛṣṭhe lasatpuṣpāvataṃsakaḥ

veṇī vā saralā dīrghā muktājālavirājitaiḥ
kalitaṃ kuntalairbhālaṃ kastūrīcandanādinā

racitaṃ citrakaṃ bhāle netre tanvañjanāñcite
ullasatkāntivalaye tālapatre ca karṇayoḥ

dantapaṅktiḥ prabhājālaprojjvalīkṛtaraṅgabhūḥ
kastūrīpatrabhaṅgāṅkau kapolau kaṇṭhalambitā

tārāhārāvalī sthūlamauktikā stanamaṇḍanā
prakoṣṭhau nyastasadratnasauvarṇavalayānvitau

aṅgulyo dhṛtamāṇikyanīlavajrādimudrikāḥ
candanairdhūsaraṃ gātraṃ yadvā kuṅkumarañjitam

kṣīrodakaṃ dukūlādi vastraṃ kūrpāsakastanuḥ
sakañcukaṃ vā calanaṃ tattaddeśānusārataḥ

etanmaṇḍanamanyadvā pātrayoḥ śyāmagaurayoḥ
yathocitaṃ vidhātavyamityāha śivavallabhaḥ

iti pātramaṇḍanāni
rūpavānnṛttatattvajño grahamokṣavicakṣaṇaḥ
samādigrahavijñaśca vādyavādanaveditā

saṃpradāyāgatajñāno dhvanimādhuryatattvavit
sthāyādhikyonatābhijñaḥ kuśalo layatālayoḥ

vādyaprabandhanirmātā mukhavādyeṣu kovidaḥ
udbhettā nūtnabhaṅgīnāṃ śiṣyaśikṣaṇadakṣiṇaḥ

pratiṣṭhāpayitā nṛttagītavādyavyavasthiteḥ
praviṣṭo hṛdayaṃ yadvā pātrasya hṛdi ca svayam

rañjakaḥ syādupādhyāyo nṛttadoṣavidhānavit

ityupādhyāyalakṣaṇam
yatraiko mukharī śreṣṭhastathā pratimukharyapi
dvāvaḍāvajinau skandhāvajinau karaṭādharau

dvātriṃśanmardaladharā varāstāladharadvayam
kāṃsyatāladharāstvaṣṭāviṣṭāḥ kāhalikadvayam

vāṃśikau rasikau vyaktasuraktapracuradhvanī
catvāro madhuradhvānā bhavantyete karāstayoḥ

dvau mukhyagāyanau sārdhamaṣṭabhiḥ saha gāyanaiḥ
mukhyagāyanike cāṣṭau sahagāyanikāstayoḥ

saṃpradāyasamullāsi pātramekaṃ guṇānvitam
sarve'mī rūpavantaḥ syuścitrālaṃkaraṇānvitāḥ

gītādisāmyanipuṇāḥ praharṣotphullacetasaḥ
uttamaḥ saṃpradāyo'sau loke kuṭilamucyate
tadardhaṃ madhyamo nyūno'smātkaniṣṭho nigadyate

iti saṃpradāyalakṣaṇam
anuvṛttirmukhariṇastalayornyūnapūraṇam
tālānuvṛttirityete catvāraḥ kuṭile guṇāḥ

saṃpradāyasya doṣaḥ syādetadguṇaviparyayaḥ

iti saṃpradāyaguṇadoṣāḥ
saṃgītajñairbudhaiḥ sārdhaṃ nāyake prekṣake sthite
praviśya raṅgabhūmiṃ te tiṣṭhantaḥ sāṃpradāyikāḥ

vādyānāṃ nādasāmyaṃ ca kṛtvā'vasthitamānasāḥ
melāpakaṃ vādayeyuḥ prabandhaṃ gajaraṃ tataḥ

tato javanikāntardhau dadhānaṃ kusumāñjalim
pātraṃ tiṣṭhedadhiṣṭhāya sthānakaṃ sauṣṭham̐vānvitam

tataścopasamārambhe'ntardhāne cāpasārite
sabhājanamanohāri pātraṃ raṅgabhuvaṃ viśet

vādyamāne prabandhe copaśamādau ca vādakaiḥ
suptāṅgairaṅgapīṭhasya madhye puṣpāñjaliṃ kṣipet

yataḥ svayaṃ surajyeṣṭho madhyeraṅgamadhiṣṭhitaḥ
tataḥ praharṣasaṃpannaṃ suptāṅgaireva kevalaiḥ
vādyenopaśamenātra nṛtyetpātraṃ manonvitam

padamotā ca kavitaṃ malapāvatsakāvapi
rigoṇī tuḍuketyebhiḥ pravandhairniyatakramaiḥ

svecchākṛtakramairyadvā vādyamānaiḥ samantataḥ
samāṅgairviṣamāṅgairvobhayairvā nṛttamācaret

tataḥ śuddhaprabandhaiśca gīyamānairnijecchayā
pātraṃ vidhāya trividhaṃ nartanaṃ sthānamācaret

gajarānantaraṃ nāsti yadopaśamanādṛte
pātraṃ pādo parā rambhe praviśediti tadvidaḥ

iti paddhatirukteyaṃ proktā pariviḍirjane
vādanaṃ samahastasya prākpraveśātpare jaguḥ

samahastādibhiḥ pāṭaiḥ suvṛttaiḥ pṛṣṭhasauṣṭhavaiḥ
sthitena samapādena praveśaṃ ca pracakṣate

kecidāhuḥ kevalayoḥ prayogaṃ gītavādyayoḥ
ekaikaśaḥ prayogo'pi gītādeḥ kaiścidiṣyate

iti śuddhapaddhatiḥ
vādyaprabandhaiḥ kaṭhinaistyaktamelādibhistathā
gītaiḥ sālagasūḍasthaiḥ prabandhairyaddhruvādibhiḥ

lāsyāṅgaiḥ kevalairaṅgaiḥ komalaiścaiva nṛtyati
svayaṃ gāyati vādyaṃ ca trivalīṃ vādayetsvayam

tatpātraṃ gauṇḍalī kecidvādanaṃ nātra manvate
trivalīdhāraṇaṃ skandhe grāmyatvaṃ kurute striyāḥ

agāyantī tvaśārīrā saiva syānmūkagauṇḍalī
gauḍalyā maṇḍalaṃ proktaṃ tajjñaiḥ karṇāṭadeśajam

tasyāśca nartanaṃ prāhurgauṇḍalīṃ lakṣaṇāśrayāt
tatratyāṃ paddhatiṃ prāhustadvido gauṇḍalīvidhim

sā deśīpaddhatistūktā tallakṣma brūmahe'dhunā
karṇāṭamaṇḍalairyuktāstatra syuḥ sāṃpradāyikāḥ

pūrvavatsamanādatvamātodyānāṃ vidhīyate
melāpakaṃ vādayeyurekatālyā samāhitāḥ

yena kenāpi tālena gajare vādite sati
niḥsāraṇaikatālyā vā''rabdhasyopaśame sati

pātraṃ praviśya raṅgasya madhye puṣpāñjaliṃ kṣipet
āviṣkurvatsavyavāmapuroṅgāṇyatha nṛtyataḥ

gajaropaśamenaiva tataḥ sarvāṅganartanam
aḍḍatālaṃ nisāruṃ caikatālīṃ śritayā tataḥ

rigoṇyā tālaniyamarahitābhyāmataḥparaḥ
avatsakavitābhyāṃ ca kramānnartanamācaret

nānāvidhaṃ punarnṛtyedrigoṇyoṭṭavaṇātmanā

nivāriteṣu vādyeṣu datte sthāne'tha vāṃśikaiḥ
saha gāyati saṃyuktaistaiḥ sārdhamatha gauṇḍalī

uccārya sthāyinaṃ kuryādrāgālaptiṃ caturvidhām
anyā vā gāyanī mukhyā vividhālaptimācaret

maṇṭhakātpratimaṇṭhācca tālenānyena saṃyutam
sakalaṃ dhruvakaṃ gītvā jakkayā vādyamānayā

ślakṣṇaṃ dhruvākhyakhaṇḍena gīyamānena saṃtatam
gāyanairmelakopetairmanovyaktimanoharam

nṛttaṃ kiṃcidvidhāyātha śāntayorgītavādyayoḥ
vidhāya vividhasthāyānmuhurdhruvapadaṃ vrajet

kāṃścidgītasya tālena gītatālākṣaraiḥ parān
nātidīrghānnātinīcānmādhuryaprauḍhipeśalān

raktiyuktānvitāṃstālaṃ yadi vā''dau vidhāya tān
sutālakalitaprāntāndhruvakhaṇḍe kalāsayet

kalāse vādyaghātaṃ ca kuryuḥ sāmyena vādakāḥ
kalāseṣu bhavetpātraṃ līnaṃ citrārpitaṃ yathā

evaṃ kurvatprakriyāyāṃ kṛtāyāṃ pūrvavatpunaḥ
nṛttaṃ samācaretpātraṃ gīyamāne dhruvāṃśake

ābhogenātha nṛtyecca vādyamānena vādakaiḥ

gauṇḍalyojonvitā sā syāttyāge saṃnihite sati
nānāvidhaprauḍhacārīcālakaṃ nṛttamācaret

atra praharaṇaṃ vādyamābhoge'pyetadiṣyate
kṛtvā'tha vādyasāmyena tyāgaṃ viśrāntimācaret

kṛtvā nṛttaṃ dhruveṇaivaṃ dhruvavanmaṇṭhakādibhiḥ
kramānnṛtte viśeṣastu teṣāmeṣo'bhidhīyate

maṇṭhāderdhruvakhaṇḍena kevalaṃ nartanaṃ bhavet
maṇṭhe tu maṇṭhatālena prārambhe nartanaṃ matam

tataḥ syādekatālyaiva maṇṭhanṛttaṃ kramātkramāt
nartanaṃ pratimaṇṭhādau svatālenaiva kīrtitam

eṣu sālagagīteṣu nṛttaṃ drutalayāśrayam
vilambito layastūktastāṇḍave paṇḍitaiḥ sadā

rūpakairekatālyantairevaṃ sālagasūḍagaiḥ
nartitvā kriyate tyāgo yatrāsau gauṇḍalīvidhiḥ

iti gauṇḍalīvidhiḥ
bhasmādiśvetaliptāṅgo bibhranmuṇḍaṃ śiraḥ śikhām
bhrājadghargharikājālajaṅghaḥ śārīrapeśalaḥ

pañcāṅgakuśalastālakalālayavicakṣaṇaḥ
sabhājanamanohārī yo nṛtyati sa peraṇī

ghargharo viṣamaṃ bhāvāśrayaśca kavicārakaḥ
gītaṃ ceti samācaṣṭa pañcāṅgāni harapriyaḥ

tatra ghargharikāvādye vahanirghargharo mataḥ

paṭivāṭaścāpaḍapaḥ siripiṭyalagādimaḥ
vāṭaḥ sirihirākhyaśca tataḥ khaluhulāhvayaḥ
iti ghargharabhedāḥ syuḥ ṣaḍamī tadvidāṃ matāḥ

bhūmilagnāgrayoraṅghryoḥ paryāyādbhūmikuṭṭanam
pārṣṇidvayena pārṣṇyā vaikayā syātpaṭivāṭakaḥ

bhaveccāpaḍapaḥ pādatalenāvanikuṭṭanam
talena bhūmilagnena pādasya saraṇaṃ puraḥ

tathā'pasaraṇaṃ paścānmuhuḥ siripiṭī bhavet
dvayoścaraṇayorvyomni paryāyeṇa prakampanam

yatkṛtaṃ komalaṃ so'trālagavāṭaḥ prakīrtitaḥ
satyekasminsame pāde'ṅghriḥ puraḥ prerito bhavet

yastasya jaṅghayā kampaḥ proktaḥ sirihiro budhaiḥ
yadā dvayoḥ svabhāvena tiṣṭhatoḥ pādayorbhuvi

jaṅghayoḥ kampanaṃ prāhurdhīrāḥ sirihira tadā
bhūlagnāgrasya vāmāṅghreḥ pārṣṇyā yadbhūmikuṭṭanam

bhūlagnāgrasya cānyasya bhramaḥ savyāpasavyataḥ
yo'sau khaluhulaḥ prokto ghargharo nṛttakovidaiḥ

diśā'nayā pare'pyūhyā ghargharāḥ śobhayā'nvitāḥ
sarve ghargharabhedāste kāryāstālānugāminaḥ

atra cotplutapūrvaṃ syātkaraṇaṃ viṣamābhidham
vikṛtārthānukārastu budhairbhāvāśrayo mataḥ

kavicāro bhavedatrottamanāyakavarṇanam
atra syātsālagaṃ gītaṃ yaduktaṃ gauṇḍalīvidhau

iti peraṇilakṣaṇam
gauṇḍalīvidhivaccātra raṅgasthāḥ sāṃpradāyikāḥ
kuryurgambhīramātodyadhvaniṃ dhidhidhidhīti te

tato vilambitaprāye rigoṇyuṭṭavaṇāśraye

pādatraye vādyamāne dvirdvirniḥsārutālataḥ
viśedvikṛtavāgveṣabhūṣo raṅge'ṭṭaboḍakaḥ

tasminnṛtyati hāsyaikarase viśati peraṇī
rigoṇyupaśamenaiṣa praviṣṭo nṛttamācaret

praśānte vādyasaṃghāte tatastāladharaiḥ samam
vādyamāne sunipuṇaṃ tāle gārugisaṃjñake

yadvā sarasvatīkaṇṭhābharaṇe vādakaistathā
kriyamāṇe mardalādermaṇḍitālasamadhvanau
peraṇī ghargharānkuryānnānā cāpaḍapādikān

tataḥ kūṭanibaddhena yadvā varṇasarātmanā
kavitenaiṣa viṣamaṃ nṛtyenniḥsārutālataḥ

tataḥ sālagasūḍena nṛtte tatra ca darśayet
rekhāṃ ca sthāpanāṃ hṛdyā vahanīrgītanartanam

viṣamaṃ ca praharaṇānugamābhogavādane
kavicārāṃstathā bhāvāśrayānperaṇipaddhatau

iti peraṇīpaddhatiḥ
tauryatraye lakṣyalakṣmavedyācāryaḥ prakīrtitaḥ
vāggmī surūpaveṣo'sau surasastutikovidaḥ
sabhāsu parihāsajño bhavedvādanavādyavit

ityācāryaḥ
caturdhābhinayābhijño naṭo bhāṇādibhedavit

iti naṭaḥ
nartakaḥ sūribhiḥ prokto mārganṛtte kṛtaśramaḥ

iti nartakaḥ
sarvabhāṣāviśeṣajño janānāṃ narmakarmadaḥ
paṭuḥ parāpavādeṣu smṛto vaitāliko budhaiḥ

iti vaitālikaḥ
kiṅkiṇīvādyavedī ca vṛtto vikaṭanartakaiḥ
marmajñaḥ sarvarāgeṣu caturaścāraṇo mataḥ

iti cāraṇaḥ
bhārasya bhūyaso voḍhā prauḍho bhramarikādiṣu
rajjusaṃcāracaturaśchurikānartane kṛtī
śastrasaṃkaṭasaṃpātapaṭuḥ kohlāṭiko mataḥ

iti kohlāṭikaḥ
madhyasthāḥ sāvadhānāśca vāggmino nyāyavedinaḥ
truṭitātruṭitābhijñā vinayānamrakaṃdharāḥ

agarvā rasabhāvajñāstauryatritayakovidāḥ
asadvādaniṣeddhāraścaturā matsaracchidaḥ
amandarasaniṣyandihṛdayāḥ syuḥ sabhāsadaḥ

iti sabhāsadaḥ
śṛṅgārī bhūrido mānyo mānyapātravivecakaḥ
śrīmānguṇalavasyāpi grāhakaḥ kautuke rataḥ

vāggmī nirmatsaro narmanirmāṇanipuṇaḥ sudhīḥ
gambhīrabhāvaḥ kuśalaḥ sakalāsu kalāsu ca

samastaśāstravijñānasaṃpannaḥ kīrtilolupaḥ
priyavākparicittajño medhāvī dhāraṇānvitaḥ

tūryatrayaviśeṣajñaḥ pāritoṣikadānavit
sarvopakaraṇopeto deśīmārgavibhāgavit

hīnādhikavivekajñaḥ prājño madhyasthadhīradhīḥ
svādhīnaparivāraśca bhāvako rasanirbharaḥ

satyavādī kulīnaśca prasannavadanottaraḥ
sthirapremā kṛtajñaśca karuṇāvaruṇālayaḥ
dharmiṣṭhaḥ pāpabhīruśca vidvadbandhuḥ sabhāpatiḥ

iti sabhāpatilakṣaṇam
vicitrā nṛtyaśālā syātpuṣpaprakaraśobhitā
nānāvitānasaṃpannā ratnastambhavibhūṣitā

tasyāṃ siṃhāsanaṃ ramyamadhyāsīnaḥ sabhāpatiḥ
vāmato'ntaḥpurāṇi syuḥ pradhānā dakṣiṇena tam

pṛṣṭhabhāge pradhānānāṃ kośaḥ śrīkaraṇādhipaḥ
tatsaṃnidhau tu vidvāṃso lokavedaviśāradāḥ

rasikāḥ hkavayo'pyatra caturāḥ sarvarītiṣu
mānyāñjyotirvido vaidyānvidvanmadhye niveśayet

syādvāmetarabhāge tu mantriṇāṃ parimaṇḍalam
tatraiva sainyamānyānāmanyeṣāmupaveśanam

vilāsino vilāsinyaḥ parito'ntaḥpurāṇi ca
purato'pi nṛpasya syuḥ pṛṣṭhabhāge tu bhūpateḥ

cārucāmaradhāriṇyo rūpayauvanasaṃbhṛtāḥ
svakaṅkaṇajhaṇatkāranirvāṇajanamānasāḥ

agrimā vāmabhāge syuragre vāggeyakārakāḥ
kathakā bandinaścātra vidyāvantaḥ priyaṃvadāḥ

praśaṃsākuśalāścānye caturāḥ sarvamātuṣu
tataḥ paraṃ tu paritaḥ parivāropaveśanam

adhiṣṭhitaṃ sadaḥ kāryaṃ dakṣairvetradharairnaraiḥ
aṅgarakṣāstu tiṣṭheyuḥ sarvataḥ śastrapāṇayaḥ

saṃniveśya sabhāmevaṃ netā saṃgītamīkṣate

iti sabhāsaṃniveśaḥ
rasapradhānamicchanti tauryatrikamidaṃ vidaḥ
tatsāmānyaviśeṣābhyāmadhunā'bhidadhe rasam

vibhāvairanubhāvaiśca naṭasthairvyabhicāribhiḥ
janitā''tmaparāmitramitrādyāśrayatāṃ vinā

avasthādeśakālādibhedasaṃbhedavarjitam
kevalaṃ ratihāsādisthāyirūpaṃ pragṛhṇatī

ato nirantarāyatvātparāṃ viśrāntimāśritā
pratibhānubhavasmṛtyādyanyabodhavilakṣaṇā

brahmasaṃvidvisadṛśī nānāratyādisaṃgamāt
sukharūpā svasaṃvedyā saṃvidāsvādanābhidhā
rasaḥ syādathavā sthāyī rasastadgocarībhavan

dadhyādivyañjanaiścaiva haridrādibhirauṣadhaiḥ
madhurādirasopetairyadvaddravyairguḍādibhiḥ

yuktaiḥ pākaviśeṣeṇa ṣāḍavākhyo'paro rasaḥ
utpādyate vibhāvādyaiḥ prayogeṇa tathā rasaḥ

śṛṅgārahāsyau karuṇo raudro vīro bhayānakaḥ
bībhatsaścādbhutaḥ śānto navadheti raso mataḥ

śāntasya śamasādhyatvānnaṭe ca tadasaṃbhavāt
aṣṭāveva rasā nāṭyeṣviti kecidacūcudan

tadacodyaṃ yataḥ kiṃcinna rasaṃ svadate naṭaḥ
sāmājikāstu lihate rasānpātraṃ naṭo mataḥ

te śuddhahṛdayāḥ śāntaṃ svavibhāvavibhāvitam
ekāgracetasaḥ santo'nubhavantīti yujyate

ratihāsaśucaḥ krodhotsāhau bhayajugupsane
vismayaścātha nirvedaḥ sthāyibhāvā navetyamī

jugupsāṃ sthāyibhāvaṃ tu śāntaṃ kecidbabhāṣire
utsāhamāhuranye'nye śamaṃ sarvānpare viduḥ

uddiśya sthāyinaḥ prāpte samaye vyabhicāriṇām
amaṅgalamapi brūte pūrvaṃ nirvedameva yat

munirmene'sya tannūnaṃ sthāyitāvyabhicārite
pūrvāparānvayo hyasya madhyasthasyānuṣaṅgataḥ

sthāpī syādviṣayeṣveṣa tattvajñānodbhavo yadi
iṣṭāniṣṭaviyogāptikṛtastu vyabhicāryasau

nirvedaglāniśaṅkaugryadainyāsūyādamaśramāḥ
cintā dhṛtiḥ smṛtirvrīḍāmohālasyāni cāpalam

harṣāmarṣaviṣādāścāpasmāro jaḍatā tathā
vitarkasuptamautsukyamavahitthaṃ tathā matiḥ

vibodho vyādhirunmādo garvāvegau mṛtistathā
trāso nidrā trayastriṃśaditi syurvyabhicāriṇaḥ

stambhaḥ svedo'tha romāñcaḥ svarabhedo'tha vepathuḥ
vaivarṇyamaśru pralayo'ṣṭau bhāvāḥ sāttvikā iti

vibhāvādyairanucitaḥ sthānatvādvikṛtiṃ gataiḥ
śṛṅgārādirasābhāsāḥ kṛtā hāsyasya hetavaḥ

phalaṃ bandhuvadho raudre vibhāvaḥ karuṇe ca saḥ
jagadustadvido raudramataḥ karuṇakāraṇam

raudraṃ bhayānake hetumata eva pracakṣate
śṛṅgārādvipralambhākhyātkaruṇotpattiriṣyate
bhayānake'dbhute hetuṃ vīraṃ dhīrā babhāṣire

vidūṣakasya hāsastu nāyake hāsyakāraṇam
sāmyādrudhiramohādivibhāvādvyabhicāriṇām

bībhatse sati bhīrūṇāmutpadyeta bhayānakaḥ
anyonyajanyajanakā bhavantyevamime rasāḥ

śyāmaḥ sito dhūsaraśca rakto gauro'sitastathā
nīlaḥ pītastataḥ śveto rasavarṇāḥ kramādime

viṣṇumanmathakīnāśarudrendrāḥ kālasaṃjñakaḥ
mahākālaḥ kramādbrahmā buddhaśca rasadevatāḥ
śṛṅgāre devatāmāhurapare makaradhvajam

vakṣye viśeṣalakṣmāṇi rasāderadhunā kramāt

vibhāvairvarakāntādyaiḥ svakāvye kavigumphitaiḥ
sākṣātkāramivā''nītairnaṭena svaprayogataḥ

nīto ratisthāyibhāvaḥ sadasyarasanīyatām
naṭena kāntadṛṣṭyādyairanubhāvaiḥ pradarśitaiḥ

āveśātiśayaṃ nītaścitrito vyabhicāribhiḥ
harṣacintādibhiḥ proktaḥ śṛṅgāraḥ sūriśārṅgiṇā

saṃbhogavipralambhau vā'vasthe dve tasya kīrtite
kāntāsaṃyogavirahau lakṣaṇe ca tayoḥ kramāt

strīpuṃsayoruttamayoryūnoḥ pūrṇasukhodayā
prārambhātphalaparyantavyāpinī smarasaṃbhṛtā
saṃvidoraikyasaṃpattyā krīḍā'tra sthāyinī ratiḥ

loke sthāyyādibhāvānāṃ dṛṣṭaye janmahetavaḥ
upanītāḥ kavivarairnaṭaiḥ sākṣātkṛtā iva
rasānprasunvate te syurvibhāvāstadvibhāvanāt

kāntau tīvrasmarākrāntau dūtīsakhyādayo janāḥ

tattadyogyo'pyalaṃkāraḥ kirīṭakaṭakādikaḥ
samayo'pi vasantādirviṣayāścandanādayaḥ

gītādayaśca deśo'pi ramyaharmyavanādikaḥ
kāntānukaraṇaṃ haṃsayugmacitrādidarśanam

jalakelītyevamādyāḥ śrutā yadvā vilokitāḥ
vibhāvatvena vikhyātā rase śṛṅgāranāmani

bhāvānāṃ yāni kāryāṇi nāṭyante kuśalairnaṭaiḥ
anubhāvā hetavaste svahetvanubhave yataḥ

te bhāvānābhimukhyena nayanti gamayanti hi
ato'bhinayaśabdenāpyucyante kṛtrimā naṭaiḥ

kāntā dṛṣṭiḥ kaṭākṣākhyaṃ tārakākarma śarmakṛt
cature ca bhruvau cārugocarā madhurā giraḥ

romāñcamukharāgādiracitaḥ sāttvikotkaraḥ
anubhāvā bhavantyete śṛṅgārarasapoṣiṇaḥ

ālasyaugryajugupsābhyo'nye'tra syurvyabhicāriṇaḥ
ālasyāditrayaṃ varjyaṃ svavibhāvaikagocaram

eṣa saṃbhogaśṛṅgāragataḥ parikaro mataḥ
vipralambhe nānubhāvaḥ kāntā dṛṣṭyādiriṣyate

cintāsūyāśramautsukyanirvedaglānimṛtyavaḥ
unmādavyādhyapasmāravibodhajaḍatāstathā

dainyaṃ nidrā tathā svapnasuptacintādayaśca ye
tadīyairanubhāvaistu vipralambho'bhinīyate

unmādādidaśāṃ cātikaṣṭāṃ nātra pradarśayet
na cātra maraṇaṃ sākṣāddarśayettasya sūcikām

tadanantarajātāṃ tu darśayetsukhinīṃ daśām
daśāṃ vā bhāvinidhanāṃ sūcayenna tvimāṃ vadet

nanu duḥkhātmakaḥ kasmādvipralambho raso mataḥ
maivaṃ ratyanusaṃdhānaṃ vipralambhe'pi dṛśyate

vipralambhodbhavā śaṅkā saṃbhoge dustyajā dhruvam
itaretaracitratvādrasatvaṃ sulabhaṃ tayoḥ

naikarūpe cirāsvādyaḥ śarkarāvadbhavedasau

saṃbhoge'pi na nidrā'sti nanvanyonyābhilāṣiṇoḥ
vibodhastvastyasau kasmādvipralambhaikagocaraḥ

naitannidrāvināśo hi vibodhastāmṛte kutaḥ

ratiśramakṛtā nidrā saṃbhoge'pyasti cenna tat
bhavantyapi na sodbhāvyā ratyutkarṣavirodhinī

karuṇe vipralambhe ca cintādivyabhicāriṇām
sāṣāraṇyāttayorbhedo nāsti cettadasāṃpratam

śoko hi karuṇe sthāyī vipralambhe ratirmatā

sthāyibhedādvibhāgo'tastayoruttamapūruṣe
natu nīce tu mālyādivibhāvānāmasaṃbhavāt

ratyabhāve vipralambhaḥ śṛṅgāro jāyate katham
ataḥ syātkaruṇaḥ spaṣṭastatreṣṭavirahodbhavaḥ

mālyādyasaṃbhavānnīce saṃbhogāsaṃbhavo'pi cet
tanna nīcaratiryasmānnārīmātravibhāvajā
viyoge'pi tathā mālyādyabhāvena kathaṃ ratiḥ

āśābandhaślathībhūtacintādivyabhicārikaḥ
virahaḥ karuṇādbhinnaḥ priyanairāśyakāritāt

kāmasūtre ca śṛṅgāro daśāvasthaḥ pradarśitaḥ
abhilāṣastataścintānusmṛtirguṇakīrtanam

udvego'tha vilāpaḥ syādunmādo vyādhisaṃbhavaḥ
jaḍatā maraṇaṃ ceti daśāvasthāḥ prakīrtitāḥ

bhoktā pradhāno bhogyā tu kāntā tadupasarjanam
ato narāntarāsaktistasyāḥ śṛṅgārabhaṅgakṛt
bhoktastvaparatantratvātkāntāntaramabhañjakam

vāṅnepathyāṅgaveṣṭābhiḥ śṛṅgārastrividho mataḥ
rāmādivyañjako veṣo naṭe nepathyamiṣyate

iti śṛṅgāraḥ
veṣālaṃkāragamanagaditānāṃ vikāritā

eteṣāṃ ca parasthānāmanukāro vilajjatā
viṣaye'rucitā dṛṣṭyā'pyasaṃgatavibhāṣaṇam

hāsanīyasya kakṣādisaṃsparśaḥ kuhanāvahaḥ
ityādayo vibhāvāḥ syuranubhāvāstu netrayoḥ

kapolayoroṣṭhayośca spando dṛṣṭyorvikāsanam
atyantamīlanaṃ kiṃcitkuñcanaṃ pārśvapīḍanam

prasvedamukharāgādyā yasyātha vyabhicāriṇaḥ
svapno'vahitthamālasyanidrātandrādayo'pare

ete smitādibhedeṣu yathāyogaṃ vyavasthitāḥ
sthāyibhāvaśca hāsaḥ syādasau hāsyaḥ prakīrtitaḥ

ātmasthaḥ parasaṃsthaścetyasya bhedadvayaṃ matam
ātmastho draṣṭurutpanno vibhāvekṣaṇamātrataḥ

hasantamaparaṃ dṛṣṭvā vibhāvaiścopajāyate
yo'sau hāsyarasastajjñaiḥ parasthaḥ parikīrtitaḥ

uttamānāṃ madhyamānāṃ nīcānāmapyasau bhavet
tryavasthaḥ kathitastasya ṣaḍbhedāḥ santi cāpare

smitaṃ ca hasitaṃ proktamuttame puruṣe budhaiḥ
bhavedvihasitaṃ copahasitaṃ madhyame nare
nīce'pahasitaṃ cātihasitaṃ parikīrtitam

īṣatphullakapolābhyāṃ kaṭākṣairapyanulbaṇaiḥ
adṛśyadaśano hāsyo mantharasmitamucyate

vaktranetrakapolaiścedutphullairupalakṣitaḥ
kiṃcillakṣitadantaśca tadā hasitamiṣyate

saśabdaṃ madhuraṃ kālāgataṃ vadanarāgavat
ākuñcitākṣigaṇḍaṃ ca vidurvihasitaṃ budhāḥ

nikuñcitāṃsaśīrṣaśca jihmadṛṣṭivilokanaḥ
utphullanāsiko hāsyo nāmnopahasitaṃ mataḥ

asthānajaḥ sāśrudṛṣṭirākampraskandhamūrdhakaḥ
śārṅgadevena gadito hāsyo'pahasitāhvayaḥ

sthūlakarṇaḥ kaṭudhvāno bāṣpapūraplutekṣaṇaḥ
karopagūḍhapārśvaśca hāsyo'tihasitaṃ mataḥ

pūrvāṇi svasamutthāni smitādiyugalatraye
parāṇi tvaparasthāni pūrvasaṃkrāntijatvataḥ

hāsyaraudrāvapi tredhā vāṅnepathyāṅgaceṣṭitaiḥ
upalakṣaṇametattu teṣāṃ sarveṣu saṃbhavāt

iti hāsyaḥ
iṣṭabandhviyogaśca śrīnāśo vadhabandhane

vyasanaprabhavo'narthaḥ sutādinidhanaṃ tathā
deśabhraṃśādayaścaite śrutā yadvā vilokitāḥ

vibhāvāḥ saṃmatāḥ puṃsāmuttamānāṃ parāśritāḥ
madhyamādhamapuṃsāṃ tu te syurātmaikagocarāḥ

aśrupāto mukhe śoṣo vilāpaḥ paridevanam
stambho vivarṇatā srastagātratā pralayastathā

śvāsocchvāsau dehapātaghātorastāḍanādayaḥ
ete yatrānubhāvāḥ syuratha glāniḥ śramo bhayam

moho viṣādanirvedau cintautsukye ca dīnatā
jaḍatā vyādhirunmādālasyāpasmāramṛtyavaḥ

stambhakampāśruvaivarṇyasvarabhaṅgādayastathā
yatra saṃcāriṇaḥ sthāyī śokaḥ sa karuṇo mataḥ

vyavasthā'trānubhāvānāṃ yogyatvāduttamādiṣu

vilāpo rodanaṃ śocyaguṇastavapuraḥsaram
syāddaivātmaparāṇāṃ yadupālambhena rodanam
paridevanamityuktaṃ tadidaṃ śabdakovidaiḥ

dharmopaghātajo vittanāśajo bandhunāśajaḥ
karuṇastrividhasteṣāmuttameṣveva pūrvajaḥ

tredhā ruditamānandārtīrṣyāhetukṛtaṃ bhavet

duḥkhasmṛtiyutānandājjātaṃ phullakapolakam
saromāñcamapāṅgasthabāṣpamānandajaṃ matam

uccaiḥ svaravilāpaṃ ca sabhrūprāntavivartitam
srutāśrudhāramasvasthaceṣṭāṅgaṃ cā''rtijaṃ matam

śiraḥkalpitaniśvāsaṃ sphuradoṣṭhakapolakam
kaṭākṣabhrukuṭīvakraṃ strīṇāmīrṣyākṛtaṃ bhavet

dhairyāduttamamadhyānāṃ nāśru svavyasane sravet
parasthe tu sravennārīnīcānāṃ tūbhayatra tat

iti karuṇaḥ
hantṛprakṛtayo rakṣodaityādyanyāyakāriṇaḥ
yuddhaṃ krodho'nṛtaṃ vākyaṃ paradārādidharṣaṇam

deśajātikulācāravidyānindā parasya
vadhānyadārayātrādipratijñāparuṣoktayaḥ

gṛhādibhañjanaṃ rājyaharaṇaṃ matsarastathā
jighāṃsādyāśca yatra syurvibhāvāḥ kavikīrtitāḥ

bhrukuṭīraktanetratvaṃ kapolasphuraṇaṃ tathā
dantoṣṭhapīḍanaṃ hastaniṣpeṣo'thānyavigrahe

talādyaistāḍanaṃ chedo mardaḥ pāṭanamoṭane
śastrāṇāṃ grahaṇaṃ pātaḥ prahāro rudhirasrutiḥ

ete'nubhāvāsteṣāṃ tu karma yattāḍanādikam
na tatsākṣātprayoktavyaṃ kīrtanīyaṃ paraṃ naṭaiḥ

utsāhasamyagbodhau cāmarṣāvegaugryacāpalam
svedavepathuromāñcagadgadasvaratādayaḥ

sākṣātsvedo'bhineyo vā vyajanagrahaṇādinā
utsāhastvatra saṃcārī na tasmādvīrasaṃkaraḥ

nanu cāvyabhicāreṇa bhāvasya sthāyitā matā
sthāyī tatkathamutsāho vīre'pyeṣa bhaviṣyati

maivaṃ kṣaṇikavidyotā vidyudvadvyabhicāriṇaḥ
sthirāḥ syuḥ sthāyinastena dvirūpo'yaṃ rasadvaye

nanu sthāyyapi bhāvatvānnisargātkṣaṇiko bhavet
satyaṃ kiṃtu sa saṃskārarūpeṇa sthāyitāṃ gataḥ

tattiraskṛtasaṃskārāstvanye tatsthairyayoginaḥ
āvirbhāvatirobhāvadharmāṇaścātra yantritāḥ

gurau priye ripau bhṛtye bhavetkrodhaścaturvidhaḥ
gurāvavyaktaceṣṭaḥ syātkrodho vinayayantritaḥ

apāṅganirgatālpāsro bhrukuṭīkuṭilānanaḥ
sphuritoṣṭho mṛgākṣīṇāṃ kopaḥ praṇayajaḥ priye

daṣṭoṣṭho hastaniṣpeṣī vikaṭabhrukuṭīpuṭaḥ
svabhujaprekṣaṇaiḥ śatrau bhavetkrodho nirargalaḥ

vikṛtaprekṣaṇairakṣivistārairbhūribhartsanaiḥ
bhṛtye kāryavaśātkopaḥ kṛtrimaḥ krūratojjhitaḥ

avismayādasaṃmohādaviṣādācca yaḥ satām
dharprādyarthaviśeṣeṣu kāryastattvaviniścayaḥ

nayaśca vinayaḥ kīrtiḥ parākramaṇaśaktatā
pratāpaḥ prabhuśaktiśca durdharṣaprauḍhasainyatā

mantraśaktiśca saṃpannadhanābhijanamantritā
ityādayo vibhāvāḥ syurnaṭe kāvyasamanvitāḥ

sāmādīnāmupāyānāṃ yathāsvaṃ viniyojane
vijñatvaṃ sthairyadhairye ca śauryaṃ tyāgo yathocitam

bhāṣaṇaṃ bhāvagambhīravākyasyetyevamādayaḥ
sarve garvānubhāvāścānubhāvāḥ syuratha smṛtiḥ

augryamāvegaromāñcāvamarṣaśca dhṛtirmatiḥ
evaṃprabhṛtayo bhāvā yatra syurvyabhicāriṇaḥ

utsāhaḥ sthāyibhāvaśca dhīrā vīraṃ tamūcire
uttamaprakṛtiṣveva puruṣeṣveṣa jāyate

samyagvijñāya ṣāḍguṇyaprayogo gīyate nayaḥ

saṃdhiśca vigraho yānamāsanaṃ saṃśrayastathā
dvaidhībhāva iti proktā nītiśāstreṣu ṣaḍguṇāḥ

indriyāṇāṃ jayaṃ prāha vinayaṃ śaṃkarapriyaḥ
pratāpaḥ pauruṣodbhūtā prasiddhiḥ śatrutāpinī

kīrtiḥ suhṛdudāsīnajanānandapradaṃ yaśaḥ
sāmadāne bhedadaṇḍāvityupāyacatuṣṭayam

sthairyaṃ tvacalacittatvaṃ dhairyaṃ gāmbhīryaśālitā
śauryaṃ bhavedanudbhūtabhayaṃ yuddhapravartanam

vīraḥ syāducite yuddhe raudrastvanucite bhavet

dānavīro dharmavīro yuddhavīra iti tridhā
vīro dānādayastatra vibhāvāḥ pratināyake
nāyake tvanubhāvāḥ syurvīrasyeti vidāṃ matam

iti vīraḥ
rakṣaḥpiśācabhallūkaprabhṛterbhīṣaṇākṛteḥ
darśanaṃ śravaṇaṃ śūnyāgārāraṇyapraveśayoḥ

vikṛtasya dhvanestrāsodvegayoḥ parasaṃsthayoḥ
śravaṇaṃ cānusaṃdhānaṃ bandhūnāṃ vadhabandhayoḥ

evamādyā vibhāvāḥ syuratha netrakarāṅghriṇaḥ
madhye madhye stambhakampau romāñcanicayastathā

śuṣkoṣṭhatālutā kamprahṛdayatvaṃ vivarṇatā
mukhasya svarabhedaśca gātrasraṃso vilakṣyatā

kāṃdiśīkatayā dṛṣṭeranubhāvā bhavantyamī
atha stambhādayo'pyaṣṭau dainyamāvegacāpale

śaṅkāmohāvapi trāsāpasmāramaraṇādayaḥ
yatra saṃcāriṇaḥ sthāyi bhayaṃ sa syādbhayānakaḥ

vāstavaṃ kṛtrimaṃ ceti bhayaṃ dvedhā nigadyate

strīṇāṃ ca nīcaprakṛteḥ puṃsaḥ syādvāstavaṃ bhayam
madhyame cottame puṃsi kṛtrimaṃ tadudāhṛtam

svabhāvādabhayau tau hi svāminaṃ ca guruṃ prati
bhayaṃ vinayabodhāya darśayetāmatāttvikam

nīcaiḥ svabhāvabodhārthaṃ tatkāryaṃ mṛduceṣṭitaiḥ

svahetūtthaḥ kṛtrimaśca vitrāsitakamityapi
bhayānakastridhā tatra prathamo'nvarthanāmakaḥ

kṛtrimastūttamakṛto gurvādīnpratyavāstavaḥ
vibhīṣikārtho bālādervitrāsitakamiṣyate

iti bhayānakaḥ
svabhāvāddhātudoṣādvā vastvatyantāpriyātmakam
niṣiddhamatitṛpteścārucitaṃ malamiśritam

aniṣṭaphaladānena muhurudvegadāyakam
syādvibhāvo'thānubhāvā utkampo gātradhūnanam

saṃkocanaṃ ca nāsoṣṭhahanūnāṃ ṣṭhīvanaṃ tathā
padanyāso'pyaniyataḥ pidhānaṃ nāsayordṛśoḥ

atha saṃcāriṇo mohāvegāpasmāramṛtyavaḥ
vyādhiśca yatra bībhatsaḥ sa sthāyinyā jugupsayā

śuddho'śuddho'tyantaśuddho bībhatsastrividho mataḥ

ādyau rudhiraviṣṭhādiśuddhāśuddhavibhāvajau
śuddhadharmodbhavo'tyantaśuddhaḥ saṃsāragocaraḥ

iti bībhatsaḥ
durlabhābhīṣṭasaṃprāptiḥ khecarāṇāṃ vilokanam
vimānānāṃ ca māyānāmindrajālasya darśanam

prāsādopavanāderapyapūrvasyātiśāyinaḥ
darśanaṃ śravaṇaṃ vākyaṃ śilpādyatiśayānvitam

ete yatra vibhāvāḥ syuranubhāvāstu netrayoḥ
vistāraṇaṃ nirnimeṣamīkṣaṇaṃ pulakodgamaḥ

sādhuvādollukasane cā''nandāddhāravastathā
gadgadaṃ vacanaṃ svedavepathū harṣagocarāḥ

sparśagrahāśritāścānubhāvāḥ saṃcāriṇastvamī
stambhaḥ svedaśca romāñcaḥ pralayo gadgadaṃ vacaḥ

āvegasaṃbhramau jāḍyamiti yatrātha vismayaḥ
sthāyī tamadbhutaṃ prāha śrīmatsoḍhalanandanaḥ

māyā mithyāprakaṭitaṃ rūpādiparivartanam

asaṃbhāvyasya sattvasya darśanaṃ vividhauṣadhaiḥ
hastalāghavato mantrairindrajālaṃ prakīrtitam

gātroddhūnanamāhlādādatrollukasanaṃ matam
kiṃcidākuñcite netre sparśaḥ skandhakapolayoḥ
bhrūkṣepaṇaṃ cānubhāvāstatra sparśagrahāśritāḥ

ānandajastathā divyo dvividho'bhidadhe'dbhutaḥ
ādyo manorathāvāpterdivyavastūdbhavo'paraḥ

ityadbhutaḥ
saṃsārabhīrutā doṣadarśanaṃ viṣayeṣu ca
yogisaṅgo munīnāṃ ca śrutāḥ śamadamakṣamāḥ

adhyātmaviṣayā goṣṭhī tāpasāstāpasāśramāḥ
bhūrinirjharajhāṃkāri vāri tīrthāni tīrthikāḥ

saritaḥ puṇyapayaso nīvārāṅkitasaikatāḥ
śaivaṃ ca vaiṣṇavaṃ kṣetraṃ vijanāni vanāni ca

bhaktā bhaktirasonmattāḥ śaṃkarasya harerapi
viṣṇubhaktiprabhāvādyā vibhāvā yatra saṃmatāḥ

mandaspandaṃ bahiścittamānandāśruplute dṛśau
romāñcakañcukā mūrtirmokṣaśāstrārthacintanam

brahmavidyopadeśaśca saṃvādastattvagocaraḥ
nāsāgrānugate netre jñānamudrāpradarśanam

ityādayo'nubhāvāḥ syurime tu vyabhicāriṇaḥ
unmādaḥ paramānandarasapānasamudbhavaḥ

harṣo dhṛtiḥ samīcīno vibodhaśca smṛtirmatiḥ
nirvedastattvabodhotthaḥ sthāyī śānto bhavedasau

ratyādibhedavidhuro viṣayopaplavojjhitaḥ
parānandaghanaikātmanirbhāsaḥ śānta ucyate

svato viṣayavaimukhyaṃ śamaḥ sthāyyathavā bhavet
nāṭyanirvāhako madhye madhye saṃcārisaṃbhavaḥ

svabhāve'bhinayāḥ pūrvamāṅkikā ye nirūpitāḥ
te śāntaviṣayā yasmācchāntaḥ prakṛtirātmanaḥ

vihāya viṣayaunmukhyaṃ nijānandasthitiryataḥ
ātmanaḥ kathyate śāntaḥ svabhāvo'sau matastataḥ

iti śāntaḥ
bhaktiṃ snehaṃ tathā laulyaṃ kecittrīnmanvate rasān
śraddhārdratābhilāṣāṃśca sthāyinasteṣu te viduḥ

tadasadratibhedau hi bhaktisnehau nṛgocarau
vyabhicāritvamanayornṛnāryoḥ sthāyinau tu tau

ayuktaviṣayā tṛṣṇā laulyaṃ taddhāsyakāraṇam
ato rasā navaiveti muninā saṃpradhāritam

ratyādayaḥ sthāyibhāvāḥ syurbhūyiṣṭhavibhāvajāḥ
stokairvibhāvairutpannāsta eva vyabhicāriṇaḥ
rasāntareṣvapi tadā yathāyogaṃ bhavanti te

yathā hi hāsaḥ śṛṅgāre ratiḥ śānte ca dṛśyate
vīre krodho bhayaṃ śoke jgupsā ca bhayānake

utsāhavismayau sarvaraseṣu vyabhicāriṇau
śamaḥ sarvaraseṣvasti sthairyatve'vyabhicāryasau

iti navarasalakṣaṇam
atha vyabhicāriṇāṃ nirvedādīnāṃ lakṣaṇam
ākrośanamadhikṣepo vyādhikrodhau ca tāḍanam
dāridryamiṣṭavirahaḥ paravṛddheśca darśanam

nīceṣviti vibhāvāḥ syuruttame tvapamānanam
tattvabodhaśca yatra syādanubhāvāstu rodanam

niśvāsocchvasite dīnamukhatā saṃpradhāraṇam
ityādayaḥ sa nirvedo bhāvaḥ sūribhiriṣyate

iti nirvedaḥ
vyādhirvāntirvirekaścopavāso niyamastapaḥ
manastāpo'tipānāṭivyāyāmasuratāni ca

nidrāchedo'dhvagamanaṃ kṣutpipāsādayastathā
vibhāvāḥ syuratha srastādharanetrakapolatā

mandāvutkṣepanikṣepau pādayostanugātratā
vivarṇaśithilāṅgatvaṃ kampānutsāhatādayaḥ
yatra bhāvānubhāvāḥ syuḥ sā glānirabhidhīyate

iti glāniḥ
cauryarājāparādhāderakāryādgrahaṇaṃ nṛṇām
anyeṣu tatsahāyeṣu vibhāvaścedathā''tmanaḥ

anyenādarśane yatra pārśvayormuhurīkṣaṇam
kaṇṭhoṣṭhamukhaśoṣaśca jihvāyāḥ parilehanam

vepathurmukhavaivarṇyaṃ guruvihvalajihvatā
unmukhekṣaṇamityādiranubhāvagaṇo yadā

nīceṣūttamamadhyeṣu nareṣu mṛduceṣṭitaiḥ
sottamānāmapi strīṇāṃ bhīrutvādbhayakṛdbhavet

priyavipriyajā śaṅkā śṛṅgāre śārṅgiṇoditā
cauryarājāparādhādiprabhavā tu bhayānake

parasthā svasamutthā ca dvedhā śaṅkā nigadyate
nṛṣu bhīrusvabhāveṣu taralālokanādibhiḥ

sāparādhatvaśaṅkā yā'nyeṣāṃ sā parasaṃsthitā
svasamutthā pare jñāsyantyaparādhaṃ mametyasau

svaśaṅkāyāṃ parajñānaśaṅkā yā svasamutthitā
sahabhāvo'vahitthena śaṅkāyā dṛśyate rase

iti śaṅkā
nṛpāparādho'saddoṣakīrtanaṃ copadhāraṇam
vibhāvāḥ syuratho bandho vadhastāḍanabhartsane
ete yatrānubhāvāstadaugryaṃ nirdayatātmakam

ityaugryam
cintautsukyānmanastāpāddaurgatyācca vibhāvataḥ

anubhāvāttu śiraso vyāvṛttergātragauravāt
dehopaskaraṇatyāgāddainyaṃ bhāvaṃ vibhāvayet

iti dainyam
nānāparādho vidveṣaḥ parasyaiśvaryasaṃpadām
saubhagyamedhāvidyāderdarśanaṃ ca vibhāvakam

anubhāvāstvamarṣādidoṣoktirguṇanihnavaḥ
guṇasya doṣīkaraṇamaprekṣaṇamadhomukham
avajñābhrukuṭītyādyā yatrāsūyāmamūṃ viduḥ

ityasūyā
madyapānaṃ vibhāvo'thānubhāvāḥ pañca yatra ca
śayanaṃ hasanaṃ gānaṃ rodanaṃ parūṣoktayaḥ

uttame puruṣe svāpo hāsagāne tu madhyame
rodanaṃ puruṣoktiśca bhavataḥ puruṣe'dhame

sa syānmadaḥ sa ca tredhā taruṇo madhyamo'dhamaḥ
taruṇo'lpo'dhamastvatra pravṛddho'dhamasaṃśrayāt

sarveṣāṃ taruṇaḥ prokto madhyamo madhyanīcayoḥ
pumāṃso'dhamasattvā ye teṣāmevādhamo madaḥ

avyaktāsaṃgatairvākyai romāñcanicayaistanoḥ
sukumāraskhaladgatyā'bhinayettaruṇaṃ madam

srastavyākulavikṣiptau bhujau skhalitaghūrṇite
netre gatiśca kuṭilā'nubhāvā madhyame made

gatibhaṅgaḥ smṛternāśo hikkā chardiḥ kaphasnutiḥ
gurvī jihvā ṣṭhīvanaṃ cānubhāvāḥ syurmade'dhame

raṅge vidhāya pānaṃ tu nāṭayenmadavardhanam
pītvā raṅgapraveśe tu madakṣaiṇyāya buddhimān
harṣaśokabhayopāyānyugapaddarśayedbahūn

iti madaḥ
adhvavyāyāmasevādyairvibhāvairanubhāvakaiḥ

gātrasaṃvāhanairāsyasaṃkocairaṅgamoṭanaiḥ
niśvāsairjṛmbhitairmandaiḥ pādakṣepaiḥ śramo yataḥ

iti śramaḥ
vibhāvā yatra dāridryamaiśvaryaṃ bhraṃśanaṃ tathā
iṣṭārthāpahṛtiścātha śvāsocchvāsāvadhomukham

saṃtāpaḥ smaraṇaṃ dhyānaṃ kārśyaṃ dehānupaskṛtiḥ
adhṛtiścānubhāvāḥ syuḥ sā cintā parikīrtitā
vitarko'syāḥ kṣaṇe pūrve pāścātye vopajāyate

iti cintā
vivekaḥ śrutisaṃpattirgurubhaktistapasvitā

ete viṣayabhāvena karaṇatvena ca sthitāḥ
iṣṭādhikānāmiṣṭānāṃ lābhastu viṣayatvataḥ

krīḍā karaṇabhāvena vibhāvā yatra saṃmatāḥ
prāptabhāgyopabhogasya tvaprāptātītabhogayoḥ

jīrṇe naṣṭe cāviṣādo na tu śocanamityapi
anubhāvadvayaṃ yatra dhṛtiṃ tāṃ bruvate budhāḥ

iti dhṛtiḥ
paścimaprahare rātreḥ svāsthyaṃ nidrākṣayastathā
dhyānaṃ ca muhurabhyāsaḥ sadṛśaḥ śrutidarśane

ete yatra vibhāvāḥ syuranubhāvāstu kampitam
udvāhitaṃ ca śīrṣasyāsadṛśasyāvalokanam

bhrūnatiśca smṛtiḥ sā syātsukhaduḥkhapradāyinām
ciravismṛtavastūnāṃ smaraṇaṃ smṛtirucyate

iti smṛtiḥguruvyatikramo'vajñā kṛte tyāge'nutāpitā
pratijñātārthanirvāho vibhāvairebhirudgatā

mukhāvanamanaṃ gūḍhavacanaṃ ca vicintanam
vastrāṅgulīyakasparśo nakhānāṃ kartanaṃ muhuḥ

bhuvi lekhanamityādyairvrīḍābhāvo'nubhāvyate
vrīḍānutāpaśucibhirdṛṣṭā kārye kṛte sati

iti vrīḍā
devajopadravāddehapīḍeṣṭavirahādikam
marmaprahāro'pyasthāne ghoracorādijaṃ bhayam

tatpratīkāraśūnyasya vairānusmaraṇādayaḥ
vibhāvāḥ santi yatrātha patanaṃ dehaghūrṇanam

hṛdayasmānavasthānamindriyāṇāmaceṣṭatā
ityādayo'nubhāvāstaṃ mohamāhurmanīṣiṇaḥ

paśyato bhītihetuṃ tatpratīkāramapaśyataḥ
kāryāniścayinī cittavṛttirmoho'bhidhīyate

iti mohaḥ
atitṛptiḥ svabhāvaśca garbhavyādhiśramādayaḥ
vibhāvā anubhāvāstu nidrā tandrāsanāśanāt
ṛte sarvakriyādveṣo yatrā''lasyaṃ taducyate

ityālasyam
amarṣaprātikūlyerṣyārāgadveṣāśca matsaraḥ
iti yatra vibhāvāḥ syuranubhāvāstu bhartsanam

vākpāruṣyaṃ prahāraśca tāḍanaṃ vadhabandhane
taccāpalamanālocyākāryakāritvamiṣyate

iti cāpalam
devabhartṛgurusvāmiprasādaḥ priyasaṃgamaḥ

manorathāptiraprāpyamanorathadhanāgamaḥ
samutpattiśca putrādervibhāvo yatra jāyate

netravaktraprasādaśca priyoktiḥ pulakodgamaḥ
aśrusvedādayaścānubhāvā harṣaṃ tamādiśet

iti harṣaḥ
vidyādhanabalaiśvaryādhikairmadhyesabhaṃ nṛbhiḥ
adhikṣepādamarṣaḥ syātpratīkāraspṛhātmakaḥ
nṛṇāmutsāhināmeva sa syāttasyānubhāvakaḥ

svedo'dhomukhatā mūrdhakampo nirlakṣacittatā
upāyānveṣaṇaṃ cittotsāhastasyānubhāvakāḥ

ityamarṣaḥ
satyupāye'pi kāryasyāsiddhirdurdaivakāritā

nṛpāparādhaścauryādigrahaṇaṃ ca vibhāvakāḥ
sahāyānveṣaṇopāyacintane vimanaskatā

uttame madhyame cānubhāvāścotsāhasaṃśrayāḥ
adhame dhāvanaṃ dhyānaṃ mukhaśoṣavilokane

nidrā niḥśvasitaṃ sṛkkalehanaṃ cānubhāvakāḥ
santi yatra viṣādo'sau bhāvo bhāvavidāṃ mataḥ

iti viṣādaḥ
devairnāgaistathā yakṣaiḥ piśācairbrahmarākṣasaiḥ
bhūtādyaiśca grahairugrairāveśastatsmṛtistathā

aśuceścirasaṃsthānaṃ śūnyāgārasya sevanam
dhātuvaiṣamyamityādyairvibhāvairanubhāvakaiḥ

spandanaṃ kampaniḥśvāsau dhāvanaṃ patanaṃ bhuvi
jihvāyā lehanaṃ svedaḥ stambho vaktraṃ ca phenilam

niḥsaṃjñatetyādibhiścāpasmāramupalakṣayet

ityapasmāraḥ
kāryāviveko jaḍatā paśyataḥ śṛṇvato'pi vā
tadvibhāvāḥ priyāniṣṭadarśanaśravaṇe rujā

anubhāvāstu caivāsyāḥ prativādāvabhāṣaṇe
iṣṭāniṣṭāparijñānaṃ cānimeṣekṣaṇādayaḥ
sā pūrvaṃ parato vā syānmohāditi vidāṃ matam

iti jaḍatā
yatra vipratipattiḥ syātsaṃśayo'pi vimarśanam
pakṣayorubhayorukte māne sādhakabādhake

vibhāvāḥ syurime cānubhāvāḥ śīrṣasya kampanam
bhrūkṣepaścaturo hastastaṃ vitarkaṃ pracakṣate

yo vitarkānvitasthāyī so'vahitthena yujyate

iti vitarkaḥ
nidrāvibhāvajaṃ suptaṃ suptāvasthātmakaṃ matam
tasyānubhāvā nibhṛtaṃ gātraṃ netranimīlitam
svapnapralāpanaṃ śvāsocchvāsau bāhyākṣalīnatā

iti suptam
saṃjātamiṣṭavirahāduddīptaṃ priyasaṃsmṛteḥ

nidrayā tandrayā gātragauraveṇa ca cintayā
anubhāvitamākhyātamautsukyaṃ bhāvakovidaiḥ

ityautsukyam
anubhāvapidhānārtho'vahitthaṃ bhāva ucyate

tadvibhāvyaṃ bhayavrīḍādhārṣṭyakauṭilyagauravaiḥ
garvādagaṇanenāpi tasyete tvanubhāvakāḥ

priyādigocarakathābhaṅgo dhairyaṃ ca kṛtrimam
anyathākathanaṃ tadvadanyathā vekṣaṇādayaḥ

ityavahittham
a pūrvapratibhānaṃ syānmatistāṃ tu vibhāvayet
anvayavyatirekotthaiḥ pratyayaiḥ śāstracintanaiḥ

ūhāpohaiśca vividhairatha tāmanubhāvayet
saṃdaṃśacaturādyaiśca karairutkṣepaṇairbhruvoḥ

nānāśāstrārthaviṣayaiḥ śiṣyāṇāmupadeśanaiḥ
tarkākhyau pratyayāvūhāpohau vidhiniṣedhayoḥ

iti matiḥ
svapnāntanidrāchedābhyāmāhārapariṇāmataḥ
śabdasparśādibhiḥ svapnaiḥ smṛtairvā jāgrati sthitaiḥ

vibhāvyate'tha jṛmbhākṣimardanaiḥ śayanodgamaiḥ
aṅgulitroṭanairaṅgavalanairyo'nubhāvyate

bhujavikṣepaṇaiḥ śvāsairvibodhapratibodhanam
samyagbodho'thavā lokāttadvibhāvānubhāvadhīḥ

iti bodhaḥ
ekaikaśo dvaṃdvaśo vā trayāṇāṃ vā prakopataḥ
vātapittakaphānāṃ bhāvo vyādhirityabhidhīyate
stambhāṅgasraṃsavikṣiptagātrasaṃkucitānanaiḥ

utkrośakampastanitaiścābhineyo jvaraḥ punaḥ
kāmajo'pyasti sa dvedhā śītadāhapravartanāt

hanucālena sarvāṅgakampena mukhaśoṣataḥ
paridevanaromāñcamukhasaṃkocanādibhiḥ

śītajvaro'bhineyo'tha dāhako'mbupipāsayā
karāṅgagātravikṣepādbhūmiśayyābhilāṣataḥ
śītānulepanākāṅkṣāvikṛṣṭaparidevanaiḥ

iti vyādhiḥ
uttamānāṃ vipralambhe bhavetpriyaviyogataḥ
nīcānāṃ vibhavabhraṃśātsarveṣāṃ saṃnipātataḥ

abhighātāttathonmādastamebhiranubhāvayet
vinā nimittaṃ hasitaṃ ruditaṃ paṭhitaṃ tathā

nṛttaṃ gītaṃ ca śayanopaveśotthānadhāvanam
asaṃbaddhapralapanaṃ codvṛttirdhūlibhasmanoḥ

kapālacīranirmālyādyalaṃkaraṇamityapi
unmādaḥ pṛthagukto'yaṃ vyādhiṣvantarbhavannapi

ayaṃ hi vipralambhādau vaicitryaṃ kurute tamām
apasmāro'pyevameva bībhatse ca bhayānake

ityunmādaḥ
kularūpabalaiśvaryavidyādraviṇayauvanaiḥ

nīcānāṃ jāyate garvaḥ prādhānyena muhurmuhuḥ
vidyudvaduttamānāṃ tu bāhulyāttveṣa yoṣitām

udgrīvāvekṣaṇāvajñāsūyānuttaradānataḥ
abhāṣaṇādamarṣācca pāruṣyādvibhramādapi

aṅganetravikārāccādhikṣepātikramādguroḥ
tasyābhinayanaṃ kāryamityāha karaṇāgraṇīḥ

vāgaṅgasāttvikāhāryakriyāvyatyāsanaṃ bhavet
vibhramo yoṣitāṃ harṣānurāgamadagarvajaḥ

iti garvaḥ
adhīrāṇāṃ jātamātre śoke'nantaramudbhavet
āvegaḥ prabalo'yaṃ tu dhīrairdhairyānnirūpyate

asau prativibhāvaṃ ca pṛthakcitrānubhāvabhāk
ato vibhāvarūpāṇāṃ hetūnāṃ bhedato'ṣṭadhā

utpātavātavarṣāgnikuñjaroddhamaṇāni ca
priyāpriyaśrutirvairavyasanaṃ ceti hetavaḥ

vidyudulkānipātābhyāṃ nirghātādbhūmikampanāt
sūryacandroparāgābhyāmāvegaḥ ketudarśanāt

utpātajo'syānubhāvo vaivarṇyaṃ srastagātratā

viṣādavismayagatānubhāvāśceha saṃmatāḥ
vātaje tvatra vastreṇa pidhānaṃ netramardanam

tvaritāgamanaṃ cānubhāvāḥ syurvarṣaje punaḥ
sarvāṅgapīḍanaṃ gehādyāśrayaḥ śīghradhāvanam

agnije dhūtiraṅgānāṃ dhūmākulitanetratā
cāryā'tikrāntayā cāpakrāntayā caraṇaṃ bhavet

kuñjarāṇāṃ niravadhibhramaṇādyastu jāyate
saraṇāpasṛtī tatra tvarite bhayavepathuḥ

vismayo vīkṣaṇaṃ paścātpriyaśravaṇaje punaḥ
vastrābharaṇadānaṃ cābhyutthānaṃ parirambhaṇam

kathāyāmaśruromāñcāścāpriyaśrutije tvamī
vilāpaḥ patanaṃ bhūmau calanaṃ parivartanam

paribhāvanamityādyā vairivyasanaje tvamī
sahasā'pasṛtiḥ śastracarmavarmādidhāraṇam

gajānāṃ turagāṇāṃ cā''rohaṇaṃ saṃpradhāraṇam
pṛthagityanubhāvāḥ syurāvege saṃbhramātmake

ityāvegaḥ
maraṇaṃ dvividhaṃ proktaṃ vyādhijaṃ cāpaghātajam
doṣavaiṣamyajairgaṇḍajvarādyairvyādhijaṃ bhavet

vātapittakaphā duṣṭā doṣatveneha saṃmatāḥ
śastrādiviṣatoyebhyaḥ śvāpadātturagādgajāt

agnyuccapatanādibhyo jātaṃ syādabhighātajam
niśceṣṭaprasṛtairaṅgairmīlanena ca netrayoḥ

hikkordhvaśvāsavamanajanatāparivāraṇaiḥ
avyaktākṣarabhāṣādyairvyādhijasyānubhāvanam

śastraje sahasā bhūmau patanaṃ ca vikampanam
sphuraṇādi prayoktavyamathāhiviṣapānaje

anubhāvā bhavantyaṣṭau viṣavegātkramādime
kārṣṇyavepathudāhāśca hikkāphenaśca pañcamaḥ

skandhabhaṅgaśca jaḍatā maraṇaṃ ceti saṃmatāḥ
abhighātāntarodbhūte'nubhāvāḥ śastrajātavat

vyādhyāderanivartyatvānniścite maraṇe sati
atra prāṅnidhanāccittavṛttirmaraṇamiṣyate

iti maraṇam
gātrotkampī camatkāraḥ sahasā trāsa ucyate
tasyotpātādghoranādaśruterbhīṣaṇadarśanāt

utpattiranubhāvāstu gātrasaṃkocakampane
stambho gadgadaśabdaśca romāñcāḥ srastagātratā

nimīlanaṃ locanayoḥ pralayaśceti kīrtitāḥ
pūrvāparavicārotthaṃ bhayaṃ trāsātpṛthagbhavet

iti trāsaḥ
nidrendriyāṇāṃ prathamā nivṛttiḥ svasvagocarāt
atyāhāraḥ svabhāvaśca cintālasye madaḥ klamaḥ

vyākhyānādiprayāsena vailakṣaṇyaṃ ca hetavaḥ
nidrāyāmanubhāvāḥ syurjṛmbhāvadanagauravam

śarīralolanaṃ netraghūrṇanaṃ gātramoṭanam
niḥśvāsocchvasitaṃ srastagātratā'kṣinimīlanam

iti nidrā
trayastriṃśadvicitratvakāritvātsthāyinaṃ rasam
kurvantīti mayā proktāḥ santi tvanye sahasraśaḥ

antarbhāvo'sti keṣāṃcidabhilāṣasya vā ratau

avahitthe tu dambhasya glānau kṣuttṛṣṇayoryathā
udvegasya tu nirvede'nyeṣāmapyevamūhyatām

iti trayastriṃśadvyabhicāribhāvāḥ
atha sāttvikalakṣaṇam
uktai ratyādibhirbhāvaiḥ saṃvidvikriyate yadā
prāṇe'dhyasyati sā''tmānaṃ dehaṃ prāṇastanoti saḥ
tadā stambhādayo dehe vikārāḥ prabhavantyamī

evaṃ sati svādyamānaratyādisvairvibhāvakaiḥ
vibhāvitā dehasaṃsthaiḥ stambhādyairanubhāvitāḥ

adhyastasaṃvidi prāṇe prakāśante'ntare bhavāḥ
ete syuḥ sāttvikā bhāvāḥ sattvaprāṇaprakāśanāt

sāṃkhyokto vā guṇaḥ sattvaṃ sādhutvaṃ vā taducyate
nirmalaprāṇadehatvaṃ sādhutvamiha saṃmatam
tatra sattve bhavā bhāvāḥ sāttvikāḥ saṃmatāḥ satām

catvāri kṣmādibhūtāni prādhānyenāvalambate
kadācitsvapradhānaḥ sandehe prāṇaścaratyayam

yadā'dhyāste dharāṃ stambhaṃ bhāvaṃ bhāvayate tadā
prāṇājjalasthādaśrūṇi tejaḥsthāttu vivarṇatā

svedaścā''kāśaniṣṭhāttu pralayo jāyate tataḥ
svatantro'sau kramānmandamadhyatīvratvabhedabhāk

romāñcaṃ vepathumatha svarabhedaṃ ca bhāvayet

bāhyāḥ stambhādayo dehe nṛṇāṃ dehātmamāninām
sulabhā durlabhāstvete satāmanabhimāninām

harṣādrāgādbhayādduḥkhādviṣādādvismayādruṣaḥ
vikṣepācca bhavetstambho'nubhāvā jāḍyaśūnyate
niḥsaṃjñastabdhagātratve niśceṣṭatvāprakampane

iti stambhaḥ
manastāpo rujā harṣo lajjā krodho bhayaṃ śramaḥ
pīḍā''ghātātapau mohavyāyāmau ca vibhāvakāḥ

vyajanagrahaṇaṃ svedo'pyarālo bhālamārjakaḥ
ityete'bhinayā yatra taṃ svedaṃ jagadurbudhāḥ

iti svedaḥ
āliṅganācchuritake śītaharṣabhayakrudhaḥ

vibhāvayanti romāñcaṃ vyaktasyābhinayāstvamī
gātrasparśollukusane muhuḥ kaṇṭakitā tanuḥ

iti romāñcaḥ
augryarogajarākrodhabhayaharṣamadādayaḥ
vibhāvā visvaro bhinno gadgadaśca dhvanirbhavet

anubhāvastadā bhāvaḥ svarabhedo'bhidhīyate
sthānabhraṣṭo visvaraḥ syādvicchinno bhinnasaṃjñakaḥ
avyavasthitatānoccanīcabhāvastu gadgadaḥ

iti svarabhedaḥ
āliṅganācchuritake harṣo roṣo bhayaṃ jarā
vibhāvāḥ śītarogau ca yatraite tvanubhāvakāḥ

vepanaṃ sphuraṇaṃ kampo vepathuṃ kathayanti tam
vepanādyāḥ kampabhedāḥ pūrvātsātiśayaḥ paraḥ

iti vepathuḥ
rogamohabhayakrodhaśītatāpaśramairbhavet

vaivarṇyamasyābhinayo nāḍīpīḍanayogataḥ
sindūrādyena vā varṇāntarasaṃcāraṇaṃ mukhe

iti vaivarṇyam
harṣāmarṣāñjanāddhūmādbhayācchokācca jṛmbhaṇāt
animeṣekṣaṇācchītādrogādbhāvo'śru jāyate
taṃ cānubhāvayedaśrusravaṇairnetramārjanaiḥ

ityaśru
madamūrchābhighātebhyo nidrāmohaśramādibhiḥ
pralayaḥ syādabhinayenmahīnipatanena tam

iti pralayaḥ
ityuktāstrividhā bhāvāḥ sthāyino vyabhicāriṇaḥ
sāttvikāśca raseṣu syuḥ sarve sarveṣu sāttvikāḥ

ekaḥ kāryo rasaḥ sthāyī rasānāṃ nāṭake sadā
rasāstadanuyāyitvādanye tu vyabhicāriṇaḥ

virodhino rasāsteṣu saṃdarbhyaḥ pṛthagāśrayaḥ
gumphaścitro rasānāṃ syānnāṭye kusumagumphavat
sthāyī tu sūtrasthānīyo raso rasavidāṃ mataḥ

sūriśrīśāraṅgadevena nāṭyavedāmbudheridam
samastamuddhṛtaṃ sāraṃ dhīrairātṛpti sevyatām

granthe madīye yadi kaścidasti guṇastatastasya parigrahāya
nābhyarthaye vaḥ sudhiyaḥ pareṣāṃ guṇo'ṇurapyadrisamo bhavatsu

sāvadyatā vā niravadyatā'stu granthe mayā'tra grathite tayā kim
ārādhane vaḥ pravaṇā matirme santo guṇaḥ kaṃ nanu nātiśete

yuṣmatkṣodakṣamaṃ vastu kiyatrāsti jagattraye
kiṃ tumatpremataḥ santaḥ puraskuruta me kṛtim

yadvā purāṇaṃ panthānaṃ munīnāmahamanvagām
snihyanti ca nisargeṇa santaḥ sanmārgagāmini

ārirādhayiṣoḥ sādhūnkiṃ prajñāvibhavena me
rāmamānandayanti sma tiryañco'pi kapīśvarāḥ

na vidyādarpato granthapravṛttirmama kiṃ tvidam
vidvanmānasavāsāya gantuṃ pātheyamāsthitam

iti śrīmadanavadyavidyāvinodaśrīkaraṇādhipatiśrīsoḍhaladevanandananiḥśaṅkaśrīśārṅgadevaviracite saṃgītaratnākare saptamo nartanādhyāyaḥ samāptaḥ