Samādhirājasūtra · Chapter 20

asmin khalu punargāthābhinirhāre bhāṣyamāṇe candraprabhaḥ kumārabhūtaḥ acintyeṣu buddhadharmeṣu gambhīranidhyaptinirdeśakauśalyamanuprāptaḥ, sūtrāntanirhārāvabhāsaṃ ca pratilabdhavān | pañcaśikhasya ca gandharvaputrasya ghoṣānugāyāḥ kṣānteḥ pratilambho 'bhūt | aprameyāṇāṃ ca sattvānāṃ devamānuṣikāyāḥ prajāyā anuttarāyāṃ samyaksaṃbodhau cittānyutpannāni | aprameyāṇāṃ ca sattvānāmarthaḥ kṛto 'bhūta ||
iti śrīsamādhirāje acintyabuddhadharmanirdeśaparivarto nāmonaviṃśatitamaḥ ||
(Vaidya 136)
20 Indraketudhvajarājaparivartaḥ ||
tatra khalu bhagavāṃścandraprabhaṃ kumārabhūtamāmantrayate sma - tasmāttarhi kumāra bodhisattvena mahāsattvena sarvakuśalamūlaśikṣāguṇadharmaniśritena bhavitavyam | asaṃsargabahulena ca bhavitavyam, pāpamitraparivarjakena kalyāṇamitrasaṃniśritena paripṛcchakajātīyena dharmaparyeṣṭyāmatṛptena prāmodyabahulena dharmārthikena dharmakāmena dharmaratena dharmaparigrāhakeṇa dharmānudharmapratipannena | śāstṛsaṃjñā anena sarvabodhisattveṣūtpādayitavyā | yasya cāntikādimaṃ dharmaparyāyaṃ śṛṇoti, tena tasyāntike prītigauravaṃ śāstṛsaṃjñā cotpāditavyā| yaḥ kumāra bodhisattvo mahāsattva imān dharmān samādāya vartate, sa kṣipramanācchedyapratibhāvaniryāto bhavati | acintyabuddhadharmādhimuktaśca bhavati | gambhīreṣu ca dharmeṣu nidhyaptiṃ gacchati | ālokabhūtaśca bhavati sadevakasya lokasya kāṅkṣāvimativicikitsāndhakāravidhamanatayā ||
atha khalu bhagavāṃstasyāṃ velāyāmimā gāthā abhāṣata -
abhyatīta bahukalpakoṭiyo aprameya atulā acintiyāḥ /
yad abhūṣi dvipadānamuttamo indraketudhvajarāja nāyakaḥ

so samādhimimu śāntu deśayi yatra nāsti naru jīva pudgalaḥ /
māya budbuda marīci vidyutā sarva dharma dakacandrasaṃnibhāḥ

nāsti sattva manujo ca labhyate kālu kṛtva paraloki gacchi yo /
no ca karma kṛtu vipraṇaśyate kṛṣṇa śukla phala deti tādṛśam

eṣa yukti nayadvāra bhadrakaṃ sūkṣma durdṛśu jināna gocarā /
yatra akṣarapadaṃ na labhyate buddhabodhi bhagavān prajānati

(Vaidya 137)
dhāraṇī vipulajñānasaṃcayā sūtrakoṭiniyutāna āgatā /
buddhakoṭiniyutāna gocarastaṃ samādhi bhagavān prabhāṣate

āturāṇamaya vyādhimocako bodhisattvasamudānitaṃ dhanam /
sarvabuddhastuta saṃprakāśito devakoṭiniyutehi pūjitaḥ

sarva bālajana bhūtacodanā tīrthikehi parivarjitaḥ sadā /
śreṣṭha śīladhanu buddhavarṇitaṃ vidyuteva gagane na lipyate

yehi pūjita jināna koṭiyo dānaśīlacaritā vicakṣaṇāḥ /
pāpamitra puri yehi varjitā teṣa paitṛkadhanaṃ niruttaram

tatra bhikṣu sthitu dharmabhāṇako brahmacāri sugatasya aurasaḥ /
śrutva dharmamimamānulomikaṃ citta pādesi ya lokanāyakaḥ

indraketudhvajarāju nāyako adhyabhāṣi abhu dharmabhāṇakam /
bhikṣubhāva paramaṃ ti duṣkaraṃ cittupāda vara agrabodhaye

śīlu rakṣa maṇiratnasaṃnibhaṃ mitra seva sada ānulomikam /
pāpamitra na kadāci sevato buddhajñānamacireṇa lapsyase