Sāhityadarpaṇa · Chapter 9

iti sāhitya-darpaṇe guṇa-vivecano nāma
aṣṭamaḥ paricchedaḥ
-o)0(o-
(9)
navamaḥ paricchedaḥ
rīti-nirṇayaḥ
pada-saṅghaṭanā rītir aṅga-saṃsthā-viśeṣavat /
upakartrī rasādīnāṃ sā punaḥ syāc caturvidhā

vaidarbhī cātha gauḍī ca pāñcālī lāṭikā tathā /
mādhurya-vyañjakair varṇai racanā lalitātmikā

avṛttir alpa-vṛttir vā vaidarbhī rītir iṣyate /
ojaḥ prakāśakair varṇair bandha āḍambaraḥ punaḥ

samāsa-bahulā gauḍī varṇaiḥ śeṣaiḥ punar dvayoḥ /
samasta-pañcaṣa-pado bandhaḥ pāñcālikā matā

lāṭī tu rītir vaidarbhī-pāñcālyor antare sthitā /
kvacit tu vaktrādyaucityād anyathā racanādayaḥ