Rig Veda · Chapter 8.092

pāntam ā vo andhasa indram abhi pra gāyata |
viśvāsāhaṁ śatakratum maṁhiṣṭhaṁ carṣaṇīnām ||

puruhūtam puruṣṭutaṁ gāthānya1ṁ sanaśrutam |
indra iti bravītana ||

indra in no mahānāṁ dātā vājānāṁ nṛtuḥ |
mahām̐ abhijñv ā yamat ||

apād u śipry andhasaḥ sudakṣasya prahoṣiṇaḥ |
indor indro yavāśiraḥ ||

tam v abhi prārcatendraṁ somasya pītaye |
tad id dhy asya vardhanam ||

asya pītvā madānāṁ devo devasyaujasā |
viśvābhi bhuvanā bhuvat ||

tyam u vaḥ satrāsāhaṁ viśvāsu gīrṣv āyatam |
ā cyāvayasy ūtaye ||

yudhmaṁ santam anarvāṇaṁ somapām anapacyutam |
naram avāryakratum ||

śikṣā ṇa indra rāya ā puru vidvām̐ ṛcīṣama |
avā naḥ pārye dhane ||

ataś cid indra ṇa upā yāhi śatavājayā |
iṣā sahasravājayā ||

ayāma dhīvato dhiyo 'rvadbhiḥ śakra godare |
jayema pṛtsu vajrivaḥ ||

vayam u tvā śatakrato gāvo na yavaseṣv ā |
uktheṣu raṇayāmasi ||

viśvā hi martyatvanānukāmā śatakrato |
aganma vajrinn āśasaḥ ||

tve su putra śavaso 'vṛtran kāmakātayaḥ |
na tvām indrāti ricyate ||

sa no vṛṣan saniṣṭhayā saṁ ghorayā dravitnvā |
dhiyāviḍḍhi puraṁdhyā ||

yas te nūnaṁ śatakratav indra dyumnitamo madaḥ |
tena nūnam made madeḥ ||

yas te citraśravastamo ya indra vṛtrahantamaḥ |
ya ojodātamo madaḥ ||

vidmā hi yas te adrivas tvādattaḥ satya somapāḥ |
viśvāsu dasma kṛṣṭiṣu ||

indrāya madvane sutam pari ṣṭobhantu no giraḥ |
arkam arcantu kāravaḥ ||

yasmin viśvā adhi śriyo raṇanti sapta saṁsadaḥ |
indraṁ sute havāmahe ||

trikadrukeṣu cetanaṁ devāso yajñam atnata |
tam id vardhantu no giraḥ ||

ā tvā viśantv indavaḥ samudram iva sindhavaḥ |
na tvām indrāti ricyate ||

vivyaktha mahinā vṛṣan bhakṣaṁ somasya jāgṛve |
ya indra jaṭhareṣu te ||

araṁ ta indra kukṣaye somo bhavatu vṛtrahan |
araṁ dhāmabhya indavaḥ ||

aram aśvāya gāyati śrutakakṣo araṁ gave |
aram indrasya dhāmne ||

araṁ hi ṣma suteṣu ṇaḥ someṣv indra bhūṣasi |
araṁ te śakra dāvane ||

parākāttāc cid adrivas tvāṁ nakṣanta no giraḥ |
araṁ gamāma te vayam ||

evā hy asi vīrayur evā śūra uta sthiraḥ |
evā te rādhyam manaḥ ||

evā rātis tuvīmagha viśvebhir dhāyi dhātṛbhiḥ |
adhā cid indra me sacā ||

mo ṣu brahmeva tandrayur bhuvo vājānām pate |
matsvā sutasya gomataḥ ||

mā na indrābhy ā3diśaḥ sūro aktuṣv ā yaman |
tvā yujā vanema tat ||

tvayed indra yujā vayam prati bruvīmahi spṛdhaḥ |
tvam asmākaṁ tava smasi ||

tvām id dhi tvāyavo 'nunonuvataś carān |
sakhāya indra kāravaḥ ||