Rig Veda · Chapter 8.093

ud ghed abhi śrutāmaghaṁ vṛṣabhaṁ naryāpasam |
astāram eṣi sūrya ||

nava yo navatim puro bibheda bāhvojasā |
ahiṁ ca vṛtrahāvadhīt ||

sa na indraḥ śivaḥ sakhāśvāvad gomad yavamat |
urudhāreva dohate ||

yad adya kac ca vṛtrahann udagā abhi sūrya |
sarvaṁ tad indra te vaśe ||

yad vā pravṛddha satpate na marā iti manyase |
uto tat satyam it tava ||

ye somāsaḥ parāvati ye arvāvati sunvire |
sarvām̐s tām̐ indra gacchasi ||

tam indraṁ vājayāmasi mahe vṛtrāya hantave |
sa vṛṣā vṛṣabho bhuvat ||

indraḥ sa dāmane kṛta ojiṣṭhaḥ sa made hitaḥ |
dyumnī ślokī sa somyaḥ ||

girā vajro na sambhṛtaḥ sabalo anapacyutaḥ |
vavakṣa ṛṣvo astṛtaḥ ||

durge cin naḥ sugaṁ kṛdhi gṛṇāna indra girvaṇaḥ |
tvaṁ ca maghavan vaśaḥ ||

yasya te nū cid ādiśaṁ na minanti svarājyam |
na devo nādhrigur janaḥ ||

adhā te apratiṣkutaṁ devī śuṣmaṁ saparyataḥ |
ubhe suśipra rodasī ||

tvam etad adhārayaḥ kṛṣṇāsu rohiṇīṣu ca |
paruṣṇīṣu ruśat payaḥ ||

vi yad aher adha tviṣo viśve devāso akramuḥ |
vidan mṛgasya tām̐ amaḥ ||

ād u me nivaro bhuvad vṛtrahādiṣṭa pauṁsyam |
ajātaśatrur astṛtaḥ ||

śrutaṁ vo vṛtrahantamam pra śardhaṁ carṣaṇīnām |
ā śuṣe rādhase mahe ||

ayā dhiyā ca gavyayā puruṇāman puruṣṭuta |
yat some-soma ābhavaḥ ||

bodhinmanā id astu no vṛtrahā bhūryāsutiḥ |
śṛṇotu śakra āśiṣam ||

kayā tvaṁ na ūtyābhi pra mandase vṛṣan |
kayā stotṛbhya ā bhara ||

kasya vṛṣā sute sacā niyutvān vṛṣabho raṇat |
vṛtrahā somapītaye ||

abhī ṣu ṇas tvaṁ rayim mandasānaḥ sahasriṇam |
prayantā bodhi dāśuṣe ||

patnīvantaḥ sutā ima uśanto yanti vītaye |
apāṁ jagmir nicumpuṇaḥ ||

iṣṭā hotrā asṛkṣatendraṁ vṛdhāso adhvare |
acchāvabhṛtham ojasā ||

iha tyā sadhamādyā harī hiraṇyakeśyā |
voḻhām abhi prayo hitam ||

tubhyaṁ somāḥ sutā ime stīrṇam barhir vibhāvaso |
stotṛbhya indram ā vaha ||

ā te dakṣaṁ vi rocanā dadhad ratnā vi dāśuṣe |
stotṛbhya indram arcata ||

ā te dadhāmīndriyam ukthā viśvā śatakrato |
stotṛbhya indra mṛḻaya ||

bhadram-bhadraṁ na ā bhareṣam ūrjaṁ śatakrato |
yad indra mṛḻayāsi naḥ ||

sa no viśvāny ā bhara suvitāni śatakrato |
yad indra mṛḻayāsi naḥ ||

tvām id vṛtrahantama sutāvanto havāmahe |
yad indra mṛḻayāsi naḥ ||

upa no haribhiḥ sutaṁ yāhi madānām pate |
upa no haribhiḥ sutam ||

dvitā yo vṛtrahantamo vida indraḥ śatakratuḥ |
upa no haribhiḥ sutam ||

tvaṁ hi vṛtrahann eṣām pātā somānām asi |
upa no haribhiḥ sutam ||

indra iṣe dadātu na ṛbhukṣaṇam ṛbhuṁ rayim |
vājī dadātu vājinam ||