Rig Veda · Chapter 8.021

vayam u tvām apūrvya sthūraṁ na kac cid bharanto 'vasyavaḥ |
vāje citraṁ havāmahe ||

upa tvā karmann ūtaye sa no yuvograś cakrāma yo dhṛṣat |
tvām id dhy avitāraṁ vavṛmahe sakhāya indra sānasim ||

ā yāhīma indavo 'śvapate gopata urvarāpate |
somaṁ somapate piba ||

vayaṁ hi tvā bandhumantam abandhavo viprāsa indra yemima |
yā te dhāmāni vṛṣabha tebhir ā gahi viśvebhiḥ somapītaye ||

sīdantas te vayo yathā gośrīte madhau madire vivakṣaṇe |
abhi tvām indra nonumaḥ ||

acchā ca tvainā namasā vadāmasi kim muhuś cid vi dīdhayaḥ |
santi kāmāso harivo dadiṣ ṭvaṁ smo vayaṁ santi no dhiyaḥ ||

nūtnā id indra te vayam ūtī abhūma nahi nū te adrivaḥ |
vidmā purā parīṇasaḥ ||

vidmā sakhitvam uta śūra bhojya1m ā te tā vajrinn īmahe |
uto samasminn ā śiśīhi no vaso vāje suśipra gomati ||

yo na idam-idam purā pra vasya ānināya tam u vaḥ stuṣe |
sakhāya indram ūtaye ||

haryaśvaṁ satpatiṁ carṣaṇīsahaṁ sa hi ṣmā yo amandata |
ā tu naḥ sa vayati gavyam aśvyaṁ stotṛbhyo maghavā śatam ||

tvayā ha svid yujā vayam prati śvasantaṁ vṛṣabha bruvīmahi |
saṁsthe janasya gomataḥ ||

jayema kāre puruhūta kāriṇo 'bhi tiṣṭhema dūḍhyaḥ |
nṛbhir vṛtraṁ hanyāma śūśuyāma cāver indra pra ṇo dhiyaḥ ||

abhrātṛvyo anā tvam anāpir indra januṣā sanād asi |
yudhed āpitvam icchase ||

nakī revantaṁ sakhyāya vindase pīyanti te surāśvaḥ |
yadā kṛṇoṣi nadanuṁ sam ūhasy ād it piteva hūyase ||

mā te amājuro yathā mūrāsa indra sakhye tvāvataḥ |
ni ṣadāma sacā sute ||

mā te godatra nir arāma rādhasa indra mā te gṛhāmahi |
dṛḻhā cid aryaḥ pra mṛśābhy ā bhara na te dāmāna ādabhe ||

indro vā ghed iyan maghaṁ sarasvatī vā subhagā dadir vasu |
tvaṁ vā citra dāśuṣe ||

citra id rājā rājakā id anyake yake sarasvatīm anu |
parjanya iva tatanad dhi vṛṣṭyā sahasram ayutā dadat ||