Rig Veda · Chapter 8.022

o tyam ahva ā ratham adyā daṁsiṣṭham ūtaye |
yam aśvinā suhavā rudravartanī ā sūryāyai tasthathuḥ ||

pūrvāyuṣaṁ suhavam puruspṛham bhujyuṁ vājeṣu pūrvyam |
sacanāvantaṁ sumatibhiḥ sobhare vidveṣasam anehasam ||

iha tyā purubhūtamā devā namobhir aśvinā |
arvācīnā sv avase karāmahe gantārā dāśuṣo gṛham ||

yuvo rathasya pari cakram īyata īrmānyad vām iṣaṇyati |
asmām̐ acchā sumatir vāṁ śubhas patī ā dhenur iva dhāvatu ||

ratho yo vāṁ trivandhuro hiraṇyābhīśur aśvinā |
pari dyāvāpṛthivī bhūṣati śrutas tena nāsatyā gatam ||

daśasyantā manave pūrvyaṁ divi yavaṁ vṛkeṇa karṣathaḥ |
tā vām adya sumatibhiḥ śubhas patī aśvinā pra stuvīmahi ||

upa no vājinīvasū yātam ṛtasya pathibhiḥ |
yebhis tṛkṣiṁ vṛṣaṇā trāsadasyavam mahe kṣatrāya jinvathaḥ ||

ayaṁ vām adribhiḥ sutaḥ somo narā vṛṣaṇvasū |
ā yātaṁ somapītaye pibataṁ dāśuṣo gṛhe ||

ā hi ruhatam aśvinā rathe kośe hiraṇyaye vṛṣaṇvasū |
yuñjāthām pīvarīr iṣaḥ ||

yābhiḥ paktham avatho yābhir adhriguṁ yābhir babhruṁ vijoṣasam |
tābhir no makṣū tūyam aśvinā gatam bhiṣajyataṁ yad āturam ||

yad adhrigāvo adhrigū idā cid ahno aśvinā havāmahe |
vayaṁ gīrbhir vipanyavaḥ ||

tābhir ā yātaṁ vṛṣaṇopa me havaṁ viśvapsuṁ viśvavāryam |
iṣā maṁhiṣṭhā purubhūtamā narā yābhiḥ kriviṁ vāvṛdhus tābhir ā gatam ||

tāv idā cid ahānāṁ tāv aśvinā vandamāna upa bruve |
tā u namobhir īmahe ||

tāv id doṣā tā uṣasi śubhas patī tā yāman rudravartanī |
mā no martāya ripave vājinīvasū paro rudrāv ati khyatam ||

ā sugmyāya sugmyam prātā rathenāśvinā vā sakṣaṇī |
huve piteva sobharī ||

manojavasā vṛṣaṇā madacyutā makṣuṁgamābhir ūtibhiḥ |
ārāttāc cid bhūtam asme avase pūrvībhiḥ purubhojasā ||

ā no aśvāvad aśvinā vartir yāsiṣṭam madhupātamā narā |
gomad dasrā hiraṇyavat ||

suprāvargaṁ suvīryaṁ suṣṭhu vāryam anādhṛṣṭaṁ rakṣasvinā |
asminn ā vām āyāne vājinīvasū viśvā vāmāni dhīmahi ||