Rig Veda · Chapter 8.020

ā gantā mā riṣaṇyata prasthāvāno māpa sthātā samanyavaḥ |
sthirā cin namayiṣṇavaḥ ||

vīḻupavibhir maruta ṛbhukṣaṇa ā rudrāsaḥ sudītibhiḥ |
iṣā no adyā gatā puruspṛho yajñam ā sobharīyavaḥ ||

vidmā hi rudriyāṇāṁ śuṣmam ugram marutāṁ śimīvatām |
viṣṇor eṣasya mīḻhuṣām ||

vi dvīpāni pāpatan tiṣṭhad ducchunobhe yujanta rodasī |
pra dhanvāny airata śubhrakhādayo yad ejatha svabhānavaḥ ||

acyutā cid vo ajmann ā nānadati parvatāso vanaspatiḥ |
bhūmir yāmeṣu rejate ||

amāya vo maruto yātave dyaur jihīta uttarā bṛhat |
yatrā naro dediśate tanūṣv ā tvakṣāṁsi bāhvojasaḥ ||

svadhām anu śriyaṁ naro mahi tveṣā amavanto vṛṣapsavaḥ |
vahante ahrutapsavaḥ ||

gobhir vāṇo ajyate sobharīṇāṁ rathe kośe hiraṇyaye |
gobandhavaḥ sujātāsa iṣe bhuje mahānto naḥ sparase nu ||

prati vo vṛṣadañjayo vṛṣṇe śardhāya mārutāya bharadhvam |
havyā vṛṣaprayāvṇe ||

vṛṣaṇaśvena maruto vṛṣapsunā rathena vṛṣanābhinā |
ā śyenāso na pakṣiṇo vṛthā naro havyā no vītaye gata ||

samānam añjy eṣāṁ vi bhrājante rukmāso adhi bāhuṣu |
davidyutaty ṛṣṭayaḥ ||

ta ugrāso vṛṣaṇa ugrabāhavo nakiṣ ṭanūṣu yetire |
sthirā dhanvāny āyudhā ratheṣu vo 'nīkeṣv adhi śriyaḥ ||

yeṣām arṇo na sapratho nāma tveṣaṁ śaśvatām ekam id bhuje |
vayo na pitryaṁ sahaḥ ||

tān vandasva marutas tām̐ upa stuhi teṣāṁ hi dhunīnām |
arāṇāṁ na caramas tad eṣāṁ dānā mahnā tad eṣām ||

subhagaḥ sa va ūtiṣv āsa pūrvāsu maruto vyuṣṭiṣu |
yo vā nūnam utāsati ||

yasya vā yūyam prati vājino nara ā havyā vītaye gatha |
abhi ṣa dyumnair uta vājasātibhiḥ sumnā vo dhūtayo naśat ||

yathā rudrasya sūnavo divo vaśanty asurasya vedhasaḥ |
yuvānas tathed asat ||

ye cārhanti marutaḥ sudānavaḥ sman mīḻhuṣaś caranti ye |
ataś cid ā na upa vasyasā hṛdā yuvāna ā vavṛdhvam ||

yūna ū ṣu naviṣṭhayā vṛṣṇaḥ pāvakām̐ abhi sobhare girā |
gāya gā iva carkṛṣat ||

sāhā ye santi muṣṭiheva havyo viśvāsu pṛtsu hotṛṣu |
vṛṣṇaś candrān na suśravastamān girā vandasva maruto aha ||

gāvaś cid ghā samanyavaḥ sajātyena marutaḥ sabandhavaḥ |
rihate kakubho mithaḥ ||

martaś cid vo nṛtavo rukmavakṣasa upa bhrātṛtvam āyati |
adhi no gāta marutaḥ sadā hi va āpitvam asti nidhruvi ||

maruto mārutasya na ā bheṣajasya vahatā sudānavaḥ |
yūyaṁ sakhāyaḥ saptayaḥ ||

yābhiḥ sindhum avatha yābhis tūrvatha yābhir daśasyathā krivim |
mayo no bhūtotibhir mayobhuvaḥ śivābhir asacadviṣaḥ ||

yat sindhau yad asiknyāṁ yat samudreṣu marutaḥ subarhiṣaḥ |
yat parvateṣu bheṣajam ||

viśvam paśyanto bibhṛthā tanūṣv ā tenā no adhi vocata |
kṣamā rapo maruta āturasya na iṣkartā vihrutam punaḥ ||