Rig Veda · Chapter 8.009

ā nūnam aśvinā yuvaṁ vatsasya gantam avase |
prāsmai yacchatam avṛkam pṛthu cchardir yuyutaṁ yā arātayaḥ ||

yad antarikṣe yad divi yat pañca mānuṣām̐ anu |
nṛmṇaṁ tad dhattam aśvinā ||

ye vāṁ daṁsāṁsy aśvinā viprāsaḥ parimāmṛśuḥ |
evet kāṇvasya bodhatam ||

ayaṁ vāṁ gharmo aśvinā stomena pari ṣicyate |
ayaṁ somo madhumān vājinīvasū yena vṛtraṁ ciketathaḥ ||

yad apsu yad vanaspatau yad oṣadhīṣu purudaṁsasā kṛtam |
tena māviṣṭam aśvinā ||

yan nāsatyā bhuraṇyatho yad vā deva bhiṣajyathaḥ |
ayaṁ vāṁ vatso matibhir na vindhate haviṣmantaṁ hi gacchathaḥ ||

ā nūnam aśvinor ṛṣiḥ stomaṁ ciketa vāmayā |
ā somam madhumattamaṁ gharmaṁ siñcād atharvaṇi ||

ā nūnaṁ raghuvartaniṁ rathaṁ tiṣṭhātho aśvinā |
ā vāṁ stomā ime mama nabho na cucyavīrata ||

yad adya vāṁ nāsatyokthair ācucyuvīmahi |
yad vā vāṇībhir aśvinevet kāṇvasya bodhatam ||

yad vāṁ kakṣīvām̐ uta yad vyaśva ṛṣir yad vāṁ dīrghatamā juhāva |
pṛthī yad vāṁ vainyaḥ sādaneṣv eved ato aśvinā cetayethām ||

yātaṁ chardiṣpā uta naḥ paraspā bhūtaṁ jagatpā uta nas tanūpā |
vartis tokāya tanayāya yātam ||

yad indreṇa sarathaṁ yātho aśvinā yad vā vāyunā bhavathaḥ samokasā |
yad ādityebhir ṛbhubhiḥ sajoṣasā yad vā viṣṇor vikramaṇeṣu tiṣṭhathaḥ ||

yad adyāśvināv ahaṁ huveya vājasātaye |
yat pṛtsu turvaṇe sahas tac chreṣṭham aśvinor avaḥ ||

ā nūnaṁ yātam aśvinemā havyāni vāṁ hitā |
ime somāso adhi turvaśe yadāv ime kaṇveṣu vām atha ||

yan nāsatyā parāke arvāke asti bheṣajam |
tena nūnaṁ vimadāya pracetasā chardir vatsāya yacchatam ||

abhutsy u pra devyā sākaṁ vācāham aśvinoḥ |
vy āvar devy ā matiṁ vi rātim martyebhyaḥ ||

pra bodhayoṣo aśvinā pra devi sūnṛte mahi |
pra yajñahotar ānuṣak pra madāya śravo bṛhat ||

yad uṣo yāsi bhānunā saṁ sūryeṇa rocase |
ā hāyam aśvino ratho vartir yāti nṛpāyyam ||

yad āpītāso aṁśavo gāvo na duhra ūdhabhiḥ |
yad vā vāṇīr anūṣata pra devayanto aśvinā ||

pra dyumnāya pra śavase pra nṛṣāhyāya śarmaṇe |
pra dakṣāya pracetasā ||

yan nūnaṁ dhībhir aśvinā pitur yonā niṣīdathaḥ |
yad vā sumnebhir ukthyā ||