Rig Veda · Chapter 8.010
yat stho dīrghaprasadmani yad vādo rocane divaḥ |
yad vā samudre adhy ākṛte gṛhe 'ta ā yātam aśvinā ||
yad vā yajñam manave sammimikṣathur evet kāṇvasya bodhatam |
bṛhaspatiṁ viśvān devām̐ ahaṁ huva indrāviṣṇū aśvināv āśuheṣasā ||
tyā nv a1śvinā huve sudaṁsasā gṛbhe kṛtā |
yayor asti pra ṇaḥ sakhyaṁ deveṣv adhy āpyam ||
yayor adhi pra yajñā asūre santi sūrayaḥ |
tā yajñasyādhvarasya pracetasā svadhābhir yā pibataḥ somyam madhu ||
yad adyāśvināv apāg yat prāk stho vājinīvasū |
yad druhyavy anavi turvaśe yadau huve vām atha mā gatam ||
yad antarikṣe patathaḥ purubhujā yad veme rodasī anu |
yad vā svadhābhir adhitiṣṭhatho ratham ata ā yātam aśvinā ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0