Rig Veda · Chapter 8.008

ā no viśvābhir ūtibhir aśvinā gacchataṁ yuvam |
dasrā hiraṇyavartanī pibataṁ somyam madhu ||

ā nūnaṁ yātam aśvinā rathena sūryatvacā |
bhujī hiraṇyapeśasā kavī gambhīracetasā ||

ā yātaṁ nahuṣas pary āntarikṣāt suvṛktibhiḥ |
pibātho aśvinā madhu kaṇvānāṁ savane sutam ||

ā no yātaṁ divas pary āntarikṣād adhapriyā |
putraḥ kaṇvasya vām iha suṣāva somyam madhu ||

ā no yātam upaśruty aśvinā somapītaye |
svāhā stomasya vardhanā pra kavī dhītibhir narā ||

yac cid dhi vām pura ṛṣayo juhūre 'vase narā |
ā yātam aśvinā gatam upemāṁ suṣṭutim mama ||

divaś cid rocanād adhy ā no gantaṁ svarvidā |
dhībhir vatsapracetasā stomebhir havanaśrutā ||

kim anye pary āsate 'smat stomebhir aśvinā |
putraḥ kaṇvasya vām ṛṣir gīrbhir vatso avīvṛdhat ||

ā vāṁ vipra ihāvase 'hvat stomebhir aśvinā |
ariprā vṛtrahantamā tā no bhūtam mayobhuvā ||

ā yad vāṁ yoṣaṇā ratham atiṣṭhad vājinīvasū |
viśvāny aśvinā yuvam pra dhītāny agacchatam ||

ataḥ sahasranirṇijā rathenā yātam aśvinā |
vatso vām madhumad vaco 'śaṁsīt kāvyaḥ kaviḥ ||

purumandrā purūvasū manotarā rayīṇām |
stomam me aśvināv imam abhi vahnī anūṣātām ||

ā no viśvāny aśvinā dhattaṁ rādhāṁsy ahrayā |
kṛtaṁ na ṛtviyāvato mā no rīradhataṁ nide ||

yan nāsatyā parāvati yad vā stho adhy ambare |
ataḥ sahasranirṇijā rathenā yātam aśvinā ||

yo vāṁ nāsatyāv ṛṣir gīrbhir vatso avīvṛdhat |
tasmai sahasranirṇijam iṣaṁ dhattaṁ ghṛtaścutam ||

prāsmā ūrjaṁ ghṛtaścutam aśvinā yacchataṁ yuvam |
yo vāṁ sumnāya tuṣṭavad vasūyād dānunas patī ||

ā no gantaṁ riśādasemaṁ stomam purubhujā |
kṛtaṁ naḥ suśriyo naremā dātam abhiṣṭaye ||

ā vāṁ viśvābhir ūtibhiḥ priyamedhā ahūṣata |
rājantāv adhvarāṇām aśvinā yāmahūtiṣu ||

ā no gantam mayobhuvāśvinā śambhuvā yuvam |
yo vāṁ vipanyū dhītibhir gīrbhir vatso avīvṛdhat ||

yābhiḥ kaṇvam medhātithiṁ yābhir vaśaṁ daśavrajam |
yābhir gośaryam āvataṁ tābhir no 'vataṁ narā ||

yābhir narā trasadasyum āvataṁ kṛtvye dhane |
tābhiḥ ṣv a1smām̐ aśvinā prāvataṁ vājasātaye ||

pra vāṁ stomāḥ suvṛktayo giro vardhantv aśvinā |
purutrā vṛtrahantamā tā no bhūtam puruspṛhā ||

trīṇi padāny aśvinor āviḥ sānti guhā paraḥ |
kavī ṛtasya patmabhir arvāg jīvebhyas pari ||