Rig Veda · Chapter 7.068

ā śubhrā yātam aśvinā svaśvā giro dasrā jujuṣāṇā yuvākoḥ |
havyāni ca pratibhṛtā vītaṁ naḥ ||

pra vām andhāṁsi madyāny asthur araṁ gantaṁ haviṣo vītaye me |
tiro aryo havanāni śrutaṁ naḥ ||

pra vāṁ ratho manojavā iyarti tiro rajāṁsy aśvinā śatotiḥ |
asmabhyaṁ sūryāvasū iyānaḥ ||

ayaṁ ha yad vāṁ devayā u adrir ūrdhvo vivakti somasud yuvabhyām |
ā valgū vipro vavṛtīta havyaiḥ ||

citraṁ ha yad vām bhojanaṁ nv asti ny atraye mahiṣvantaṁ yuyotam |
yo vām omānaṁ dadhate priyaḥ san ||

uta tyad vāṁ jurate aśvinā bhūc cyavānāya pratītyaṁ havirde |
adhi yad varpa itaūti dhatthaḥ ||

uta tyam bhujyum aśvinā sakhāyo madhye jahur durevāsaḥ samudre |
nir īm parṣad arāvā yo yuvākuḥ ||

vṛkāya cij jasamānāya śaktam uta śrutaṁ śayave hūyamānā |
yāv aghnyām apinvatam apo na staryaṁ cic chakty aśvinā śacībhiḥ ||

eṣa sya kārur jarate sūktair agre budhāna uṣasāṁ sumanmā |
iṣā taṁ vardhad aghnyā payobhir yūyam pāta svastibhiḥ sadā naḥ ||