Rig Veda · Chapter 7.067

prati vāṁ rathaṁ nṛpatī jaradhyai haviṣmatā manasā yajñiyena |
yo vāṁ dūto na dhiṣṇyāv ajīgar acchā sūnur na pitarā vivakmi ||

aśocy agniḥ samidhāno asme upo adṛśran tamasaś cid antāḥ |
aceti ketur uṣasaḥ purastāc chriye divo duhitur jāyamānaḥ ||

abhi vāṁ nūnam aśvinā suhotā stomaiḥ siṣakti nāsatyā vivakvān |
pūrvībhir yātam pathyābhir arvāk svarvidā vasumatā rathena ||

avor vāṁ nūnam aśvinā yuvākur huve yad vāṁ sute mādhvī vasūyuḥ |
ā vāṁ vahantu sthavirāso aśvāḥ pibātho asme suṣutā madhūni ||

prācīm u devāśvinā dhiyam me 'mṛdhrāṁ sātaye kṛtaṁ vasūyum |
viśvā aviṣṭaṁ vāja ā puraṁdhīs tā naḥ śaktaṁ śacīpatī śacībhiḥ ||

aviṣṭaṁ dhīṣv aśvinā na āsu prajāvad reto ahrayaṁ no astu |
ā vāṁ toke tanaye tūtujānāḥ suratnāso devavītiṁ gamema ||

eṣa sya vām pūrvagatveva sakhye nidhir hito mādhvī rāto asme |
aheḻatā manasā yātam arvāg aśnantā havyam mānuṣīṣu vikṣu ||

ekasmin yoge bhuraṇā samāne pari vāṁ sapta sravato ratho gāt |
na vāyanti subhvo devayuktā ye vāṁ dhūrṣu taraṇayo vahanti ||

asaścatā maghavadbhyo hi bhūtaṁ ye rāyā maghadeyaṁ junanti |
pra ye bandhuṁ sūnṛtābhis tirante gavyā pṛñcanto aśvyā maghāni ||

nū me havam ā śṛṇutaṁ yuvānā yāsiṣṭaṁ vartir aśvināv irāvat |
dhattaṁ ratnāni jarataṁ ca sūrīn yūyam pāta svastibhiḥ sadā naḥ ||