Rig Veda · Chapter 7.069

ā vāṁ ratho rodasī badbadhāno hiraṇyayo vṛṣabhir yātv aśvaiḥ |
ghṛtavartaniḥ pavibhī rucāna iṣāṁ voḻhā nṛpatir vājinīvān ||

sa paprathāno abhi pañca bhūmā trivandhuro manasā yātu yuktaḥ |
viśo yena gacchatho devayantīḥ kutrā cid yāmam aśvinā dadhānā ||

svaśvā yaśasā yātam arvāg dasrā nidhim madhumantam pibāthaḥ |
vi vāṁ ratho vadhvā3 yādamāno 'ntān divo bādhate vartanibhyām ||

yuvoḥ śriyam pari yoṣāvṛṇīta sūro duhitā paritakmyāyām |
yad devayantam avathaḥ śacībhiḥ pari ghraṁsam omanā vāṁ vayo gāt ||

yo ha sya vāṁ rathirā vasta usrā ratho yujānaḥ pariyāti vartiḥ |
tena naḥ śaṁ yor uṣaso vyuṣṭau ny aśvinā vahataṁ yajñe asmin ||

narā gaureva vidyutaṁ tṛṣāṇāsmākam adya savanopa yātam |
purutrā hi vām matibhir havante mā vām anye ni yaman devayantaḥ ||

yuvam bhujyum avaviddhaṁ samudra ud ūhathur arṇaso asridhānaiḥ |
patatribhir aśramair avyathibhir daṁsanābhir aśvinā pārayantā ||

nū me havam ā śṛṇutaṁ yuvānā yāsiṣṭaṁ vartir aśvināv irāvat |
dhattaṁ ratnāni jarataṁ ca sūrīn yūyam pāta svastibhiḥ sadā naḥ ||