Rig Veda · Chapter 5.055

prayajyavo maruto bhrājadṛṣṭayo bṛhad vayo dadhire rukmavakṣasaḥ |
īyante aśvaiḥ suyamebhir āśubhiḥ śubhaṁ yātām anu rathā avṛtsata ||

svayaṁ dadhidhve taviṣīṁ yathā vida bṛhan mahānta urviyā vi rājatha |
utāntarikṣam mamire vy ojasā śubhaṁ yātām anu rathā avṛtsata ||

sākaṁ jātāḥ subhvaḥ sākam ukṣitāḥ śriye cid ā prataraṁ vāvṛdhur naraḥ |
virokiṇaḥ sūryasyeva raśmayaḥ śubhaṁ yātām anu rathā avṛtsata ||

ābhūṣeṇyaṁ vo maruto mahitvanaṁ didṛkṣeṇyaṁ sūryasyeva cakṣaṇam |
uto asmām̐ amṛtatve dadhātana śubhaṁ yātām anu rathā avṛtsata ||

ud īrayathā marutaḥ samudrato yūyaṁ vṛṣṭiṁ varṣayathā purīṣiṇaḥ |
na vo dasrā upa dasyanti dhenavaḥ śubhaṁ yātām anu rathā avṛtsata ||

yad aśvān dhūrṣu pṛṣatīr ayugdhvaṁ hiraṇyayān praty atkām̐ amugdhvam |
viśvā it spṛdho maruto vy asyatha śubhaṁ yātām anu rathā avṛtsata ||

na parvatā na nadyo varanta vo yatrācidhvam maruto gacchathed u tat |
uta dyāvāpṛthivī yāthanā pari śubhaṁ yātām anu rathā avṛtsata ||

yat pūrvyam maruto yac ca nūtanaṁ yad udyate vasavo yac ca śasyate |
viśvasya tasya bhavathā navedasaḥ śubhaṁ yātām anu rathā avṛtsata ||

mṛḻata no maruto mā vadhiṣṭanāsmabhyaṁ śarma bahulaṁ vi yantana |
adhi stotrasya sakhyasya gātana śubhaṁ yātām anu rathā avṛtsata ||

yūyam asmān nayata vasyo acchā nir aṁhatibhyo maruto gṛṇānāḥ |
juṣadhvaṁ no havyadātiṁ yajatrā vayaṁ syāma patayo rayīṇām ||