Rig Veda · Chapter 5.054

pra śardhāya mārutāya svabhānava imāṁ vācam anajā parvatacyute |
gharmastubhe diva ā pṛṣṭhayajvane dyumnaśravase mahi nṛmṇam arcata ||

pra vo marutas taviṣā udanyavo vayovṛdho aśvayujaḥ parijrayaḥ |
saṁ vidyutā dadhati vāśati tritaḥ svaranty āpo 'vanā parijrayaḥ ||

vidyunmahaso naro aśmadidyavo vātatviṣo marutaḥ parvatacyutaḥ |
abdayā cin muhur ā hrādunīvṛtaḥ stanayadamā rabhasā udojasaḥ ||

vy a1ktūn rudrā vy ahāni śikvaso vy a1ntarikṣaṁ vi rajāṁsi dhūtayaḥ |
vi yad ajrām̐ ajatha nāva īṁ yathā vi durgāṇi maruto nāha riṣyatha ||

tad vīryaṁ vo maruto mahitvanaṁ dīrghaṁ tatāna sūryo na yojanam |
etā na yāme agṛbhītaśociṣo 'naśvadāṁ yan ny ayātanā girim ||

abhrāji śardho maruto yad arṇasam moṣathā vṛkṣaṁ kapaneva vedhasaḥ |
adha smā no aramatiṁ sajoṣasaś cakṣur iva yantam anu neṣathā sugam ||

na sa jīyate maruto na hanyate na sredhati na vyathate na riṣyati |
nāsya rāya upa dasyanti notaya ṛṣiṁ vā yaṁ rājānaṁ vā suṣūdatha ||

niyutvanto grāmajito yathā naro 'ryamaṇo na marutaḥ kabandhinaḥ |
pinvanty utsaṁ yad ināso asvaran vy undanti pṛthivīm madhvo andhasā ||

pravatvatīyam pṛthivī marudbhyaḥ pravatvatī dyaur bhavati prayadbhyaḥ |
pravatvatīḥ pathyā antarikṣyāḥ pravatvantaḥ parvatā jīradānavaḥ ||

yan marutaḥ sabharasaḥ svarṇaraḥ sūrya udite madathā divo naraḥ |
na vo 'śvāḥ śrathayantāha sisrataḥ sadyo asyādhvanaḥ pāram aśnutha ||

aṁseṣu va ṛṣṭayaḥ patsu khādayo vakṣaḥsu rukmā maruto rathe śubhaḥ |
agnibhrājaso vidyuto gabhastyoḥ śiprāḥ śīrṣasu vitatā hiraṇyayīḥ ||

taṁ nākam aryo agṛbhītaśociṣaṁ ruśat pippalam maruto vi dhūnutha |
sam acyanta vṛjanātitviṣanta yat svaranti ghoṣaṁ vitatam ṛtāyavaḥ ||

yuṣmādattasya maruto vicetaso rāyaḥ syāma rathyo3 vayasvataḥ |
na yo yucchati tiṣyo3 yathā divo3 'sme rāranta marutaḥ sahasriṇam ||

yūyaṁ rayim marutaḥ spārhavīraṁ yūyam ṛṣim avatha sāmavipram |
yūyam arvantam bharatāya vājaṁ yūyaṁ dhattha rājānaṁ śruṣṭimantam ||

tad vo yāmi draviṇaṁ sadyaūtayo yenā sva1r ṇa tatanāma nṝm̐r abhi |
idaṁ su me maruto haryatā vaco yasya tarema tarasā śataṁ himāḥ ||