Rig Veda · Chapter 5.056

agne śardhantam ā gaṇam piṣṭaṁ rukmebhir añjibhiḥ |
viśo adya marutām ava hvaye divaś cid rocanād adhi ||

yathā cin manyase hṛdā tad in me jagmur āśasaḥ |
ye te nediṣṭhaṁ havanāny āgaman tān vardha bhīmasaṁdṛśaḥ ||

mīḻhuṣmatīva pṛthivī parāhatā madanty ety asmad ā |
ṛkṣo na vo marutaḥ śimīvām̐ amo dudhro gaur iva bhīmayuḥ ||

ni ye riṇanty ojasā vṛthā gāvo na durdhuraḥ |
aśmānaṁ cit svarya1m parvataṁ girim pra cyāvayanti yāmabhiḥ ||

ut tiṣṭha nūnam eṣāṁ stomaiḥ samukṣitānām |
marutām purutamam apūrvyaṁ gavāṁ sargam iva hvaye ||

yuṅgdhvaṁ hy aruṣī rathe yuṅgdhvaṁ ratheṣu rohitaḥ |
yuṅgdhvaṁ harī ajirā dhuri voḻhave vahiṣṭhā dhuri voḻhave ||

uta sya vājy aruṣas tuviṣvaṇir iha sma dhāyi darśataḥ |
mā vo yāmeṣu marutaś ciraṁ karat pra taṁ ratheṣu codata ||

rathaṁ nu mārutaṁ vayaṁ śravasyum ā huvāmahe |
ā yasmin tasthau suraṇāni bibhratī sacā marutsu rodasī ||

taṁ vaḥ śardhaṁ ratheśubhaṁ tveṣam panasyum ā huve |
yasmin sujātā subhagā mahīyate sacā marutsu mīḻhuṣī ||