Rig Veda · Chapter 10.162

brahmaṇāgniḥ saṁvidāno rakṣohā bādhatām itaḥ |
amīvā yas te garbhaṁ durṇāmā yonim āśaye ||

yas te garbham amīvā durṇāmā yonim āśaye |
agniṣ ṭam brahmaṇā saha niṣ kravyādam anīnaśat ||

yas te hanti patayantaṁ niṣatsnuṁ yaḥ sarīsṛpam |
jātaṁ yas te jighāṁsati tam ito nāśayāmasi ||

yas ta ūrū viharaty antarā dampatī śaye |
yoniṁ yo antar āreḻhi tam ito nāśayāmasi ||

yas tvā bhrātā patir bhūtvā jāro bhūtvā nipadyate |
prajāṁ yas te jighāṁsati tam ito nāśayāmasi ||

yas tvā svapnena tamasā mohayitvā nipadyate |
prajāṁ yas te jighāṁsati tam ito nāśayāmasi ||