Rig Veda · Chapter 10.163
akṣībhyāṁ te nāsikābhyāṁ karṇābhyāṁ chubukād adhi |
yakṣmaṁ śīrṣaṇyam mastiṣkāj jihvāyā vi vṛhāmi te ||
grīvābhyas ta uṣṇihābhyaḥ kīkasābhyo anūkyāt |
yakṣmaṁ doṣaṇya1m aṁsābhyām bāhubhyāṁ vi vṛhāmi te ||
āntrebhyas te gudābhyo vaniṣṭhor hṛdayād adhi |
yakṣmam matasnābhyāṁ yaknaḥ plāśibhyo vi vṛhāmi te ||
ūrubhyāṁ te aṣṭhīvadbhyām pārṣṇibhyām prapadābhyām |
yakṣmaṁ śroṇibhyām bhāsadād bhaṁsaso vi vṛhāmi te ||
mehanād vanaṁkaraṇāl lomabhyas te nakhebhyaḥ |
yakṣmaṁ sarvasmād ātmanas tam idaṁ vi vṛhāmi te ||
aṅgād-aṅgāl lomno-lomno jātam parvaṇi-parvaṇi |
yakṣmaṁ sarvasmād ātmanas tam idaṁ vi vṛhāmi te ||
Original text: Ṛgveda-Saṃhitā · Edition: Theodor Aufrecht Die Hymnen des Rigveda. Mandala I-VI Bonn Mareus Theodor Aufrecht Die Hymnen des Rigveda. Mandala VII-X Bonn Mareus · Data entry Barend A. Van Nooten Gary B. Holland · GRETIL (Göttingen) · CC BY-NC-SA 4.0