ઋગ્વેદ · અધ્યાય 10.162

બ્રહ્મણાગ્નિઃ સંવિદાનો રક્ષોહા બાધતામ્ ઇતઃ ।
અમીવા યસ્ તે ગર્ભં દુર્ણામા યોનિમ્ આશયે ॥

યસ્ તે ગર્ભમ્ અમીવા દુર્ણામા યોનિમ્ આશયે ।
અગ્નિષ્ ટમ્ બ્રહ્મણા સહ નિષ્ ક્રવ્યાદમ્ અનીનશત્ ॥

યસ્ તે હન્તિ પતયન્તં નિષત્સ્નું યઃ સરીસૃપમ્ ।
જાતં યસ્ તે જિઘાંસતિ તમ્ ઇતો નાશયામસિ ॥

યસ્ ત ઊરૂ વિહરત્ય્ અન્તરા દમ્પતી શયે ।
યોનિં યો અન્તર્ આરેળ્હિ તમ્ ઇતો નાશયામસિ ॥

યસ્ ત્વા ભ્રાતા પતિર્ ભૂત્વા જારો ભૂત્વા નિપદ્યતે ।
પ્રજાં યસ્ તે જિઘાંસતિ તમ્ ઇતો નાશયામસિ ॥

યસ્ ત્વા સ્વપ્નેન તમસા મોહયિત્વા નિપદ્યતે ।
પ્રજાં યસ્ તે જિઘાંસતિ તમ્ ઇતો નાશયામસિ ॥