Rig Veda · Chapter 10.160

tīvrasyābhivayaso asya pāhi sarvarathā vi harī iha muñca |
indra mā tvā yajamānāso anye ni rīraman tubhyam ime sutāsaḥ ||

tubhyaṁ sutās tubhyam u sotvāsas tvāṁ giraḥ śvātryā ā hvayanti |
indredam adya savanaṁ juṣāṇo viśvasya vidvām̐ iha pāhi somam ||

ya uśatā manasā somam asmai sarvahṛdā devakāmaḥ sunoti |
na gā indras tasya parā dadāti praśastam ic cārum asmai kṛṇoti ||

anuspaṣṭo bhavaty eṣo asya yo asmai revān na sunoti somam |
nir aratnau maghavā taṁ dadhāti brahmadviṣo hanty anānudiṣṭaḥ ||

aśvāyanto gavyanto vājayanto havāmahe tvopagantavā u |
ābhūṣantas te sumatau navāyāṁ vayam indra tvā śunaṁ huvema ||