Rig Veda · Chapter 10.033

pra mā yuyujre prayujo janānāṁ vahāmi sma pūṣaṇam antareṇa |
viśve devāso adha mām arakṣan duḥśāsur āgād iti ghoṣa āsīt ||

sam mā tapanty abhitaḥ sapatnīr iva parśavaḥ |
ni bādhate amatir nagnatā jasur ver na vevīyate matiḥ ||

mūṣo na śiśnā vy adanti mādhyaḥ stotāraṁ te śatakrato |
sakṛt su no maghavann indra mṛḻayādhā piteva no bhava ||

kuruśravaṇam āvṛṇi rājānaṁ trāsadasyavam |
maṁhiṣṭhaṁ vāghatām ṛṣiḥ ||

yasya mā harito rathe tisro vahanti sādhuyā |
stavai sahasradakṣiṇe ||

yasya prasvādaso gira upamaśravasaḥ pituḥ |
kṣetraṁ na raṇvam ūcuṣe ||

adhi putropamaśravo napān mitrātither ihi |
pituṣ ṭe asmi vanditā ||

yad īśīyāmṛtānām uta vā martyānām |
jīved in maghavā mama ||

na devānām ati vrataṁ śatātmā cana jīvati |
tathā yujā vi vāvṛte ||