Rig Veda · Chapter 10.032

pra su gmantā dhiyasānasya sakṣaṇi varebhir varām̐ abhi ṣu prasīdataḥ |
asmākam indra ubhayaṁ jujoṣati yat somyasyāndhaso bubodhati ||

vīndra yāsi divyāni rocanā vi pārthivāni rajasā puruṣṭuta |
ye tvā vahanti muhur adhvarām̐ upa te su vanvantu vagvanām̐ arādhasaḥ ||

tad in me chantsad vapuṣo vapuṣṭaram putro yaj jānam pitror adhīyati |
jāyā patiṁ vahati vagnunā sumat puṁsa id bhadro vahatuḥ pariṣkṛtaḥ ||

tad it sadhastham abhi cāru dīdhaya gāvo yac chāsan vahatuṁ na dhenavaḥ |
mātā yan mantur yūthasya pūrvyābhi vāṇasya saptadhātur ij janaḥ ||

pra vo 'cchā ririce devayuṣ padam eko rudrebhir yāti turvaṇiḥ |
jarā vā yeṣv amṛteṣu dāvane pari va ūmebhyaḥ siñcatā madhu ||

nidhīyamānam apagūḻham apsu pra me devānāṁ vratapā uvāca |
indro vidvām̐ anu hi tvā cacakṣa tenāham agne anuśiṣṭa āgām ||

akṣetravit kṣetravidaṁ hy aprāṭ sa praiti kṣetravidānuśiṣṭaḥ |
etad vai bhadram anuśāsanasyota srutiṁ vindaty añjasīnām ||

adyed u prāṇīd amamann imāhāpīvṛto adhayan mātur ūdhaḥ |
em enam āpa jarimā yuvānam aheḻan vasuḥ sumanā babhūva ||

etāni bhadrā kalaśa kriyāma kuruśravaṇa dadato maghāni |
dāna id vo maghavānaḥ so astv ayaṁ ca somo hṛdi yam bibharmi ||