Rig Veda · Chapter 10.034

prāvepā mā bṛhato mādayanti pravātejā iriṇe varvṛtānāḥ |
somasyeva maujavatasya bhakṣo vibhīdako jāgṛvir mahyam acchān ||

na mā mimetha na jihīḻa eṣā śivā sakhibhya uta mahyam āsīt |
akṣasyāham ekaparasya hetor anuvratām apa jāyām arodham ||

dveṣṭi śvaśrūr apa jāyā ruṇaddhi na nāthito vindate marḍitāram |
aśvasyeva jarato vasnyasya nāhaṁ vindāmi kitavasya bhogam ||

anye jāyām pari mṛśanty asya yasyāgṛdhad vedane vājy a1kṣaḥ |
pitā mātā bhrātara enam āhur na jānīmo nayatā baddham etam ||

yad ādīdhye na daviṣāṇy ebhiḥ parāyadbhyo 'va hīye sakhibhyaḥ |
nyuptāś ca babhravo vācam akratam̐ emīd eṣāṁ niṣkṛtaṁ jāriṇīva ||

sabhām eti kitavaḥ pṛcchamāno jeṣyāmīti tanvā3 śūśujānaḥ |
akṣāso asya vi tiranti kāmam pratidīvne dadhata ā kṛtāni ||

akṣāsa id aṅkuśino nitodino nikṛtvānas tapanās tāpayiṣṇavaḥ |
kumāradeṣṇā jayataḥ punarhaṇo madhvā sampṛktāḥ kitavasya barhaṇā ||

tripañcāśaḥ krīḻati vrāta eṣāṁ deva iva savitā satyadharmā |
ugrasya cin manyave nā namante rājā cid ebhyo nama it kṛṇoti ||

nīcā vartanta upari sphuranty ahastāso hastavantaṁ sahante |
divyā aṅgārā iriṇe nyuptāḥ śītāḥ santo hṛdayaṁ nir dahanti ||

jāyā tapyate kitavasya hīnā mātā putrasya carataḥ kva svit |
ṛṇāvā bibhyad dhanam icchamāno 'nyeṣām astam upa naktam eti ||

striyaṁ dṛṣṭvāya kitavaṁ tatāpānyeṣāṁ jāyāṁ sukṛtaṁ ca yonim |
pūrvāhṇe aśvān yuyuje hi babhrūn so agner ante vṛṣalaḥ papāda ||

yo vaḥ senānīr mahato gaṇasya rājā vrātasya prathamo babhūva |
tasmai kṛṇomi na dhanā ruṇadhmi daśāham prācīs tad ṛtaṁ vadāmi ||

akṣair mā dīvyaḥ kṛṣim it kṛṣasva vitte ramasva bahu manyamānaḥ |
tatra gāvaḥ kitava tatra jāyā tan me vi caṣṭe savitāyam aryaḥ ||

mitraṁ kṛṇudhvaṁ khalu mṛḻatā no mā no ghoreṇa caratābhi dhṛṣṇu |
ni vo nu manyur viśatām arātir anyo babhrūṇām prasitau nv astu ||