Rig Veda · Chapter 1.190

anarvāṇaṁ vṛṣabham mandrajihvam bṛhaspatiṁ vardhayā navyam arkaiḥ |
gāthānyaḥ suruco yasya devā āśṛṇvanti navamānasya martāḥ ||

tam ṛtviyā upa vācaḥ sacante sargo na yo devayatām asarji |
bṛhaspatiḥ sa hy añjo varāṁsi vibhvābhavat sam ṛte mātariśvā ||

upastutiṁ namasa udyatiṁ ca ślokaṁ yaṁsat saviteva pra bāhū |
asya kratvāhanyo3 yo asti mṛgo na bhīmo arakṣasas tuviṣmān ||

asya śloko divīyate pṛthivyām atyo na yaṁsad yakṣabhṛd vicetāḥ |
mṛgāṇāṁ na hetayo yanti cemā bṛhaspater ahimāyām̐ abhi dyūn ||

ye tvā devosrikam manyamānāḥ pāpā bhadram upajīvanti pajrāḥ |
na dūḍhye3 anu dadāsi vāmam bṛhaspate cayasa it piyārum ||

supraituḥ sūyavaso na panthā durniyantuḥ pariprīto na mitraḥ |
anarvāṇo abhi ye cakṣate no 'pīvṛtā aporṇuvanto asthuḥ ||

saṁ yaṁ stubho 'vanayo na yanti samudraṁ na sravato rodhacakrāḥ |
sa vidvām̐ ubhayaṁ caṣṭe antar bṛhaspatis tara āpaś ca gṛdhraḥ ||

evā mahas tuvijātas tuviṣmān bṛhaspatir vṛṣabho dhāyi devaḥ |
sa naḥ stuto vīravad dhātu gomad vidyāmeṣaṁ vṛjanaṁ jīradānum ||