Rig Veda · Chapter 1.191

kaṅkato na kaṅkato 'tho satīnakaṅkataḥ |
dvāv iti pluṣī iti ny a1dṛṣṭā alipsata ||

adṛṣṭān hanty āyaty atho hanti parāyatī |
atho avaghnatī hanty atho pinaṣṭi piṁṣatī ||

śarāsaḥ kuśarāso darbhāsaḥ sairyā uta |
mauñjā adṛṣṭā vairiṇāḥ sarve sākaṁ ny alipsata ||

ni gāvo goṣṭhe asadan ni mṛgāso avikṣata |
ni ketavo janānāṁ ny a1dṛṣṭā alipsata ||

eta u tye praty adṛśran pradoṣaṁ taskarā iva |
adṛṣṭā viśvadṛṣṭāḥ pratibuddhā abhūtana ||

dyaur vaḥ pitā pṛthivī mātā somo bhrātāditiḥ svasā |
adṛṣṭā viśvadṛṣṭās tiṣṭhatelayatā su kam ||

ye aṁsyā ye aṅgyāḥ sūcīkā ye prakaṅkatāḥ |
adṛṣṭāḥ kiṁ caneha vaḥ sarve sākaṁ ni jasyata ||

ut purastāt sūrya eti viśvadṛṣṭo adṛṣṭahā |
adṛṣṭān sarvāñ jambhayan sarvāś ca yātudhānyaḥ ||

ud apaptad asau sūryaḥ puru viśvāni jūrvan |
ādityaḥ parvatebhyo viśvadṛṣṭo adṛṣṭahā ||

sūrye viṣam ā sajāmi dṛtiṁ surāvato gṛhe |
so cin nu na marāti no vayam marāmāre asya yojanaṁ hariṣṭhā madhu tvā madhulā cakāra ||

iyattikā śakuntikā sakā jaghāsa te viṣam |
so cin nu na marāti no vayam marāmāre asya yojanaṁ hariṣṭhā madhu tvā madhulā cakāra ||

triḥ sapta viṣpuliṅgakā viṣasya puṣyam akṣan |
tāś cin nu na maranti no vayam marāmāre asya yojanaṁ hariṣṭhā madhu tvā madhulā cakāra ||

navānāṁ navatīnāṁ viṣasya ropuṣīṇām |
sarvāsām agrabhaṁ nāmāre asya yojanaṁ hariṣṭhā madhu tvā madhulā cakāra ||

triḥ sapta mayūryaḥ sapta svasāro agruvaḥ |
tās te viṣaṁ vi jabhrira udakaṁ kumbhinīr iva ||

iyattakaḥ kuṣumbhakas takam bhinadmy aśmanā |
tato viṣam pra vāvṛte parācīr anu saṁvataḥ ||

kuṣumbhakas tad abravīd gireḥ pravartamānakaḥ |
vṛścikasyārasaṁ viṣam arasaṁ vṛścika te viṣam ||