Rig Veda · Chapter 1.189

agne naya supathā rāye asmān viśvāni deva vayunāni vidvān |
yuyodhy a1smaj juhurāṇam eno bhūyiṣṭhāṁ te namaüktiṁ vidhema ||

agne tvam pārayā navyo asmān svastibhir ati durgāṇi viśvā |
pūś ca pṛthvī bahulā na urvī bhavā tokāya tanayāya śaṁ yoḥ ||

agne tvam asmad yuyodhy amīvā anagnitrā abhy amanta kṛṣṭīḥ |
punar asmabhyaṁ suvitāya deva kṣāṁ viśvebhir amṛtebhir yajatra ||

pāhi no agne pāyubhir ajasrair uta priye sadana ā śuśukvān |
mā te bhayaṁ jaritāraṁ yaviṣṭha nūnaṁ vidan māparaṁ sahasvaḥ ||

mā no agne 'va sṛjo aghāyāviṣyave ripave ducchunāyai |
mā datvate daśate mādate no mā rīṣate sahasāvan parā dāḥ ||

vi gha tvāvām̐ ṛtajāta yaṁsad gṛṇāno agne tanve3 varūtham |
viśvād ririkṣor uta vā ninitsor abhihrutām asi hi deva viṣpaṭ ||

tvaṁ tām̐ agna ubhayān vi vidvān veṣi prapitve manuṣo yajatra |
abhipitve manave śāsyo bhūr marmṛjenya uśigbhir nākraḥ ||

avocāma nivacanāny asmin mānasya sūnuḥ sahasāne agnau |
vayaṁ sahasram ṛṣibhiḥ sanema vidyāmeṣaṁ vṛjanaṁ jīradānum ||