Rig Veda · Chapter 1.185

katarā pūrvā katarāparāyoḥ kathā jāte kavayaḥ ko vi veda |
viśvaṁ tmanā bibhṛto yad dha nāma vi vartete ahanī cakriyeva ||

bhūriṁ dve acarantī carantam padvantaṁ garbham apadī dadhāte |
nityaṁ na sūnum pitror upasthe dyāvā rakṣatam pṛthivī no abhvāt ||

aneho dātram aditer anarvaṁ huve svarvad avadhaṁ namasvat |
tad rodasī janayataṁ jaritre dyāvā rakṣatam pṛthivī no abhvāt ||

atapyamāne avasāvantī anu ṣyāma rodasī devaputre |
ubhe devānām ubhayebhir ahnāṁ dyāvā rakṣatam pṛthivī no abhvāt ||

saṁgacchamāne yuvatī samante svasārā jāmī pitror upasthe |
abhijighrantī bhuvanasya nābhiṁ dyāvā rakṣatam pṛthivī no abhvāt ||

urvī sadmanī bṛhatī ṛtena huve devānām avasā janitrī |
dadhāte ye amṛtaṁ supratīke dyāvā rakṣatam pṛthivī no abhvāt ||

urvī pṛthvī bahule dūreante upa bruve namasā yajñe asmin |
dadhāte ye subhage supratūrtī dyāvā rakṣatam pṛthivī no abhvāt ||

devān vā yac cakṛmā kac cid āgaḥ sakhāyaṁ vā sadam ij jāspatiṁ vā |
iyaṁ dhīr bhūyā avayānam eṣāṁ dyāvā rakṣatam pṛthivī no abhvāt ||

ubhā śaṁsā naryā mām aviṣṭām ubhe mām ūtī avasā sacetām |
bhūri cid aryaḥ sudāstarāyeṣā madanta iṣayema devāḥ ||

ṛtaṁ dive tad avocam pṛthivyā abhiśrāvāya prathamaṁ sumedhāḥ |
pātām avadyād duritād abhīke pitā mātā ca rakṣatām avobhiḥ ||

idaṁ dyāvāpṛthivī satyam astu pitar mātar yad ihopabruve vām |
bhūtaṁ devānām avame avobhir vidyāmeṣaṁ vṛjanaṁ jīradānum ||