Rig Veda · Chapter 1.184

tā vām adya tāv aparaṁ huvemocchantyām uṣasi vahnir ukthaiḥ |
nāsatyā kuha cit santāv aryo divo napātā sudāstarāya ||

asme ū ṣu vṛṣaṇā mādayethām ut paṇīm̐r hatam ūrmyā madantā |
śrutam me acchoktibhir matīnām eṣṭā narā nicetārā ca karṇaiḥ ||

śriye pūṣann iṣukṛteva devā nāsatyā vahatuṁ sūryāyāḥ |
vacyante vāṁ kakuhā apsu jātā yugā jūrṇeva varuṇasya bhūreḥ ||

asme sā vām mādhvī rātir astu stomaṁ hinotam mānyasya kāroḥ |
anu yad vāṁ śravasyā sudānū suvīryāya carṣaṇayo madanti ||

eṣa vāṁ stomo aśvināv akāri mānebhir maghavānā suvṛkti |
yātaṁ vartis tanayāya tmane cāgastye nāsatyā madantā ||

atāriṣma tamasas pāram asya prati vāṁ stomo aśvināv adhāyi |
eha yātam pathibhir devayānair vidyāmeṣaṁ vṛjanaṁ jīradānum ||