Rig Veda · Chapter 1.186

ā na iḻābhir vidathe suśasti viśvānaraḥ savitā deva etu |
api yathā yuvāno matsathā no viśvaṁ jagad abhipitve manīṣā ||

ā no viśva āskrā gamantu devā mitro aryamā varuṇaḥ sajoṣāḥ |
bhuvan yathā no viśve vṛdhāsaḥ karan suṣāhā vithuraṁ na śavaḥ ||

preṣṭhaṁ vo atithiṁ gṛṇīṣe 'gniṁ śastibhis turvaṇiḥ sajoṣāḥ |
asad yathā no varuṇaḥ sukīrtir iṣaś ca parṣad arigūrtaḥ sūriḥ ||

upa va eṣe namasā jigīṣoṣāsānaktā sudugheva dhenuḥ |
samāne ahan vimimāno arkaṁ viṣurūpe payasi sasminn ūdhan ||

uta no 'hir budhnyo3 mayas kaḥ śiśuṁ na pipyuṣīva veti sindhuḥ |
yena napātam apāṁ junāma manojuvo vṛṣaṇo yaṁ vahanti ||

uta na īṁ tvaṣṭā gantv acchā smat sūribhir abhipitve sajoṣāḥ |
ā vṛtrahendraś carṣaṇiprās tuviṣṭamo narāṁ na iha gamyāḥ ||

uta na īm matayo 'śvayogāḥ śiśuṁ na gāvas taruṇaṁ rihanti |
tam īṁ giro janayo na patnīḥ surabhiṣṭamaṁ narāṁ nasanta ||

uta na īm maruto vṛddhasenāḥ smad rodasī samanasaḥ sadantu |
pṛṣadaśvāso 'vanayo na rathā riśādaso mitrayujo na devāḥ ||

pra nu yad eṣām mahinā cikitre pra yuñjate prayujas te suvṛkti |
adha yad eṣāṁ sudine na śarur viśvam eriṇam pruṣāyanta senāḥ ||

pro aśvināv avase kṛṇudhvam pra pūṣaṇaṁ svatavaso hi santi |
adveṣo viṣṇur vāta ṛbhukṣā acchā sumnāya vavṛtīya devān ||

iyaṁ sā vo asme dīdhitir yajatrā apiprāṇī ca sadanī ca bhūyāḥ |
ni yā deveṣu yatate vasūyur vidyāmeṣaṁ vṛjanaṁ jīradānum ||