Rig Veda · Chapter 1.183

taṁ yuñjāthām manaso yo javīyān trivandhuro vṛṣaṇā yas tricakraḥ |
yenopayāthaḥ sukṛto duroṇaṁ tridhātunā patatho vir na parṇaiḥ ||

suvṛd ratho vartate yann abhi kṣāṁ yat tiṣṭhathaḥ kratumantānu pṛkṣe |
vapur vapuṣyā sacatām iyaṁ gīr divo duhitroṣasā sacethe ||

ā tiṣṭhataṁ suvṛtaṁ yo ratho vām anu vratāni vartate haviṣmān |
yena narā nāsatyeṣayadhyai vartir yāthas tanayāya tmane ca ||

mā vāṁ vṛko mā vṛkīr ā dadharṣīn mā pari varktam uta māti dhaktam |
ayaṁ vām bhāgo nihita iyaṁ gīr dasrāv ime vāṁ nidhayo madhūnām ||

yuvāṁ gotamaḥ purumīḻho atrir dasrā havate 'vase haviṣmān |
diśaṁ na diṣṭām ṛjūyeva yantā me havaṁ nāsatyopa yātam ||

atāriṣma tamasas pāram asya prati vāṁ stomo aśvināv adhāyi |
eha yātam pathibhir devayānair vidyāmeṣaṁ vṛjanaṁ jīradānum ||