Rig Veda · Chapter 1.182

abhūd idaṁ vayunam o ṣu bhūṣatā ratho vṛṣaṇvān madatā manīṣiṇaḥ |
dhiyaṁjinvā dhiṣṇyā viśpalāvasū divo napātā sukṛte śucivratā ||

indratamā hi dhiṣṇyā maruttamā dasrā daṁsiṣṭhā rathyā rathītamā |
pūrṇaṁ rathaṁ vahethe madhva ācitaṁ tena dāśvāṁsam upa yātho aśvinā ||

kim atra dasrā kṛṇuthaḥ kim āsāthe jano yaḥ kaś cid ahavir mahīyate |
ati kramiṣṭaṁ juratam paṇer asuṁ jyotir viprāya kṛṇutaṁ vacasyave ||

jambhayatam abhito rāyataḥ śuno hatam mṛdho vidathus tāny aśvinā |
vācaṁ-vācaṁ jaritū ratninīṁ kṛtam ubhā śaṁsaṁ nāsatyāvatam mama ||

yuvam etaṁ cakrathuḥ sindhuṣu plavam ātmanvantam pakṣiṇaṁ taugryāya kam |
yena devatrā manasā nirūhathuḥ supaptanī petathuḥ kṣodaso mahaḥ ||

avaviddhaṁ taugryam apsv a1ntar anārambhaṇe tamasi praviddham |
catasro nāvo jaṭhalasya juṣṭā ud aśvibhyām iṣitāḥ pārayanti ||

kaḥ svid vṛkṣo niṣṭhito madhye arṇaso yaṁ taugryo nādhitaḥ paryaṣasvajat |
parṇā mṛgasya pataror ivārabha ud aśvinā ūhathuḥ śromatāya kam ||

tad vāṁ narā nāsatyāv anu ṣyād yad vām mānāsa ucatham avocan |
asmād adya sadasaḥ somyād ā vidyāmeṣaṁ vṛjanaṁ jīradānum ||