Rig Veda · Chapter 1.096

sa pratnathā sahasā jāyamānaḥ sadyaḥ kāvyāni baḻ adhatta viśvā |
āpaś ca mitraṁ dhiṣaṇā ca sādhan devā agniṁ dhārayan draviṇodām ||

sa pūrvayā nividā kavyatāyor imāḥ prajā ajanayan manūnām |
vivasvatā cakṣasā dyām apaś ca devā agniṁ dhārayan draviṇodām ||

tam īḻata prathamaṁ yajñasādhaṁ viśa ārīr āhutam ṛñjasānam |
ūrjaḥ putram bharataṁ sṛpradānuṁ devā agniṁ dhārayan draviṇodām ||

sa mātariśvā puruvārapuṣṭir vidad gātuṁ tanayāya svarvit |
viśāṁ gopā janitā rodasyor devā agniṁ dhārayan draviṇodām ||

naktoṣāsā varṇam āmemyāne dhāpayete śiśum ekaṁ samīcī |
dyāvākṣāmā rukmo antar vi bhāti devā agniṁ dhārayan draviṇodām ||

rāyo budhnaḥ saṁgamano vasūnāṁ yajñasya ketur manmasādhano veḥ |
amṛtatvaṁ rakṣamāṇāsa enaṁ devā agniṁ dhārayan draviṇodām ||

nū ca purā ca sadanaṁ rayīṇāṁ jātasya ca jāyamānasya ca kṣām |
sataś ca gopām bhavataś ca bhūrer devā agniṁ dhārayan draviṇodām ||

draviṇodā draviṇasas turasya draviṇodāḥ sanarasya pra yaṁsat |
draviṇodā vīravatīm iṣaṁ no draviṇodā rāsate dīrgham āyuḥ ||

evā no agne samidhā vṛdhāno revat pāvaka śravase vi bhāhi |
tan no mitro varuṇo māmahantām aditiḥ sindhuḥ pṛthivī uta dyauḥ ||