Rig Veda · Chapter 1.095

dve virūpe carataḥ svarthe anyānyā vatsam upa dhāpayete |
harir anyasyām bhavati svadhāvāñ chukro anyasyāṁ dadṛśe suvarcāḥ ||

daśemaṁ tvaṣṭur janayanta garbham atandrāso yuvatayo vibhṛtram |
tigmānīkaṁ svayaśasaṁ janeṣu virocamānam pari ṣīṁ nayanti ||

trīṇi jānā pari bhūṣanty asya samudra ekaṁ divy ekam apsu |
pūrvām anu pra diśam pārthivānām ṛtūn praśāsad vi dadhāv anuṣṭhu ||

ka imaṁ vo niṇyam ā ciketa vatso mātṝr janayata svadhābhiḥ |
bahvīnāṁ garbho apasām upasthān mahān kavir niś carati svadhāvān ||

āviṣṭyo vardhate cārur āsu jihmānām ūrdhvaḥ svayaśā upasthe |
ubhe tvaṣṭur bibhyatur jāyamānāt pratīcī siṁham prati joṣayete ||

ubhe bhadre joṣayete na mene gāvo na vāśrā upa tasthur evaiḥ |
sa dakṣāṇāṁ dakṣapatir babhūvāñjanti yaṁ dakṣiṇato havirbhiḥ ||

ud yaṁyamīti saviteva bāhū ubhe sicau yatate bhīma ṛñjan |
uc chukram atkam ajate simasmān navā mātṛbhyo vasanā jahāti ||

tveṣaṁ rūpaṁ kṛṇuta uttaraṁ yat sampṛñcānaḥ sadane gobhir adbhiḥ |
kavir budhnam pari marmṛjyate dhīḥ sā devatātā samitir babhūva ||

uru te jrayaḥ pary eti budhnaṁ virocamānam mahiṣasya dhāma |
viśvebhir agne svayaśobhir iddho 'dabdhebhiḥ pāyubhiḥ pāhy asmān ||

dhanvan srotaḥ kṛṇute gātum ūrmiṁ śukrair ūrmibhir abhi nakṣati kṣām |
viśvā sanāni jaṭhareṣu dhatte 'ntar navāsu carati prasūṣu ||

evā no agne samidhā vṛdhāno revat pāvaka śravase vi bhāhi |
tan no mitro varuṇo māmahantām aditiḥ sindhuḥ pṛthivī uta dyauḥ ||