Rig Veda · Chapter 1.041

yaṁ rakṣanti pracetaso varuṇo mitro aryamā |
nū cit sa dabhyate janaḥ ||

yam bāhuteva piprati pānti martyaṁ riṣaḥ |
ariṣṭaḥ sarva edhate ||

vi durgā vi dviṣaḥ puro ghnanti rājāna eṣām |
nayanti duritā tiraḥ ||

sugaḥ panthā anṛkṣara ādityāsa ṛtaṁ yate |
nātrāvakhādo asti vaḥ ||

yaṁ yajñaṁ nayathā nara ādityā ṛjunā pathā |
pra vaḥ sa dhītaye naśat ||

sa ratnam martyo vasu viśvaṁ tokam uta tmanā |
acchā gacchaty astṛtaḥ ||

kathā rādhāma sakhāyaḥ stomam mitrasyāryamṇaḥ |
mahi psaro varuṇasya ||

mā vo ghnantam mā śapantam prati voce devayantam |
sumnair id va ā vivāse ||

caturaś cid dadamānād bibhīyād ā nidhātoḥ |
na duruktāya spṛhayet ||