Rig Veda · Chapter 1.042

sam pūṣann adhvanas tira vy aṁho vimuco napāt |
sakṣvā deva pra ṇas puraḥ ||

yo naḥ pūṣann agho vṛko duḥśeva ādideśati |
apa sma tam patho jahi ||

apa tyam paripanthinam muṣīvāṇaṁ huraścitam |
dūram adhi sruter aja ||

tvaṁ tasya dvayāvino 'ghaśaṁsasya kasya cit |
padābhi tiṣṭha tapuṣim ||

ā tat te dasra mantumaḥ pūṣann avo vṛṇīmahe |
yena pitṝn acodayaḥ ||

adhā no viśvasaubhaga hiraṇyavāśīmattama |
dhanāni suṣaṇā kṛdhi ||

ati naḥ saścato naya sugā naḥ supathā kṛṇu |
pūṣann iha kratuṁ vidaḥ ||

abhi sūyavasaṁ naya na navajvāro adhvane |
pūṣann iha kratuṁ vidaḥ ||

śagdhi pūrdhi pra yaṁsi ca śiśīhi prāsy udaram |
pūṣann iha kratuṁ vidaḥ ||

na pūṣaṇam methāmasi sūktair abhi gṛṇīmasi |
vasūni dasmam īmahe ||