Rig Veda · Chapter 1.040

ut tiṣṭha brahmaṇas pate devayantas tvemahe |
upa pra yantu marutaḥ sudānava indra prāśūr bhavā sacā ||

tvām id dhi sahasas putra martya upabrūte dhane hite |
suvīryam maruta ā svaśvyaṁ dadhīta yo va ācake ||

praitu brahmaṇas patiḥ pra devy etu sūnṛtā |
acchā vīraṁ naryam paṅktirādhasaṁ devā yajñaṁ nayantu naḥ ||

yo vāghate dadāti sūnaraṁ vasu sa dhatte akṣiti śravaḥ |
tasmā iḻāṁ suvīrām ā yajāmahe supratūrtim anehasam ||

pra nūnam brahmaṇas patir mantraṁ vadaty ukthyam |
yasminn indro varuṇo mitro aryamā devā okāṁsi cakrire ||

tam id vocemā vidatheṣu śambhuvam mantraṁ devā anehasam |
imāṁ ca vācam pratiharyathā naro viśved vāmā vo aśnavat ||

ko devayantam aśnavaj janaṁ ko vṛktabarhiṣam |
pra-pra dāśvān pastyābhir asthitāntarvāvat kṣayaṁ dadhe ||

upa kṣatram pṛñcīta hanti rājabhir bhaye cit sukṣitiṁ dadhe |
nāsya vartā na tarutā mahādhane nārbhe asti vajriṇaḥ ||