Rig Veda · Chapter 1.018

somānaṁ svaraṇaṁ kṛṇuhi brahmaṇas pate |
kakṣīvantaṁ ya auśijaḥ ||

yo revān yo amīvahā vasuvit puṣṭivardhanaḥ |
sa naḥ siṣaktu yas turaḥ ||

mā naḥ śaṁso araruṣo dhūrtiḥ praṇaṅ martyasya |
rakṣā ṇo brahmaṇas pate ||

sa ghā vīro na riṣyati yam indro brahmaṇas patiḥ |
somo hinoti martyam ||

tvaṁ tam brahmaṇas pate soma indraś ca martyam |
dakṣiṇā pātv aṁhasaḥ ||

sadasas patim adbhutam priyam indrasya kāmyam |
sanim medhām ayāsiṣam ||

yasmād ṛte na sidhyati yajño vipaścitaś cana |
sa dhīnāṁ yogam invati ||

ād ṛdhnoti haviṣkṛtim prāñcaṁ kṛṇoty adhvaram |
hotrā deveṣu gacchati ||

narāśaṁsaṁ sudhṛṣṭamam apaśyaṁ saprathastamam |
divo na sadmamakhasam ||