ऋग्वेद · अध्याय 1.018

सोमानं स्वरणं कृणुहि ब्रह्मणस् पते ।
कक्षीवन्तं य औशिजः ॥

यो रेवान् यो अमीवहा वसुवित् पुष्टिवर्धनः ।
स नः सिषक्तु यस् तुरः ॥

मा नः शंसो अररुषो धूर्तिः प्रणङ् मर्त्यस्य ।
रक्षा णो ब्रह्मणस् पते ॥

स घा वीरो न रिष्यति यम् इन्द्रो ब्रह्मणस् पतिः ।
सोमो हिनोति मर्त्यम् ॥

त्वं तम् ब्रह्मणस् पते सोम इन्द्रश् च मर्त्यम् ।
दक्षिणा पात्व् अंहसः ॥

सदसस् पतिम् अद्भुतम् प्रियम् इन्द्रस्य काम्यम् ।
सनिम् मेधाम् अयासिषम् ॥

यस्माद् ऋते न सिध्यति यज्ञो विपश्चितश् चन ।
स धीनां योगम् इन्वति ॥

आद् ऋध्नोति हविष्कृतिम् प्राञ्चं कृणोत्य् अध्वरम् ।
होत्रा देवेषु गच्छति ॥

नराशंसं सुधृष्टमम् अपश्यं सप्रथस्तमम् ।
दिवो न सद्ममखसम् ॥