Rig Veda · Chapter 1.017

indrāvaruṇayor ahaṁ samrājor ava ā vṛṇe |
tā no mṛḻāta īdṛśe ||

gantārā hi stho 'vase havaṁ viprasya māvataḥ |
dhartārā carṣaṇīnām ||

anukāmaṁ tarpayethām indrāvaruṇa rāya ā |
tā vāṁ nediṣṭham īmahe ||

yuvāku hi śacīnāṁ yuvāku sumatīnām |
bhūyāma vājadāvnām ||

indraḥ sahasradāvnāṁ varuṇaḥ śaṁsyānām |
kratur bhavaty ukthyaḥ ||

tayor id avasā vayaṁ sanema ni ca dhīmahi |
syād uta prarecanam ||

indrāvaruṇa vām ahaṁ huve citrāya rādhase |
asmān su jigyuṣas kṛtam ||

indrāvaruṇa nū nu vāṁ siṣāsantīṣu dhīṣv ā |
asmabhyaṁ śarma yacchatam ||

pra vām aśnotu suṣṭutir indrāvaruṇa yāṁ huve |
yām ṛdhāthe sadhastutim ||